Umo Tingachitira Kuti Tilutilire Kutemwana Chomene

1-2. (a) Chifukwa wuli mpositole Paulosi wakayowoya kuti chitemwa ndicho ni mukhaliro ‘ukuru’ chomene? (b) Kasi tidumbiskanenge mafumbo wuli?

MPOSITOLE Paulosi wakati walongosora za chipulikano, chigomezgo kweniso chitemwa, wakamalizga na mazgu ghakuti “chikuru chomene pa vyose ivi ntchitemwa.” (1 Kor. 13:13) Chifukwa wuli Paulosi wakayowoya nthena? Chifukwa ntchakuti, munthazi umu tizamukhumbikwiraso yayi kuti tiŵe na chipulikano mu malayizgo gha Chiuta ghakukhwaskana na charu chiphya chifukwa vinthu vyose ivyo tikugomezga vizamuŵa kuti vyafiskika kale. Kweni nyengo zose tizamukhumbikwira kutemwa Yehova kweniso ŵanthu. Nakuti, chitemwa chithu pa iwo chizamulutilira kukura m’paka muyirayira.

² Pakuti nyengo zose tikukhumbikwira kuŵa na chitemwa, tidumbiskanenge mafumbo ghatatu ghakulondezgapo agha. Lakwamba, chifukwa wuli tikwenera kutemwana? Lachiŵiri, kasi tingalongora wuli kuti tikutemwa ŵanyithu? Ndipo laumaliro, kasi tingachita wuli kuti tilutilire kutemwana?

CHIFUKWA WULI TIKWENERA KUTEMWANA YUMOZA NA MUNYAKE?

3. Chifukwa wuli tikwenera kutemwana?

³ Chifukwa wuli ntchakuzirwa kutemwana? Chifukwa chimoza ntchakuti, chitemwa ndicho ntchimanyikwiro cha Ŵakhristu ŵaunenesko. Yesu wakaphalira ŵasambiri ŵake kuti: “Usange mukutemwana, wose ŵamanyenge kuti ndimwe ŵasambiri ŵane.” (Yoh. 13:35) Kweniso, para tikutemwana tikuŵa ŵakukolerana. Paulosi wakati chitemwa “chikukakilira ŵanthu pamoza.” (Kol. 3:14) Kweni paliso chifukwa chinyake chakuzirwa icho tikwenera kutemwerana yumoza na munyake. Mpositole Yohane wakaŵalembera Ŵakhristu ŵanyake kuti: “Uyo wakutemwa Chiuta wakwenera kutemwaso mubali wake.” (1 Yoh. 4:21) Usange tikutemwana yumoza na munyake, tikulongora kuti tikutemwa Chiuta.

4-5. Yowoyani chiyelezgero icho chikulongora kukolerana uko kulipo pakati pa kutemwa ŵanyithu na kutemwa Chiuta.

⁴ Kasi pali kukolerana wuli pakati pa kutemwa Chiuta na kutemwa ŵanyithu? Kuti tipulikiske makora fundo iyi, wonani chiyelezgero ichi. Wonani kukolerana uko kulipo pakati pa mtima withu na viŵaro vinyake vya thupi lithu. Usange dokotala wawona umo musipa wa pa woko lithu ukutimbira, wangamanyaso umo mtima withu ukugwilira ntchito. Kasi chiyelezgero ichi chikukolerana wuli na nkhani ya chitemwa?

⁵ Nga umo wakuchitira dokotala kuti wangamanya umo mtima withu ukugwilira ntchito para wangawona waka umo musipa wa pa woko lithu ukutimbira, nase tingamanyaso usange ubwezi withu na Chiuta ngwakukhora para tingasanda umo tikutemwera ŵanyithu. Usange tawona kuti chitemwa chithu ku Ŵakhristu ŵanyithu chamba kuchepa, vingalongoraso kuti chitemwa chithu kwa Chiuta chamba kuchepa. Kweni usange nyengo zose tikuŵatemwa Ŵakhristu ŵanyithu vikulongora kuti chitemwa chithu kwa Chiuta ntchakukhora.

6. Chifukwa wuli tikwenera kufipa mtima usange chitemwa chithu ku ŵabali na ŵadumbu chamba kulopwa? (1 Yohane 4:​7-9, 11)

⁶ Usange chitemwa chithu ku ŵabali na ŵadumbu chamba kulopwa, ni suzgo likuru chomene. Chifukwa wuli? Chifukwa vingang’anamura kuti ubwezi withu na Yehova walopwa. Mpositole Yohane wakalongosora mwakupulikikwa makora fundo iyi apo wakati: “Uyo wakuleka kutemwa mubali wake uyo wakumuwona, wangamutemwa yayi Chiuta uyo wandamuwonepo.” (1 Yoh. 4:20) Kasi tikusambirapo vichi? Yehova wakukondwa nase pekha para ‘tikutemwana yumoza na munyake.’—Ŵazgani 1 Yohane 4: 7-9, 11.

KASI TIKULONGORA WULI KUTI TIKUTEMWANA YUMOZA NA MUNYAKE?

7-8. Kasi ni nthowa wuli zinyake izo tingalongolera chitemwa?

⁷ Mwakuwerezgawerezga mu Mazgu gha Chiuta, tikusangamo dango lakuti “mutemwanenge.” (Yoh. 15:​12, 17; Rom. 13:8; 1 Tes. 4:9; 1 Pet. 1:22; 1 Yoh. 4:11) Kweni, chitemwa chikufuma mu mtima, ndipo palije munthu uyo wangawona mu mtima. Ipo kasi tingalongora wuli kuti tikuŵatemwa ŵabali na ŵadumbu ŵithu? Tingalongora kwizira mu ivyo tikuyowoya kweniso kuchita.

⁸ Pali nthowa zinandi izo tingalongolera kuti tikuŵatemwa ŵabali na ŵadumbu ŵithu. Zinyake izo tingalongolera ni izi: “Yowoyani unenesko kwa yumoza na munyake.” (Zek. 8:16) “Sungani mtende pakati pinu.” (Mrk. 9:50) “Yambani ndimwe kulongora ntchindi ku ŵanyinu.” (Rom. 12:10) ‘Mupokeleranenge.’ (Rom. 15:7) “Lutilirani . . . kugowokerana.” (Kol. 3:13) “Lutilirani kuyegherana vizito.” (Gal. 6:2) “Lutilirani kusanguluskana.” (1 Tes. 4:18) “Lutilirani kuzengana.” (1 Tes. 5:11) Kweniso ‘mulomberanenge.’—Yak. 5:16.

9. Chifukwa wuli kusanguluska ŵanji ni nthowa yakuzirwa chomene yakulongolera kuti tikuŵatemwa? (Wonaniso chithuzi.)

⁹ Pasono tiyeni tidumbiskane yimoza mwa nthowa izo taziyowoya mu ndime iyo yajumpha. Tidumbiskanenge mazgu agho Paulosi wakayowoya, ghakuti: “Lutilirani kusanguluskana.” Chifukwa wuli kusanguluskana ni nthowa yakukhumbikwa chomene yakulongolera kuti tikutemwa ŵanji? Kuyana na buku linyake lakulongosora Baibolo, lizgu lakuti “kusanguluskana” ilo Paulosi wakagwiliskira ntchito apa likung’anamura “kukhala pafupi na munthu uyo wakukhumbikwira kumukhwimiska chifukwa cha suzgo likuru ilo wasangana nalo.” Ntheura, para tikuŵasanguluska ŵabali awo ŵasangana na masuzgo tikuŵawovwira kuti ŵalutilire kuteŵetera Yehova mwakugomezgeka. Nakuti nyengo yiliyose para tasanguluska mubali withu tikulongora kuti tikumutemwa chomene.—2 Kor. 7: 6, 7, 13.

10. Kasi pali kukolerana wuli pakati pa lusungu na kusanguluskana?

¹⁰ Pali kukolerana chomene pakati pa kulengera munthu lusungu na kumusanguluska. Mu nthowa wuli? Munthu walusungu wakuyezgayezga kuchitapo kanthu kuti wasanguluske munthu uyo wasangana na suzgo. Chakwamba munthu tikumulengera lusungu, pamanyuma ndipo tikumusanguluska. Wonani umo Paulosi wakuyaniskira lusungu lwa Yehova na chisangulusko icho wakupeleka. Paulosi wakulongosora kuti Yehova “ni Dada wa mtima walusungu na Chiuta wa chisangulusko chose.” (2 Kor. 1:3) Nga umo vesi ili likuyowoyera, Paulosi wakagwiliskira ntchito mazgu ghakuti “mtima walusungu” kuti walongosore vya lusungu ulo tikulongora ku ŵanji. Lekani, “Chiuta wakuchemeka kuti ni Dada, panyake Chisimi cha lusungu lukuru, chifukwa chakuti lusungu lukufuma kwa iyo. Ndipo lusungu lwake ndilo lukumutuma kuti watisanguluskenge mu ‘masuzgo ghithu ghose.’ (2 Kor. 1:4) Nga umo maji ghawemi ghakufuma mu chisimi ghakusamphuskira wose awo ŵali na nyota, Yehova nayo wakusamphuska panji kuti kusanguluska wose awo ŵasweka mtima. Kasi tingamuyezga wuli Yehova pa nkhani ya kulengera ŵanji lusungu kweniso kuŵasanguluska? Nthowa yimoza iyo tingachitira ivi, nkhuŵa na mikhaliro iyo yingatovwira kuti tilengerenge ŵanji lusungu na kuŵasanguluska. Kasi yinyake mwa mikhaliro iyi ni njini?

11. Kuyana na Ŵakolose 3:12 kweniso 1 Petrosi 3:​8, kasi ni mikhaliro wuli yinyake iyo tikwenera kuŵa nayo iyo yingatovwira kuti tilutilire kutemwa ŵanji kweniso kuŵasanguluska?

¹¹ Kasi ntchivichi chingatovwira kuti tilutilire kutemwana na ‘kusanguluskana’ zuŵa lililose? Tikwenera kulengera ŵanyithu chitima, kutemwa ŵabali kweniso kuŵa ŵalusungu. (Ŵazgani Ŵakolose 3:12; 1 Petrosi 3:8.) Kasi mikhaliro iyi yingatovwira wuli? Usange tikuŵalengera lusungu ŵabali withu kweniso kuŵaghanaghanira tizamuŵa na mtima wakukhumbisiska kuŵawovwira usange ŵakusuzgika. Yesu wakayowoya kuti “mulomo ukuyowoya ivyo vili kuzura mu mtima. Munthu muwemi kufuma pa usambazi wake uwemi, wakufumiska vinthu viwemi.” (Mat. 12:​34, 35) Ntheura kusanguluska ŵabali na ŵadumbu ŵithu ni nthowa yimoza yakuzirwa chomene iyo tikulongolera kuti tikuŵatemwa nadi.

UMO TINGACHITIRA KUTI TILUTILIRE KUTEMWANA ZANADI

12. (a) Chifukwa wuli tikwenera kuŵa maso? (b) Kasi tidumbiskanenge fumbo wuli?

¹² Tose tikwenera ‘kulutilira kutemwana.’ (1 Yoh. 4:7) Ndipouli, ntchakuzirwa kukumbuka kuti Yesu wakachenjezga kuti “chitemwa cha ŵanandi chizamuzizima.” (Mat. 24:12) Apa Yesu wakang’anamuranga kuti ŵasambiri ŵake wose ŵazamuleka kulongora chitemwa yayi. Ndipouli tikwenera kuŵa maso chomene kuti tileke kuzomerezga kuti mzimu wa charu ichi utimbanizge chitemwa chithu. Apo tili na fundo iyi mu maghanoghano, tiyeni tidumbiskane fumbo lakulondezgapo ili: Kasi ntchivichi chingatovwira kumanya usange tikuŵatemwa zanadi ŵabali ŵithu?

13. Kasi tingamanya wuli usange chitemwa chithu pa ŵabali na ŵadumbu ntchanadi?

¹³ Nthowa yimoza iyo tingamanyira usange tikuŵatemwa zanadi ŵabali na ŵadumbu ŵithu, nkhuwona umo tikuchitira nawo vinthu pa vyakuchitika vinyake. (2 Kor. 8:8) Mpositole Petrosi wakayowoyapo chimoza mwa vinthu ivi. Iyo wakati: “Kuluska vyose mutemwanenge chomene, chifukwa chitemwa chikubenekelera zakwananga zinandi.” (1 Pet. 4:8) Ntheura umo tikuchitira para ŵabali na ŵadumbu ŵithu ŵabudiska vinthu vinyake, vingalongora usange tikuŵatemwa zanadi.

14. Kuyana na 1 Petrosi 4:​8, kasi tikwenera kutemwana wuli? Yowoyani chiyelezgero.

¹⁴ Tiyeni tighanaghanire mwakupwelelera mazgu agho Petrosi wakayowoya. Chigaŵa chakwamba cha vesi 8 chikulongosora umo tikwenera kutemwerana. Chikulongosora kuti ‘titemwanenge chomene.’ Mazgu ghakuti “chomene” agho Petrosi wakagwiliskira ntchito apa ghakung’anamura “kutandawura.” Chigaŵa chachiŵiri cha vesi ili chikulongosora ivyo tingachita usange tili na chitemwa ichi. Usange tikuŵatemwa chomene ŵabali ŵithu vikutovwira kuti tibenekelerenge zakwananga zawo zinandi. Chitemwa ichi tingachiyelezgera na salu iyo yikutandawuka. Usange vinthu ivyo tikukhumba kubenekelera ni vinandi kweni salu njichoko, tingachita kuyitanura kuti m’paka yibenekelere. Chitemwa ichi nacho tingachita kutanura m’paka chibenekelere “zakwananga zinandi.” Kubenekelera ni nthowa yinyake yakuyowoyera kuti tagowoka. Para tikuŵatemwa chomene ŵabali ŵithu tiŵagowokerenge maubudi ghawo.

15. Usange chitemwa chithu ku ŵabali na ŵadumbu ntchakukhora, kasi vitichiskenge kuchitachi? (Ŵakolose 3:13)

¹⁵ Chitemwa chithu ku ŵabali chikwenera kuŵa chakukhora chomene mwakuti tingafiska kuŵagowokera nanga ni apo ntchakusuzga kuchita nthena. (Ŵazgani Ŵakolose 3:13.) Usange tikugowokera ŵanji, tikulongora kuti tili na chitemwa chanadi kweniso tikulongora kuti tikukhumba kukondweska Yehova. Kweni kasi ntchivichi chinyake icho chingatovwira kuti tigowokerenge ŵanyithu para ŵali na tunkharo tunyake uto tukutikwenyerezga?

16-17. Kasi ntchivichi icho chingatovwiraso kuti tisulengeko maubudi gha ŵanji? Yowoyani chiyelezgero. (Wonaniso chithuzi.)

¹⁶ Muŵikenge chomene mahara pa viwemi ivyo ŵabali na ŵadumbu ŵinu ŵakuchita, pa viheni yayi. Ghanaghanirani chiyelezgero ichi. Tiyelezgere kuti muli pa phwando na ŵabali na ŵadumbu. Mwakondwa chomene na phwando ili ndipo paumaliro mose mukujambuliska chithuzi. Mukujambuliskaso vithuzi vinyake viŵiri kuchitira kuti panji chakwamba chira chindawoneke makora. Apa sono ndikuti muli na vithuzi vitatu. Kweni pa chithuzi chimoza, mukuwona kuti mubali munyake wandasekelere. Kasi mukuchita nacho wuli chithuzi ichi? Mukuchisisita waka chifukwa chakuti muli kale na vithuzi viŵiri ivyo waliyose wakusekelera kusazgapo na mubali uyo.

¹⁷ Tiyeni tiyaniske vithuzi ivyo tasunga na vinthu ivyo tikukumbukira. Nyengo zinandi tikukumbukanga nyengo izo tikachezga na ŵabali na ŵadumbu. Kweni tiyelezgere kuti pa nyengo yinyake mubali panji mudumbu wakayowoya panji kuchita chinthu icho chikatikhuŵazga. Kasi tingachita wuli usange takumbuka ivyo wakachita? Tingachita makora kuwuskamo waka maghanoghano ghaheni agha, nga umo tikusisitira chithuzi icho chindawoneke makora. (Zinth. 19:11; Efe. 4:32) Tingafiska kuluwako waka kaubudi ako mubali panji mudumbu withu wakatichitira chifukwa pali nyengo zinandi ziwemi izo tikachezga nayo makora izo tingakumbukira. Ivi ndivyo ni vinthu vyakuzirwa ivyo tikwenera kukumbukira na kuvisunga.

CHIFUKWA WULI CHITEMWA NTCHAKUKHUMBIKWA CHOMENE MAZUŴA GHANO?

18. Kasi ni fundo wuli zikuru zakukhwaskana na chitemwa izo tadumbiskana mu nkhani iyi?

¹⁸ Chifukwa wuli tikukhumbikwira kulutilira kutemwana chomene yumoza na munyake? Nga umo tawonera kale, usange tikutemwa ŵabali na ŵadumbu, tikulongoraso kuti tikumutemwa Yehova. Kweni kasi tingalongora wuli kuti tikuŵatemwa Ŵakhristu ŵanyithu? Nthowa yimoza ndiyo kuŵasanguluska. Tingalutilira “kusanguluskana yumoza na munyake” usange tikuchitirana lusungu. Kasi tingachita wuli kuti tilutilire kuŵa na chitemwa chanadi? Usange tikuchita vyose ivyo tingafiska kuti tiŵagowokerenge ŵabali ŵithu para ŵatibudira.

19. Chifukwa wuli mazuŵa ghano ndipo ntchakukhumbikwa chomene kulongorana chitemwa?

¹⁹ Chifukwa wuli mazuŵa ghano ndipo ntchakukhumbikwa chomene kulongorana chitemwa? Wonani chifukwa icho Petrosi wakayowoya. Iyo wakati: “Umaliro wa vinthu vyose waneng’enera. Ntheura, . . . mutemwanenge chomene.” (1 Pet. 4:​7, 8) Kasi tikwenera kulindilira vichi apo umaliro wa charu ichi ukusendelera chomene? Pakuyowoya za ŵasambiri ŵake Yesu wakayowoyerathu kuti: “Muzamutinkhika na mitundu yose chifukwa cha zina lane.” (Mat. 24:9) Kuti tilutilire kuŵa ŵakugomezgeka kwa Yehova nangauli tikutinkhika tikwenera kulutilira kuŵa ŵakukolerana. Usange tikuchita nthena, Satana wazamutipatura yayi chifukwa chitemwa “chikukakilira ŵanthu pamoza.”—Kol. 3:14; Fil. 2:​1, 2.