Pwelelerani ‘Kasambizgiro’ Kinu
“Pharazga mazgu; . . . ucenjezge, ucenye, uciske, na kuzizipizga kose na kusambizga.”—2 TIM. 4:2.
1. Kasi Yesu wakaŵatuma kucitaci ŵasambiri ŵake, ndipo wakaŵalekera ciyelezgero wuli?
NANGAULI Yesu apo wakaŵa pacaru capasi wakacizganga mwamunthondwe, kweni wakacemekanga kuti ni dokotara yayi nesi munthu wakucita minthondwe, m’malo mwake wakacemekanga msambizgi. (Mrk. 12:19; 13:1) Mulimo ukuru wa Yesu ukaŵa wa kupharazga makani ghawemi gha Ufumu. Uwu ndiwoso ni mulimo ukuru wa ŵalondezgi ŵake mazuŵa ghano. Ŵakhristu ŵakulutizga mulimo wa kovwira ŵanthu kuŵa ŵasambiri mwa kuŵasambizga kukoleska vyose ivyo Yesu wakaŵatuma.—Mat. 28:19, 20.
2. Kasi tikwenera kucitaci kuti tifiske mulimo withu wa kupharazga?
2 Kuti tifiske mulimo withu wa kovwira ŵanthu kuŵa ŵasambiri, tikukhumbikwira kuti nyengo zose tinyololerenge maluso gha kasambizgiro. Mpositole Paulosi wakalongora kukhumbikwa kwa luso ulu apo wakalembera kalata Timote. Wakati: “Jicenjelerenge, ndiposo na kusambizga kwako. Ukhalilire mu vyeneivi; cifukwa pakucita ceneici uti ujiponoske wamwene na awo ŵakukupulika.” (1 Tim. 4:16) Kusambizga uko Paulosi wakayowoyanga apa kukaŵa kwakuti ŵanthu ŵamanye waka vinthu yayi. Mkhristu uyo wakusambizga makora wakucontha mitima ya ŵanthu na kuŵakhuŵilizga kusintha maumoyo ghawo. Ndilo ni luso. Mwantheura, kasi tingalongora wuli luso lwa “kusambizga” apo tikupharazgira ŵanthu makani ghawemi gha Ufumu?—2 Tim. 4:2.
Umo Tingaŵira na Luso lwa ‘Kasambizgiro’
3, 4. (a) Kasi tingaŵa wuli na luso pakusambizga? (b) Kasi Sukulu ya Uteŵeti wa Ciuta yikutovwilira wuli kuti tisambizgenge makora?
3 Dikishonare linyake likuti munthu wakuŵa na luso para wakusambira, kuyezga kucita ivyo wasambira, panji kwizira mu ivyo wakuwona. Tikukhumbikwira kulondezga fundo zose zitatu izi kuti tiŵe na luso pakusambizga makani ghawemi. Nthowa iyo tingapulikiskira makora ivyo tikusambizga nkhuŵazga ndiposo kulomba. (Ŵazgani Salmo 119:27, 34.) Kuwona umo ŵapharazgi ŵaluso ŵakusambizgira kungatovwira kuti tisambire nthowa zawo zakasambizgiro ndiposo kulondezga umo ŵakucitira. Ndipo usange nyengo zose tikufwilirapo kuyezga kucita ivyo tikusambira, tovwirikenge kunyololera maluso ghithu.—Luka 6:40; 1 Tim. 4:13-15.
4 Yehova ndiyo ni Msambizgi withu Mulara. Kwizira mu cigaŵa cakuwoneka na maso ca gulu lake, wakulongozga ŵateŵeti ŵake pa caru capasi umo ŵangacitira kuti ŵafiske mulimo wa kupharazga. (Yes. 30:20, 21) Lekani mpingo wuliwose ukuŵa na Sukulu ya Uteŵeti wa Ciuta sabata yiliyose, iyo cilato cake nkhovwira awo ŵali kulembeska kuti ŵapharazgenge makora Ufumu wa Ciuta. Buku likuru ilo ŵakusambira pa sukulu iyi ni Baibolo. Mazgu gha Yehova ghakutiphalira ivyo tikwenera kusambizga. Nakuti ghakulongora nthowa ziwemi zakasambizgiro ndiposo izo ni zakwenelera. Sukulu ya Uteŵeti wa Ciuta, nyengo zose yikutikumbuska kuti tingaŵa na luso pakusambizga usange ivyo tikusambizga vikufuma mu Mazgu gha Ciuta, tikufumba mafumbo mwaluso, kusambizga mu nthowa yipusu, ndiposo kutemwa awo tikuŵasambizga mwa kufumira pasi pa mtima. Tiyeni tisande fundo izi, yiliyose payekha. Pamasinda pake tidumbiskanenge umo tingaconthera mtima wa musambiri.
Visambizgo Vinu Vifumenge mu Baibolo
5. Kasi ivyo tikusambizga vikwenera kufuma nkhu, ndipo cifukwa wuli?
5 Yesu, uyo wakasambizganga mwaluso kuluska ŵasambizgi wose, wakasambizganga vinthu vyakufuma mu Malemba. (Mat. 21:13; Yoh. 6:45; 8:17) Wakasambizganga vinthu vya mu mutu wake yayi, kweni vya uyo wakamutuma. (Yoh. 7:16-18) Nase tikwenera kucita nga umo wakacitira. Mwantheura, para tili mu upharazgi wa ku nyumba na nyumba panji tikucitiska sambiro, ivyo tikusambizga vikwenera kufuma mu Mazgu gha Ciuta. (2 Tim. 3:16, 17) Malemba ghali na nkhongono comene kuluska vinjeru ivyo ise tingaŵa navyo. Baibolo ndilo lingawovwira munthu. Mwantheura, fundo yiliyose iyo tikukhumba kuti musambiri wapulikiske, nthowa yiwemi nkhuŵazga nayo Malemba.—Ŵazgani Ŵahebere 4:12.
6. Kasi msambizgi wangawovwira wuli musambiri kupulikiska fundo iyo ŵakudumbiskana?
6 Ici cikung’anamura kuti mupharazgi waleke kunozgekera sambiro la Baibolo yayi. Kweni pwelelero likukhumbikwa pakusankha malemba agho msambizgi na musambiri ŵamuŵazga pa sambiro la Baibolo, agho ghalongoreka mu ndime ndipo mazgu ghake ghandalembeke. Kanandi nchiwemi kuŵazga malemba agho ghakukhozgera vigomezgo vinthu. Nchiwemiso kovwira musambiri kupulikiska lemba lililose ilo laŵazgika.—1 Kor. 14:8, 9.
Fumbani Mafumbo Mwaluso
7. Cifukwa wuli kufumba mafumbo ni nthowa yiwemi yakusambizgira?
7 Para msambizgi wakufumba mafumbo mwaluso wakovwira kuti musambiri waghanaghanenge ndiposo kuti wacontheke mtima. Mwantheura, m’malo mwa kulongosolera musambiri winu ivyo lemba likuyowoya, mupemphani kuti wamulongosolerani. Nyengo zinyake fumbo panji mafumbo ghakusazgikira ghangakhumbikwira kuti movwire musambiri kufika pa fundo yeneko. Para musambiri winu mukumusambizga mwanthowa iyi, ndikuti mukumovwira kupulikiska fundo iyo mukusambira pera yayi, kweniso kuti wakhorwe yekha na ivyo mukusambira.—Mat. 17:24-26; Luka 10:36, 37.
8. Kasi tingamanya wuli ivyo vili mu mtima wa musambiri?
8 Mabuku ghithu ghakulembeka mu nthowa ya mafumbo na mazgoro. Nchakuwonekerathu kuti ŵanthu ŵanandi awo tikusambira nawo Baibolo, nchipusu kuzgora mafumbo agho ghalembeka mwa kutora mazgoro agho ghali mu ndime. Ndipouli, msambizgi uyo wakukhumba kucontha mtima wa musambiri kuti wakukhorwa waka na zgoro ilo musambiri wazgora yayi. Mwaciyelezgero, musambiri wangalongosora makora ivyo Baibolo likuyowoya pa nkhani ya uzaghali. (1 Kor. 6:18) Kweni kumufumba mwaluso kungavumbura umo wakuwonera ivyo wakusambira. Mwantheura, msambizgi wangafumba kuti: “Cifukwa wuli Baibolo likukanizga kugonana na munthu uyo undatorane nayo? Kasi imwe mukutipo wuli pa dango la Ciuta ili? Kasi mukughanaghana kuti munthu wangasanga candulo para wakupulikira malango gha Ciuta?” Mazgoro gha mafumbo agha ghangavumbura ivyo vili mu mtima wa musambiri.—Ŵazgani Mateyu 16:13-17.
Sambizgani Mu Nthowa Yipusu
9. Ni vinthu wuli ivyo tikwenera kukumbuka para tikusambizga munthu Baibolo?
9 Visambizgo vinandi ivyo vili mu Mazgu gha Ciuta ni vipusu. Kweni mutepanji ŵanthu awo tikusambira nawo Baibolo ŵali kutimbanizgika na visambizgo vya cisopa cautesi. Nchito yithu njakovwira ŵanthu kuti ŵapulikiske Baibolo mu nthowa yipusu. Msambizgi uyo ngwaluso, wakusambizga mu nthowa yipusu, mwakupulikikwa makora, ndiposo mwambura kubendezga unenesko. Usange tikulondezga ulongozgi uwu, ŵanthu ŵasuzgikenge yayi kupulikiska unenesko. Tileke kulongosora vinthu vinandi vyambura kukhumbikwa. Tikukhumbikwira cara kulongosora cigaŵa cilicose ca lemba ilo taŵazga. Tikwenera kudemelera pa cigaŵa cekha ico cikukolerana na fundo iyo tikusambira. Pacoko na pacoko, musambiri wazamupulikiska visambizgo vyandimba vya mu Malemba para wamba kumanya vinandi.—Heb. 5:13, 14.
10. Kasi ni vinthu wuli ivyo vikovwira kumanya unandi wa ndime izo tikwenera kusambira?
10 Kasi tikwenera kusambizga vinthu vinandi wuli pa nyengo yimoza? Apa pakukhumbikwa umanyi. Maluso na mikhaliro ya musambiri na msambizgi vingapambana, kweni nyengo zose tikwenera kukumbuka kuti cilato cithu nkhovwira musambiri kuŵa na cipulikano cakukhora. Mwantheura, tikwenera kumupa nyengo yakuti waŵazge, kupulikiska fundo, na kuzomerezga unenesko uwo wakusambira mu Mazgu gha Ciuta. Tikwenera cara kusambira vinthu vinandi kujumpha ivyo wangapulikiska. Ndipouli, sambiro likwenera kukhalilira pamoza yayi. Para musambiri wapulikiska fundo tikwenera kuluta pa yinyake.—Kol. 2:6, 7.
11. Ni sambiro wuli lakukhwaskana na kusambizga ilo tingatorako kwa Paulosi?
11 Pakupharazgira ŵapya, mpositole Paulosi wakayowoyanga mu nthowa yipusu. Nangauli wakaŵa munthu wakusambira comene, kweni wakayowoyanga mazgu ghambura kusuzga kupulikiska. (Ŵazgani 1 Ŵakorinte 2:1, 2.) Kuyowoya unenesko wa mu Malemba mu nthowa yipusu kukupangiska ŵanthu awo ŵakutemwa unenesko kuti ŵanweke ndiposo kukhorwa. Palije uyo wakukhumbikwira dankha masambiro ghapacanya kuti wapulikiske unenesko.—Mat. 11:25; Mil. 4:13; 1 Kor. 1:26, 27.
Wovwirani Musambiri Kulondezga Ivyo Wakusambira
12, 13. Nchivici cingacitiska musambiri kulondezga ivyo wakusambira? Yowoyani ciyelezgero.
12 Luso lukukhumba kuti ivyo tikusambizga viconthenge mtima wa musambiri. Uyo tikumusambizga wakwenera kuwona umo ivyo tikusambira vikumukhwaskira iyo payekha, umo wangasangira navyo candulo, ndiposo umo umoyo wake ungasinthira usange wangalondezga ulongozgi wa mu Malemba.—Yes. 48:17, 18.
13 Mwaciyelezgero, tingaŵa kuti tikudumbiskana lemba la Ŵahebere 10:24, 25, ilo likuciska Ŵakhristu kuti ŵawunganenge na cilato cakuti ŵakhozgane na Malemba ndiposo kutemwana. Usange musambiri wandambe kuluta ku maungano gha mpingo, mwakudumura tingamuphalira umo maungano ghakucitikira ndiposo ivyo tamusambira pa ungano wuliwose uwo tasankha kumulongosolera. Tingamuphaliraso kuti maungano gha mpingo nchigaŵa ca kusopa kwithu ndiposo kuti ghakovwira munthu waliyose payekha. Pamasinda tingamucemera ku maungano. Musambiri wakwenera kulondezga ivyo Malemba ghakuyowoya na cilato cakuti wakondweske Yehova, kuti kukhumba kukondweska uyo wakusambira nayo yayi.—Gal. 6:4, 5.
14, 15. (a) Kasi musambiri wa Baibolo wangasambiraci vyakukhwaskana na Yehova? (b) Kasi para musambiri wamumanya makora Ciuta wangawovwirika wuli?
14 Cinthu cakuzirwa comene ico musambiri wangasanga para wakusambira Baibolo na kulondezga ivyo likuyowoya nchakuti wamanyenge Yehova na kumutemwa. (Yes. 42:8) Padera pa kuŵa dada wacitemwa, Mlengi, ndiposo Mweneko wa vilengiwa vyose, Yehova wakuvumburaso mikhaliro yake ndiposo maluso ghake kwa awo ŵakumutemwa na kumuteŵetera. (Ŵazgani Exodus 34:6, 7.) Apo Mozesi wakaŵa pafupi kulongozga Ŵaisrayeli kufuma mu wuzga mu caru ca Eguputo, Yehova wakajivumbura yekha mwakuyowoya kuti: “Ndine mweneuyo ndine.” (Ex. 3:13-15) Mazgu agha ghakang’anamuranga kuti Yehova waŵenge cilicose ico wangaŵa mwakuti wafiske ivyo wakalayizga vyakukhwaskana na ŵanthu ŵake ŵakusankhika. Ici cikacitiska kuti Ŵaisrayeli ŵamumanye Yehova nga ni Mponoski, Cinkhara ca nkhondo, Mupi, Mfiski wa malayizgano, ndiposo mikhaliro yake yinyake.—Ex. 15:2, 3; 16:2-5; Josh. 23:14.
15 Yehova wangacitira minthondwe ŵasambiri ŵithu nga umo wakacitira na Mozesi yayi. Kweni para ŵasambiri ŵithu ŵakukura mu cipulikano ndiposo ŵakuzirwiska ivyo ŵakusambira na kwamba kuvilondezga, nchakuwonekerathu kuti ŵazamwamba kugomezga Yehova kuti waŵape cikanga, vinjeru, ndiposo ulongozgi. Apo ŵakucita nthena, nawo ŵazamumanya kuti Yehova ni msambizgi wakugomezgeka ndiposo wavinjeru, Muvikiliri, ndiposo ndiyo wangaŵapa vyose ivyo ŵakusoŵerwa.—Sal. 55:22; 63:7; Zinth. 3:5, 6.
Ŵatemwani
16. Cifukwa wuli maluso ghakawiro kuti ndiyo ngakuzirwa comene yayi pakusambizga?
16 Usange mukughanaghana kuti mulije maluso ghakasambizgiro, lekani kutaya mtima. Yehova na Yesu wakulaŵilira mulimo wa kusambizga uwo ukucitika pa caru cose. (Mil. 1:7, 8; Civ. 14:6) Ŵangatumbika citatata cithu mwakuti ivyo tikuyowoya viwovwire ŵanthu awo ŵakutemwa unenesko. (Yoh. 6:44) Para msambizgi wakutemwa musambiri wake, vingamwendera makora comene pakusambizga, nangauli wangaŵavya maluso ghanyake mwakawiro. Mpositole Paulosi wakulongora kuti wakamanyanga kukhumbikwa kwa kutemwa awo wakaŵasambizganga.—Ŵazgani 1 Ŵatesalonika 2:7, 8.
17. Kasi tingalongora wuli kuti tikutemwa musambiri waliyose wa Baibolo?
17 Mwakuyana waka, nase tingalongora kuti tikutemwa musambiri waliyose wa Baibolo para tikusanga nyengo yakucezgera nayo na kumumanya makora. Apo tikusambira nayo fundo za mu Baibolo, nchakuwonekerathu kuti timanyenge makora mikhaliro yake. Tingasangaso kuti wakulondezga kale fundo zinyake za mu Baibolo izo wakusambira. Kweni panji pali mikhaliro yinyake iyo wangakhumbikwira kusintha. Para musambiri tikumovwira umo wangalondezgera ivyo tikumusambizga kufuma mu Baibolo, wazamuŵa musambiri wakukwana wa Khristu.
18. Cifukwa wuli nkhwakuzirwa kulomba pamoza na musambiri ndiposo kumuzunura mu lurombo?
18 Cinthu cakuzirwa comene ico tingacita nkhulomba pamoza na musambiri withu ndiposo kumuzunura mu lurombo. Wakwenera kupulikiska kuti cilato cithu nkhumovwira kuti waŵe paubwezi uwemi na Mlengi wake, wasendelere kwa iyo, ndiposo kuti wasange candulo na ulongozgi Wake. (Ŵazgani Salmo 25:4, 5.) Para tikulomba Yehova kuti wovwire musambiri kulondezga ivyo wakusambira, musambiri wamanyenge kuzirwa kwa kuŵa ‘wakucita mazgu.’ (Yak. 1:22) Ndipo para musambiri wakutegherezga malurombo agho tikulomba, nayo wasambirenge umo wangalombera. Para ŵasambiri ŵawovwirika kukhozga ubwezi wawo na Yehova, cikuŵa cakukondweska comene.
19. Kasi mu nkhani yakulondezgapo tizamudumbiskana vici?
19 Tikukhozgeka kumanya kuti Ŵakaboni ŵa Yehova ŵakujumpha 6.5 miliyoni ŵakuyezgayezga “kusambizga” mwaluso na cilato cakuti wovwire ŵanthu awo ŵakutemwa unenesko kukoleska vinthu vyose ivyo Yesu wakayowoya. Ni vici vikucitika cifukwa ca mulimo withu wa kupharazga? Zgoro la fumbo ili tizamudumbiskana mu nkhani yakulondezgapo.
Kasi Mukukumbuka?
• Cifukwa wuli Ŵakhristu ŵakwenera kuŵa na luso lwa “kusambizga”?
• Kasi ni nthowa wuli zakasambizgiro izo ni zakovwira?
• Para tilije maluso pakusambizga, kasi nchivici ico cingatovwira?
[Cithuzithuzi pa peji 9]
Kasi muli kulembeska mu Sukulu ya Uteŵeti wa Ciuta?
[Cithuzithuzi pa peji 10]
Cifukwa wuli nchiwemi kupempha musambiri winu kuti waŵazge Baibolo?
[Cithuzithuzi pa peji 12]
Lombani pamoza na musambiri winu ndiposo muzunurani mu lurombo