Vyose Vili mu Mawoko Ghinu Kuti Munthazi Vizakamwenderani Makora

Vyaka pafupifupi 3,500 ivyo vyajumpha, Yehova Chiuta wakaphalira awo ŵakamusopanga ivyo ŵangachita kuti vinthu viŵayendere makora. Iyo wakati: “Naŵika pamaso pinu umoyo na nyifwa, thumbiko na nthembo. Ntheura sorani umoyo kuti muŵe ŵamoyo, imwe na ŵana ŵinu.”​—Dotoronome 30:19.

Kuti vinthu viŵayendere makora, ŵanthu aŵa ŵakeneranga kusankha makora. Nase ndimo viliriso mazuŵa ghano. Baibolo likulongosora umo tingasankhira kuti vinthu vizakatendere makora munthazi. Likuti: “Mutemwe Yehova Chiuta winu, mupulikire mazgu ghake.”​—Dotoronome 30:20.

KASI TINGACHITA WULI KUTI TITEMWE YEHOVA NA KUPULIKIRA MAZGU GHAKE?

SAMBIRANI MU BAIBOLO: Kuti mutemwe Yehova, chakwamba mukwenera kusambira za iyo mu Baibolo. Apo mukusambira muwonenge kuti iyo ni Chiuta wachitemwa uyo wakumukhumbirani viwemi. Iyo wakumupemphani kuti mulombenge kwa iyo “chifukwa wakumupwelelerani.” (1 Petrosi 5:7) Baibolo likutiphalira kuti usange mwaŵikapo mtima kusendelera kwa iyo, “iyo wasendelerenge kwa imwe.”​—Yakobe 4:8.

LONDEZGANI IVYO MUKUSAMBIRA: Kupulikira Yehova chikung’anamura kulondezga ulongozgi wake wavinjeru uwo uli mu Baibolo. Para mwachita nthena, ‘vinthu vimwenderaninge makora, ndipo muchitenge mwavinjeru.’​—Joshuwa 1:8.