Kasi Umaliro Wizenge Pawuli? Ivyo Yesu Wakayowoya

WONANI FUNDO ZIŴIRI IZO YESU WAKAYOWOYA PA NKHANI YA UMALIRO:

“Ntheura, muŵenge maso, chifukwa mukumanya chara zuŵa nesi ora.”​—MATEYU 25:13.

“Lutilirani kulaŵiska, muŵenge maso, pakuti mukumanya chara apo nyengo yakutemeka yizirenge.”​—MARIKO 13:33.

Palije munthu pa charu chapasi uyo wakumanya nyengo yeneko apo umaliro wa charu chiheni ichi wizirenge. Kweni Chiuta wali ‘kutema nyengo,’ kuŵikirathu ‘zuŵa na ora’ apo umaliro wizirenge. (Mateyu 24:36) Kasi ichi chikung’anamura kuti palije chilichose icho chingatovwira kumanya kuti umaliro uli pafupi? Yayi. Yesu wakaphalira ŵasambiri ŵake vyakuchitika ivyo vizamulongora kuti umaliro uli pafupi.

VIMANYIKWIRO VYAKUTI UMALIRO ULI PAFUPI

Vinthu vyakulondezgapo ivi ivyo Yesu wakayowoya ni vimanyikwiro vya “umaliro wa charu.” Yesu wakati: “Mtundu uzamuwukirana na mtundu unyake, ufumu na ufumu unyake. Kweniso kuzamuŵa njara na vindindindi mu malo na malo.” (Mateyu 24:3, 7) Wakayowoyaso kuti kuzamuŵa “nthenda zakwambukira.” (Luka 21:11) Kasi mukuviwona vimanyikwiro ivyo Yesu wakayowoyerathu kuti vizamuchitika pambere umaliro undize?

Mazuŵa ghano taŵanthu tikusuzgika na nkhondo, njara, vindindindi, kweniso matenda ghakupambanapambana. Mwachiyelezgero, mu 2004 ku India kukachitika chindindindi chikuru icho chikachitiska tsunami ndipo chikakoma ŵanthu 225,000. Mu vyaka vitatu, pa charu chose muliri wa COVID-19 wakoma ŵanthu ŵakujumpha 6.9 miliyoni. Yesu wakati vinthu nga ni ivi, vikulongora kuti umaliro wa charu chiheni ichi uli pafupi.

“MAZUŴA GHAUMALIRO”

Baibolo likulongosora nyengo iyo tilimo pambere umaliro undize kuti ni “mazuŵa ghaumaliro.” (2 Petrosi 3:3, 4) Lemba la 2 Timote 3:1-5, likuti mu mazuŵa ghaumaliro ŵanthu ŵanandi ŵazamuŵa na nkharo ziheni. (Wonani bokosi lakuti “Pambere Umaliro wa Charu Undafike.”) Kasi mazuŵa ghano mukuŵawona ŵanthu awo mbakujitemwa, ŵaryezi, ŵakofya kweniso ŵambura kutemwa ŵanyawo? Uwu mbukaboni unyake wakuti charu chakhala nadi pachoko kumara.

Kasi nyengo ya mazuŵa ghaumaliro yiŵenge yitali wuli? Baibolo likuti ni “nyengo yifupi.” Ndipo sonosono apa Chiuta ‘wazamuparanya awo ŵakunanga charu chapasi.’​—Chivumbuzi 11:15-18, 12:12.

PARADISO WALI PAFUPI!

Chiuta wali kutema kale zuŵa na ora ilo wazamuparanyira charu chiheni ichi. (Mateyu 24:36) Kweni nkhani yakukondweska njakuti Chiuta “wakukhumba yayi kuti munyake waparanyike.” (2 Petrosi 3:9) Lekani watipa mwaŵi kuti tisambire vya iyo na kumupulikira. Chifukwa wuli? Wakukhumba kuti tizakapone para wazamuparanya charu chiheni ichi, na kuzakakhala mu charu chiphya icho chizamuŵa paradiso.

Chiuta wanozga ndondomeko yakuti ŵanthu pa charu chose ŵasambire za iyo kuti ŵazakakhale mu charu chiphya chakuwusika na Ufumu wake. Yesu wakati makani ghawemi gha Ufumu wa Chiuta ghazamupharazgika “mu charu chose chapasi.” (Mateyu 24:14) Ŵakaboni ŵa Yehova pa charu chose ŵakamalira maora mabiliyoni ghanandi kupharazga na kusambizga ŵanthu uthenga wa mu Baibolo uwo ukupa ŵanthu chigomezgo. Yesu wakati ntchito ya kupharazga iyi, yikwenera kuchitika pa charu chose chapasi pambere umaliro undize.

Nyengo ya muwuso wa ŵanthu yakhala pachoko chomene kumara. Kweni nkhani yakukondweska njakuti namwe mungazakapona umaliro wa charu chiheni ichi na kuzakakhala mu Paradiso uyo Chiuta walayizga pa charu chapasi. Nkhani yakulondezgapo yikulongosora ivyo mungachita kuti muzakaŵemo mu charu chiphya.