Vinthu Vyakukondweska Ivyo Vyanichitikira Pakuteŵetera Yehova Kweniso Ivyo Nasambirapo

Ŵapapi ŵane ŵakawukako ku Estonia panyengo ya Nkhondo Yachiŵiri ya pa Charu Chose ndipo ŵakaluta ku Germany, uko ine nkhababikira. Nati nababika, ŵakamba vyakunozgeka kuti ŵasamire ku Canada. Tati tafika ku Canada, malo ghakwamba kukhala kukaŵa kufupi na Ottawa, ndipo uku tikakhalanga mu kanyumba kachoko chomene akoso tikaŵeterangamo nkhuku. Tikaŵa ŵakavu chomene, kweni tikaŵanga na masumbi agho ghakaŵa chakurya chithu cha mulenji.

Zuŵa linyake, Ŵakaboni ŵa Yehova ŵakaŵerengera amama lemba la Chivumbuzi 21:3, 4. Ivyo amama ŵakasambira vikaŵakhwaska chomene mwakuti ŵakathiska na masozi wuwo. Mbuto yaunenesko yikakura, ndipo amama na adada wose ŵakakura luŵiro chomene mwauzimu ndipo ŵakabatizika.

Nangauli amama na adada ŵakayowoyanga makora yayi Chingelezi, kweni ŵakaŵa ŵamwamphu chomene pakuteŵetera Yehova. Mwakuti zuŵa lililose la Chisulo, adada nanga ŵangaŵa kuti ŵagwira ntchito usiku wose ku kampani yakusongonora visulo ku Sudbury, Ontario, ŵakatitoranga ine na mudumbu wane muchoko, Sylvia, kuluta nase mu uteŵeti. Ndipo sabata yiliyose tikasambiranga Gongwe la Mulinda nga mbumba. Amama na Adada ŵakanovwira chomene kuti nitemwenge Chiuta. Ivi vikanovwira kuti nipeleke umoyo wane kwa Yehova mu 1956 apo nkhaŵa na vyaka 10. Nyengo yiliyose para nkhughanaghanira umo ŵakamutemweranga Yehova, vikunichiska kuti nane nilutilire kumuteŵetera.

Nkhati namalizga sukulu, nkhalimbikiranga viŵi yayi vinthu vyauzimu. Nkhaghanaghananga kuti para ningaŵa mupayiniya, mbwenu nipangenge ndalama zinandi yayi kuti nifiske loto lane lakukwera ndege na kuluta ku charu chinyake. Nkhasanga ntchito pa wayilesi yinyake ndipo nkhaŵa dj, ndipo nkhayitemwa chomene ntchito iyi. Kweni pakuti nkhagwiranga usiku, kanandi nkhakhalanga ku maungano ndipo nkhatemwanga kuchezga na ŵanthu awo ŵakatemwanga Chiuta yayi. Paumaliro njuŵi yane yakusambizgika Baibolo yikanichiska kuti nisinthe.

Nkhasamira ku Oshawa, Ontario. Ku malo agha nkhakumana na Ray Norman, mudumbu wake Lesli, na ŵapayiniya ŵanyake. Wose ŵakanipokelera makora. Nati nawona umo ŵakaŵira ŵakukondwa, nkhachiskika kuti nisandeso vilato vyane. Ŵakanichiska kuti nane nambe upayiniya, ndipo nkhambapo mu Seputembala 1966. Nkhaŵa wakukondwa chomene, ndipo umoyo ukaŵa wakunozga chomene. Ndipouli vinthu ivyo nkhakhazganga yayi ivyo vikasintha umoyo wane vikaŵa pafupi kuchitika.

PARA YEHOVA WAMUCHEMANI KUCHITA MULIMO UNYAKE, KUKANA YAYI

Apo nkhaŵa kuti nichali ku sekondare, nkhafumbira uteŵeti wa pa Beteli ku Toronto, Canada. Pamanyuma apo nkhachitanga upayiniya, nkhachemeka kuti nkhateŵetere pa Beteli kwa vyaka vinayi. Kweni nkhamutemwa chomene Lesli, mwakuti nkhawopanga kuti para nazomera kuluta ku Beteli, mbwenu nizamumuwonaso yayi. Nkhati nalomba chomene kwa Yehova, paumaliro nkhazomera kwamba uteŵeti wa pa Beteli, kweni nkhaŵa na chitima kulekana na Lesli.

Pa Beteli nkhateŵeteranga ku londire (dipatimenti ya kuchapa vyakuvwara) ndipo pamanyuma nkhaŵa sekeletare. Nyengo yichoko waka yikati yajumphapo, Lesli wakaŵa mupayiniya wapadera ku Gatineau, Quebec. Kanandi nkhajifumbanga ivyo wakuchita kweniso usange nili kusankha makora kwamba uteŵeti pa Beteli. Pamanyuma pakachitika chinthu chinyake chakukondweska chomene pa umoyo wane icho nkhakhazganga yayi. Ray, mudumbu wa Lesli, wakachemeka pa Beteli ndipo tikagonanga chipinda chimoza. Ivi vikapangiska kuti tambeso kuyowoyeskana na Lesli. Tikatorana pa zuŵa ilo nkhamalizgiranga uteŵeti wane wa vyaka 4, ndipo pakaŵa pa Febuluwale 27, 1971.

Ine na Lesli tikatumizgika ku mpingo Wachifurenchi ku Quebec. Vyaka vichoko waka, nkhazizwa chomene kuti nkhachemeka kuti nkhambe kwendera dera ndipo panyengo iyi nkhaŵa na vyaka 28. Nkhajiwonanga kuti nili mwana kweniso wambura kwenelera kuŵa mulaŵiliri wa dera, kweni mazgu gha pa Yeremiya 1:7, 8 ghakanikhozga chomene. Ndipouli, Lesli wakaŵa kuti wachitapo ngozi za galimoto zakupambanapambana, ntheura vikamusuzganga kugona. So tikajifumbanga kuti tamukwaniska wuli mulimo uwu? Kweni iyo wakati, “Usange Yehova watichema kuti tichite chinthu chinyake, tikwenera kuyezga dankha kuchita chinthu icho.” Tikazomera uteŵeti uwu ndipo tikawuchita kwa vyaka 17.

Nkhatangwanikanga chomene apo nkhaŵa mulaŵiliri wa dera, ndipo kanandi nkhaŵavyanga nyengo yakukwana yakuchezgera na Lesli. Kweni nkhasambirapo sambiro linyake. Zuŵa linyake mulenji pa Mande, belu likalira pa mulyango. Kweni nati nafika pa mulyango pakaŵavya waliyose, pakaŵa waka basiketi iyo mukaŵa salu ya pa thebulu, chizi, buledi, botolo la vinyo, matambulara, kweniso kapepara kanyake ako pakalembeka kuti: “Muwoli winu mulute nayo ku paki panji ku malo ghanyake kukatembeya.” Zuŵa ili kukacha makora ndipo kuchanya kukaŵa waka ngwee kwambura matutu. Ndipouli, nkhamulongosolera Lesli kuti nili na nkhani zakuti ninozgekere, so nilutenge yayi. Wakapulikiska kweni wakaŵa na chitima. Nati nakhala pa desiki lane, njuŵi yane yikamba kunisuzga. Nkhaghanaghanirapo lemba la Ŵaefeso 5:25, 28. Ndipo nkhawona kuti mazgu gha pa lemba ili yikaŵa nthowa iyo Yehova wakaniphaliliranga kuti nighanaghanirengeso umo muwoli wane wakujipulikira. Nati nalomba, nkhamuphalira Lesli kuti, “Tiye tilutenge,” ndipo wakakondwa chomene. Tikaluta ku malo ghanyake ghakutowa agho ghakaŵa mu mphepete mwa dambo linyake, ndipo tikatandika salu pasi na kukhalapo, ndipo tikasangwa chomene pa zuŵa ili. Kweni nkhayisanga nipera nyengo yakunozgekera nkhani zane.

Mulimo withu wa dera ukaŵa wakukondweska chomene, ndipo madera ghanandi agho tikendera ghakaŵa gha ku British Columbia na Newfoundland. Sono chilato chane chakuti nendenge malo ghakupambanapambana chikafiskika. Nkhaghanaghanirapo vya Sukulu ya Giliyadi kweni nkhakhumbanga yayi kuluta ku charu chinyake. Nkhawonanga kuti ŵamishonale mbanthu ŵapadera, so nkhajiwonanga kuti nili wakwenelera yayi. Padera pa chifukwa ichi, nkhawopangaso kuti ŵangatituma ku charu chinyake cha ku Africa icho kuli matenda na nkhondo. Nkhakondwanga umo nkhaŵira ku Canada.

KUCHEMEKA MWAMABUCHI KULUTA KU ESTONIA NA KU VYARU VYA KU BALTICS

Mu 1992 apo mulimo withu ukambirangaso mu vyaru ivyo kumasinda vikaŵa mu Soviet Union, tikapempheka usange tingajipeleka kusamira ku Estionia na kuŵa ŵamishonale. Tikazizwa chomene, ndipo tikayilombera nkhani iyi. Apa napo tikaghanaghaniraposo kuti, ‘Usange Yehova watichema kuti tichite chinthu chinyake, tikwenera kuyezga dankha kuchita chinthu icho.’ Ntheura tikazomera uteŵeti uwu, kweniso mu mtima nkhati: ‘Uwemi wake ngwakuti tikuluta ku Africa yayi.’

Mwaluŵiro tikambapo kusambira chiyowoyero cha ku Estonia. Tikati tateŵeterako kwa myezi yinandiko, tikapempheka kuchita mulimo wakwendera dera. Tikenderanga mipingo 46 na magulu ghatatu mu Estonia, Latvia, na Lithuania, kweniso ku Kaliningrad, Russia. So apa tikakhumbikwirangaso kusambira viyowoyero vinyake vya ku Latvia, Lithuania na Russia. Ichi chikaŵa chakusuzga chomene. Ndipouli, ŵabali na ŵadumbu ŵakaŵa ŵakukondwa kuti tikayezgayezganga kusambira viyowoyero vyawo, ndipo ŵakatovwira chomene. Mu 1999, ofesi ya munthavi yikajulika ku Estonia, ndipo ine nkhasankhika kuteŵetera mu Komiti ya Munthavi pamoza na Toomas Edur, Lembit Reile, na Tommi Kauko.

Tikamanyana na Ŵakaboni ŵanandi awo ŵakaŵa kuti ŵatorekera ku Siberia. Nangauli ŵakatambuzgikanga mu jele kweniso ŵakaŵa kutali na mbumba zawo, kweni ŵakaŵa ŵakukwiya yayi panji ŵakali. Iwo ŵakalutilira kuŵa ŵakukondwa kweniso ŵamwamphu mu uteŵeti. Chiyelezgero chawo chikatovwira kuwona kuti nase tingazizipizga na kuŵa ŵakukondwa nanga tingakumana na masuzgo ghakuru.

Tikatangwanikanga chomene na uteŵeti kwa vyaka vinandi mwakuti kanandi tikatoranga yayi holide kuti tipumulepo, ndipo ivi pamanyuma vikapangiska kuti Lesli wambe kujipulika wakuvuka chomene. Tikamanya mwaluŵiro yayi kuti wakajipulikanga nthena chifukwa cha nthenda yinyake yakuchemeka fibromyalgia. Tikaghanaghanirapo chomene ndipo tikawona kuti tiwelere ku Canada. Tikati tachemeka kuti tikanjire sukulu ya awo ŵali mu komiti ya munthavi ku Patterson, New York, U.S.A., nkhakayikanga usange tingakanjira. Ndipouli, tati tafwilirapo kulomba, tikazomera. Yehova wakatumbika ivyo tikasankha. Ku sukulu uku ndiko Lesli wakasanga wovwiri wa chipatala uwo wakakhumbikwiranga. Pamanyuma, tikambiraso kuchita milimo iyo tikachitanga.

TIKACHEMEKASO MWAMABUCHI KULUTA KU KONTINENTI YINYAKE

Zuŵa linyake usiku mu 2008, nili ku Estonia, nkhapokera foni kufuma ku likuru lithu, kunipempha usange tingazomera kukachita uteŵeti ku Congo. Nkhazizwa chomene, chomene chifukwa nkhakhumbikwiranga kuti nizgore machero ghake. Pakwamba, nkhamuphalira yayi Lesli chifukwa nkhamanyanga kuti mbwe wagonenge yayi usiku. Kweni ine ndine nkhatondeka kugona chifukwa nkhalombanga kwa Yehova ivyo nkhafipanga navyo mtima vyakukhwaskana na ku Africa.

Namachero ghake nati namuphalira Lesli, tikadumbiskana kuti, “Yehova ndiyo wakutipempha kuti tilute ku Africa. So tingamanya wuli kuti tingafiska yayi na kukondwa nawo uteŵeti uwu usange tindayezge kuwuchita?” Ntheura pamanyuma pa vyaka 16 tili mu Estonia, tikasamira ku Kinshasa, Congo. Ofesi ya munthavi ya uku yikaŵa na munda wakutowa kweniso kukaŵa kwa phee, kwambura viwawa. Chimoza mwa vinthu vyakwamba icho Lesli wakaŵika mu chipinda yikaŵa kadi ilo wakasunga kwambira waka apo tikafumirako ku Canada. Pa kadi ili pakalembeka kuti: “Utikitirenge kulikose uko wapandika.” Tati takumana na ŵabali, kuŵa na masambiro gha Baibolo, na kuwona umo mulimo waumishonale ukunozgera, chimwemwe chithu pakuteŵetera Yehova chikasazgikira chomene. Nyengo yikati yajumphapo, tikaŵa na mwaŵi wakwendera maofesi ghanyake gha munthavi mu vyaru 13 vya mu Africa. Ivi vikatipa mwaŵi wakumanyana na ŵanthu ŵakupambanapambana kweniso kuwona mikhaliro yawo yakukondweska. Nkhawopangaso yayi kuŵa mu vyaru vya mu Africa, ndipo tikamuwonga Yehova pakutitumizga ku Africa.

Ku Congo, tikapika vyakurya vyakupambanapambana ivyo pakwamba tikaviwonanga kuti ni vyakurya yayi. Kweni tikati tawona kuti ŵabali ŵakuvitemwa chomene vyakurya ivi, tikaviyezga ndipo tikavitemwa chomene.

Tikaluta kumafumiro gha dazi kwa charu ichi ndipo tikaŵakhozga ŵabali ŵithu na kuŵapa ivyo ŵakakhumbikwiranga, chifukwa ku malo agha vigeŵenga vikawukiranga mizi na kupweteka ŵanakazi na ŵana. Ku malo agha, ŵabali na ŵadumbu ŵanandi ŵakaŵa ŵakavu. Kweni tikakhwaskika chomene na umo ŵabali aŵa ŵakaŵira na chigomezgo chakukhora pa nkhani ya chiwuka, umo ŵakamutemweranga Yehova kweniso kuŵa ŵakugomezgeka ku gulu lake. Chiyelezgero chawo chikatichiska kuti tighanaghanirepo chifukwa icho tikuteŵetelera Yehova na kukhozga chipulikano chithu. Ŵabali ŵithu ŵanyake ŵakaluza nyumba zawo na mbuto zawo izo ŵakaŵa kuti ŵapanda kale. Ichi chikanikumbuska waka kuti tingataya vinthu vyakuthupi mwaluŵiro chomene kweniso kuti ubwezi withu na Yehova ndiwo ngwakuzirwa chomene kuluska chilichose. Nangauli ŵakasangananga na masuzgo agha, kweni ŵabali ŵithu ŵakakhaliranga waka kudandawura yayi. Umo ŵakachitiranga vinthu, tikakhozgeka chomene kuti nase tiŵe na chikanga apo tikulimbana na masuzgo ghithu, kusazgapo suzgo la ulwari.

UTEŴETI UPHYA KU ASIA

Tikapikaso uteŵeti unyake mwamabuchi. Tikapempheka kuti tikateŵetere ku ofesi ya munthavi ya Hong Kong. Tikaghanaghanangapo yayi vyakuti zuŵa linyake tizamukhala ku Asia. Kweni tati tawona umo Yehova watovwilira mwachitemwa pa uteŵeti uliwose uwo tikapikapo, tikazomera kusama. Mu 2013, uku tikuthiska masozi, tikaŵaleka ŵabwezi ŵithu ŵakutemweka kweniso kontinenti yakutowa ya Africa, ndipo tikamanyanga yayi ivyo tikumanenge navyo munthazi.

Kukaŵa kusintha kukuru chomene kwamba kukhala ku Hong Kong chifukwa msumba uwu uli na ŵanthu ŵanandi chomene ŵakufuma mu vyaru vyakupambanapambana. Chikaŵa chakusuzga chomene kusambira Chitchayinizi. Ndipouli, ŵabali ŵakatipokelera na mawoko ghaŵiri, ndipo tikachitemwa chomene chakurya cha uku. Pa ofesi ya munthavi ntchito zikasazgikirangasazgikiranga, kweni panyengo yimozaso mtengo wakugulira vinthu ukakwerangaso chomene. Ntheura Wupu Wakulongozga ukasankha kuti nyumba zinandi pa ofesi iyi ziguliskike. Nyengo yichoko yikati yajumphapo, mu 2015, tikasamira kuno ku South Korea, uko tikuteŵetera pasono. Kuno nako tikakhumbikwiraso kusambira chiyowoyero chinyake chakusuzga. Nangauli tikuchiyowoya makora yayi kweni ŵabali na ŵadumbu ŵakutikhozga pakutiphalira kuti kusintha kulipo pa umo tikuyowoyera Chikoreya.

IVYO TASAMBIRA APO TIKUTEŴETERA YEHOVA

Kusanga ŵabwezi ŵaphya ntchipusu yayi nyengo zose, kweni tasambira kuti para tamba ndise kuchemera ŵanji kunyumba kwithu na kuchezga nawo, tikwamba kumanyana nawo mwaluŵiro chomene. Tasanga kuti mu vinandi ŵabali ŵakuyana waka ndipo ivyo ŵakupambana ni vichoko waka, ndipo tikuwonga Yehova kuti wali kutilenga mu nthowa yakuti tingajura mitima yithu na kuŵa na ŵabwezi ŵanandi.—2 Kor. 6:11.

Tawona kuti ntchakukhumbikwa kutemwa ŵanthu nga umo Yehova wakuchitira kweniso kuti tiŵenge maso na kuwona ukaboni wakulongora kuti Yehova wakutitemwa na kutilongozga pa umoyo withu. Para tagongowa panji tamba kukayika usange ŵabali na ŵadumbu ŵakutitemwa, tikuŵazgaso makadi panji makalata ghakufuma ku ŵabwezi ŵithu. Tawona umo Yehova wazgolera malurombo ghithu, ndipo ivi vyatipa chigomezgo kuti Yehova wakutitemwa nadi kweniso vyatipa nkhongono kuti tilutilire kumuteŵetera.

Kwa vyaka vyose ivyo takhalira lumoza, ine na Lesli tasambira kuti ntchakuzirwa chomene kusanga nyengo yakuchezgera, nanga tingaŵa ŵakutangwanika wuli. Tasambiraso kuti ntchiwemi kusekapo para vinthu vinyake vyatitonda, chomenechomene para tikukhumba kusambira chiyowoyero chinyake. Ndipo usiku uliwose tikuyezgayezga kughanaghanira chinthu chakukondweska icho tingamuwongerapo Yehova.

Kuyowoya unenesko, nkhaghanaghanangapo yayi kuti ningazakaŵa mishonale panji kukhala mu vyaru vyakupambanapambana. Kweni nakondwa chomene chifukwa najiwonera nekha kuti vyose ni vyamachitiko na wovwiri wa Yehova. Nyengo zose nkhukumbuka mazgu gha ntchimi Yeremiya ghakuti: “A Yehova, mwanizelezeska.” (Yer. 20:7) Nadi, watipa vinthu vinandi vyakukondweska ivyo tikakhazganga yayi, kweniso watitumbika chomene kuluska umo tikaghanaghaniranga, ndipo wafiska nanga ntchilato chane cha kwenda mu ndege. Takwera ndege kuluta mu vyaru vinandi kuluska umo nkhaghanaghaniranga apo nkhaŵa mwana, ndipo nenderapo maofesi gha munthavi mu makontinenti 5. Nkhumuwongaso chomene Lesli kuti wanovwira pa mauteŵeti ghakupambanapambana agho nachitapo.

Tikulutilira kujikumbuska kuti vyose ivyo tikuchita, tikuchita chifukwa chakuti tikutemwa Yehova. Vitumbiko ivyo tikusangwa navyo pasono, nkhulaŵa waka kwa vinthu viwemi vya mu charu chiphya apo Yehova wazamujura woko lake na “kukhorweska chamoyo chose.”—Sal. 145:16.