UMOYO WACHIKHRISTU

Yehova Wakutemwa Ŵanthu Ŵakutowa

Kanandi ŵavyaumoyo ŵakuyowoya kuti “tikwenera kugeza mu mawoko, kunozga mu nyumba zithu kweniso kuti titayenge viswaswa kutali.” Ŵapapi ŵanandi ŵakusambizga ŵana ŵawo umo ŵangaŵira ŵakutowa mwakuthupi. Nakuti Chiuta withu uyo ni mutuŵa ndiyo wakambiska vyakuti tiŵenge ŵakutowa. (Ek 30:18-20; Do 23:14; 2Ko 7:1) Para tikupwelelera thupi lithu na vinthu ivyo tili navyo ndikuti tikuchindika Yehova. (1Pe 1:14-16) Wuli pakuyowoya za nyumba yithu na pa luŵaza? Mwakupambana na ŵanthu awo ŵakujitayira bweka viswaswa mu misewu na mu malo ghanyake ghambura kwenelera, Ŵakhristu ŵakuyezgayezga kuchita ivyo ŵangafiska kuti charu chiŵe chiwemi. (Sa 115:16; Chiv 11:18) Tingalongora umo tikuwonera nkhani ya utozi, usange tikutaya waka palipose yayi nanga tungaŵa tunthu tuchokotuchoko, nga nthumapepara twa switi, tumabotolo, babogamu uyo tasumba na vinyake. Pa chilichose icho tikuchita, tikukhumba ‘kulongora kuti ndise ŵateŵeti ŵa Chiuta.’—2Ko 6:3, 4.

WONENELERANI VIDIYO YA MUTU WAKUTI, CHIUTA WAKUTEMWA ŴANTHU ŴAKUTOWA, NDIPO PAMANYUMA ZGORANI MAFUMBO GHAKULONDEZGAPO AGHA:

Kasi ŵanyake ŵangapeleka vifukwa wuli vyakugwenthera ivyo ŵakulekera kupwelelera vinthu vyawo kuti viwonekenge makora?
Kasi Dango la Mozesi likulongora wuli umo Yehova wakuwonera nkhani ya utozi?
Kasi tingachitira wuli ukaboni Yehova kwambura mazgu?

Dada wakunjira mu galimoto ya mwana wake iyo njakubinkha; dada na mwana ŵakudumbiskana pa ya umo Yehova wakuwonera utozi; ŵasembe ŵaŵiri mu nyengo ya Israyeli ŵali pafupi na beseni lakugezerapo; ŵabali ŵakhira mu galimoto ya mwana iyo sono njakutowa — Kasi ningayezga wuli Yehova pa nkhani ya utozi?