Naŵa na Umoyo Wakukondweska Chifukwa cha Kuteŵetera Yehova

Mu chaka chakulondezgapo, ku Beteli ŵakapharazga kuti pakukhumbikwa ŵabali ŵakujipeleka kuti ŵakateŵetere ku ofesi ya munthavi ya South Africa, uko ŵakakhumbanga kuŵikako makina ghaphya ghakupulintira mabuku. Nane nkhajipeleka kuti nilute, ndipo nkhakondwa chomene ŵati ŵanisankha. Pakaŵaso ŵabale ŵanyake ŵatatu ŵa ku Canada awo nawo ŵakasankhika kuluta. Ŵabali aŵa ŵakaŵa, Dennis Leech, Bill McLellan, na Ken Nordineech. Ŵakatiphalilirathu kuti ku South Africa tamukhalako nyengo yitali.

Nati napokera uteŵeti uphya uwu, nkhaŵayimbira foni amama na kuŵaphalira kuti: “Amama, nili na nkhani yakuti nimuphalirani. Namwamba kuteŵetera ku South Africa!” Amama ŵakaŵa ŵa chetee, kweni ŵakaŵa na chipulikano chakukhora kweniso ŵakamutemwanga chomene Yehova. Nati naŵaphalira nkhani iyi ŵakayowoyapo vinandi yayi, kweni nkhamanya kuti ŵakakolerana navyo ivyo nkhasankha. Amama na adada wose ŵakakolerana navyo ivyo nkhasankha, nangauli ŵakafipanga mtima kuti niŵenge kutali nawo.

ULENDO WAKULUTA KU SOUTH AFRICA!

Pambere tindalute ku South Africa, tose ŵanayi, tikaluta dankha ku Beteli ya Brooklyn, uko tikakasambizgika kwa myezi yitatu umo tingagwiliskira ntchito makina ghakusindikizgira mabuku. Tati tamara tikakwera sitima yakuluta ku Cape Town, South Africa. Panyengo iyi nkhaŵa kuti nakwaniska waka vyaka 20. Kufuma ku Cape Town kuluta ku Johannesburg tikakwera sitima ya pamtunda, ndipo ulendo uwu tikanyamuka usiku. Siteji yakwamba apo sitima yikayima kwati kwamba kucha, pakaŵa pa tawuni yichoko ya Karoo iyo chigaŵa chinyake kuli chipalamba. Kukaŵa chuvu chinandi kweniso kukawontchanga. Tose ŵanayi tikalaŵiskanga pa windo ndipo tikajifumbanga kuti ni malo wuliso agha. Tikamba kufipa mtima na umo uteŵeti withu uŵirenge. Kweni pamanyuma tikatemwanga kulutaso ku matawuni ghachokoghachoko agha kukatembeya, ndipo tikamba kuwona kuti ghakaŵa malo ghakukondweska chomene kweniso ŵanthu ŵakakhalanga mwamtende.

Kwa vyaka vichoko waka, uteŵeti wane ukaŵa wa pa mashini ghakupanga mizere yakulembamo mazgu kuti tipulinte magazini gha Gongwe la Mulinda na Wukani! Ofesi ya munthavi yikapulintangaso magazini mu viyowoyero vinandi vya ku Africa. Tikaŵa ŵakukondwa chomene kuti mashini ghaphya agha, agho tikizira kufuma ku Canada, ghakagwiranga ntchito yikuru chomene

Pamanyuma, nkhamba kugwira ntchito mu ofesi iyo yikalaŵiliranga mulimo wa kung’anamura, kupulinta na kutumizga mabuku. Nkhatangwanikanga chomene ndipo nkhaŵa wakukhorwa.

NTHENGWA KWENISO UTEŴETI UPHYA

Mu 1968, nkhatora Mudumbu Laura Bowen uyo wakakhalanga pafupi na Beteli. Wakaŵa mupayiniya ndipo wakachitanga mulimo wakutayipa ku Dipatimenti ya Kung’anamura Mabuku. Mazuŵa agho, ŵanthu awo ŵatorana waka kanandi ŵakakhalanga yayi pa Beteli, ntheura ofesi ya munthavi yikatiphalira kuti tikachitenge upayiniya wapadera. Pachoko waka nkhafipanga mtima. Nkhaŵa kuti nakhala vyaka 10 pa Beteli ndipo nkhazgoŵera kuti ŵakatipasanga chakurya na malo ghakugona, so nkhajifumbanga kuti tamukwaniska wuli kulipira chilichose icho tamukhumbikwira na kandalama kachoko waka ako ŵakapelekanga ku ŵapayiniya ŵapadera? Waliyose wakapokeranga 25 rand (iyo panyengo iyo yikaŵa madola 35 gha ku U.S.), ndalama iyi tikapokeranga mwezi uliwose kweni para tafiska maora, maulendo ghakuwelerako na mabuku agho ghakaŵikika kuti tifiskenge. Ndalama yeneyiyi ndiyo tikeneranga kulipira renti, kugura chakurya, kwendera, kugwiliskira ntchito pa vya chipatala kweniso vinthu vinyake.

Tikatumizgika kuti tikateŵeterenge kufupi na msumba wa Durban, chigaŵa cha Indian Ocean. Ku malo agha kukaŵa ŵanthu ŵanandi ŵa ku India. Ŵanthu aŵa ŵakaŵa ŵana ŵa awo ŵakiza ku South Africa mu 1875, kufuma ku India kuzakagwira ntchito ku kampani ya shuga. Sono ŵakagwiranga ntchito zakupambanapambana kweni ŵakalutilira kusunga mitheto yawo na kuphika chakurya munthowa yawo kusazgapo na mphangwe iyo ŵakayiphikanga makora chomene. Ndipo ŵakayowoyanga Chingelezi, ivi vikapangiska kuti chiŵe chipusu kwa ise kuŵapharazgira.

Ŵapayiniya ŵakeneranga kumalira maora 150 mu upharazgi mwezi uliwose. Ntheura ine na Laura tikapangana kuti tipharazge maora 6 zuŵa lakwamba. Kukawotchanga chomene. Tikaŵavya maulendo ghakuwelerako na masambiro gha Baibolo, ntheura tikeneranga kuchita upharazgi wa kunyumba na nyumba kwa maora 6 yose. Tikati tapharazgapo, nkhalaŵiska panyengo yane ndipo pakaŵa kuti pajumpha waka maminiti 40 pera. Nkhamba kukayikira usange tikwaniskenge kuchita upayiniya wapadera uwu.

Pati pajumpha nyengo yichoko waka, tikajinozgekereska makora. Zuŵa lililose tikayeyanga coffee na vyakurya vinyake. Para tikukhumba kupumulapo tikayimikanga galimoto yithu musi mwa khuni lililose ilo lili pafupi. Ndipo nyengo zinyake ŵana ŵakatiwungiliranga na kutilaŵisiska chifukwa tikaŵa ŵakupambana kawonekero kathupi. Mwaluŵiro tikamba kuwona kuti para pajumpha waka maora ghaŵiri panji ghatatu mu upharazgi, kunyake uku nyengo yikendanga mwaluŵiro chomene.

Tikakondwanga chomene kusambizga ŵanthu ŵa mu chigaŵa ichi unenesko wa mu Baibolo, ndipo ŵanthu aŵa ŵakatemwangaso chomene kupokelera ŵalendo. Tikawona kuti ŵanthu ŵa ku India aŵa, ŵakaŵa ŵantchindi, ŵankharo yiwemi ndiposo ŵakatemwanga Chiuta. Ŵahindu ŵanandi ŵakazomera uthenga uwo tikiza nawo. Ŵakatemwanga kusambira vyakukhwaskana na Yehova, Yesu, Baibolo, charu chiphya cha mtende kweniso chilindizga cha ŵakufwa. Pati pajumpha chaka chimoza, tikaŵa na masambiro gha Baibolo 20. Zuŵa lililose tikaryanga chakurya na mbumba iyo tikusambira nayo panyengo iyo. Tikakondwanga chomene.

Kweni pati pajumpha kanyengo kachoko waka, tikapika uteŵeti unyake. Tikaphalirika kuti tikenderenge dera mu mphepete mwa Indian Ocean. Ndikuti sabata yiliyose tikaŵanga ŵalendo pa mbumba yinyake ndipo tikateŵeteranga lumoza na ŵapharazgi mu mpingo na kuŵakhozga. Ŵakachitanga nase vinthu nga ndise ŵanthu ŵamumbumba yawo, tikachezganga nawo pamoza na ŵana ŵawo. Pati pajumpha vyaka viŵiri, mwamabuchi tikapokera foni kufuma ku ofesi ya munthavi. Mubali uyo wakimba foni wakati: “Tikukhumba kuti muwelereso ku Beteli.” Nkhazgora kuti: “Tikukondwa chomene kuno tili kuno.” Kweni tikaŵa ŵakunozgeka kuteŵetera kulikose uko ŵatituma.

KUWELERASO PA BETELI

Pa Beteli, nkhateŵeteranga mu Dipatimenti ya Uteŵeti, ndipo nkhaŵa na mwaŵi wakuteŵetera na ŵabali ŵakumanya tunthu. Mazuŵa agho, para wadera wendera mpingo, wakatumanga lipoti ku munthavi. Kufuma apo Dipatimenti ya Uteŵeti yikatumizganga kalata ku mpingo kuyana na lipoti ilo mulaŵiliri wadera wakatumizga. Chilato cha kalata iyi, chikaŵa kukhozga mpingo kweniso kupeleka ulongozgi usange ukukhumbikwa. Masekeletare ghakaŵa na ntchito yinandi chomene ya kung’anamura malipoti ghakufuma kwa mulaŵiliri wa dera kufuma mu Chixhosa, Chizulu na viyowoyero vinyake, kwiza mu Chingelezi. Kufuma apo, ŵakang’anamurangaso makalata gha ofesi ya munthavi kufuma mu Chingelezi kuya mu viyowoyero vya ku Africa. Nkhaŵawonganga chomene ŵabali ŵakulimbikira aŵa, awo ŵakachitanga mulimo wakung’anamura, kweniso ŵakanovwira kumanya masuzgo agho ŵabali na ŵadumbu ŵithu ŵa mtundu wachifipa ŵakakumananga nagho.

Panyengo iyo, ku South Africa ŵafipa na ŵazungu ŵakachitiranga lumoza yayi vinthu. Ŵazungu ŵakakhalanga kwaŵekha ŵafipa nawo kwaŵekha, ntheura ŵanthu aŵa ŵakachezgerananga yayi. Ŵabali ŵithu ŵafipa, ŵakayowoyanga viyowoyero vyawo, kupharazga mu viyowoyero vyawo ndipo ŵakawungananga mu mipingo ya viyowoyero vyawo.

Nkhaŵamanyanga yayi ŵabali ŵanandi ŵa mtundu wachifipa chifukwa chigaŵa cha mpingo wane nyengo zose chikaŵanga cha Chingelezi. Kweni sono nkhaŵa na mwaŵi wakuŵamanya makora ŵabali ŵithu aŵa na kumanya mitheto yawo. Nkhamanya masuzgo agho ŵabali ŵithu aŵa ŵakasangananga nagho chifukwa cha mitheto kweniso vigomezgo vya chisopa. Ŵakaŵa ŵachikanga chomene. Ŵakachitangako yayi mitheto iyo yikasuskananga na malemba kweniso ŵakachitangako yayi vinthu vyakukhwaskana na vyamizimu nangauli kuti ŵachite ivi, ŵakeneranga kuzizipizga chifukwa ŵakasuskikanga chomene na ŵamumbumba zawo kweniso ŵanthu ŵa mu muzi wawo. Ndipo mu vigaŵa vya ku mizi ŵanthu ŵakaŵa ŵakavu chomene. Ŵanandi ŵakaŵa ŵambura kusambira, kweni ŵakalichindikanga Baibolo.

Nkhaŵa na mwaŵi wakovwirapo pa nkhani za malango zakukhwaskana na wanangwa wakusopa kweniso kuleka kunjilirapo pa ndyali. Chikaŵa chakukhozga chomene kuwona chikanga na kugomezgeka kwa Ŵakaboni ŵachinyamata awo ŵakaŵachimbizga pa sukulu chifukwa cha kukana kunjizgikamo mu malurombo kweniso kwimbako sumu zakukhwaskana na chisopa.

Ku Africa kwenekuku, mu charu chinyake icho panyengo iyo chikamanyikwanga kuti Swaziland, ŵabali ŵakalongoraso chikanga apo ŵakakumana na suzgo linyake. Themba Sobhuza likati lafwa, waliyose mu charu wakeneranga kuchitako mitheto iyo yikuchitika para munthu wafwa. Ŵanalume ŵakeneranga kumeta sisi zawo zose, ndipo ŵanakazi ŵakeneranga kumeta sisi lawo kuti liŵe lifupi. Ŵabali na ŵadumbu ŵanandi ŵakatambuzgikanga chifukwa cha kukana kuchitako mitheto iyi, iyo yikakolerananga na kusopa ŵasekuru awo ŵali kufwa. Kugomezgeka kwawo kwa Yehova, kukatikhozga ndipo tikakondwa chomene. Tikasambira vinandi vyakukhwaskana na chipulikano, kugomezgeka kweniso kuzikira kufuma ku ŵabali ŵithu ku Africa ndipo nase chipulikano chithu chikakhora.

KUWELERASO KU MULIMO WAKUPULINTA MABUKU

Mu 1981, nkhamba kuteŵeteraso ku Dipatimenti ya Kupulinta kuti nkhawovwire ŵabali umo ŵangagwiliskira ntchito makompyuta pa mulimo wakupulinta. Iyi yikaŵa nyengo yakukondweska chomene. Nthowa zakupulintira mabuku zikasinthanga chomene. Munthu munyake uyo wakimiranga kampani yinyake, wakapa ofesi ya munthavi mashini ghaphya kuti ŵaghayezge umo yakugwilira ntchito kweni kwambura kulipira. Ivi vikapangiska kuti mashini 9 agho tikaŵa nagho pakwamba ghaguliskike na kugura mashini 5 ghaphya agha. Pakaŵikikaso seti yinyake ya mashini ghaphya ghakupulintira. Ntchito ya kupulinta yikamba kwenda luŵiro chomene kuluska kumanyuma kose.

Makompyuta ghakatovwiraso kusanga nthowa ziphya za umo tingalembera makora mazgu pa mapepara mu viyowoyero vinandi mwakugwiliskira ntchito nthowa ya MEPS (Multilanguage Electronic Publishing System). Tafuma kutali chomene, tikamba na mashini agho ghakasuzganga kughagwiliskira ntchito, ndipo ghakachitanga vinthu pachokopachoko, kweni vinthu vyasintha chomene pa nkhani ya tekinoloje kufuma apo tikizira ku South Africa. (Yes. 60:17) Panyengo iyo, tose 4 tikaŵa kuti tatora ŵadumbu awo ŵakaŵa ŵapayiniya awo ŵakatemwanga chomene Yehova. Ine na Bill tikaŵa kuti tichali kuteŵetera pa Beteli. Ken na Dennis ŵakaŵa kuti ŵamba kupwelelera mbumba zawo.

Milimo pa ofesi ya munthavi yikamba kusazgikira chomene. Mabuku ghakulongosora Baibolo ghakamba kung’anamulika na kupulintika mu viyowoyero vinandi ndipo ghakatumizgikanga ku maofesi ghanyake gha munthavi. Pa chifukwa ichi pa Beteli pakakhumbikwanga kuzenga nyumba yakuŵa na ma ofesi ghanandi. Ŵabali ŵakazenga yimoza ku malo ghakutowa cha kumanjiliro gha dazi kwa Johannesburg, ndipo yikapelekeka kwa Yehova mu 1987. Ukaŵa mwaŵi wapadera chomene kwa ine kovwirapo pa kusanuzga ofesi uku, na kuteŵetera mu Komiti ya Munthavi ya South Africa kwa vyaka vinandi.

UTEŴETI UNYAKE UPHYA

Mu 2001 tikapokera uthenga wakuzizwiska. Nkhachemeka kuti nkhateŵeterenge mu Komiti ya Munthavi iyo yikaŵa kuti yapangika waka ku United States. Nangauli tikaŵa na chitima chifukwa tikeneranga kuleka mulimo uwo tikachitanga kweniso ŵabwezi ŵithu ku South Africa, kweni tikaŵa ŵakunozgeka kwamba umoyo uphya mu mbumba ya Beteli ku United States.

Kweni tikafipa mtima chifukwa apa tikaŵa kuti tiŵenge kutali na amama ŵa Laura awo ŵakaŵa ŵachekuru. Tikaŵa kuti tingaŵachitira yayi vinandi uku tili ku New York. Mwamwaŵi ŵanung’una ŵa Laura ŵatatu ŵakajipeleka kuti ŵaŵawovwirenge, mwakuthupi kweniso maghanoghano. Iwo ŵakati, “Ise tingaŵa yayi mu uteŵeti wanyengozose, kweni para tikupwelelera amama, vimovwiraninge kuti mulutilire kuchita uteŵeti winu.” Tikaŵawonga chomene chifukwa cha wovwiri uwu.

Nga umo ŵakayowoyera ŵanung’una ŵa Laura, kuti ŵapwelelerenge amama ŵawo, nane mukuru wane na muwoli wake awo ŵakakhalanga ku Toronto, Canada, ŵakaŵapweleleranga amama awo panyengo iyo ŵakaŵa chokoro. Panyengo iyi amama ŵakaŵa kuti ŵakhala na mukuru wane pamoza na muwoli wake kwa vyaka vyakujumpha 20. Tikuwonga chomene wovwiri wawo pa amama mpaka apo ŵakafwira ise tati tafika waka ku New York. Ni thumbiko likuru chomene kuŵa na ŵabali awo mbakukhumbisiska kusintha vinthu pa umoyo wawo kuti ŵapwelelere ŵapapi awo mbachekuru, icho nyengo zinyake ntchinthu chakusuzga chomene kuchita.

Kwa vyaka vyakwambilira ku United States, nkhachitanga mulimo wa kupulinta mabuku, ndipo pasono mulimo uwu vinandi vyasintha kweniso ngupusu. Mwasonosono apa, nagwiranga ku Dipatimenti yakugura katundu. Naŵa wakukondwa chomene kuti vyaka 20 ivyo vyajumpha naŵa pa ofesi ya munthavi iyi, iyo yili na ŵabali na ŵadumbu pafupifupi 5,000 awo ŵakukhala pa Beteli kweniso 2,000 awo ŵakwendera.

Vyaka 60 ivyo vyajumpha, nkhaghanaghanangako yayi kuti ningazakasangika kuno. Laura wanovwira chomene na mtima wose vyaka vyose ivi. Naŵa na umoyo wakukondweska chomene. Tikuzirwiska chomene mauteŵeti ghakupambanapambana agho tachita, kweniso ŵanthu ŵawemi chomene awo tateŵetera nawo lumoza, kusazgapo awo ŵali mu maofesi gha munthavi agho tendako para ŵatipa mulimo wakwendera minthavi mu vyaru vyakupambanapambana. Chifukwa chakuti pasono nili na vyaka vyakujumpha 80, nkhuchita milimo yinandi yayi, pakuti pali ŵabali ŵachinyamata awo ŵali kusambizgika kuchita milimo iyi.

Wamasalimo munyake wakalemba kuti: “Ngwakukondwa mtundu uwo Chiuta wake ni Yehova.” (Sal. 33:12) Uwu mbunenesko nadi. Ndine wakukondwa chomene kuti nateŵetera Yehova na ŵanthu ŵake ŵakukondwa.