Wovwirani Ŵanji Kupulikira Ivyo Baibolo Likusambizga

“Kweni ya pa nyata yiwemi, mbeneawo na mtima wakuneneska na uwemi, ŵati ŵapulika mazgu, ŵakughakoreska, ndipo ŵakupambika vipambi na cizizipizgo.”—LUKA 8:15.

1, 2. (a) Buku la Kasi Baibolo Likusambizgaci Comenecomene? liri kulembeka na cakulata wuli? (b) Mu vilimika viŵiri ivyo vyajumpha, kasi Yehova watumbika wuli phamphu la ŵanthu ŵake la kusambizga ŵanthu kuŵa ŵasambiri?

“NI buku liwemi comene. Ŵasambiri ŵane ŵakulitemwa. Nane nkhulitemwa. Buku ili likovwira kwambiska masambiro gha Baibolo pa ulendo wakwamba.” Ndimo wakayowoyera mupayiniya munyake wa nyengo zose kukhwaskana na buku la Kasi Baibolo Likusambizgaci Comenecomene?a Mucekuru munyake uyo wapharazga makani ghawemi gha Ufumu kwa nyengo yitali, nayo wakati: “Pa vilimika 50 ivyo nateŵetera mwamwamphu, nawovwira ŵanthu ŵanandi kuti ŵamanye Yehova. Kweni nkhwenera kuyowoya kuti buku ili ndakovwira comene. Liri na mazgu ghakucontha agho ghakulongosora vithuzi na viyelezgero vyakukondweska.” Kasi ndimo namwe mukuliwonera nthena buku la Baibolo Likusambizgaci? Buku ili liri kulembeka kuti limovwirani kufiska dango la Yesu lakuti: “Ntheura lutaninge mukasambizge mitundu yose, . . . muŵasambizge kukoreska vyose ivyo ndamulangulirani.”—Mateyu 28:19, 20.

² Mwambura kukayika, Yehova wakukondwa kuwona Ŵakaboni pafupifupi 6.6 miliyoni ŵakunweka kupulikira ulongozgi wa Yesu wakusambizga ŵanthu kuŵa ŵasambiri. (Zintharika 27:11) Nchakuwonekerathu kuti Yehova wakutumbika phamphu lawo. Mwaciyelezgero, mu 2005 makani ghawemi ghakapharazgika mu vyaru 235, ndipo avireji ya masambiro gha Baibolo ghakujumpha 6,061,500 ghakacitika. Ndipo ici cikacitiska kuti ŵanthu ŵanandi ŵapulike na ‘kupokera mazgu gha uthenga, nga ni mazgu gha ŵanthu cara, kweni nga umo ghaliri kwakuneneska, mazgu gha Ciuta.’ (1 Ŵatesalonika 2:13) Pa vilimika viŵiri ivyo vyajumpha, ŵasambiri ŵaphya ŵakujumpha 500,000 ŵasintha maumoyo ghawo kuti wakolerane na malango gha Yehova ndipo ŵajipatulira kwa Ciuta.

3. Kasi ni mafumbo wuli agho tidumbiskanenge mu nkhani iyi ghakukhwaskana na umo tingagwiliskira nchito buku la Baibolo Likusambizgaci?

³ Kasi mwasonosono apa mwanguŵa na cimwemwe cifukwa ca kusambizga munthu Baibolo? Pa caru cose capasi, pacali ŵanthu ŵa “mtima wakuneneska na uwemi” awo para ŵangapulika mazgu gha Ciuta ‘ŵangaghakoreska, ndipo ŵangapambika vipambi na cizizipizgo.’ (Luka 8:11-15) Tiyeni tidumbiskane umo mungagwiliskira nchito buku la Baibolo Likusambizgaci? pakusambizga ŵanthu kuŵa ŵasambiri. Tidumbiskanenge mafumbo ghatatu: (1) Kasi mungamba wuli sambiro la Baibolo? (2) Ni nthowa wuli zakasambizgiro izo zikovwira? (3) Kasi mungawovwira wuli musambiri kuŵa musambizgi wa Mazgu gha Ciuta?

Umo Mungambira Sambiro la Baibolo

4. Cifukwa wuli ŵanji ŵangagongowa kuti musambirenge nawo Baibolo, ndipo mungaŵawovwira wuli?

⁴ Usange imwe mungapempheka kwambuka mronga usani, kweni ŵakuti mucite kuduka kamoza mpaka sirya linyake, mungazomera yayi pempho ili. Kweni usange ŵangaŵikapo malibwe ghakuti mudyakengepo pakwambuka, mungazomera kwambura kudinginyika. Mwakuyana waka, munthu wakutangwanika wangagongowa kuti musambirenge nayo Baibolo. Wangaghanaghana kuti kusambira Baibolo kukukhumba nyengo yinandi. Kasi mungamovwira wuli kuti waleke kugongowa? Kuti mwambiske sambiro la kukhazikika, mungagwiliskira nchito buku la Baibolo Likusambizgaci? mwakucita nayo sambiro lifupi kwa maulendo ghanandiko na kudumbirana nayo fundo izo kale wakazimanyanga yayi. Usange mukunozgekera makora, ulendo uliwose wakuwelerako uzamuŵa nga ni malibwe ghakudyakapo kwambuskira munthu kuti waŵe paubwezi na Yehova.

5. Cifukwa wuli mukukhumbikwira kuliŵazga buku la Baibolo Likusambizgaci?

⁵ Kweni, pambere mundambe kovwira munthu kuti wasange candulo na buku la Baibolo Likusambizgaci? mukukhumbikwira kuti imwe mulimanye dankha makora. Kasi muli kumalizga kuliŵazga buku ili? Mbumba yinyake yikayegha buku ili apo yikaluta kukavakaca, ndipo yikamba kuliŵazga apo yikapumuranga mumphepete mwa nyanja. Mwanakazi munyake uyo wakaguliskanga vinthu ku ŵalendo wakafika kwa iwo, ndipo wakawona buku la Kasi Baibolo Likusambizgaci Comenecomene? Wakaphalira mbumba iyi kuti pajumpha nyengo yicoko waka, wangulomba kwa Ciuta kuti wamuzgore fumbo lakuyana waka. Mbumba iyi yikakondwa kumupa buku mwanakazi. Kasi imwe ‘mungajiwombolera nyengo’ kuti muŵazgeso buku ili, pa nyengo iyo mukulindizga munthu uyo mwapangana nayo, para mukupumura ku nchito, panji ku sukulu? (Ŵaefeso 5:15, 16) Usange mukucita nthena, mulimanyenge makora buku lakovwira kusambizgira Baibolo ili. Ndiposo muzamusanga mipata yakuyowoyera na ŵanji ivyo vili mu buku ili.

6, 7. Kasi mungamba wuli kusambira na munthu buku la Baibolo Likusambizgaci?

⁶ Para mukugaŵira munthu buku ili mu uteŵeti wa m’munda, gwiliskirani nchito makora vithuzi, malemba, na mafumbo pa mapeji 4, 5 na 6. Mwaciyelezgero, mungamba cidumbirano mwa kufumba kuti, “Pa masuzgo ghose agho ŵanthu ŵakusuzgika nagho sono, ni nkhu uko ŵangasanga ulongozgi wakugomezgeka?” Tegherezgani comene zgoro la munthu uyo, ndipo ŵazgani 2 Timote 3:16, 17, na kulongosora kuti Baibolo liri na ulongozgi wakugomezgeka. Pamasinda mulongorani mapeji 4 na 5, na kumufumba kuti: “Pa masuzgo agho ghalongoreka apa, ni ndi ilo mukufipa nalo mtima comene?” Para walongora, mupani buku wakolere apo imwe mukuŵazga lemba kufuma mu Baibolo. Ndipo ŵazgani pa peji 6, na kumufumba kuti, “Pa mafumbo ghankhondi na limoza agha, ni ndi ilo mungatemwa kusanga zgoro lake? Para wasankha, mulongorani cipaturo ico cikuzgora fumbo ilo, mulekerani buku, ndipo panganani mwakusimikizga kuti muzakizeso kuzakadumbiskana fumbo ilo.

⁷ Cidumbirano ici cingatora waka maminiti ghankhondi. Ndipouli, pa maminiti ghacoko waka agha, mungamanya ivyo wakwenjerwa navyo, mungalongosora malemba ghaŵiri, ndiposo mungapangana nayo kuti muzakawelereko. Nangauli mungadumbirana nayo nyengo yicoko, kweni panyake pajumpha nyengo yitali kufuma apo wakaŵa na cidumbirano cakukhozga nthena. Ndipo ici cingacitiska nanga ni munthu wakutangwanika kuŵa wakunweka kuti muzakizeso na kuzakadumbiskana maminiti ghanandiko. Mwantheura muzamumovwira kuti waŵe pa ‘nthowa yakuya ku umoyo.’ (Mateyu 7:14) Mukuluta kwa nyengo, para munthu uyo wazakakhumbisiska, mungasazgirako nyengo. Ici cingacitika para mungamupempha kusazgirako nyengo yakusambilira.

Nthowa izo Zikovwira Comene Pakusambizga

8, 9. (a) Kasi munganozgekereska wuli musambiri winu wa Baibolo kwimikana na viyezgo ivyo wangakumana navyo? (b) Kasi vinthu vyakukhozga cipulikano ivyo vikugolera moto yayi vikusangika nkhu?

⁸ Para munthu wamba kupulikira ivyo Baibolo likusambizga, wangakumana na vyakujandizga ivyo vingamutondeska kuluta panthazi mwauzimu. Mpositole Paulosi wakati: “Wose awo ŵakukhumba kuŵa ŵasopi Ciuta mwa Khristu Yesu ŵati ŵazikizgikenge.” (2 Timote 3:12) Paulosi wakayelezgera viyezgo na moto uwo ukocha vyakuzengera nyumba vyambura kukhora, kweni ukuleka vyakukhora nga ni golide, siliva, na mawe ghakuzirwa. (1 Ŵakorinte 3:10-13; 1 Petros 1:6, 7) Kuti movwire uyo mukumusambizga Baibolo kunozgekera kwimikana na viyezgo ivyo wakumanenge navyo, mukwenera kumuzenga na vinthu ivyo vikugolera moto yayi.

⁹ Wamasalmo wakati, “mapangano gha Yehova” ghakuyana na “siliva lakwengeka mu ng’anjo pa caru kwengetuka kankhondi na kaŵiri.” (Salmo 12:6) Enya, Baibolo liri na vyose vyakukhumbikwira pakukhozga cipulikano. (Salmo 19:7-11; Zintharika 2:1-6) Ndipo buku la Baibolo Likusambizgaci? likulongora umo mungagwiliskira nchito makora Malemba.

10. Ni mwauli umo mungamovwilira musambiri kupulikiska ivyo Baibolo likusambizga?

¹⁰ Para mukucitiska sambiro, woneseskani kuti musambiri wakupulikiska makora malemba agho ghali mu cipaturo ico mukusambira. Fumbani mafumbo kuti movwire musambiri kupulikiska malemba na kughalondezga. Cenjerani kuti muleke kumusankhira vyakucita. M’malo mwake, londezgani ciyelezgero ca Yesu. Apo mumanyi Malango wakamufumba, Yesu wakazgora kuti: “Mu Malango nchici cili kulembekamo? Ukuŵazga wuli?” Mumanyi malango wakazgora kufuma mu Malemba, ndipo Yesu wakamovwira umo wangaghalondezgera malango. Yesu wakamovwiraso munthu yura, mwakuyowoya ntharika kuti wawone umo vikumukhwaskira ivyo wasambira. (Luka 10:25-37) Buku la Baibolo Likusambizgaci? liri na ntharika zinandi zipusu izo mungazigwiliskira nchito pakovwira musambiri kuti walondezgenge ivyo Malemba ghakuyowoya.

11. Kasi mukwenera kusambira ndime zilinga?

¹¹ Yesu wakasambizganga vinthu vinonono mu nthowa yipusu. Buku la Baibolo Likusambizgaci? nalo ndipusu ndipo likulongosora makora Mazgu gha Ciuta. (Mateyu 7:28, 29) Londezgani ciyelezgero cake. Longosorani fundo mwaupusu, mwakupulikikwa makora, ndipo mwaunenesko. Lekani kucimbilira pakusambizga. M’malo mwake, zomerezgani mikhaliro na mahara gha musambiri kuwona unandi wa ndime izo mungasambira. Yesu wakamanyanga mikhaliro ya ŵasambiri ŵake ndipo wakaŵasambizganga vinthu vinandi yayi panyengo yimoza, wakasambizganga vyekha ivyo vikakhumbikiranga pa nyengo iyo.—Yohane 16:12.

12. Kasi mungagwiliskira wuli nchito vyakusazgirapo?

¹² Buku la Baibolo Likusambizgaci? liri na mutu wakuti vyakusazgirapo uwo uli na nkhani zakukwana 14. Kuyana na umo musambiri waliri, imwe nga musambizgi wake mukwenera kumanya vyakusazgirapo ivyo vingamovwira. Mwaciyelezgero, usange musambiri wakutondeka kupulikiska ivyo mukusambira, panji wali na fumbo cifukwa ca vigomezgo vyake vyakale, cingaŵa ciwemi kumulongora mutu wakwenelera wa vyakusazgirapo na kumuphalira kuti wayiwone yekha nkhani iyo. Nyengo zinyake musambiri wangakhumbikwira kuti nkhani iyo muyiwonere mose pamoza. Vyakusazgirapo vili na nkhani zakuzirwa za mu Malemba, nga ni “Kasi Ŵanthu Ŵali Nadi na Mzimu Uwo Ukuleka Kufwa?” na “Umo Tingamumanyira ‘Babulone Mukuru.’” Mungatemwa kudumbiskana mitu iyi na musambiri winu. Pakuti nkhani za vyakusazgirapo zilije mafumbo, mungakhumbikwira kuzimanya makora nkhani izi na kupanga mafumbo ghakwenelera.

13. Kasi lurombo lukukhozga wuli cipulikano?

¹³ Lemba la Salmo 127:1 likuti: “Kwambura kuti Yehova wakuzenga nyumba awo ŵakuyizenga ŵakutokatoka waka.” Mwantheura, para mukunozgekera kusambizga munthu Baibolo, lombani wovwiri wa Yehova. Ndipo malurombo agho mukulomba pakwamba pa sambiro na paumaliro ghalongorenge kuti muli paubwezi na Yehova. Mukhuŵirizgani musambiri kuti walombenge vinjeru kufuma kwa Yehova kuti wapulikiske makora Mazgu ghake na kulondezga ulongozgi wake. (Yakobe 1:5) Usange wakucita ntheura, musambiri waŵenge wakunozgeka kuzizipizga viyezgo na kulutilira kukhozga cipulikano cake.

Wovwirani Musambiri Kuŵa Musambizgi wa Baibolo

14. Kasi nkhukura wuli uko ŵasambiri ŵa Baibolo ŵakukhumbikwira kucita?

¹⁴ Awo tikuŵasambizga Baibolo kuti ŵapulikire vinthu “vyose” ivyo Yesu wakaphalira ŵasambiri ŵake, ŵakukhumbikwira kukura kufuma pa ŵasambiri ŵa Mazgu gha Ciuta kufika pa ŵasambizgi. (Mateyu 28:19, 20; Milimo 1:6-8) Kasi mungacitaci kuti movwire musambiri kukura mwauzimu?

15. Cifukwa wuli mukwenera kumuciska musambiri winu wa Baibolo kuti walutenge ku maungano?

¹⁵ Kwambira waka pa zuŵa lakwamba, muphalirani musambiri kuti walute namwe ku maungano gha mpingo. Mulongosolerani kuti ku maungano ndiko imwe mukusambira vinandi kuti muŵe musambizgi wa Mazgu gha Ciuta. Para pajumpha masabata ghacoko waka, nyengo yiliyose para mukumalizga sambiro la Baibolo, mulongosolerani ulongozgi wauzimu uwo mukupokera pa maungano ghakupambanapambana. Muphalirani vyandulo ivyo mukusanga ku maungano. (Ŵahebere 10:24, 25) Para musambiri wakuluta ku maungano nyengo zose, nchakuwonekerathu kuti nayo waŵenge musambizgi wa Mazgu gha Ciuta.

16, 17. Kasi ni vyakulata wuli vinyake ivyo musambiri wa Baibolo wangapanga?

¹⁶ Movwirani musambiri wa Baibolo kuŵa na vyakulata vyauzimu. Mwaciyelezgero, mukhuŵirizgani kuti waphalirengeko ŵabwezi na ŵacibali wake ivyo wakusambira. Ndiposo, muphalirani sacizgo la kuŵa na cakulata ca kuŵazga Baibolo lose. Usange mukumovwira kuŵa na cizgoŵi ca kuŵazga Baibolo nyengo zose, cizgoŵi ici cizamumovwira kwa nyengo yitali pamasinda pa ubapatizo wake. Kweniso, mwalekeraci kumuphalira kuti waŵe na cakulata ca kukumbuka panji lemba limoza ilo likuzgora fumbo lakuzirwa mu cipaturo cilicose ca buku la Baibolo Likusambizgaci? Para wakucita ntheura, wazamuŵa “wanchito wambura kukhozgeka soni, wakurunjika makora mazgu gha unenesko.”—2 Timote 2:15.

¹⁷ M’malo mwa kusambizga musambiri kuyowoya waka malemba kufuma pa mtima, mukhuŵirizgani kuti walongosorenge umo malemba ghakukolerana na nkhani iyo mukusambira, nga ni para wakuzgora fumbo la munthu munyake uyo wamufumba za cipulikano cake. Kupanga nayo ciyezgelero cifupi kungamovwira, imwe muŵe nga nipara wacibali panji munyake wa ku nchito wamufumba. Apo musambiri wakuzgora, mulongorani umo wangazgolera mwa “kuzika na wofi.”—1 Petros 3:15.

18. Para musambiri wa Baibolo wazomelezgeka kuŵa mupharazgi wambura kubapatizika, kasi mungamovwiraso wuli?

¹⁸ Mukuluta kwa nyengo, musambiri wangaŵa wakwenelera kunjira mu uteŵeti wa m’munda. Musimikizgirani kuti ni mwaŵi ukuru comene kuzomerezgeka kucitako mulimo uwu. (2 Ŵakorinte 4:1, 7) Para ŵalara ŵa mpingo ŵasimikizga kuti ngwakwenelera kuŵa mupharazgi ŵambura kubapatizika, movwirani kunozgekera upharazgi upusu ndiposo mwende nayo mu uteŵeti wa m’munda. Lutilirani kupharazga nayo mu uteŵeti wa m’munda, ndipo musambizgani kunozgekera na kupanga maulendo ghakuwelerako ghacandulo. Ciyelezgero cinu ciwemi cizamumukhuŵilizga comene.—Luka 6:40.

“Ujiponoske Wamwene na awo Ŵakukupulika”

19, 20. Kasi nchakulata wuli ico tikwenera kuŵa naco, ndipo cifukwa wuli?

¹⁹ Mwambura kukayika, pakukhumbikwira kufwilirapo kuti munthu wafike pa “kumanya unenesko.” (1 Timote 2:4) Ndipouli, ni vyakukondweska vicoko waka ivyo tingaviyelezgera na kukondwa uko kukuŵapo para mwawovwira munthu kupulikira ivyo Baibolo likusambizga. (1 Ŵatesalonika 2:19, 20) Enya, tili nadi na mwaŵi ukuru comene kuŵa “ŵalimi ŵamoza na Ciuta” mu mulimo wa pa caru cose wakusambizga.—1 Ŵakorinte 3:9.

²⁰ Kwizira mwa Yesu Khristu na ŵangelo, Yehova weruzgenge “awo ŵalive kumanya Ciuta, na awo ŵakuleka kupulikira ivangeli la Fumu yithu Yesu.” (2 Ŵatesalonika 1:6-8) Ŵanthu ŵali pa ngozi. Kasi mungapanga cakulata cakuti mucitiskenge nanga lingaŵa sambiro limoza na buku la Kasi Baibolo Likusambizgaci Comenecomene? Para mukucitako mulimo uwu, muli na mwaŵi ‘wa kujiponoska mwaŵene na awo ŵakumupulikani.’ (1 Timote 4:16) Kuluska kale, sono nkhwakukhumbikwa comene kuti tiwovwire ŵanji kupulikira ivyo Baibolo likusambizga.

[Mazgu ghamusi]

Kasi Mwasambiraci?

• Kasi buku la Baibolo Likusambizgaci? liri kulembeka na cakulata wuli?

• Kasi mungamba wuli kusambira na munthu buku la Baibolo Likusambizgaci?

• Ni nthowa wuli zakasambizgiro izo zikovwira comene?

• Kasi mungamovwira wuli musambiri kuŵa musambizgi wa Mazgu gha Ciuta?

[Cithuzithuzi pa peji 11]

Kasi mukugwiliskira nchito makora buku ili?