IVYO TINGACHITA KUTI TIMAZGE THINKHO

2 | Kuwezgera Yayi

Ivyo Baibolo Likuyowoya:

“Kuwezgera munthu uheni pa uheni yayi. . . . Usange ntchamachitiko, muŵe pamtende na ŵanthu wose, kuyana na umo mungafiskira. Kuwezgera nduzga mwekha yayi, . . . Pakuti kuli kulembeka kuti: Yehova wakuti: ‘Nduzga ni zane, nizamuwezgera.’”—ŴAROMA 12:17-19.

Ivyo Lemba Ili Likung’anamura:

Nangauli mwakawiro tikukwiya para munthu watinangira, kweni Chiuta wakukhumba yayi kuti tiwezgerenge. M’malo mwake, wakutiphalira kuti tilindilire iyo kuti ndiyo wazakamazge vinthu vyambura urunji.—Salimo 37:7, 10.

Ivyo Mungachita:

Para ŵanthu ŵambura kufikapo ŵakuwezgera, vikupangiska waka kuti ŵanthu ŵalutilire kutinkhana. Ipo para munthu wamukwiyiskani panji kumunangirani, kumuwezgera yayi. Yezeskani kuchita nayo vinthu mwamtende. Nakuti nyengo zinyake vikuŵa makora chomene kuvileka waka ivyo vyachitika. (Zintharika 19:11) Ndipouli, nyengo zinyake pakuŵa vifukwa vyakupulikikwa vyakuyowoyera ivyo vyachitika. Mwachiyelezgero para munthu wamuchitirani nkhaza, mungakayowoya ku polisi panji ku ŵamazaza ŵanyake.

Kuwezgera kukunanga waka vinthu

Kweni kasi mungachita wuli usange vikuwoneka kuti palije nthowa yamtende yakumazgira suzgo ilo lachitika? Wuli usange mwachita vyose ivyo vyakhumbikwanga kuti mumazge suzgo ilo mwamtende, kweni vyatondeka? Mungawezgeranga yayi. Chifukwa para muwezgerenge ndipo vinthu vinganangikirathu. Kweni para mundawezgere vingawovwira kuti kutinkhana kuleke kulutilira. Tikwenera kuthemba fundo za Chiuta kuti timazge masuzgo mu nthowa yiwemi. Baibolo likuti: “Umugomezge, ndipo wakovwirenge.”—Salimo 37:3-5.

Chakuchitika Chanadi—ADRIÁN

Wakaleka Kuwezgera

Apo wakaŵa muwukirano, Adrián wakaŵa wankhaza kweniso wakatinkhanga ŵanji, ndipo wakawezgeranga uheni pa uheni kwa waliyose uyo wamunangira. Iyo wakuti: “Kanandi tikatimbananga na ŵanyane, zifuti muchanya. Ntheura nyengo zinandi nkhapwetekekanga chomene, ndopa khachikhachi, ndipo nkhakhalanga pasingo pera.”

Apo wakaŵa na vyaka 16, Adrián wakamba kusambira Baibolo. Iyo wakuti: “Apo nkhalutiliranga kusambira Baibolo, nkhamanya kuti nkhakhumbikwiranga kusintha nkharo yane.” Wakeneranga kuleka thinkho na nkhaza. Chomene wakapindura na ivyo wakasambira kufuma pa lemba la Ŵaroma 12:17-19 ilo likuti tikwenera yayi kuwezgera. Iyo wakuti: “Nkhazomerezga kuti Yehova wazamumazga vinthu vyambura urunji pa nyengo yake kweniso munthowa iyo mweneko wakumanya. Pachoko na pachoko nkhamba kuleka mbembe.”

Mise yinyake genge ilo wakatemwanga kutimbana nalo, likamuwukira. Uyo wakadangiliranga wakachemerezga kuti: “Kwesako tiwone!” Adrián wakuti: “Nkhakhumbanga chomene kuti niwezgere.” Kweni m’malo mwa kuwezgera, wakalomba cha mu mtima kwa Yehova na kufumapo pa malo agha.

Adrián wakalutilizga kuti: “Machero ghake, nkhasanganaso nayo mulongozgi wa gulu lira wali yekha. Mtima ukafuma, kweni nkhalombaso Yehova kuti wanovwire nijikore. Nkhaghanaghananga kuti nayo wakwiya, kweni nkhazizwa kuti munyamata uyu wakiza kwa ine na kuyowoya kuti: ‘Unigowokere pa ivyo vikachitika mayiro. Chakuti umanye ntchakuti, nane nkhukhumba kuŵa nga ndiwe. Nkhukhumba kusambira Baibolo.’ Nkhakondwa chomene kuti nkhajikora. Ntheura tikamba kusambilira lumoza Baibolo.”