Sambizgani Unenesko

Kwambira mu Seputembala, mu kabuku ka Uteŵeti na Umoyo Wachikhristu, pa chigaŵa chakuti Umo Mungapharazgira, paŵengeso chigaŵa chinyake chakuti “Sambizgani Unenesko.” Chilato chithu ntchakuti tiphalire munthu unenesko wa mu Baibolo munthowa yipusu, mwa kumufumba fumbo na kumuŵazgira lemba.

Para tawona kuti munthu wakukhumba kumanya vinandi, tingamulekera buku panji chakugaŵira chinyake, panyake tingamulongora vidiyo ya pa jw.org mwakuti tijure mwaŵi wakuti tikawereso. Tikwenera kuyezgeska kuti tiwelerengeko luŵiro kuti tikalutizge kudumbirana apo tikalekerana. Chigaŵa chiphya ichi kweniso nkhani za ŵasambiri zizamufumanga pa fundo zakudumura mu buku la Kasi Baibolo Likutisambizga Vichi? Pa chigaŵa ichi paliso mafumbo na malemba ghanyake agho ghangatovwira pa ulendo wakuwelerako panji pakusambizga munthu na Baibolo pera.

Pali nthowa yimoza pera iyo yikulongozgera ku umoyo. (Mt 7:13, 14) Pakuti tikupharazgira ŵanthu ŵakupambanapambana kweniso ŵavisopa vyakupambanapambana tikwenera kusintha upharazgi withu kuti tiŵafikenge pa mtima ŵanthu aŵa. (1Ti 2:4) Para tazgoŵera kuyowoya na ŵanthu nkhani za mu Baibolo, ndipo tikuchita “mwakwenelera na mazgu gha unenesko,” tiŵenge ŵakukondwa chomene kweniso tisambizgenge makora ŵanthu unenesko.—2Ti 2:15.