UMOYO WACHIKHRISTU

Mulimo Wakupharazga na Kusambizga Ngwakuzirwa Chomene Pakuzgora Ŵanthu Kuŵa Ŵasambiri

Yesu wakaphalira ŵalondezgi ŵake kuti ŵalute na kukazgora ŵanthu ŵa mitundu yose kuŵa ŵasambiri. (Mt 28:19) Ivi vikusazgapo kupharazga na kusambizga. Nyengo zose tikwenera kujifumba kuti, ‘Kasi ningachita wuli kuti nisazgireko luso pa mulimo wakuzgora ŵanthu kuŵa ŵasambiri?’

KUPHARAZGA

M’malo mwa kulindilira ŵanthu kuti ndiwo ŵize kwa ise, tikwenera kunyamuka na kukapenja awo ‘mbakwenelera.’ (Mt 10:11) Para tikupharazga, kasi tikuŵa maso kuti tipharazgire awo ‘ŵakusangika mwamwaŵi’? (Mil 17:17) Lidiya wakazgoka msambiri chifukwa Paulosi wakalimbikiranga chomene kupharazga.—Mil 16:13-15.

Samuel wakumugaŵira magazini Ezekiel; Solomon na Mary ŵakumupharazgira Ezekiel na Abigail — “Seŵa mbuto yako mulenji, ndipo ungapumuzganga chara woko lako m’paka mise” (Mu 11:6)

WONELERANI VIDIYO YAKUTI LUTILIRANI KUPHARAZGA “KWAMBURA KULEKA”—KU NYUMBA NA NYUMBA, NDIPO PAMASINDA ZGORANI MAFUMBO AGHA:

Kasi ivyo Samuel wakachitanga zuŵa na zuŵa, vikalongoranga wuli kuti wakalimbikiranga kupanda mbuto za unenesko?
Chifukwa wuli tikwenera kuzizipizga para tikupharazga?
Kasi ninjani uyo mungapharazgira nayo lumoza uthenga wa Ufumu?

KUSAMBIZGA

Kuti tizgore munthu kuŵa msambiri, tikwenera kuchita vinandi padera pa kumulekera waka mabuku ghithu. Kuti ŵakure mwauzimu, tikwenera kupanga maulendo ghakuwelerako na kuchitiska masambiro gha Baibolo. (1Ko 3:6-9) Kweni kasi tikwenera kuchita wuli para mulimo withu wakusambizga ŵanthu uthenga wa Ufumu ukuwoneka nga ukuphura kanthu yayi? (Mt 13:19-22) Tikwenera kulutilira kupenja ŵanthu awo ŵali na mitima iyo yili nga ni “dongo liwemi.”—Mt 13:23; Mil 13:48.

Solomon na Mary ŵakusambira Baibolo na Ezekiel kweniso Abigail; Ezekiel na Abigail ŵakupharazga ku malo uko kukusangika ŵanthu ŵanandi — “Ine nkhapanda, Apolo wakathilira, kweni Chiuta ndiyo wakakuzganga” (1Ko 3:6)

WONELERANI VIDIYO YAKUTI, LUTILIRANI KUPHARAZGA “KWAMBURA KULEKA”—KOVWIRA ŴANTHU KUŴA ŴASAMBIRI, NDIPO PAMASINDA ZGORANI MAFUMBO AGHA:

Kasi Solomon na Mary ŵakathilira wuli mbuto za unenesko mu mitima ya Ezekiel na Abigail?
Kasi chilato chithu chikuru chikwenera kuŵa vichi para tikupharazga, nanga ni para tikupharazga uko kukusangika ŵanthu ŵanandi?
Kasi tingachita wuli kuti tiŵikepo mtima pa mulimo wakusambizga unenesko?