3 | Sambiraniko ku Ŵanthu Awo Ŵakuzunulika mu Baibolo

BAIBOLO LIKULONGOSORA ZA . . . Ŵanalume na ŵanakazi ŵakugomezgeka awo ‘ŵakajipulikanga nga ndise.’—YAKOBE 5:17.

Ivyo Lemba Ili Likung’anamura

Mu Baibolo muli nkhani zinandi za ŵanalume na ŵanakazi awo ŵakasuzgikapo maghanoghano munthowa zakupambanapambana. Apo tikuŵerenga Baibolo, tingasanga nkhani ya munthu munyake uyo nayo wakajipulikanga nga ndise.

Umo Fundo Iyi Yingatovwilira

Tose tikukhumba kuti ŵanyithu ŵatipulikiskenge, chomene pa nyengo iyo tikusuzgika maghanoghano. Apo tikuŵerenga Baibolo, tingasanga nkhani ya munthu munyake uyo nayo wakajipulikapo nga umo nase tikujipulikira. Ivi vikutovwira kumanya kuti, tili tekha yayi apo tikulimbana na kwenjerwa kweniso maghanoghano ghaheni.

Mu Baibolo muli mazgu gha ŵanthu ŵanandi awo nawo ŵakajiwonanga nga ŵali ŵekha ndipo ŵakasoŵa chakuchita. Kasi namwe muli kuyowoyapo kuti, ‘Mbwe kwamara ningakwaniskaso yayi.’ Mozesi, Eliya na Davide ŵakajipulikapo nthena.—Maŵazgo 11:14; 1 Mathemba 19:4; Salimo 55:4.
Baibolo likutiphalira za mwanakazi munyake zina lake Hana, uyo ‘wakapwetekeka chomene mu mtima’ chifukwa wakaŵavya mwana ndipo muwolimwa munyake wakamunyozanga chomene.—1 Samuyeli 1:6, 10.
Baibolo likuyowoya za mwanalume munyake zina lake Yobu uyo nayo tingasambirako. Nangauli wakaŵa na chipulikano chakukhora, kweni wakasuzgika chomene maghanoghano ndipo nyengo yinyake wakayowoya kuti: “Nkhutinkha umoyo wane, nkhukhumba yayi kukhalilira wamoyo.”—Yobu 7:16.

Para tingasambira umo ŵanalume aŵa ŵakatondera maghanoghano ghaheni, vingatovwira kuti nase titonde maghanoghano ghaheni.

Umo Baibolo Likovwilira Kevin

Umo Matenda gha mu Wongo Ghakanikhwaskira

“Nkhasangika na matenda gha mu wongo apo nkhaŵa na vyaka pafupifupi 50. Nyengo zinyake nkhuwona nga ningamarana na suzgo lililose ilo ningasangana nalo. Kweni nyengo zinyake nkhuwona kuti palije chifukwa chakuŵira na umoyo.”

Umo Baibolo Likunovwilira

“Munthu yumoza uyo wakuzunulika mu Baibolo uyo ningasambirako ni mpositole Petrosi. Wakabudiskanga vinthu vinyake ivyo vikapangiska kuti wajiwonenge kuti ngwawakawaka. M’malo mwakuti waghanaghanirenge ivyo wakabudiskanga, Petrosi wakaghanaghaniranga za ŵabwezi ŵake awo ŵakamovwiranga. Para zuŵa linyake nthenda iyi yaniwukira, nkhutimbanizgika chomene maghanoghano ndipo nkhujiwona kuti ndine wambura kuzirwa. Nga ni Petrosi, nkhutemwa chomene kuŵa pafupi na ŵabwezi ŵane, ivi vikunovwira kuti nileke kugongowa.

“Munthu munyake wa mu Baibolo uyo wakunipembuzga chomene ni Themba Davide. Iyo kanandi wakasuzgikanga maghanoghano chifukwa cha viheni ivyo wakabudiskanga. Nkhusambirako kwa iyo, chifukwa nane nyengo zinyake nkhuyowoya panji kuchita vinthu ivyo pamanyuma nkhudandawura navyo. Nkhupembuzgika na mazgu gha Davide agho ghali pa Salimo 51. Mu vesi 3, Davide wakayowoya kuti: ‘Maubudi ghane nkhughamanya makora, ndipo kwananga kwane kuli pamaso pane nyengo zose.’ Ndimo nane nkhujipulikira para nasuzgika chomene maghanoghano ndipo chikuŵa chakusuzga kujiwona mwakwenelera. Kweniso nkhupembuzgika na mazgu gha Davide agho ghali mu vesi 10 agho ghakuti: ‘Mwe Chiuta, lengani mwa ine mtima wakutowa, na kuŵika mwa ine mzimu uphya, wakukhazikika.’ Nane nkhulomba mwakuyana waka kwa Chiuta kuti wanovwire kuti nijiwonenge mwakwenelera. Kweniso vesi 17 likunipembuzga chomene ilo likuti: ‘Mtima wakuphyoka na kuteketeka, A Chiuta, muwukanenge chara.’ Vesi ili likunisimikizgira kuti Chiuta wakunitemwa.

“Pakuti nkhughanaghanira chomene pa viyelezgero vya mu Baibolo kweniso ivyo Chiuta wanipa pasono, vikunovwira kuti nikhozge chigomezgo chane cha munthazi. Ivyo Baibolo likulayizga vikuŵa vyanadi kwa ine ndipo vikunovwira kuti nileke kugongowa.”