IVYO TINGACHITA KUTI TIMAZGE THINKHO

1 | Kutemwera Yayi

Ivyo Baibolo Likuyowoya:

“Chiuta wakutemwera yayi, kweni wakupokelera munthu wa mtundu uliwose uyo wakumopa na kuchita urunji.”—MILIMO 10:34, 35.

Ivyo Lemba Ili Likung’anamura:

Yehovaa wakuteruzga mwakutolera charu icho tikukhala yayi, nesi mtundu withu, mtundu wa thupi, panji mutheto withu. M’malo mwake iyo wakuwona chomene wunthu withu wamukati. Baibolo likuyowoyaso kuti, “munthu wakuwona kuwaro, kweni Yehova wakuwona mu mtima.”—1 Samuyeli 16:7.

Ivyo Mungachita:

Nangauli tingawona yayi ivyo vili mu mtima wa munthu nga umo wakuchitira Chiuta, kweni tingamuyezga Chiuta na kuchita vinthu mwambura kutemwera. Ŵikanipo mtima kuwona munthu waliyose payekha, m’malo mwa mtundu wake. Para mwawona kuti muli na maghanoghano ghakubudika ghakukhwaskana na mtundu unyake wa ŵanthu panji fuko linyake, lombani Chiuta kuti wamovwirani kuwuskamo maghanoghano ghaheni agho muli nagho. (Salimo 139:23, 24) Para mwamulomba Yehova kufumira pasi pamtima kuti wamovwirani kuti muleke kutemwera, manyani kuti wapulikenge lurombo lwinu na kumovwirani.—1 Petrosi 3:12.

a Yehova ni zina la Chiuta.—Salimo 83:18.

“Nkhaŵa kuti nindakhalepo pasi lumoza na muzungu mwamtende . . . Pasono nili yumoza wa gulu la ŵabali ilo ndakukolerana pa charu chose.”—TITUS

Chakuchitika Chanadi—TITUS

Wakamazga Thinkho

Titus wakaŵa mukali chomene chifukwa cha malango ghakusankhana mtundu agho ghakaŵapo. Ntheura wakanjira gulu la ŵanthu ŵakusuzga awo nawo ŵakajipulikanga mwakuyana waka nga ndiyo. Iyo wakuti: “Tikalutanga mu tawuni ku malo agho ŵafipa ŵakazomerezgekanga yayi, nga nkhu ma hotelo na ku mabala, kuti tikayambiske mbembe.” Titus wakuti wakachitanga vyose ivi chifukwa cha thinkho. Iyo wakayowoyaso kuti: “Para nayambana na munthu kwali ni mwanalume panji mwanakazi, ine ndine nkhaŵanga wakwamba kuponya fayiti.”

Titus wati wamba kusambira Baibolo na Ŵakaboni ŵa Yehova, wakamba kusintha. Wati wamba kuŵerenga Baibolo, wakamba kusintha kaghanaghaniro kake. Iyo wakakondwa chomene na layizgo lakuti “nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.”—Chivumbuzi 21:3, 4.

Pakwamba, chikaŵa chakusuzga kwa Titus kuti waleke kutinkha ŵanji. Iyo wakuti: “Chikaŵa chakusuzga chomene kuti nisinthe umo nkhaghanaghaniranga kweniso umo nkhachitiranga vinthu.” Kweni wakawovwirika na ivyo wakasambira kufuma pa lemba la Milimo 10:34, 35, ilo likuti Chiuta wakutemwera yayi.

Kasi ntchivichi chikachitika? Titus wakulongosora kuti: “Nkhakhorwa kuti Ŵakaboni ŵa Yehova ntchisopa chaunenesko nadi nati nawona umo ŵakutemwerana yumoza na munyake, nanga ŵangaŵa kuti ŵakupambana mtundu panji mafuko. Nanga ni apo nkhaŵa kuti nindabatizike kuŵa Kaboni wa Yehova, muzungu munyake mu mpingo wakanichemera kunyumba kwake kuti tikalyere lumoza chakurya. Nkhaŵa nga nkhulota. Nkhaŵa kuti nindakhalepo pasi lumoza na muzungu mwamtende, kweni panyengo iyi nkharyanga chakurya pamoza na muzungu ku nyumba kwake. Pasono nili yumoza wa gulu la ŵabali ilo ndakukolerana pa charu chose chapasi.”