1 | Lurombo “Muthulirani Vyose Ivyo Mukwenjerwa Navyo”

BAIBOLO LIKUTI: “Muthulirani [Chiuta] vyose ivyo mukwenjerwa navyo, chifukwa wakumupwelelerani.”—1 PETROSI 5:7.

Ivyo Lemba Ili Likung’anamura

Yehova wakutipempha kuti timuphalirenge chilichose icho chikupangiska kuti tisuzgikenge maghanoghano. (Salimo 55:22) Tingalomba kwa Yehova pa suzgo lililose kwali ndikuru panji ndichoko. Icho ntchakuzirwa kwa ise, ntchakuzirwaso kwa Yehova. Ntchakuzirwa chomene kulomba kwa Yehova kuti tiŵe na mtende wa mu maghanoghano.—Ŵafilipi 4:6, 7.

Umo Fundo Iyi Yingatovwilira

Para tikusuzgika maghanoghano, tingamba kujiwona nga tili tekha. Ni nyengo zose yayi apo ŵanthu ŵanyake ŵangapulikiska ivyo tikujumphamo. (Zintharika 14:10) Kweni para tamuphalira Chiuta mu lurombo kufumira pasi pa mtima umo tikujipulikira, wakutitegherezga mwalusungu. Yehova wakutiwona, wakumanya vyakuŵinya kweniso masuzgo ghithu, ndipo wakukhumba kuti timuphalirenge chilichose icho tikwenjerwa nacho mu lurombo.—2 Midauko 6:29, 30.

Para tikuyowoya na Yehova mu lurombo vikutovwira kuti tigomezgenge chomene kuti wakutipwelelera. Nase tingajipulika nga ngwamasalimo uyo wakalomba kuti: “Mwawona visuzgo vyane. Mukumanya kukweŵeka kwane.” (Salimo 31:7) Kumanya kuti Yehova wakuwona masuzgo agho tikukumana nagho, vikutovwira kuti tileke kugongowa para tasangana na masuzgo. Kweni Yehova wakuchita vinandi padera pakumanya masuzgo ghithu. Iyo wakutipulikiska kweniso wakutipembuzga na kutikhozga kwizira mu Baibolo kuluska munthu waliyose.

Umo Baibolo Likovwilira Julian

Umo Kwenjerwa Kukanikhwaskira

“Nkhenjerwanga chomene kweniso nkhalwaranga matenda ghakunitondeska kujikora pakuchita vinthu vinyake. Nyengo zinyake mwamabuchi waka mbwe nkhambanga kwenjerwa. Nyengo zinyake nkhuŵa makora kweni mbwe nkhwamba kwenjerwa kwambura chifukwa chilichose. Kanandi nkhwamba kwenjerwa para nili pa gulu la ŵanthu. Nkhufipa mtima chomene na ivyo ŵanthu ŵakughanaghana vya ine.

“Awo ŵakumanya suzgo lane ŵakunovwira chomene. Kweni nyengo zinyake ivyo ŵakuyowoya vikuŵa vyakovwira yayi. Ndipouli nkhuwonga chomene kuti ŵakuŵikapo mtima kuti ŵanovwire.

“Nyengo zinyake, vikunisuzga kulomba kwa Yehova chifukwa cha kwenjerwa kweniso matenda agho nkhulwara. Nkhukhumbikwira kuŵikapo mtima chomene kuti maghanoghano ghakhazikike na kulomba kwa Yehova. Maghanoghano ghane ghakusintha mwaluŵiro chomene, mwakuti nkhukaŵa yayi kutimbanizgika. Para nasuzgika maghanoghano, vikunisuzga chomene kuti nimuphalire Yehova umo nkhujipulikira panji ivyo nkhughanaghana.”

Umo Baibolo Likunovwilira

“Nasambira mu Baibolo kuti malurombo ghakwenera kuŵa ghatali panji ghakuyowoyeka mwakukopa yayi kuti Chiuta wapulike. Nyengo zinyake para natondeka kuyowoya umo nkhujipulikira, nkhulomba waka kuti: ‘Yehova chonde novwirani.’ Nangauli vili nthena, kweni nkhuwona kuti Yehova wakunipulikiska ndipo wakunipa ivyo nkhukhumba pa nyengo yakwenelera. Padera pa lurombo, nkhupokeraso wovwiri wa ku chipatala. Nkhuwonga chomene chifukwa cha wovwiri wose uwu, chifukwa pasono vinthu viliko makora. Nkhuwona kuti ntchakuzirwa chomene kulomba kwa Dada wane wakuchanya uyo wakunitemwa chomene.”