Gomezgani Kuti Yehova Wakumutemwani

1. Chifukwa wuli mukajipeleka kwa Yehova? (Wonaniso chithuzi.)

KASI mukukumbuka apo mukajipelekera kwa Yehova? Mukachita nthena chifukwa chakuti mukamumanya makora kweniso kwamba kumutemwa. Mukamulayizga kuti mudangizgenge khumbo lake pa umoyo winu kweniso mulutilirenge kumutemwa na mtima winu wose, umoyo winu wose, maghanoghano ghinu ghose, na nkhongono zinu zose. (Mrk. 12:30) Kufuma nyengo iyo, chitemwa chinu pa iyo chikulutilira kukura. Kweni kasi mungazgora wuli usange munthu munyake wangamufumbani kuti: “Kasi mukumutemwa nadi Yehova?” Panji mungamuzgora mwaluŵiro kuti, “Nkhumutemwa chomene kuluska waliyose kweniso chinthu chilichose!”

2-3. Kasi Yehova wakukhumba tikhorwe kuti vichi, ndipo tidumbiskanenge vichi mu nkhani iyi? (Yeremiya 31:3)

² Kweni kasi mungazgora wuli usange munyake wangamufumbani kuti, “Kasi mukugomezga kuti Yehova wakumutemwani nadi?” Kasi mungaziwulika kuzgora chifukwa cha kughanaghana kuti ndimwe ŵakwenelera yayi kutemweka na Yehova? Mudumbu munyake uyo wakalereka mwakusuzgikira wakati: “Nkhumanya kuti Yehova nkhumutemwa, nakuti nkhukayika yayi napachoko. Kweni icho nkhukayikira kanandi, ni usange Yehova wakunitemwa nadi.” Ntheura kasi ntchivichi chingamovwirani kugomezga kuti Yehova wakumutemwani nadi?

³ Yehova wakukhumba kuti mugomezgenge kuti wakumutemwani. (Ŵazgani Yeremiya 31:3.) Unenesko ngwakuti Yehova ndiyo wali kumuguzirani kwa iyo. Ndipo mukati mwajipeleka kwa iyo na kubatizika, wakamupani chawanangwa chakuzirwa chomene, icho ntchitemwa chake chakugomezgeka. Chitemwa ichi ntchamuyirayira ndipo chikulongora kuti wazamumulekanipo yayi. Chitemwa ichi chikumuchiska kuti wawonenge ŵateŵeti ŵake wose kusazgapo na imwe wuwo, ‘kuŵa chuma chake chapadera.’ (Mal. 3:17) Yehova wakukhumba kuti namwe mukhorwe kuti wakumutemwani, nga umo wakachitira mpositole Paulosi. Paulosi wakakhorwa kuti Yehova wakamutemwanga ndipo wakalemba kuti: “Nakhorwa ine kuti nanga ni nyifwa, umoyo, ŵangelo, maboma, vinthu ivyo viliko sono, vinthu ivyo vikwiza, nkhongono, kutumphuka, kunyang’amira, panji chilengiwa chinyake chilichose, vitipaturenge yayi ku chitemwa cha Chiuta icho chili mwa Khristu Yesu Fumu yithu.” (Rom. 8:​38, 39) Mu nkhani iyi, tidumbiskanenge chifukwa icho ntchakuzirwa chomene kugomezga kuti Yehova wakutitemwa kweniso ivyo tingachita kuti tilutilire kukhorwa kuti wakutitemwa.

CHIFUKWA ICHO TIKWENERA KUGOMEZGERA KUTI YEHOVA WAKUTITEMWA

4. Kasi Satana wakukhumba tigomezge vichi, ndipo tingamutonda wuli?

⁴ Para tikugomezga kuti Yehova wakutitemwa, tingalimbana na “mauryarya” gha Satana. (Efe. 6:11) Satana wachitenge chilichose kuti watilekeske kuteŵetera Yehova. Uryarya unyake uwo Satana wakugwiliskira ntchito ngwakuti Yehova wakutitemwa yayi. Kuluwa yayi kuti Satana wakugwiliskira ntchito m’pata uliwose uwo wasanga. Kanandi wakutiwukira para talopwa chifukwa cha vinthu ivyo vikatichitikirapo kumanyuma, masuzgo agho tikusangana nagho sono, panji vinthu vya munthazi ivyo tikufipa navyo mtima. (Zinth. 24:10) Satana wali nga ni nkhalamu iyo yikusangirapo m’pata kukora nyama iyo yikuwoneka yambura kuvikilirika. Ntheura wakusangirapo m’pata apo tagongowa kuti tithere. Kweni para tilutilirenge kugomezga kuti Yehova wakutitemwa, tiŵenge ŵakunozgeka ‘kwimikana’ na Satana na mauryarya ghake ghose.—1 Pet. 5:​8, 9; Yak. 4:7.

5. Chifukwa wuli ntchakuzirwa kuwona kuti Yehova wakumutemwani na kumuwonani kuti ndimwe ŵakuzirwa?

⁵ Para tikugomezga kuti Yehova wakutitemwa, ubwezi withu na iyo ulutilirenge kuŵa wakukhora. Wonani chifukwa icho tikuyowoyera nthena. Yehova wakatilenga munthowa yakuti titemwenge ŵanji kweniso nase tilongorekenge chitemwa. Para munthu munyake walongora kuti wakutitemwa, nase mwakawiro tikwamba kumutemwa. Ntheura para tikuwona kuti Yehova wakutitemwa na kutiwona kuti ndise ŵakuzirwa, nase timutemwenge chomene. (1 Yoh. 4:19) Ndipo apo tikwamba kumutemwa chomene, nayo watitemwenge chomene. Baibolo likutiphalira kuti: “Sendelerani kwa Chiuta, ndipo iyo wasendelerenge kwa imwe.” (Yak. 4:8) Ipo kasi tingachita wuli kuti tigomezge kuti Yehova wakutitemwa?

KASI NTCHIVICHI CHINGAMOVWIRANI KUGOMEZGA KUTI YEHOVA WAKUMUTEMWANI?

6. Kasi mukwenera kuchita wuli usange mukukayikira kuti Yehova wakumutemwani?

⁶ Koserani kulomba ndipo mulombenge mwakudunjika. (Luka 18:1; Rom. 12:12) Mulombani Yehova kanandi waka pa zuŵa usange ntchakukhumbikwa, kuti wamovwirani kujiwona nga umo iyo wakumuwonerani. Nangauli ntchakusuzga kukhorwa kuti Yehova wakukutemwa usange wamunthu ukujiwona mwambura kwenelera, kweni kumbukani kuti Yehova ni mukuru kuluska mtima winu. (1 Yoh. 3:​19, 20) Kweniso wakumumanyani makora kuluska umo mwaŵeneko mukujimanyira; wakuwona mikhaliro yiwemi iyo muli nayo nanga ni para mwaŵenecho mukumanya yayi kuti muli nayo. (1 Sam. 16:7; 2 Mid. 6:30) Ntheura kuziwulika yayi kumuphalira umo mukujipulikira, na kumulomba kuti wamovwirani kugomezga kuti wakumutemwani. (Sal. 62:8) Kufuma apo chitani vinthu kuyana na malurombo ghinu mwakulondezga masachizgo ghakulondezgapo agha.

7-8. Kasi lemba la Salimo likutisimikizgira wuli kuti Yehova wakutitemwa?

⁷ Gomezgani ivyo Yehova wakuyowoya. Yehova wakakhuŵilizga ŵanalume na mzimu wake kuti ŵalembe Baibolo. Ntheura ivyo ŵakalemba vyakukhwaskana na iyo ni vyaunenesko. Wonani umo wamasalimo wakamulongosolera Yehova, wakati: “Yehova wali pafupi na ŵakusweka mu mtima. Wakuponoska awo ŵagongoweskeka.” (Sal. 34:18; mazgu ghamusi) Para muli na chitima chomene, mungamba kujiwona kuti muli mwekha. Kweni Yehova wakulayizga kuti pa nyengo zanthena izi, wakuŵa namwe pafupi chifukwa wakuwona kuti mukukhumbikwira chomene wovwiri wake. Pa salimo linyake, Davide wakalemba kuti: “Sungani masozi ghane mu thumba linu lachikumba.” (Sal. 56:8) Yehova wakuwona para muli na chitima kweniso para mukupulika vyakuŵinya. Wakumughanaghanirani chomene ndipo wakumanya ivyo mukukumana navyo. Mukayowoyero kanyake, tingati wakusunga masozi ghinu ndipo wakughawona kuti ngakuzirwa, nga umo munthu uyo wakwenda mu chipalamba wakuzirwiskira maji ghake agho wanyamura mu botolo. Pa Salimo 139:​3, tikuŵazga kuti: “[Imwe a Yehova] mendero ghane ghose muli kuzgoŵerana nagho.” Yehova wakuwona mendero ghinu ghose, kweni wakuŵika waka mtima pa viwemi ivyo mukuchita. (Heb. 6:10) Chifukwa wuli? Chifukwa wakuzirwiska chomene vyose ivyo mukuyezgayezga kuchita kuti mumukondweske.a

⁸ Kwizira mu Baibolo, vikuŵa nga Yehova wakuyowoya kuti: “Nkhukhumba mumanye kuti nkhumutemwani chomene kweniso nkhuŵikako mahara kwa imwe.” Kweni nga umo tasambilira kale, Satana wakukhumba kuti mugomezge utesi wakuti Yehova wakumutemwani yayi. Ntheura usange nyengo zinyake mukukayikira kuti Yehova wakumutemwani, ghanaghaniranipo na kujifumba kuti, ‘Kasi nigomezgenge njani, “wiske wa utesi” panji “Chiuta waunenesko”?’—Yoh. 8:44; Sal. 31:5.

9. Kasi Yehova wakuŵasimikizgira vichi ŵanthu awo ŵakumutemwa? (Ekisodo 20:​5, 6)

⁹ Ghanaghanirani umo Yehova wakujipulikira na awo ŵakumutemwa. Ghanaghanirani ivyo Yehova wakaphalira Mozesi kweniso Ŵaisrayeli. (Ŵazgani Ekisodo 20:​5, 6.) Yehova wakulayizga kuti walutilirenge kulongora chitemwa chakugomezgeka ku awo ŵakumutemwa. Mazgu agha ghakutisimikizgira kuti Chiuta withu uyo ngwakugomezgeka, wazamulekapo yayi kulongora chitemwa awo ŵakumutemwa. (Neh. 1:5) Ntheura usange nyengo yinyake mukukhumba kuwona ukaboni wakuti Yehova wakumutemwani, ghanaghaniranipo na kujifumba kuti, ‘Kasi ine nkhumutemwa Yehova?’ Kufuma apo, ghanaghanirani fundo iyi: Usange mukumutemwa ndipo mukuyezgayezga kuchita vyose ivyo mungafiska kuti mumukondweske, mbwenu muli nawo ukaboni wakuti iyo wakumutemwani chomene. (Dan. 9:4; 1 Kor. 8:3) Mukayowoyero kanyake tingati, usange imwe mukukayikira yayi kuti mukumutemwa Yehova, mbwenu palije chifukwa chakukayikira kuti iyo wakumutemwani. Iyo ngwakugomezgeka ndipo chitemwa chake ntchamuyirayira.

10-11. Kasi Yehova wakukhumba kuti muyiwonenge wuli sembe yakuwombora? (Ŵagalatiya 2:20)

¹⁰ Mughanaghanirengepo pa sembe yakuwombora. Sembe yakuwombora ya Yesu Khristu, ntchawanangwa chapadera chomene icho Yehova wali kutipa. (Yoh. 3:16) Kweni kasi chawanangwa ichi chikumukhwaskani imwe pamwekha? Enya! Ghanaghanirani vya mpositole Paulosi. Kumbukani kuti wakachita zakwananga zinyake zikuru pambere wandazgoke Mkhristu, kweniso wakalimbananga na masuzgo ghanyake agho wakaŵa nagho. (Rom. 7:​24, 25; 1 Tim. 1:​12-14) Kweni wakakhorwa na mtima wose kuti sembe yakuwombora ntchawanangwa icho Yehova wakamupa iyo payekha. (Ŵazgani Ŵagalatiya 2:20.) Kumbukani kuti Yehova ndiyo wakakhuŵilizga Paulosi kulemba mazgu agha. Ndipo vyose ivyo vili mu Baibolo vili kulembeka kuti vitisambizge. (Rom. 15:4) Mazgu gha Paulosi ghakulongora kuti Yehova wakukhumba kuti muwonenge sembe yakuwombora kuŵa chawanangwa chapadera kwa imwe pamwekha. Para mukuwona sembe yakuwombora munthowa iyi, mugomezgenge chomene kuti Yehova wakumutemwani imwe pamwekha.

¹¹ Tikuwonga chomene Yehova chifukwa cha kutuma Yesu pa charu chapasi kuzakatifwira. Kweni chifukwa chinyake icho Yesu wakizira pa charu chapasi, nkhuphalira ŵanthu unenesko wakukhwaskana na Chiuta. (Yoh. 18:37) Unenesko uwu ukusazgaposo umo Yehova wakuwonera ŵana ŵake.

UMO YESU WAKUTOVWILIRA KUGOMEZGA KUTI YEHOVA WAKUTITEMWA

12. Chifukwa wuli tingagomezga ivyo Yesu wakayowoya vyakukhwaskana na Yehova?

¹² Apo Yesu wakaŵa pa charu chapasi, wakavumbura umo Yehova waliri. (Luka 10:22) Tili na chifukwa chakupulikikwa chakugomezgera ivyo Yesu wakayowoya vyakukhwaskana na Yehova. Iyo wakakhala na Adada ŵake a Yehova kuchanya kwa vyaka vinandi chomene pambere wandize pa charu chapasi. (Kol. 1:15) Yesu wakumanya kuti Adada ŵake ŵakumutemwa chomene. Ndipo wakawonaso umo Adada ŵake ŵakulongolera chitemwa ŵangelo ŵakugomezgeka kweniso ŵanthu wose ŵakugomezgeka pano pasi. Kasi Yesu wakovwira wuli ŵanji kusimikizga kuti Chiuta wakuŵatemwa?

13. Kasi Yesu wakukhumba kuti timuwonenge wuli Yehova?

¹³ Yesu wakukhumba kuti tiwonenge Yehova nga umo iyo wakumuwonera. Mu mabuku gha Makani Ghawemi, Yesu wakachema Yehova kuti “Adada” maulendo 139. Ndipo apo wakayowoyanga na ŵalondezgi ŵake, wakagwiliskiranga ntchito mazgu nga ghakuti “Awiskemwe” panji “Awiskemwe ŵakuchanya.” (Mat. 5:16; 6:26) Mazgu ghakulongosora vesi gha pa Mateyu 5:16 ghakuti: “Ŵateŵeti ŵanyake ŵa Chiuta ŵakayowoyanga vithokozo vinandi pakulongosora na kuchema Yehova, nga ni ‘Wankhongonozose,’ ‘Wapachanya Nkhanira,’ na ‘Mlengi Mukuru.’ Kweni Yesu wakayowoya kanandi waka lizgu lipusu lakuti ‘Awiskemwe’ panji ‘Adada’ pakukhumba kulongora wenenawene uwo Chiuta wali nawo na ŵasopi ŵake.” Apa ntchakuwonekerathu kuti Yesu wakukhumba tiwonenge Yehova nga umo iyo wakumuwonera—kuti ni Dada wachitemwa uyo wakutemwa chomene ŵana ŵake. Tiyeni tiwone maulendo ghaŵiri agho Yesu wakagwiliskira ntchito mazgu ghakuti “Adada” panji “Awiskemwe.”

14. Kasi Yesu wakalongora wuli kuti waliyose wa ise ngwakuzirwa mu maso mwa Adada ŵithu ŵakuchanya? (Mateyu 10:​29-31) (Wonaniso chithuzi.)

¹⁴ Chakwamba, tiyeni tiwone ivyo Yesu wakayowoya pa Mateyu 10:​29-31. (Ŵazgani.) Tumpheta nthuyuni tuchokotuchoko uto tuzamumutemwapo yayi Yehova panji kumusopa. Ndipouli, Adada ŵithu ŵakuzirwiska nanga nkhampheta kamoza, ndipo para kawa pasi ŵakumanya. Ipo kuli wuli imwe mukumuteŵetera mwakugomezgeka chifukwa chakuti mukumutemwa! Pakuyowoya vya mazgu ghakuti “nanga ni masisi gha ku mutu kwinu ghose ghali kupendeka,” mazgu ghakulongosora vesi gha pa vesi 30 ghakuti: “Pakuti Yehova wakuwona tunthu tuchoko chomene nthena, tikugomezga kuti wakuŵikako mahara kwa waliyose uyo wakulondezga Khristu.” Apa vikulongolerathu kuti Yesu wakukhumba waliyose wamanye kuti ngwakuzirwa mu maso mwa Adada ŵithu ŵakuchanya.

15. Kasi mazgu gha Yesu gha pa Yohane 6:44 ghakumuphalirani vichi vyakukhwaskana na Adada ŵinu ŵakuchanya?

¹⁵ Tiyeni tiwoneso ulendo unyake apo Yesu wakagwiliskira ntchito mazgu ghakuti “Adada” pakuyowoya vya Yehova. (Ŵazgani Yohane 6:44.) Adada ŵinu ŵakuchanya ndiwo ŵakamuguzirani mu unenesko. Chifukwa wuli ŵakamuguzani? Chifukwa ŵakawona mu mtima winu kuti muli na maghanoghano ghakwenelera. (Mil. 13:48) Mazgu ghakulongosora vesi gha pa Yohane 6:44 ghakuti Yesu wakwenera kuti wakakora mazgu gha Yeremiya, agho pajintha nkhani iyi ghakuti: “Nakuguza [na chitemwa chakugomezgeka, panji kuti nalutilira kukulongora chitemwa chakugomezgeka].” (Yer. 31:​3, yaniskani na Hoseya 11:4.) Ghanaghanirani ivyo mazgu agha ghakung’anamura. Adada ŵithu ŵakuchanya ŵakulutilira kuwona viwemi mwa imwe, ivyo panji mwaŵenecho mungaviwona yayi.

16. (a) Kasi tingati Yesu wakutiphalira vichi, ndipo chifukwa wuli tikwenera kumugomezga? (b) Kasi mungachita wuli kuti mukhorwe kuti Yehova ni Dada winu muwemi chomene? (Wonani bokosi lakuti “Dada Muwemi Chomene.”)

¹⁶ Pakulongosora Yehova kuti Mbadada ŵithu, tingati Yesu wakutiphalira kuti: “Yehova Mbadada ŵane pera yayi; namweso Mbadada ŵinu. Ndipo nkhumusimikizgirani kuti ŵakumutemwani chomene kweniso kuŵikako mahara kwa imwe pamwekha.” Ntheura usange nyengo zinyake mukukayikira usange Yehova wakumutemwani, ghanaghaniranipo na kujifumba kuti, ‘Kasi nkhwenera kughagomezga yayi mazgu agho wakayowoya Mwana wawo uyo wakuŵamanya makora chomene Adada ŵithu, ndipo nyengo zose wakuyowoya unenesko?’—1 Pet. 2:22.

LUTILIRANI KUCHITAPO KANTHU KUTI MUGOMEZGE KUTI YEHOVA WAKUMUTEMWANI

17. Chifukwa wuli tikwenera kulutilira kuchitapo kanthu kuti tigomezge kuti Yehova wakutitemwa?

¹⁷ Tikwenera kulutilira kuchitapo kanthu kuti tigomezge kuti Yehova wakutitemwa. Nga umo tasambilira kale, mulwani withu Satana ni muryarya, ndipo wayezgeskenge kuchita vyose ivyo wangafiska kuti watilekeske kuteŵetera Yehova. Kuti watilopweske, Satana walutilirenge kuyezga kutipangiska kugomezga kuti Chiuta wakutitemwa yayi. Ntheura tingazomerezganga yayi kuti Satana watipusike.—Yobu 27:5.

18. Kasi mungachita wuli kuti mulutilire kugomezga kuti Yehova wakumutemwani?

¹⁸ Kuti mulutilire kugomezga kuti Chiuta wakumutemwani, lutilirani kulomba kuti wamovwirani kuti mujiwonenge nga umo iyo wakumuwonerani. Ghanaghaniranipo pa ivyo awo ŵakalemba Baibolo ŵakalongosora vyakukhwaskana na chitemwa cha Yehova. Kweniso ghanaghaniranipo umo wakuchitira na ŵanthu awo ŵakumutemwa; wangaleka yayi kutemwa awo ŵakumutemwa. Ghanaghaniraniposo chifukwa icho mukwenera kuwonera sembe yakuwombora kuti ntchawanangwa icho wali kumupani imwe pamwekha. Ndipo gomezgani ivyo Yesu wali kuyowoya kuti Yehova ni Dada winu wakuchanya. Ntheura usange munyake wangamufumbani kuti, “Kasi mukugomezga kuti Yehova wakumutemwani?” na mtima wose muzamuzgora kuti, “Enya wakunitemwa! Ndipo zuŵa lililose nkhuchita vyose ivyo ningafiska kuti nilongore kuti nkhumutemwa!”