Ivyo Mungachita Kuti Muzakaŵemo mu Charu Chiphya

Nkhani izo zajumpha, zayowoya kuti Chiuta waparanyenge charu chiheni ichi sonosono apa, na kumazga masuzgo ghose agho chikupangiska. Tili na chigomezgo chose kuti ivi vichitikenge nadi. Chifukwa wuli? Chifukwa Mazgu gha Chiuta Baibolo ghakulayizga kuti:

“Charu chikuluta.”—1 YOHANE 2:17.

Tikugomezgaso kuti ŵanthu ŵanyake ŵazamupona chifukwa lemba ilo lili pachanya apa likuyowoyaso kuti:

“Uyo wakuchita khumbo la Chiuta wakukhalilira muyirayira.”

Ntheura kuti tizakapone ni pekha para tikuchita khumbo la Chiuta. Kuti timanye khumbo lake, chakwamba tikwenera kumumanya dankha Chiuta.

MUNGAZAKAPONA, PARA ‘MWAMUMANYA’ MAKORA CHIUTA

Chithuzi: 1. Nesi wakhala pasi, wavuka chomene ndipo ngwakukondwa yayi. 2. Wakupumura mu resitiranti ndipo wakuwona munyake uyo wakugwira nayo ntchito ngwakukondwa wakuŵazga magazini. 3. Munyake uyu wakumuŵazgira vesi mu Baibolo ndipo wakumupa kadi la jw.org.

Yesu wakati: “Kuti ŵaŵe na umoyo wamuyirayira, ŵakwenera kumumanyani imwe Chiuta waunenesko yekha.” (Yohane 17:3) Kuti tizakapone umaliro wa charu ichi na kuzakakhala kwamuyirayira, tikwenera ‘kumumanya’ Chiuta. Pali vinandi ivyo tikwenera kuchita padera pakumanya waka kuti Chiuta waliko panji kumanya vichoko waka vya iyo. Tikwenera kuŵa nayo paubwezi. Nga umo vikuŵira na ŵanthu awo ŵali paubwezi, kuti ubwezi wawo ukhore ŵakwenera kusanga nyengo yakuti ŵachezgeranenge. Ndimo viliriso na ubwezi withu na Chiuta. Wonani unenesko wakuzirwa uwo tikusambira mu Baibolo uwo ungatovwira kuti tiŵe paubwezi na Chiuta na kukhozga ubwezi uwu.

Unenesko Uwo Tikusambira mu Baibolo

Tikusambira kuti Chiuta wakakhumbanga kuti tikhalenge mu Paradiso.

Iyo wakalenga ŵanthu ŵakwamba Adamu na Eva, na kuŵaŵika mu munda wakutowa wakuchemeka Edeni. Ŵakaŵa ŵarunji, ndipo Chiuta wakaŵapa chilichose kuti ŵakondwenge na umoyo. Ŵakatenge ŵakhalenge kwamuyirayira. Ndipo ŵakatenge ŵafwenge yayi ŵalutilirenge kuŵa paubwezi na Chiuta. Kweni ŵakasankha kuleka kupulikira dango lipusu ilo Chiuta wakaŵapa.

Tikusambira chifukwa icho tikusuzgikira.

Adamu wakataya mwaŵi wakukhala na umoyo kwamuyirayira chifukwa chakuti wakatondeka kupulikira Chiuta. Ndipo ivi vili kukhwaskaso ŵanthu wose. Baibolo likuti: “Kwananga kukanjira mu charu na munthu yumoza ndipo nyifwa yikiza chifukwa cha kwananga. Ntheura nyifwa yikathandazgikira ku ŵanthu wose.” (Ŵaroma 5:12) Nga umo mwana wangatolera matenda ku ŵapapi ŵake, ŵana wose ŵa Adamu nawo ŵali kuhara kwananga. Lekani tikuchekura na kufwa.

Tikusambira kuti Chiuta wali kuchitapo kale kanthu kuti watovwire.

Baibolo likuti: “Pakuti Chiuta wakachitemwa chomene charu, lekani wakapeleka Mwana wake wapadera, kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.” (Yohane 3:16) Chiuta wakatuma Yesu pa charu chapasi kuti wazakatifwire na kupeleka umoyo wake chifukwa cha ise. Pakuyowoya za chitemwa icho Chiuta wali kulongora, mwanalume munyake wa vyaka 86 wa ku India zina lake Prabhakar wakati: “Vikulongora kuti Yehovaa wakunitemwa chomene. Chitemwa chake chanipa chilindizga chakuzakakhala na umoyo kwamuyirayira.”

Tikusambira umo tingalongolera kuti tikuwonga ivyo Chiuta wali kutichitira.

Baibolo likuti tingalongora kuti tikuwonga ivyo Chiuta wali kutichitira usange “tikusungilira malango ghake.” (1 Yohane 2:3) Mwachitemwa Yehova Chiuta wakutiphalira ivyo tingachita kuti tikondwenge na umoyo pasono. (Yesaya 48:17, 18) Chiuta wakukhumba yayi kuti tisuzgikenge. Iyo wakulayizga kuti para tingalondezga malango ghake, tikhalenge makora sono kweniso kuzakasanga umoyo wamuyirayira.

ŴAZGANI MAZGU GHA CHIUTA, BAIBOLO, ZUŴA LILILOSE

Nesi wakulaŵiska kuchanya pamanyuma pa kuŵazga Baibolo panyengo ya kupumura ku ntchito. — Mungazakapona umaliro wa charu ichi para mukulomba kwa Chiuta kuti wamovwirani na kuchita khumbo lake

Zuŵa lililose tikurya chakurya kuti tilutilire kuŵa na umoyo. Kweni Yesu wakati: “Munthu wakhalenge wamoyo na chingwa pera chara, kweni na lizgu lililose ilo likufuma mu mulomo wa Yehova.”—Mateyu 4:4.

Mazuŵa ghano, mazgu gha Yehova ghakusangika mu Baibolo. Apo mukuŵazga buku lakupatulika ili, muwonenge umo Chiuta wakachitiranga vinthu na ŵanthu kale, sono, kweniso umo wachitirenge munthazi.

PEMPHERANI KWA CHIUTA KUTI WAMOVWIRANI

Kasi mungachita wuli usange mukukhumba kulondezga ivyo Chiuta wakutiphalira, kweni vikutisuzga kuti tileke kuchita vinthu ivyo iyo wakuti ni viheni? Para vyaŵa nthena, mungawovwirika usange mungamumanya makora Chiuta.

Tiyeni tiwone ivyo vikachitikira mwanakazi munyake uyo timuchemenge Sakura uyo wakaŵa muzaghali. Apo wakambanga kusambira Baibolo, wakamanya dango la Yehova lakuti “chimbirani uzaghali.” (1 Ŵakorinte 6:18) Sakura wakalomba kuti Chiuta wamupe nkhongono ndipo wakakwaniska kuleka vizgoŵi viheni. Kweni nipera wachali kulimbana na viyezgo. Iyo wakuti: “Para maghanoghano ghaheni yanizira, nkhumuphalira Yehova mu pemphero kufumira pasi pa mtima kuti panekha ningakwaniska yayi. Pakuti pemphero ndankhongono chomene, lanovwira kuti niŵe pafupi na Yehova.” Nga ni Sakura, ŵanthu ŵanandi ŵakwamba kumumanya makora Chiuta. Iyo wakuŵapa nkhongono izo ŵakukhumbikwira kuti ŵasinthe umoyo wawo kuti ŵamukondweske.—Ŵafilipi 4:13.

Para mwamumanya makora Chiuta, ndipo ‘Chiuta nayo wamumanyaninge’ nga mubwezi wake. (Ŵagalatiya 4:9; Salimo 25:14) Para vyaŵa nthena mbwenu muzamuŵa ŵakwenelera kuzakapona na kukhala mu charu chiphya. Kweni kasi vinthu vizamuŵa wuli mu charu chiphya? Nkhani yakulondezgapo yilongosorenge.

a Yehova ni zina la Chiuta nga umo Baibolo likuyowoyera.