2 | “Kusanguluskika na Malemba”

BAIBOLO LIKUTI: “Vinthu vyose ivyo vikalembeka kale, vikalembeka kuti vitisambizge, kuti para tazizipizga na kusanguluskika na Malemba, tiŵe na chigomezgo.” —ŴAROMA 15:4.

Ivyo Lemba Ili Likung’anamura

Mu Baibolo muli fundo izo zingatipembuzga, kutipa nkhongono na kutovwira kuzizipizga para tamba kughanaghana viheni. Kweniso Baibolo likutipa chigomezgo kuti sonosono apa tizamusuzgikaso maghanoghano yayi.

Umo Fundo Iyi Yingatovwilira

Nyengo zinyake tose tikusangana na vinthu ivyo vikutisuzga; kweni awo ŵakusuzgika maghanoghano panji kwenjerwa nyengo zose ŵakulimbana na maghanoghano ghaheni. Kasi Baibolo lingawovwira wuli?

Mu Baibolo muli fundo zinandi izo zingawovwira kuti munthu waghanaghanirenge viwemi. (Ŵafilipi 4:8) Lingatisanguluska na kutizikiska mtima ndipo ivi vingatovwira kuti tichepeske suzgo la kusuzgika maghanoghano.—Salimo 94:18, 19.
Baibolo lingatovwiraso kuti tileke kujiwona kuti ndise ŵambura kuzirwa.—Luka 12:6, 7.
Mavesi ghanandi mu Baibolo ghakutisimikizgira kuti tili tekha yayi, ndipo Chiuta withu, uyo ni Mlengi, wakupulikiska umo tikujipulikira.—Salimo 34:18; 1 Yohane 3:19, 20.
Baibolo likutilayizga kuti Chiuta wazamumazga maghanoghano ghaheni agho ghakutisuzga. (Yesaya 65:17; Chivumbuzi 21:4) Para tikusuzgika maghanoghano, layizgo ili lingatovwira kuti tizizipizge.

Umo Baibolo Likovwilira Jessica

Umo Kusuzgika Maghanoghano Kukanikhwaskira

“Apo nkhaŵa na vyaka 25, nkhamba kufipa mtima chomene ndipo ŵakanisanga na nthenda yakusuzgika maghanoghano. Nkhasuzgikanga chomene chifukwa cha kukumbukira vinthu vyakuŵinya ivyo vikanichitikirapo kumanyuma. Madokotala ghakanovwira kumanya kuti nkhasuzgikanga maghanoghano chifukwa chakuti nkhaghanaghaniranga vinthu viheni ivyo vikanichitikira pa umoyo. Padera pakupokera mankhwala ghakwenelera, ŵakenerangaso kunovwira kumanya vinthu ivyo vikunipangiska kuti nisuzgikenge maghanoghano kweniso umo ningamazgira maghanoghano ghaheni.”

Umo Baibolo Likunovwilira

“Apo nkhasuzgikanga chomene maghanoghano, vinthu vikaŵanga makora yayi, nkhenjerwanga chomene kweniso nkhatondekanga kugona. Kanandi usiku nkhenjerwanga chomene mwakuti maghanoghano ghakakhazikikanga yayi. Nga umo lemba la Salimo 94:19 likulongosolera, Chiuta wangatisanguluska na kutizikiska mtima pa nyengo iyo tikwenjerwa chomene. Ntheura pafupi na bedi nkhaŵikangapo Baibolo na buku ilo mukaŵa mavesi agho ghakanikhozganga. Para tulo twachimbira, nkhaŵerenganga mavesi ghanyake mu Baibolo, ntheura nkhapembuzgikanga na fundo za Chiuta.

“Baibolo likutichiska kuti tifumiskemo maghanoghano ghaheni agho ghakukolerana yayi na fundo za Chiuta. Kale nkhajiwonanga kuti ndine wambura ntchito na wambura kutemweka. Kweni nkhasambira kuti ivi vikupambana na ivyo Baibolo likusambizga, kuti Chiuta ngwachitemwa kweniso ni Dada walusungu ndipo wakupwelelera waliyose payekha. Pachoko na pachoko nkhamba kutonda maghanoghano ghaheni ndipo ghakanisuzgangaso yayi. Chifukwa chakuti nili kusambira Baibolo, pasono nkhujiwona nga umo Yehova wakuniwonera. Ivi vikanovwira chomene kuti nitonde maghanoghano ghaheni agho nkhaŵa nagho.

“Nkhulindizga nyengo apo maghanoghano ghaheni na ghakupweteka ghazamuŵa kuti ghamara. Pakuti sono nkhumanya kuti kutimbanizgika maghanoghano kuzamumara, vikunovwira kuti nizizipizge chifukwa munthazi tizamulimbanaso na kusuzgika maghanoghano yayi.”