Yehova Wakuvikilira Ŵanthu Ŵake

Paska lakwamba chikaŵa chakuchitika chakuzirwa chomene. Pa usiku wura Farawo wati wawona kuti mwana wake wakwamba wafwa, iyo wakaphalira Mozesi kuti: “Wukani, fumanipo pakati pa ŵanthu ŵane, imwe na Ŵaisrayeli ŵanyinu. Lutaninge mukateŵetere Yehova, nga umo mwayowoyera.” (Ek 12:31) Yehova wakalongora kuti wakuvikilira ŵanthu ŵake.

Usange tikuwona mdauko wa ŵanthu ŵa Yehova mazuŵa ghano, tikuŵa na chigomezgo chose kuti Yehova wakulutilira kulongozga na kuvikilira ŵanthu ŵake. Fundo iyi yikulongosoreka makora mu myuziyamu ya mutu wakuti “Ŵanthu ŵa Zina la Yehova” iyo yili ku likuru lithu la pa charu chose.

WONELERANI VIDIYO YA MUTU WAKUTI KUWONA MALO GHAKUSUNGIRA VINTHU VYAKALE KU WARWICK: “ŴANTHU ŴA ZINA LA YEHOVA,” NA KUZGORA MAFUMBO GHAKULONDEZGAPO AGHA:

• 

  Kasi kwambira mu 1914, Ŵasambiri ŵa Baibolo ŵakamba kugwiliskira ntchito vichi, ndipo vikaŵayendera wuli?

• 

  Kasi ntchiyezgo wuli icho ŵakakumana nacho mu 1916 na 1918, ndipo pali ukaboni wuli wakuti Yehova wakalongozganga gulu lake?

• 

  Kasi ŵanthu ŵa Yehova ŵakalutilira wuli kugomezgeka nangauli wakakumananga na masuzgo?

• 

  Kasi ni fundo wuli yiphya iyo ŵanthu ŵa Yehova ŵakapulikiska mu 1935, ndipo ŵakakhwaskika wuli?

• Usange muli kulutako ku myuziyamu iyi, panji ku ofesi ya munthavi mu charu chinu, ni vinthu wuli ivyo mukawona ivyo vikakhozga chipulikano chinu kuti Yehova wakulongozga na kuvikilira ŵanthu ŵake?