Chitemwa cha Chiuta Ntchamuyirayira

1-2. Kasi Ŵakhristu ŵanandi ŵakusangana na suzgo wuli?

GHANAGHANIRANI vya boti ilo likwenda pa maji ndipo kuli chimphepo chikuru. Vimajigha vikututuzgira boti uku na uku. Boti ili lingayeghekera waka kulikose uko majigha ghangalitutuzgira usange pangaŵavya munthu uyo wangaponya nyanguru pasi pa maji. Nyanguru wangawovwira boti ili kuti likhazikike na kuleka kuyegheka uku na uku na majigha, apo chimphepo chili mukati.

² Usange mukusangana na suzgo ilo lili nga ni majigha agho ghakuŵako para kuli chimphepo chikuru, namwe mungaŵa nga ni boti ili. Mwahuno mungajipulika munthowa yinyake, machero munthowa yinyakeso, nga ni boti ilo likuyeghekera uku na uku. Kweniso mwahuno mungasimikizga kuti Yehova wakumutemwani na kumovwirani, machero ghake mungamba kukayikira usange wakuwona suzgo ilo mukujumphamo. (Sal. 10:1; 13:1) Nyengo zinyake mubwezi winu wangamuphaliraniko fundo zakukhozga ndipo mungajipulikako makora kwakanyengo. (Zinth. 17:17; 25:11) Kweni pamanyuma mungambaso kukayikira usange Yehova wakumovwirani. Mungambaso kuwona kuti Yehova wakumuwonani kuti ndimwe ŵawakawaka. Kasi mwakuyelezgera mungaponya wuli pasi nyanguru winu apo mukusangana na suzgo? Mu mazgu ghanyake tingati, kasi mungasimikizga wuli na kulutilira kugomezga kuti Yehova wakumutemwani ndipo wamovwiraninge?

3. Kasi mazgu ghamusi ghakuti “chitemwa chakugomezgeka” agho ghali pa Salimo 31:7, na 136:1 ghakung’anamurachi, ndipo chifukwa wuli tingayowoya kuti Yehova ndiyo ntchiyelezgero chiwemi chomene pa nkhani iyi? (Wonaniso chithuzi.)

³ Nthowa yimoza iyo mwakuyelezgera mungaponyera pasi nyanguru winu panyengo ya suzgo, nkhukumbukira chitemwa chakugomezgeka cha Yehova. (Ŵazgani Salimo 31:7, mazgu ghamusi; 136:1, mazgu ghamusi.) Mazgu ghakuti “chitemwa chakugomezgeka” kanandi ghakuyowoya vya chitemwa chikuru kweniso kugomezgeka uko munthu wakuŵa nako pa mubwezi wake. Yehova ndiyo ntchiyelezgero chiwemi chomene pa nkhani yakuŵa na chitemwa chakugomezgeka. Nakuti Baibolo likumulongosora Yehova kuti ‘ngwakuzara na chitemwa chakugomezgeka.’ (Eks. 34:6, 7, mazgu ghamusi) Baibolo likuyowoyaso za Yehova kuti: “Ndimwe wakuzura na chitemwa chakugomezgeka ku wose awo ŵakuchema pa imwe.” (Sal. 86:5, mazgu ghamusi) Ghanaghanirani ivyo malemba agha ghakung’anamura: Yehova wazamuŵajowolapo yayi ŵateŵeti ŵake ŵakugomezgeka. Kukumbuka kuti Yehova ngwakugomezgeka, kungamovwirani kuponya pasi mwakuyelezgera nyanguru winu, para mwasangana na suzgo ilo lili nga ni majigha ghakofya gha pa nyanja.—Sal. 23:4.

KUMBUKANI KUTI CHITEMWA CHA YEHOVA NTCHIMOZA MWA VISAMBIZGO VYAKWAMBILIRA VYA MU BAIBOLO

4. Yowoyani visambizgo vyakwambilira vya mu Baibolo, ndipo longosorani chifukwa icho tikuvigomezgera chomene.

⁴ Nthowa yinyake iyo mungaponyera pasi nyanguru winu pa nyengo iyo mukusangana na masuzgo, nkhukumbuka kuti chitemwa cha Yehova ntchisambizgo chakwambilira cha mu Baibolo. Ntchivichi chikwiza mu maghanoghano ghinu para mwapulika mazgu ghakuti “chisambizgo chakwambilira cha mu Baibolo”? Panji mungaghanaghanira za vigomezgo vya unenesko ivyo muli kusambira mu Mazgu gha Chiuta. Mwachiyelezgero, muli kusambira kuti zina la Chiuta ni Yehova, Yesu ni mwana wapadera wa Chiuta, ŵakufwa ŵakumanya kalikose yayi, kweniso kuzamuŵa paradiso pa charu chapasi umo ŵanthu ŵazamukhala kwamuyirayira. (Sal. 83:18; Muph. 9:5; Yoh. 3:16; Chivu. 21:3, 4) Mwati mwagomezga kuti visambizgo ivi ni vyaunenesko, chikaŵa chakusuzga kuti munthu wamupatuskani. Chifukwa wuli? Chifukwa mukamanya kuti vikujintha pa unenesko. Tiyeni tiwone umo kumanya fundo yakuti chitemwa cha Yehova ntchisambizgo chakwambilira cha mu Baibolo, kungatovwilira kuti tileke kukayikira kuti Yehova wakuŵikako mahara panji kuwona masuzgo ghithu.

5. Longosorani umo munthu wangakanira visambizgo vyautesi.

⁵ Apo mukambanga kusambira Baibolo, kasi ntchivichi chikamovwirani kuti mukane visambizgo vyautesi? Panji mukwenera kuti mukayaniskanga ivyo mukasambizgikanga ku chisopa chinu na ivyo Malemba ghakusambizga. Ghanaghanirani chiyelezgero ichi: Tiyelezgere kuti kumasinda mukagomezganga kuti Yesu ni Chiuta Wankhongonozose. Ndipouli, apo mukasambiranga Baibolo mukajifumbanga kuti, ‘Kasi chisambizgo ichi ntchaunenesko nadi nthena?’ Pamanyuma pa kusanda ukaboni wa mu Malemba, mukawamo kuti ntchaunenesko yayi. Mbwenu mukaleka kuchigomezga chisambizgo ichi na kwamba kugomezga unenesko wa mu Malemba uwu wakuti: Yesu ‘ngwakwamba kubabika wa chilengiwa chose,’ “Mwana wapadera wa Chiuta.” (Kol. 1:15; Yoh. 3:18) Mbunenesko kuti nyengo zinyake visambizgo vyautesi vingaŵa “vyakukhora chomene” ndipo chingaŵa chakusuzga kuvigadabura. (2 Kor. 10:4, 5) Kweni mukati mwasambira unenesko, mukaleka kuvigomezgaso visambizgo vyautesi.—Fil. 3:13.

6. Chifukwa wuli mungagomezga kuti ‘chitemwa chakugomezgeka cha Yehova chikukhalilira muyirayira’?

⁶ Mungachitaso mwakuyana waka pa nkhani ya ivyo Baibolo likusambizga vyakukhwaskana na chitemwa cha Yehova. Para muli mu suzgo, ndipo mwamba kukayikira kuti Yehova wakumutemwani, jifumbani kuti, ‘Kasi kaghanaghaniro kane kali makora waka?’ Yaniskani maghanoghano ghinu ghakukayikira chitemwa cha Yehova na mazgu gha pa Salimo 136:1, agho pajintha mutu wa nkhani iyi. Chifukwa wuli Yehova wakulongosora chitemwa chake kuti ‘ntchakugomezgeka’? Chifukwa wuli mazgu ghakuti ‘chitemwa chake chakugomezgeka chikukhalilira muyirayira’ ghakuwerezgeka maulendo 26 mu Salimo 136? Nga umo tawonera, chitemwa chakugomezgeka icho Yehova wali nacho pa ŵanthu ŵake ntchisambizgo chakwambilira cha mu Baibolo, nga umo viliriso na visambizgo vinyake ivyo muli kusambira mu Mazgu gha Chiuta ivyo mukugomezga. Maghanoghano ghakuti Yehova wakumuwonani kuti ndimwe ŵambura kuzirwa kweniso wakumutemwani yayi, ngautesi. Kanizgani maghanoghano agha nga umo mungakanira chisambizgo chilichose chautesi!

7. Yowoyani viyelezgero vya malemba agho ghakutisimikizgira kuti Yehova wakutitemwa.

⁷ Mu Baibolo muliso maukaboni ghanandi agho ghakutisimikizgira kuti Yehova wakutitemwa. Mwachiyelezgero, Yesu wakaphalira ŵalondezgi ŵake kuti: “Imwe muli ŵakuzirwa kuluska mpheta zinandi.” (Mat. 10:31) Yehova iyomwene wakaphalira ŵanthu ŵake kuti: “Nikukhozgenge, enya, nikovwirenge, nikukolenge na woko lane lamalyero laurunji.” (Yes. 41:10) Wonani umo fundo za mavesi agha zikusimikizgira fundo iyi. Yesu wakuyowoyapo yayi kuti ‘Mungaŵa ŵakuzirwa,’ kweniso Yehova nayo wakuyowoyapo yayi kuti ‘Panji ningakovwira.’ M’malo mwake, Yesu wakuti: “Imwe muli ŵakuzirwa” kweniso Yehova wakuti: “Nikovwirenge.” Usange mukukayikira chitemwa cha Yehova para mwasangana na suzgo, malemba ghanthena agha ghangamovwirani kuti mujipulikeko makora kweniso kuti mukhorwe kuti Yehova wakumutemwani. Malemba agha ghakuyowoya fundo zaunenesko nadi. Kulomba na kughanaghanirapo pa malemba agha, kumovwiraninge kuti namwe muyowoye mazgu gha pa 1 Yohane 4:16, ghakuti: “Ise tamanya na kugomezga kuti Chiuta wakutitemwa.”a

8. Kasi mungachita wuli usange nyengo zinyake mukukayikira kuti Yehova wakumutemwani?

⁸ Kweni wuli usange nyengo zinyake mukukayikira nipera kuti Yehova wakumutemwani? Yaniskani umo mukujipulikira na ivyo mukumanya. Ni nyengo zose yayi apo maghanoghano ghithu ghangaŵa ghakugomezgeka, kweni chitemwa cha Yehova ntchanadi na chakugomezgeka ndipo ndivyo Baibolo likutisambizga. Usange tikukayikira kuti Yehova wakutitemwa, mbwenu ndikuti tikusulako mukhaliro wakuzirwa chomene wa Yehova, uwo ntchitemwa.—1 Yoh. 4:8.

GHANAGHANIRANI UMO YEHOVA ‘WAKUMUTEMWERANI’

9-10. Kasi Yesu wakayowoyanga vyakukhwaskana na vichi apo wakayowoya mazgu agho ghali pa Yohane 16:26, 27, ghakuti: “Ŵadada iwoŵene ŵakumutemwani”? (Wonaniso chithuzi.)

⁹ Tingasambira vinandi vyakukhwaskana na chitemwa cha Yehova mwa kusanda mazgu agho Yesu wakaphalira ŵalondezgi ŵake ghakuti: “Ŵadada iwoŵene ŵakumutemwani.” (Ŵazgani Yohane 16:26, 27, bi7.) Yesu wakayowoya mazgu agha kuti ŵasambiri ŵake ŵajipulikeko waka makora yayi. Nakuti nkhani yose ya mu mavesi agha, yikulongora kuti wakayowoyanga vyakukhwaskana na umo ŵasambiri ŵake ŵakajipulikiranga pa nyengo iyo yayi. M’malo mwake, wakayowoyanga nkhani yakupambanako, yakukhwaskana na lurombo.

¹⁰ Yesu wakaŵa kuti waŵaphalira waka ŵasambiri ŵake kuti ŵakwenera kulomba kwizira mwa iyo, kwa iyo yayi. (Yoh. 16:23, 24) Chikaŵa chakuzirwa chomene kwa iwo kumanya fundo iyi. Pamanyuma pakuti wawuskika, ŵasambiri ŵake ŵakwenera kuti panji ŵakayezgeka kuti ŵalombenge kwa iyo. Ŵakaŵa kuti ŵamumanya makora Yesu, ndipo wakaŵa mubwezi wawo. Ntheura ŵakwenera kuti ŵakaghanaghananga kuti chifukwa chakuti wakuŵatemwa chomene, mbwenu waŵenge wakukhumbisiska kutegherezga malurombo ghawo na kupempha Adada ŵake kuti ŵaŵawovwire. Ndipouli, Yesu wakati ŵakwenera kughanaghana munthowa iyi yayi. Chifukwa wuli? Chifukwa cha fundo iyo wakaŵaphalira yakuti: “Chifukwa Ŵadada iwoŵene ŵakumutemwani.” Fundo iyi ntchigaŵa cha chisambizgo chakwambilira cha mu Baibolo chakukhwaskana na lurombo. Ghanaghanirani umo fundo iyi yikumukhwaskirani: Chifukwa cha kusambira Baibolo, mwamumanya makora Yesu kweniso mwamba kumutemwa. (Yoh. 14:21) Kweni nga mbasambiri aŵa, namwe mungalomba kwa Chiuta na chigomezgo chose, pakumanya kuti Adada ‘iwoŵene ŵakumutemwani.’ Ntheura nyengo yiliyose iyo mwalomba kwa Yehova mukulongora kuti muli na chipulikano mu mazgu agha.—1 Yoh. 5:14.

MANYANI IVYO VIKUMUPANGISKANI KUTI MWAMBE KUKAYIKA

11. Chifukwa wuli Satana wangakondwa para tingamba kukayikira kuti Yehova wakutitemwa?

¹¹ Kasi ntchivichi chingapangiska kuti tambe kukayikira kuti Yehova wakutitemwa? Panji mungazgora kuti wakupangiska ni Satana, ndipo kaunenesko kalipo. Dyabulosi wakukhumba kuti ‘watimilimitizge,’ ndipo wangakondwa chomene usange tingamba kukayikira kuti Yehova wakutitemwa. (1 Pet. 5:8) Nakuti Yehova wakapeleka sembe yakuwombora chifukwa chakuti wakutitemwa, kweni Satana wakukhumba kuti tijiwonenge ŵambura kwenelera sembe iyi. (Heb. 2:9) Kweni kasi ni njani wakukondwa para tikukayikira chitemwa cha Yehova? Satana. Ndipo kasi ni njani wakukondwa usange tagongowa chifukwa cha masuzgo agho tikujumphamo na kuleka kuteŵetera Yehova? Ni Satana mweneyuyu. Satana wakukhumba kuti tighanaghanenge kuti Yehova wakutitemwa yayi, kweni apo ndimo viliri yayi. Iyo Satana ndiyo wakutemweka yayi na Yehova. Kweni ‘uryarya’ umoza uwo Satana wakutemwa kuwugwiliskira ntchito, ngwakuti wakuyezga kupangiska kuti ise ndise tijiwonenge ŵambura kutemweka kweniso kuti Yehova wali kutijowora. (Efe. 6:11) Para tamanya ivyo mulwani withu wakuyezga kuchita, tingaŵikapo mtima chomene kuti ‘tisuske Dyabulosi.’—Yak. 4:7.

12-13. Kasi kwananga uko tili kuhara kungatipangiska wuli kuti tikayikirenge chitemwa cha Yehova?

¹² Paliso chinthu chinyake icho chingatipangiska kuti tikayikire chitemwa Yehova. Kasi chingaŵa chivichi? Kwananga uko tili kuhara. (Sal. 51:5; Rom. 5:12) Kwananga kuli kutimbanizga ubwezi uwo ukaŵapo pakati pa Chiuta na ŵanthu. Kweniso kuli kunanga kaghanaghaniro kawo, mtima wawo, na thupi lawo.

¹³ Kwananga kukukhwaska chomene kaghanaghaniro kithu, ndipo kukupangiska kuti tijiyimbenge mulandu, tenjerwenge, tijipulikenge ŵambura kuvikilirika, kweniso kuchita soni. Vyose ivi vingatichitikira usange tachita kwananga. Kweni nyengo zinyake tingamba kujipulika munthowa iyi chifukwa nyengo zose tikumanya kuti ndise ŵakwananga, ndipo umu ndimo Yehova wakatilengera yayi pakwamba. (Rom. 8:20, 21) Nga umo galimoto iyo yaphwa tayala yingatondekera kwenda makora, nase pakuŵa ŵanthu ŵakwananga, tikutondeka kuchita vinthu mwakufikapo munthowa iyo tikalengekera. Ntheura ntchakuzizika yayi kuti nyengo zinyake tikwamba kukayikira kuti Yehova wakutitemwa. Para ivi vyachitika, tikwenera kukumbuka kuti Yehova ni “Chiuta mukuru na wakofya, uyo . . . [wakulongora] chitemwa chakugomezgeka ku awo ŵakumutemwa na kusungilira malango ghake.”—Neh. 1:5, mazgu ghamusi.

14. Kasi kughanaghanira pa sembe yakuwombora kungatovwira wuli kuwuskamo maghanoghano ghakuti Yehova wakutitemwa yayi? (Ŵaroma 5:8) (Wonaniso bokosi lakuti “Muŵe Maso na ‘Nkhongono Yakupusika ya Kwananga.’”)

¹⁴ Mbunenesko kuti nyengo zinyake tingajipulika kuti ndise ŵambura kwenelera chitemwa cha Yehova. Ndipo kuyowoya unenesko, tikwenelera nadi yayi chitemwa cha Yehova, lekani chitemwa ichi ntchapadera chomene. Palije icho tingachita kuti tipangiske Yehova kwamba kutitemwa. Ndipouli, sembe yakuwombora yikubenekelera zakwananga zithu, ndipo Yehova wakapeleka chawanangwa ichi chifukwa chakuti wakutitemwa. (1 Yoh. 4:10) Kumbukaniso kuti Yesu wakizira kuzakaponoska ŵanthu ŵakwananga, ŵarunji yayi. (Ŵazgani Ŵaroma 5:8.) Palije uyo wangafiska kuchita vinthu mwakufikapo, ndipo Yehova wakukhazga kuti tichitenge vyose mwakufikapo yayi. Para tapulikiska kuti kwananga uko tili kuhara kungatipangiska kwamba kukayikira chitemwa cha Yehova, tiŵikengepo mtima chomene kulimbana nako kuti kuleke kutimbanizga kaghanaghaniro kithu.—Rom. 7:24, 25.

SANKHANI KULUTILIRA KUGOMEZGEKA

15-16. Para tikulutilira kugomezgeka kwa Yehova, kasi tingasimikizga vichi, ndipo chifukwa wuli? (2 Samuyeli 22:26)

¹⁵ Yehova wakukhumba kuti tisankhe mwakwenelera mwa “kudemelera kwa iyo.” (Doto. 30:19, 20) Usange tachita nthena, tingaŵa na chigomezgo chose kuti nayo walutilirenge kugomezgeka kwa ise. (Ŵazgani 2 Samuyeli 22:26.) Chikuru tikulutilira kugomezgeka kwa Yehova, tingasimikizga kuti watovwirenge kuzizipizga suzgo lililose ilo tingasangana nalo pa umoyo withu.

¹⁶ Nga umo tadumbiskirana, tili na vifukwa vyakukwana vyakulutilira kuŵa ŵakukhora apo tikusangana na masuzgo. Tikumanya kuti Yehova wakutitemwa ndipo watovwirenge. Nakuti ivi ndivyo Baibolo likusambizga. Para tamba kukayikira chitemwa chake, tingachita makora kughanaghanira ivyo tikumanya kuti mbunenesko m’malo mwa kughanaghanira waka umo tikujipulikira panyengo iyo. Tiyeni tilutilire kugomezga unenesko wa mu Baibolo wakuti chitemwa chakugomezgeka cha Yehova chikukhalilira muyirayira.