Kasi Tikumanya Vichi vya Umo Yehova Wazamweruzgira Ŵanthu Kunthazi?

1. Chifukwa wuli tingati tikukhala mu nyengo zakukondweska chomene?

TIKUKHALA mu nyengo zakukondweska chomene! Zuŵa lililose tikuwona na maso ghithu kuti mauchimi gha mu Baibolo ghakufiskika. Mwachiyelezgero, tikuwona “themba lakumpoto” na “themba lakumwera” ŵakulimbana mazaza. (Dan. 11:​40, mazgu ghamusi) Tikuwonaso makani ghawemi gha Ufumu wa Chiuta ghakupharazgika pa charu chose chapasi, ndipo ŵanthu mamiliyoni ghanandi ŵakusankha kuteŵetera Yehova. (Yes. 60:22; Mat. 24:14) Ndipo tikupokera chakurya chinandi chauzimu “pa nyengo yakwenelera.”—Mat. 24:​45-47.

2. Kasi tili na chigomezgo wuli, ndipo tikwenera kumanya vichi?

² Yehova wakulutilira kutovwira kuti tipulikiske makora za vyakuchitika vikuruvikuru ivyo vichitikenge sonosono apa. (Zinth. 4:18; Dan. 2:28) Tili na chigomezgo chose kuti para suzgo yikuru yikwamba, tizamuŵa kuti tikumanya chilichose icho ntchakukhumbikwa kuti tizakazizipizge mwakugomezgeka, na kulutilira kuŵa ŵakukolerana pa nyengo yakusuzga iyi. Ndipouli, tikwenera kumanya kuti pali vinthu vinyake vyakukhwaskana na munthazi ivyo tikuvimanya yayi. Mu nkhani iyi, chakwamba tiwonenge chifukwa icho tasinthira umo tikapulikiskiranga pakwamba za vinthu vinyake ivyo vizamuchitika munthazi. Pamanyuma tiwonenge vinthu vinyake ivyo tikumanya vyakukhwaskana na munthazi kweniso umo Adada ŵithu ŵakuchanya ŵazamuchitira.

IVYO TIKUMANYA YAYI

3. Kasi tikayowoya vichi pa nkhani yakuti ŵanthu ŵazamuŵavyaso mwaŵi wakuti ŵaŵe na chipulikano mwa Yehova, ndipo chifukwa wuli tikayowoya nthena?

³ Kumanyuma uku, tikayowoya kuti para suzgo yikuru yamba waka, pazamuŵavya mwaŵi wakuti ŵanthu ŵasinthe na kuŵa na chipulikano mwa Yehova na kuponoskeka pa Aramagedoni. Tikayowoya nthena chifukwa tikawonanga kuti nkhani yakukhwaskana na Chigumula ukaŵa uchimi. Mwachiyelezgero, tikaghanaghananga kuti nga umo Yehova wakajalira mulyango wa chingalaŵa apo Chigumula chikaŵa pafupi kwamba, wazamuchitaso mwakuyana waka kuti para suzgo yikuru yikwamba, wazamujara “mulyango” wakuyelezgera panji kuti wazamuzomerezga waliyose yayi mu mgonezi wa Satana uwu, kuti waŵe na mwaŵi wakuŵa na chipulikano mwa Yehova na kuponoskeka.—Mat. 24:​37-39.

4. Kasi sono tikuwona kuti nkhani yakukhwaskana na Chigumula ni uchimi? Longosorani.

⁴ Kasi tikwenera kuwona kuti nkhani yakukhwaskana na Chigumula ni uchimi nadi? Zgoro ndakuti yayi. Chifukwa wuli? Chifukwa palije lemba lakudunjika ilo likukhozgera fundo iyi.a Yesu wakayaniska “mazuŵa gha Nowa” na nyengo yakuŵapo kwake. Kweni wakayowoyapo yayi kuti Chigumula ni uchimi, kweniso kuti munthu waliyose panji chakuchitika chilichose vikimiranga vinthu vinyake; nesi kujalika kwa mulyango wa chingalaŵa kuti ukaŵa uchimi. Ndipouli, ichi chikung’anamura kuti tingaleka kusambirako kanthu yayi ku nkhani ya Nowa yakukhwaskana na Chigumula.

5. (a) Kasi Nowa wakalongora wuli kuti wali na chipulikano pambere Chigumula chindachitike? (Ŵahebere 11:7; 1 Petrosi 3:20) (b) Pa nkhani ya ntchito yakupharazga, kasi vikuyanako wuli na umo vikaŵira mu nyengo ya Nowa?

⁵ Apo Nowa wakapulika chenjezgo la Yehova, wakalongora kuti wali na chipulikano pa kupanga chingalaŵa. (Ŵazgani Ŵahebere 11:7; 1 Petrosi 3:20.) Mwakuyana waka, ŵanthu awo ŵapulika makani ghawemi ghakukhwaskana na Ufumu wa Chiuta, ŵakwenera kuchitapo kanthu pa ivyo ŵasambira. (Mil. 3:​17-20) Petrosi wakachema Nowa kuti “mupharazgi wa urunji.” (2 Pet. 2:5) Ndipouli, nga umo tikawonera mu nkhani iyo yajumpha, tikumanya yayi usange Nowa wakapharazgira munthu waliyose pambere Chigumula chindachitike. Mazuŵa ghano nase tikuchita mulimo wakuyana waka, ndipo tikuyezgayezga kuti tipharazgire ŵanthu wose pa charu chapasi. Ndipouli, nanga tingayezgayezga wuli, tingafiska yayi kupharazgira munthu waliyose pambere umaliro undize. Chifukwa wuli?

6-7. Chifukwa wuli tingati tifiskenge yayi kupharazgira waliyose makani ghawemi pambere umaliro undize? Longosorani.

⁶ Wonani ivyo Yesu wakayowoya vyakukhwaskana na mulimo withu wakupharazga. Iyo wakayowoyerathu kuti makani ghawemi ghazamupharazgika “mu charu chose chapasi kuti uŵe ukaboni ku mitundu yose.” (Mat. 24:14) Uchimi uwu ukufiskika chomene mazuŵa ghano kuluska kumasinda kose. Uthenga wa Ufumu ukupharazgika mu viyowoyero vyakujumpha 1,000, ndipo kwizira pa webusayiti yithu ya jw.org, ŵanthu ŵanandi ŵangasambira makani ghawemi gha Ufumu wa Chiuta.

⁷ Ndipouli, Yesu wakaphaliraso ŵasambiri ŵake kuti ‘ŵazamumara chara kuzingilira misumba,’ panji kupharazgira waliyose, pambere iyo wandize. (Mat. 10:23; 25:​31-33) Mazgu gha Yesu agha ghakufiskikaso mazuŵa ghano. Ŵanthu ŵanandi mazuŵa ghano ŵakukhala mu vyaru ivyo mulimo withu wakupharazga ngwakukanizgika. Kweniso ŵana ŵanandi ŵakubabika zuŵa lililose. Tikuchita vyose ivyo tingafiska kuti tifikire ŵanthu ‘ŵa mtundu uliwose, fuko lililose, na lulimi lulilose’ na makani ghawemi. (Chivu. 14:6) Kweni unenesko ngwakuti tifiskenge yayi kupharazgira munthu waliyose pambere umaliro undize.

8. Kasi tingajifumba vichi pa nkhani ya umo Yehova wazamweruzgira ŵanthu kunthazi? (Wonaniso vithuzi.)

⁸ Ntheura tingajifumba kuti: Wuli pakuyowoya za awo ŵakaŵavya mwaŵi wakupulika makani ghawemi pambere suzgo yikuru yindambe? Kasi Yehova na Mwana wake uyo wamupa mulimo wakweruzga, ŵazamuchita nawo wuli? (Yoh. 5:​19, 22, 27; Mil. 17:31) Lemba ilo pajintha mutu wa nkhani iyi likuti Yehova “wakukhumba yayi kuti munyake waparanyike.” M’malo mwake, wakukhumba kuti “wose ŵang’anamuke mtima.” (2 Pet. 3:9; 1 Tim. 2:4) Nangauli vili nthena, tikwenera kumanya kuti Yehova wandativumbulire umo wazamuchitira na ŵanthu aŵa. Nakuti tikumanyaso kuti Yehova wakukhumbikwira kuti watiphalire chilichose yayi chakukhwaskana na icho wachita panji wachitenge.

9. Kasi Yehova wativumbulira vichi kwizira mu Baibolo?

⁹ Mu Baibolo, Yehova wativumbulira vinthu vinyake ivyo wachitenge. Mwachiyelezgero, Baibolo likutiphalira kuti Yehova wazamuwuska ŵanthu “ŵambura urunji” awo ŵakaŵavya mwaŵi wakuti ŵapulike makani ghawemi gha Ufumu na kusintha nthowa zawo. (Mil. 24:15; Luka 23:​42, 43) Fundo iyi yikuwuskaso mafumbo ghanyake ghakuzirwa.

10. Kasi pakuwuka mafumbo wuli?

¹⁰ Kasi awo ŵazamufwa pa suzgo yikuru ndikuti ŵazamuŵa kuti ŵaparanyikirathu kwamuyirayira kwambura chilindizga chilichose cha kuzakawuskika? Malemba ghakuyowoya mwakupulikikwa makora kuti wose awo ŵakususka Yehova na ŵankhondo ŵake, awo ŵazamuparanyika pa Aramagedoni, ŵazamuwuskikaso yayi. (2 Tes. 1:​6-10) Kweni wuli pakuyowoya za ŵanthu ŵanyake? Mwachiyelezgero awo ŵazamufwa chifukwa cha ulwari panji uchekuru, ngozi panji kukomeka na ŵanthu ŵanyawo. (Muph. 9:11; Zek. 14:13) Kasi ŵanyake mwa ŵanthu aŵa ŵazamuŵa pa gulu la ŵanthu “ŵambura urunji” awo ŵazamuwuskika mu charu chiphya? Tikumanya yayi.

IVYO TIKUMANYA

11. Kasi pa Aramagedoni ŵanthu ŵazamweruzgika kuyana na vichi?

¹¹ Tikumanya vinandi vyakukhwaskana na ivyo vichitikenge munthazi. Mwachiyelezgero, tikumanya kuti pa Aramagedoni, ŵanthu ŵazamweruzgika kuyana na umo ŵakachitiranga na ŵabali ŵa Khristu. (Mat. 25:40) Awo ŵazamweruzgika kuti ni mberere ni awo ŵakalongora kuti ŵakakhozgeranga ŵakuphakazgika kweniso Khristu. Tikumanyaso kuti ŵabali ŵanyake ŵa Khristu ŵazamuŵa kuti ŵachali pa charu chapasi para suzgo yikuru yamba waka, ndipo ŵazamuluta kuchanya para kwakhala nyengo yichoko waka kuti Aramagedoni yambe. Chikuru ŵabali ŵa Khristu ŵachali pa charu chapasi, ntchamachitiko kuti ŵanthu ŵamitima yiwemi ŵazamuŵa na mwaŵi wakuŵawovwira kweniso kukhozgera ntchito yiwemi iyo ŵakuchita. (Mat. 25:​31, 32; Chivu. 12:17) Chifukwa wuli ntchakuzirwa kumanya fundo izi?

12-13. Kasi ŵanyake ŵangazakachita wuli pamanyuma pakuwona kuti “Babuloni Mukuru” waparanyika? (Wonaniso vithuzi.)

¹² Nanga mphamanyuma pakuti suzgo yikuru yamba, ntchamachitiko kuti ŵanyake awo ŵazamuwona kuti “Babuloni Mukuru” wakuparanyika, ŵazamukumbuka kuti Ŵakaboni ŵa Yehova ŵakayowoya kale kuti ivi vizamuchitika. Kasi vingazakachitika kuti ŵanyake awo ŵazamuwona vinthu ivi ŵazamusintha mitima yawo?—Chivu. 17:5; Ezek. 33:33.

¹³ Usange ivi vyazakachitika, vizamuyana waka na ivyo vikachitika mu Eguputo mu nyengo ya Mozesi. Kumbukani kuti “ŵanthu ŵanandi ŵamitundu yinyake” ŵakalutira lumoza na Ŵaisrayeli apo ŵakafumanga mu Eguputo. Ŵanyake mwa ŵanthu aŵa ŵakwenera kuti ŵakamba kuŵa na chipulikano ŵakati ŵawona kuti ivyo Mozesi wakachenjezga vyakukhwaskana na Miliri 10 vikufiskika. (Eks. 12:38) Para vyanthena ivi vizamuchitika pamanyuma pa kuparanyika kwa Babuloni Mukuru, kasi tizamukhuŵara pakuwona kuti ŵanthu ŵanyake ŵakusintha na kwiza mu gulu la Yehova uku kwakhala nyengo yichoko waka kuti umaliro wize? Yayi! Tikukhumba kuyezga Dada withu wakuchanya, “Chiuta walusungu na wachiwuravi, wakukalipa luŵiro chara, wakuzara na chitemwa, na unenesko.”b—Eks. 34:6.

14-15. Kasi kuti munthu wazakaŵe na mwaŵi wakukhala kwamuyirayira vikuthemba pa nyengo iyo wakafwira panji uko wakakhalanga? Longosorani. (Salimo 33:​4, 5)

¹⁴ Nyengo zinyake tikupulika ŵanyake ŵakuyowoya vyakukhwaskana na mubali wawo uyo ni Kaboni yayi kuti, “Chingaŵa makora kuti wafwe pambere suzgo yikuru yindambe mwakuti wazakaŵe na chilindizga cha kuzakawuskika.” Tikumanya kuti ŵali na vifukwa viwemi vyakuyowoyera nthena. Kweni kuti munthu wazakawuskike, vikuthemba pa nyengo iyo wafwira yayi. Yehova ni mweruzgi waurunji, ndipo nyengo zose wakweruzga mwakunyoloka. (Ŵazgani Salimo 33:​4, 5.) Tili na chigomezgo chose kuti “Mweruzgi wa charu chose chapasi” wazamuchita icho ntchakunyoloka.—Gen. 18:25.

¹⁵ Ntchakupulikikwaso kuyowoya kuti munthu wazakawuskike na kukhala kwamuyirayira vikuthemba uko wakakhalanga yayi. Vingachitika yayi kuti Yehova wazakeruzge ŵanthu mamiliyoni ghanandi kuŵa “mbuzi” chifukwa chakuti ŵakakhalanga mu vyaru ivyo ŵakaŵavya mwaŵi wakusambira vya uthenga wa Ufumu. (Mat. 25:46) Mweruzgi waurunji wa charu chose wakughanaghanira chomene vya ŵanthu aŵa kuluska ise. Tikumanya yayi umo Yehova wazamuchitira vinthu pa nyengo ya suzgo yikuru. Panji ŵanyake mwa ŵanthu aŵa ŵazamuŵa na mwaŵi wakusambira vyakukhwaskana na Yehova, kuŵa na chipulikano mwa iyo, na kuŵa ku chigaŵa cha Yehova apo wazamujituŵiska panthazi pa mitundu yose.—Ezek. 38:16.

16. Kasi tamanya vichi vyakukhwaskana na Yehova? (Wonaniso chithuzi.)

¹⁶ Kwizira mu Baibolo, tamanya kuti Yehova wakuzirwiska chomene umoyo wa ŵanthu. Wakapeleka umoyo wa Mwana wake kuti tose tiŵe na mwaŵi wakuzakakhala na umoyo kwamuyirayira. (Yoh. 3:16) Tose tajiwonera tekha chitemwa na lusungu lukuru lwa Yehova. (Yes. 49:15) Wakumanya waliyose payekha na mazina ghithu wuwo. Nakuti wakutimanya makora chomene, mwakuti nanga tingafwa, wangatiwuska na kuwezgerapo chilichose chakukhwaskana na ise, nanga kangaŵa kaghanaghaniro kithu ako tikaŵa nako. (Mat. 10:​29-31) Nadi, tili na chifukwa chiwemi chakugomezgera kuti Adada ŵithu ŵakuchanya awo ŵakutitemwa chomene, ŵazamweruzga waliyose mwaurunji, mwakunyoloka, kweniso mwalusungu.—Yak. 2:13.

17. Kasi mu nkhani yakulondezgapo tizamudumbiskana vichi?

¹⁷ Kapulikiskiro kaphya aka, katovwirenge kumanya kuti ntchito yakupharazga yikwenera kuchitika mwaluŵiro chomene kuluska kumasinda kose. Chifukwa wuli tikuyowoya nthena? Ndipo ntchivichi chikutituma kuti tilutilire kupharazga makani ghawemi kwambura kuleka? Tizamudumbiskana mazgoro gha mafumbo agha mu nkhani yakulondezgapo.