Yehova Wakumutemwani Chomene

1. Kasi Yehova wakuwonamo vichi mu ŵanthu ŵake?

YEHOVA CHIUTA “wakukondwa na ŵanthu ŵake.” (Sal. 149:4) Fundo iyi njakukondweska chomene. Yehova wakuwona makhaliro ghithu ghawemi. Wakuwona kuti tingasintha na kuŵa ŵanthu ŵawemi, ndipo wakutovwira kuti tiŵe ŵabwezi ŵake. Usange tilutilirenge kugomezgeka, iyo waŵenge nase muyirayira.​—Yoh. 6:44.

2. Chifukwa wuli ŵanyake vikuŵasuzga kugomezga kuti Yehova wakuŵatemwa?

² Ŵanyake ŵangati, ‘Nkhumanya kuti Yehova wakutemwa ŵanthu ŵake nga gulu, kweni kasi ningagomezga wuli kuti Yehova wakunitemwa ine panekha?’ Chifukwa wuli ŵanyake ŵangafumba nthena? Oksanab, uyo wakakumana na masuzgo ghakuru apo wakaŵa mwana muchoko, wakuti: “Nkhakondwa chomene nkhati nabatizika na kwamba upayiniya. Kweni pakati pajumpha vyaka 15, nkhasuzgikanga chomene maghanoghano chifukwa cha kukumbukira vinthu viheni ivyo vikanichitikira apo nkhaŵa muchoko. Nkhamba kughanaghana kuti Yehova waleka kunitemwa ndipo nili wakwenelera nadi yayi kutemweka na iyo.” Yua, uyo nayo wakakumana na masuzgo ghanandi apo wakaŵa muchoko, wakuti: “Nkhajipeleka kwa Yehova chifukwa nkhakhumbanga kumukondweska. Kweni nkhagomezganga yayi kuti iyo wanganitemwa.”

3. Kasi mu nkhani iyi tisangenge mazgoro gha mafumbo wuli?

³ Nga Mbakhristu ŵakugomezgeka awo taŵazunura kukwambilira, namwe mukumutemwa chomene Yehova, kweni nyengo zinyake mungakayika usange nayo wakumutemwani. Chifukwa wuli mukwenera kugomezga kuti wakumutemwani nadi? Ndipo ntchivichi chingamovwirani para mukughanaghana kuti Yehova wakumutemwani yayi? Tiyeni tisange mazgoro gha mafumbo agha.

NTCHIHENI CHOMENE KUKAYIKIRA KUTI YEHOVA WAKUTITEMWA

4. Chifukwa wuli ntchiheni chomene kukayika kuti Yehova wakutitemwa?

⁴ Chitemwa chikutovwira chomene. Tingamuteŵetera Yehova na mtima wose nanga tingasanga na masuzgo, para tikugomezga kuti Yehova wakutitemwa kweniso wakutovwira. Kweni para tikukayika kuti Chiuta wakutitemwa, ‘nkhongono zithu ziŵenge zichoko.’ (Zinth. 24:10) Ndipo para talopwa na kwamba kukayika kuti Chiuta wakutitemwa, tizamutondeka kujivikilira kwa Satana.​—Efe. 6:16.

5. Kasi ntchivichi chachitikira Ŵakhristu ŵanyake chifukwa cha kukayika kuti Chiuta wakuŵatemwa?

⁵ Ŵakhristu ŵanyake ŵakugomezgeka mazuŵa ghano ŵalopwa mwauzimu chifukwa cha kukayika. Mubali mulara munyake zina lake James, wakuti: “Nangauli nkhateŵeteranga pa Beteli, kweniso nkhakondwanga chomene kupharazgira ŵanthu mu chigaŵa cha mpingo wa chiyowoyero chinyake, kweni nkhawonanga nga Yehova wakukondwa yayi na ivyo nkhachitanga. Ndipo nkhafika na pa kukayika kuti Yehova wakapulikanga yayi malurombo ghane. Eva uyo wakuchita uteŵeti wanyengo zose, wakuti: “Nkhawona kuti ntchiheni chomene kukayika kuti Yehova wakukutemwa, chifukwa vikukhwaska vyose ivyo ukuchita pakumuteŵetera. Ivi vikupangiska munthu kuŵavya khumbo lakuchita vinandi pakuteŵetera Yehova kweniso kumuteŵetera mwakukondwa.” Michael, uyo ni mupayiniya wanyengozose kweniso mubali mulara, wakuti: “Para wamunthu ukugomezga yayi kuti Chiuta wakukutemwa, ukupatukako kwa iyo.”

6. Kasi tikwenera kuchita wuli para tamba kughanaghana kuti Chiuta wakutitemwa yayi?

⁶ Viyelezgero ivi vikulongora uheni wakukayika kuti Chiuta wakutitemwa. Kweni kasi tikwenera kuchita vichi para tamba kuwona nga Chiuta wakutitemwa yayi? Tikwenera kukanizga maghanoghano agha mwaluŵiro. Mupemphani Yehova kuti wamovwirani kuwuskamo “vyenjezgo vya mu maghanoghano” kuti muŵe na ‘mtende wa Chiuta uwo uvikilirenge mitima yinu.’ (Sal. 139:23; Fil. 4:6, 7) Ndipo manyani kuti ndimwe pera yayi mukujipulika nthena. Pali ŵabali na ŵadumbu ŵanyake ŵakugomezgeka awo nawo ŵali na suzgo ili. Ŵateŵeti ŵa Yehova ŵa mu nyengo yakale nawo ŵakalimbananga na masuzgo ghakuyana waka. Tiyeni tiwone ivyo tingasambirako kwa mpositole Paulosi.

IVYO TIKUSAMBIRAKO KWA MPOSITOLE PAULOSI

7. Kasi Paulosi wakasangana na masuzgo wuli?

⁷ Kasi nyengo zinyake mukuwona kuti muli na milimo yinandi ndipo chikuŵa chakusuzga kuyikwaniska kuchita? Usange ni nthena, mungapulikiska umo Paulosi nayo wakajipulikiranga. Iyo wakenjelweranga mpingo umoza yayi, kweni “mipingo yose.” (2 Kor. 11:23-28) Kasi matenda ghakumupangiskani kuti muleke kuŵa ŵakukondwa? Paulosi wakasuzgika kwanyengo yitali na “munga mu thupi.” Suzgo ili likwenera kuti likaŵa la matenda, ndipo wakakhumbanga chomene kuti munga uwu ufumeko kwa iyo. (2 Kor. 12:7-10) Kasi nyengo zinyake mukujiwona kuti ndimwe ŵambura kwenelera chifukwa cha ivyo mukubudiska? Ndimo nyengo zinyake Paulosi nayo wakajipulikiranga. Nyengo yinyake wakati iyo ni ‘munthu wakusuzgika,’ chifukwa nyengo zose wakachitanga kusuzgikira kuti wachite icho ntchiwemi.​—Rom. 7:21-24.

8. Kasi ntchivichi chikawovwira Paulosi kuzizipizga masuzgo agho wakakumana nagho?

⁸ Nangauli Paulosi wakakumana na masuzgo ghose agha, kweni wakalutilira kuteŵetera Yehova. Kasi chikamovwira ntchivichi? Nangauli wakamanyanga kuti wakaŵa munthu wakwananga, kweni wakaŵa na chipulikano chakukhora mu sembe yakuwombora. Wakamanyanga makora ivyo Yesu wakalayizga vyakuti, “waliyose uyo wakupulikana mwa [Yesu] . . . waŵenge na umoyo wamuyirayira.” (Yoh. 3:16; Rom. 6:23) Nadi, Paulosi wakaŵa na chipulikano mu sembe yakuwombora. Iyo wakagomezganga kuti Yehova ngwakunozgeka kugowokera nanga ni ŵanthu awo ŵachita kwananga kukuru usange ŵalapa.​—Sal. 86:5.

9. Kasi tikusambirapo vichi pa fundo iyo Paulosi wakayowoya pa Ŵagalatiya 2:20?

⁹ Paulosi wakagomezgangaso kuti Chiuta wakumutemwa chomene chifukwa wakatuma Mwana wake Yesu kuzakamufwira. (Ŵazgani Ŵagalatiya 2:20.) Wonani mazgu ghakukhozga agho ghali kuumaliro wa vesi ili. Paulosi wakati: “Mwana wa Chiuta, . . . wakanitemwa ndipo wakajipeleka chifukwa cha ine.” Paulosi wakajiwonanga kuti ni muheni chomene yayi kuti m’paka Chiuta waleke kumutemwa. Iyo wakaghanaghanapo yayi kuti, ‘Nkhumanya chifukwa icho Yehova wakutemwera ŵabali ŵane, kweni vingachitika yayi kuti ine wanitemwe.’ Paulosi wakakumbuska Ŵaroma kuti: “Apo tikaŵa kuti tichali ŵakwananga, Khristu wakatifwira.” (Rom. 5:8) Palije icho chingapangiska kuti Chiuta waleke kutitemwa.

10. Kasi tikusambirapo vichi pa Ŵaroma 8:38, 39?

¹⁰ Ŵazgani Ŵaroma 8:38, 39. Paulosi wakagomezganga chomene kuti Chiuta wakumutemwa. Iyo wakalemba kuti palije vinthu ivyo “vitipaturenge . . . ku chitemwa cha Chiuta.” Paulosi wakamanyanga umo Yehova wakachitira vinthu mwakuzikira na mtundu wa Israyeli. Ndipo wakamanyangaso umo Yehova wakamulongolera lusungu. Apa, tingati Paulosi wakayowoyanga kuti, ‘Pakuti Chiuta wakatuma mwana wake kuti wazakanifwire, kasi chilipo chifukwa cha kukayikira kuti wakunitemwa?’​—Rom. 8:32.

11. Nangauli Paulosi wakachita zakwananga zikuru izo zikuyowoyeka pa 1 Timote 1:12-15, chifukwa wuli wakagomezganga kuti wakatemwekanga na Chiuta?

¹¹ Ŵazgani 1 Timote 1:12-15. Paulosi wakwenera kuti nyengo zinyake njuŵi yikamusuzganga para wakumbuka ivyo wakachita kumanyuma. Lekani tikuzizwa yayi kuti wakajiyowoya yekha kuti ngwakwananga “chomene.” Pambere Paulosi wandasambire unenesko, wakatambuzganga Ŵakhristu mu misumba yakupambanapambana. Ŵakhristu ŵanyake wakaŵajaliranga mu majele, ndipo ku ŵanyake wakazomerezgananga na khoti kuti ŵakomeke. (Mil. 26:10, 11) Paulosi wakwenera kuti wakajiyimbanga mulandu para wakumana na Mkhristu muwukirano uyo ŵapapi ŵake ŵakakomeka chifukwa cha iyo. Paulosi chitima chikamukoranga na ivyo wakachita kumanyuma, kweni pakaŵavya chakuti wangachita. Iyo wakagomezga waka kuti Yesu wakamufwira, ndipo wakalemba kuti: “Sono nili nthena chifukwa cha lusungu lukuru lwa Chiuta.” (1 Kor. 15:3, 10) Kasi ise tikusambirapo vichi? Gomezgani kuti Yesu wakamufwirani ndipo wali kupangiska kuti chiŵe chamachitiko kuti muŵe paubwezi wakukhora na Yehova. (Mil. 3:19) Chakuzirwa chomene kwa Chiuta ni ivyo tikuchita sono, kweniso ivyo tizamuchita kunthazi. Ivyo tikabudiska kumanyuma yayi, kwali tikaŵa Ŵakaboni ŵa Yehova pa nyengo iyo panji yayi.​—Yes. 1:18.

12. Kasi fundo iyo yili pa 1 Yohane 3:19, 20, yingatovwira wuli para tikujiwona kuti ndise ŵambura kuzirwa panji ŵambura kwenelera kutemweka?

¹² Nyengo zinyake para mukughanaghana kuti Yesu wakafwa chifukwa cha zakwananga zinu, mungamba kujiwona kuti, ‘Nili wakwenelera yayi mwaŵi uwu.’ Chifukwa wuli mungajiwona nthena? Mtima withu wakwananga ungatipusika, ungatipangiska kuti tijiwonenge ŵambura kuzirwa, panji ŵambura kutemweka. (Ŵazgani 1 Yohane 3:19, 20.) Para tamba kughanaghana nthena, tikwenera kukumbuka kuti “Chiuta ni mukuru kuluska mitima yithu.” Nanga tingaghanaghana kuti Yehova wangatitemwa yayi, panji wangatigowokera yayi zakwananga zithu, kweni unenesko ngwakuti, Adada ŵithu ŵakuchanya ŵakutitemwa, kweniso ŵangatigowokera zakwananga zithu. Ise tikwenera kugomezga waka kuti Yehova wakutitemwa. Kuti tigomezge, nyengo zose tikwenera kuŵerenga Mazgu ghake, kulomba nyengo zose, na kuchezga lumoza na ŵanthu awo ŵakumusopa. Chifukwa wuli ntchakuzirwa kuchita vinthu ivi?

KASI KUSAMBIRA BAIBOLO, LUROMBO, NA ŴABWEZI ŴAKUGOMEZGEKA, VINGATOVWIRA WULI?

13. Kasi kusambira Mazgu gha Chiuta kungatovwira wuli? (Wonani bokosi lakuti “Umo Mazgu gha Chiuta Ghakuŵawovwilira.”)

¹³ Musambirenge Baibolo zuŵa lililose, ndipo muzamumanya makora mikhaliro yinandi ya Yehova. Kweniso muzamumanya kuti wakumutemwani chomene. Para mukughanaghanirapo pa Mazgu gha Chiuta zuŵa lililose, vizamumovwirani kuti mughanaghanenge makora, na “kunyoloska vinthu” mu maghanoghano na mu mtima winu. (2 Tim. 3:16) Mubali munyake mulara zina lake Kevin, uyo wakasuzgikanga maghanoghano chifukwa cha kujiwona wambura kuzirwa, wakati: “Kuŵerenga Salimo 103 na kughanaghanirapo pa lemba ili, kwanovwira chomene kuti nambe kughanaghana mwakwenelera, kweniso kumanya umo Yehova wakuniwonera.” Eva uyo tamuzunura kukwambilira wakuti: “Zuŵa lililose namise nkhughanaghanira pa Mazgu gha Yehova. Ivi vikunovwira kuti niŵe na mtende wa mu mtima kweniso kukhozga chipulikano chane.”

14. Kasi lurombo lungatovwira wuli?

¹⁴ Nyengo zose mulombenge. (1 Tes. 5:17) Ŵanthu ŵakuŵa paubwezi wakukhora para ŵakuyowoyeskana kweniso ŵakuphalirana vyakusingo. Ndimoso tikwenera kuchitira kuti ubwezi withu na Yehova ukhore. Para tikumuphalira mu lurombo maghanoghano ghithu, umo tikujipulikira, kweniso ivyo tikufipa navyo mtima, tikulongora kuti tikumugomezga, ndipo tikumanya kuti wakutitemwa. (Sal. 94:17-19; 1 Yoh. 5:14, 15) Yua, uyo tamuzunura kukwambilira wakuti: “Para nkhulomba, nkhumuphalira vinandi chomene Yehova padera pa umo zuŵa lendera. Nkhumuphalira ivyo vili ku mtima wane kweniso umo nkhujipulikira. Pachoko na pachoko, namba kuwona kuti Yehova wali nga ni bwana wa pa kampani yayi, kweni nga ni Dada uyo wakutemwa chomene ŵana ŵake.”—Wonani Bokosi lakuti “Kasi Mwaŵerenga?”

15. Kasi Yehova wakulongora wuli kuti wakutighanaghanira?

¹⁵ Muchezgenge na ŵabwezi ŵakugomezgeka; iwo ni vyawanangwa vyakufuma kwa Yehova. (Yak. 1:17) Adada ŵithu ŵakuchanya ŵakutighanaghanira chomene pakutipa mbumba yauzimu ya ŵabali na ŵadumbu awo ‘ŵakutitemwa nyengo zose.’ (Zinth. 17:17) Mu kalata iyo Paulosi wakalembera Ŵakolose, wakazunuramo Ŵakhristu ŵanyake awo ŵakamovwira chomene. Iyo wakati Ŵakhristu aŵa ‘ŵakamusanguluskanga chomene.’ (Kol. 4:10, 11) Yesu Khristu nayo wakawonganga chomene wovwiri wakufuma ku ŵabwezi ŵake, ŵangelo na ŵanthu.​—Luka 22:28, 43.

16. Kasi ŵabwezi ŵakugomezgeka ŵangatovwira wuli kuti tiŵe paubwezi wakukhora na Yehova?

¹⁶ Kasi mukupindura na wovwiri wakufuma ku ŵabwezi ŵakugomezga awo Yehova watipa? Para tikuphalirako mubwezi withu wakukhwima ivyo tikwenjerwa navyo, chikung’anamura kuti ndise ŵakulopwa yayi. Kweni kungatovwira kuti tiŵe ŵakuvikilirika. Wonani ivyo wakayowoya James uyo tamuzunura kukwambilira, wakati: “Kuŵa paubwezi na Ŵakhristu ŵakukhwima mwauzimu kwanovwira chomene. Para namba kusuzgika maghanoghano, ŵabwezi ŵane ŵakuzirwa aŵa, ŵakunitegherezga mwakuzikira na kunikumbuska kuti ŵakunitemwa chomene. Chifukwa cha ivyo ŵabwezi ŵane ŵakunichitira, nkhuwona kuti Yehova wakunitemwa kweniso wakunipwelelera.” Lekani ntchakuzirwa chomene kuŵa paubwezi wakukhora na ŵabali na ŵadumbu withu ŵauzimu.

KHALILIRANI MU CHITEMWA CHA YEHOVA

17-18. Kasi tikwenera kupulikira njani, ndipo chifukwa wuli?

¹⁷ Satana wakukhumba kuti tileke kuchita icho ntchiwemi. Iyo wakukhumba kuti tighanaghanenge kuti Yehova wakutitemwa yayi, kweniso kuti Yehova walije nase ntchito, ndipo wangatiponoska yayi. Kweni nga umo tawonera kale, uwu mbutesi.

¹⁸ Yehova wakumutemwani. Iyo wakumuwonani kuti muli ŵakuzirwa chomene. Para mukumupulikira, ‘mukhalilirenge mu chitemwa chake,’ nga ni Yesu. (Yoh. 15:10) Ntheura kupulikira Satana yayi panji mtima winu wakupusika. Kweni pulikirani Yehova uyo wakuwona viwemi mwa munthu waliyose payekha. Gomezgani kuti iyo “wakukondwa na ŵanthu ŵake,” kusazgapo na imwe uwo.