IVYO TINGACHITA KUTI TIMAZGE THINKHO

4 | Thembani Wovwiri wa Chiuta Kuti Mumazge Thinkho

Ivyo Baibolo Likuyowoya:

“Vipambi vya mzimu ntchitemwa, chimwemwe, mtende, kuzikira, lusungu, uwemi, chipulikano, kuzika, na kujikora.”—ŴAGALATIYA 5:22, 23.

Ivyo Lemba Ili Likung’anamura:

Tingamazga thinkho na wovwiri wa Yehova. Mzimu wa Chiuta ungatovwira kuŵa na mikhaliro iyo ise patekha tingaŵa nayo yayi. Ntheura m’malo mwa kulimbana na kumazga thinkho pa ise tekha, tikwenera kuthemba wovwiri uwo Chiuta wakupeleka. Para tachita nthena, nase tiŵenge nga ni mpositole Paulosi uyo wakalemba kuti: “Mu vinthu vyose, nkhusanga nkhongono mwa uyo wakunipa nkhongono.” (Ŵafilipi 4:13) Ndipo nase tingayowoya kuti: “Wovwiri wane ukufuma kwa Yehova.”—Salimo 121:2.

Ivyo Mungachita:

“Yehova wanisintha chomene, kale nkhaŵa wankhaza, kweni sono nkhuchita vinthu mwamtende.”—WALDO

Lombani Yehova kuti wamupani mzimu wake utuŵa. (Luka 11:13) Mulombani kuti wamovwirani kuŵa na mikhaliro yiwemi. Sambirani mikhaliro iyo Baibolo likuti yingamovwirani kuti muleke kutinkha ŵanji nga ni chitemwa, mtende, kuzikira, na kujikora. Sangani mipata ya umo mungalongolera mikhaliro iyi pa umoyo winu. Ndipo muchezgenge na ŵanthu awo ŵakuyezga kulongora mikhaliro iyi. Ŵanthu aŵa ‘ŵangamukhuŵilizgani kuti mutemwanenge na kuchita milimo yiwemi.’—Ŵahebere 10:24; mazgu ghamusi.

Chakuchitika Chanadi—WALDO

Wakaleka Nkhaza

Waldo wakakura na umoyo wakusuzga chomene wa thinkho. Iyo wakuti: “Nkhakhaliranga waka kutimbana na ŵakuguliska minkhwala . . . Pa nyengo yinyake ŵalwani ŵane ŵakatuma chigeŵenga chakumanyikwa kuti chinikome, kweni nkhapona nangauli chikanigwaza na chimayi.”

Waldo wakakondwa yayi apo muwoli wake wakamba kusambira Baibolo na Ŵakaboni ŵa Yehova. Iyo wakuti: “Ine nkhaŵatinkhanga chomene Ŵakaboni ndipo kanandi nkhaŵatukanga, kweni nyengo zose ŵakanizgoranga mwamtende.”

Pati pajumpha nyengo, Waldo wakamba kusambira Baibolo. Iyo wakuti: “Chikaŵa chipusu yayi kuchita ivyo nkhasambiranga. Ndipo nkhawonanga kuti vingachitika yayi kuti nileke kukwiya luŵiro.” Kweni chinthu chinyake icho wakasambira mu Baibolo chikamovwira chomene kuti wasinthe.

Waldo wakulongosora kuti: “Zuŵa linyake Alejandro, uyo wakasambiranga nane Baibolo wakaniphalira kuti niŵazge Ŵagalatiya 5:22, 23. . . . Alejandro wakaniphalira kuti vikuthemba pa ine pera yayi kuti niŵe na mikhaliro iyi, kweni vikuthembaso pa mzimu utuŵa wa Chiuta. Fundo iyi yikanovwira kuti nisinthe maghanoghano ghane.”

Na wovwiri wa Yehova, Waldo wakasintha nkharo yake. Iyo wakuti: “Ŵabali na ŵabwezi ŵane ŵakupulikiska yayi umo nili kusinthira.” Iyo wakutiso: “Yehova wanisintha chomene, kale nkhaŵa wankhaza, kweni sono nkhuchita vinthu mwamtende.”