IVYO MUNGACHITA KUTI MUMAZGE THINKHO

3 | Wuskanimo Thinkho mu Maghanoghano Ghinu

Ivyo Baibolo Likuyowoya:

“Musinthe maghanoghano ghinu, mwakuti mumanye khumbo la Chiuta, ilo ndiwemi, lakuzomerezgeka na lakufikapo.”—ŴAROMA 12:2.

Ivyo Lemba Ili Likung’anamura:

Ivyo tikughanaghana vikukhwaskaso Chiuta. (Yeremiya 17:10) Pali vinandi ivyo tikwenera kuchita padera pa kugega kuyowoya panji kuchita vinthu ivyo vikulongora kuti tili na thinkho. Thinkho likwambira mu maghanoghano na mu mtima. Ntheura tikwenera kuwuskamo chilichose icho chingatipangiska kuti tiŵe na thinkho. Para tachita nthena ndipo ‘tingasintha’ na kuleka kuŵa na mtima wa thinkho.

Ivyo Mungachita:

Ghanaghaniranipo chomene umo mukuwonera ŵanthu ŵanyake, chomene para mba fuko panji mtundu winu yayi. Jifumbani kuti: ‘Kasi nkhuŵawona wuli? Kasi umo nkhuŵawonera, vikuthemba pa ivyo ine nkhumanya vyakukhwaskana na iwo? Panji nkhutemwera?’ Lekani kuwonelera panji kuŵerenga vinthu pa Intaneti ivyo vikukhuŵilizga nkhaza na kutinkhana.

Mazgu gha Chiuta ghangatovwira kuti timazge thinkho mu mitima na mu maghanoghano ghithu

Ntchipusu yayi kuti tijeruzge tekha pa umo tikughanaghanira panji kuwonera vinthu. Kweni Mazgu gha Chiuta ghangatovwira ‘kumanya ivyo mtima ukughanaghana na kukhumba.’ (Ŵahebere 4:12) Ntheura lutilirani kusanda ivyo Baibolo likuyowoya. Yaniskani ivyo mukusambira mu Baibolo na ivyo mukughanaghana, ndipo yezgani kuchita vinthu mwakuyana na ivyo Baibolo likuyowoya. Mazgu gha Chiuta ghangatovwira kuti timazge thinkho ilo ‘lakhomelera chomene’ mu maghanoghano na mitima yithu.—2 Ŵakorinte 10:4, 5.

Chakuchitika Chanadi—STEPHEN

Wakasintha Umo Wakaghanaghaniranga

Stephen na ŵamubanja lakwake ŵakatinkhikanga chomene na ŵazungu. Ivi vikapangiska kuti wambe kukolerana na gulu la ndyali ilo likalweranga wanangwa wa ŵanthu. Nyengo yikati yajumphapo, wakamba kusangika na milandu chifukwa cha thinkho. Stephen wakuti: “Ulendo unyake ine na ŵanyane tikaluta kukawonelera mafilimu agho ghakalongoranga umo ŵanthu ŵafipa ŵakasuzgikiranga mu United States vyaka vyakumasinda. Ine na ŵanyane tikakwiya chomene, ndipo tikatimba ŵanyamata ŵazungu awo ŵakaŵa umo tikawoneleranga mafilimu. Kufuma apo, tikamba kwenda mu nyumba za ŵazungu izo zikaŵa kufupi na ise, kupenja ŵanthu ŵanyake ŵakuti tiŵatimbe.”

Kweni Stephen wakasintha chomene umo wakawoneranga vinthu wati wamba kusambira Baibolo na Ŵakaboni ŵa Yehova. Iyo wakuti: “Pakuti nkhani ya kusankhana mitundu yikaninjira chomene, vinthu vinyake ivyo Ŵakaboni ŵakachitanga vikanizizika. Mwachiyelezgero, Kaboni munyake muzungu wakafumapo kuya ku charu chinyake. Ŵana ŵake wakasungiska ku mbumba ya Kaboni munyake mufipa. Kweniso Kaboni munyake muzungu wakatora munyamata munyake mufipa na kwamba kukhala nayo chifukwa wakaŵavya kwakukhala.” Stephen wakakhorwa kuti Ŵakaboni ŵa Yehova ŵakutemwana zanadi, ndipo Mbakhristu awo Yesu wakati ŵazamumanyikwa kuti mbasambiri ŵake para ŵakutemwana.—Yohane 13:35.

Kasi ntchivichi chikamovwira Stephen kuti waleke thinkho na nkhaza? Lemba la Ŵaroma 12:2 ndilo likamovwira. Iyo wakuti: “Nkhamba kumanya kuti nkhwenera kusintha maghanoghano ghane. Nkhasintha maghanoghano ghane mwakuti nikhalenge mwamtende na ŵanthu kweniso nkhawona kuti ndiwo umoyo uwemi chomene.” Stephen wali kuleka kutinkha ŵanji ndipo pasono ngwakukondwa ndipo wakhala umoyo uwemi uwu kwa vyaka 40.