4 Baibolo Lili na Ulongozgi Wakovwira

Ivyo Lemba Ili Likung’anamura

Nangauli Baibolo ni buku la chipatala yayi, kweni lili na ulongozgi wakovwira. Ulongozgi uwu ungawovwira munthu uyo wakusuzgika maghanoghano. Wonani viyelezgero vyakulondezgapo ivi.

Umo Fundo Iyi Yingatovwilira

“Ŵanthu awo ŵali makora ŵakukhumbikwira dokotala chara, kweni ŵalwari ndiwo.”—MATEYU 9:12.

Baibolo nalo likuzomerezga kuti tingakapokera wovwiri wa ku chipatala. Ŵanthu ŵanandi ŵakuwona kuti ŵakovwirika para ŵamanya unenesko wakukhwaskana na suzgo lawo kweniso para ŵaluta kukakumana na dokotala.

“Maseŵero ghakukhozga thupi ghali na chandulo.”—1 TIMOTE 4:8.

Para mungaŵikapo mtima kuti muchitenge vinthu ivyo vingamovwirani kuŵa na umoyo uwemi, mbwe mungachepeskako suzgo lakusuzgika maghanoghano. Vinthu ivi vikusazgapo kuchita maseŵero mwakukhazikika, kurya vyakurya viwemi na kugona mwakukwana.

“Mtima wachimwemwe ni munkhwala uwemi, kweni mzimu wakuphyoka ukukamuska nkhongono.”—ZINTHARIKA 17:22.

Kuŵerenga nkhani zakukhozga za mu Baibolo kweniso kujiŵikira vilato ivyo tingafiska vingatovwira kuti tiŵe ŵakukondwa. Para mukughanaghanira pa vinthu viwemi na kugomezga kuti vinthu vizamuŵa makora munthazi, vingamovwirani kuti muzizipizge suzgo lakusuzgika maghanoghano.

“Vinjeru vili na ŵakujiyuyura.”—ZINTHARIKA 11:2.

Nyengo zinyake vingamusuzgani kuti muchitenge vinthu vyose pamwekha, ntheura mukwenera kuŵa ŵakukhumbisiska kuzomera wovwiri wa ŵanyinu. Ŵabwezi na ŵa mu banja linu ŵangakhumba kuti ŵamovwirani kweni nyengo zinyake ŵangamanya yayi ivyo ŵangachita. Ntheura ŵaphalirani ivyo mukuwona kuti ŵangamuchitirani. Kweni kukhazga vinandi yayi kwa iwo, ndipo muwongenge wovwiri uwo ŵakumupani.

Umo Ulongozgi wa mu Baibolo Ukovwilira Awo Ŵakusuzgika Maghanoghano

“Nkhawona kuti vinthu vili makora yayi kwa ine, ntheura nkhaluta kukakumana na dokotala. Dokotala wakasanga suzgo lane. Ivi vikanovwira kuti nizomerezge suzgo ilo nkhaŵa nalo na kumanya wovwiri uwo ningapokera pa suzgo lane.”—Nicole,a uyo wali na nthenda ya mu wongo.

“Kuŵerenga Baibolo zuŵa lililose pamoza na muwoli wane kukunovwira kuti zuŵa lililose nighanaghanirenge vinthu viwemi na vyakukhozga. Ndipo mazuŵa ghanyake para nkhusuzgika maghanoghano, mavesi ghanyake ghakunipembuzga na kunikhozga.”—Peter, uyo wakusuzgika maghanoghano.

“Vikanisuzganga kuti niphalire ŵanyane vya suzgo lane chifukwa nkhachitanga soni. Kweni mubwezi wane wapamtima wakanitegherezganga mwalusungu. Wakanovwira chomene kuti nijipulikengeko makora kweniso kuti nileke kujiwona kuti nili nekha.”—Ji-yoo, uyo wali na suzgo la kuleka kurya.

“Baibolo lanovwira kuti nilimbikirenge kugwira ntchito kweniso kuti nipumurenge mwakukwana. Ulongozgi wake wanovwira kuti nichitenge mwamahara para nkhusuzgika maghanoghano.”—Timothy, uyo wakulwara nthenda yakutondeka kujikora pakuchita vinthu vinyake.