Sambizgani Ŵanthu Mwaluso na Ivyo Vili mu Buku la Baibolo Likusambizgaci

Awo tikusambira nawo ŵangakura mwauzimu na kupambika vipambi para ŵakulondezga ivyo ŵakusambira mu Baibolo. (Sal. 1:1-3) Para munthu tikumulongosolera makora ivyo vili mu buku la Baibolo Likusambizgaci vingamovwira kuti wakure mwauzimu.

Mafumbo Agho Ghakuŵa Pakwamba pa Chipaturo: Chipaturo chilichose chikuŵa na mafumbo pakwambilira, ndipo mazgoro ghakusangika mukati mwa chipaturo chenechicho. Tikwenera kufumba mafumbo agha kuti uyo tikudumbiskana nayo waŵe na khumbo lakuti wamanye vinandi. Panji mungamupempha kuti wazgore mwakudumura mafumbo agha. Kumususka yayi para wazgora vyautesi. Ivyo wazgorenge vingatovwira kuwona apo tikwenera kudidimizgapo chomene para tikumusambizga.—Zinth. 16:23; 18:13.

Vyakusazgirapo: Para uyo tikusambira nayo wapulikiska ndipo wakukolerana navyo ivyo tasambira, tingamuchiska kuti wakaŵazge vyakusazgirapo vyakukhwaskana na nkhani iyo tadumbiskana payekha. Pa sambiro lakulondezgapo, tingaweleramo ivyo tikasambira kwa maminiti ghachoko waka kuti tiwone usange wakupulikiska nadi. Kweni nyengo zinyake chingaŵa chiwemi kuti panyengo iyo tikusambira tidumbiskanengepo vyakusazgirapo. Panji tingaŵazga ndime na kufumbapo mafumbo agho tangunozgekerathu.

Bokosi Lakuweleramo: Bokosi ilo lili kuumaliro wa chipaturo chilichose kanandi likuŵa na mazgoro gha mafumbo agho ghakuŵa pakwambilira pa chipaturo. Mungafumba mafumbo agha kuti muwone usange uyo mukusambira nayo wapulikiska nadi, kweniso usange wangalongosora fundo zikuru. Ŵazgani na msambiri winu fundo yiliyose na malemba agho ghakuŵa kunthazi kwake. Paumaliro, mupemphani kuti walongosore chifukwa icho wakugomezgera kuti fundo iyi njaunenesko kuyana na lemba ilo mwaŵazga.—Mil. 17:2, 3.