Mafumbo Ghakufuma ku Ŵaŵazgi
Chifukwa wuli ŵanthu ŵanyake ŵangati mazgu gha pa Salimo 12:7 ghakuyowoya vya “mazgu gha Yehova” (mu vesi 6) apo Baibolo la Mang’anamuliro gha Charu Chiphya likuyowoya vya “ŵakusuzgika” (mu vesi 5)?
Nkhani yose yikulongora kuti vesi ili likuyowoya vya ŵanthu.
Pa Salimo 12:1-4, tikuŵazga kuti “ŵanthu ŵachipulikano ŵamara mukati mu ŵanthu.” Kufuma apo pa Salimo 12:5-7, tikuŵazga kuti:
“Yehova wakuti: ‘Pakuti ŵakusuzgika ŵakuyuzgika,
Ŵakavu ŵakutampha,
Niwukenge na kuchitapo kanthu,
Niŵaponoskenge ku wose awo ŵakuŵanyoza.’
Mazgu gha Yehova ngakutowa,
Ghali nga ni siliva lakwengeka mu ng’anjo yapasi, lakwengeka kankhondi na kaŵiri.
Imwe Yehova, muŵasungilirenge.
Muvikilirenge waliyose wa iwo ku muwiro uwu muyirayira.”
Vesi 5 likuyowoya ivyo Chiuta wachitirenge “ŵakusuzgika.” Waŵaponoskenge.
Vesi 6 likusazgirapo kuti “mazgu gha Yehova ngakutowa, ghali nga ni siliva lakwengeka.” Vesi ili likuyowoya umo tikuwonera mazgu gha Yehova.—Sal. 18:30; 119:140.
Sono wonani vesi lakulondezgapo la Salimo 12:7: “Imwe Yehova, muŵasungilirenge. Muvikilirenge waliyose wa iwo ku muwiro uwu muyirayira.” Kasi “iwo” wakwimira vichi?
Pakuti vesi 7 likulongozgana na mazgu ghakuti “mazgu gha Yehova,” ŵanyake ŵangaghanaghana kuti mazgu ghakuti “iwo” ghakuyowoya vya mazgu gha Chiuta. Ndipo tikumanya kuti Chiuta wavikilira Baibolo nangauli ŵakususka ŵanandi ŵayezga kulikanizga kweniso kuliparanya.—Yes. 40:8; 1 Pet. 1:25.
Ndipouli, ivyo vikuyowoyeka mu vesi 5 navyo ni vyaunenesko. Yehova wakuvikilira ndipo walutilirenge kovwira na kuponoska “ŵakusuzgika” na “ŵakuyuzgika.”—Yobu 36:15; Sal. 6:4; 31:1, 2; 54:7; 145:20.
Kasi mazgu ghakuti “iwo” agho ghali mu vesi 7 ghakwimira vichi?
Nkhani yose ya mu salimo ili yikulongora kuti mazgu ghakuti “iwo” ghakwimira ŵanthu.
Salimo 12:1 likuyowoya vya “ŵanthu ŵachipulikano” awo ŵakwenera kuti ŵakapusikika na ŵanthu ŵaheni. Kufuma apo, tikusanga mazgu ghakulongora kuti Yehova wazamulanga wose awo ŵakuyowoya vinthu viheni. Salimo ili likutisimikizgira kuti Chiuta wazamuchitapo kanthu kovwira ŵanthu ŵake chifukwa mazgu ghake ngakutowa.
Vesi 7 likuyowoya kuti Yehova wazamusungilira na kuvikilira “iwo,” kung’anamura awo ŵakuyuzgika na ŵaheni.
Malemba gha Chihebere gha Ŵamasoreti nagho ghali kugwiliskira ntchito mazgu ghakuti “iwo” pa vesi ili. Apo Baibolo la Chigiriki la Septuagint likugwiliskira ntchito mazgu ghakuti “ise” kaŵiri mu vesi 7, ndipo ghakwimira ŵakugomezgeka awo ŵakusuzgika na kuyuzgika. Paumaliro, vesi 7 likuyowoya kuti “waliyose wa” ŵakugomezgeka wazamuvikilirika “ku muwiro uwu,” kung’anamura ŵaheni awo ŵakuhaya ukazuzi. (Sal. 12:7, 8) Mu Baibolo linyake la Chiaramu, vesi 7 lili kung’anamulika kuti: “Imwe FUMU, muvikilirenge ŵarunji, muŵaponoskenge iwo ku uheni wa muwiro uwu muyirayira. Kulikose uko muheni wanganjilira nga ni munyololo uwo ukonkha ndopa za ŵanthu.” Uwu mbukaboni unyakeso wakuti lemba la Salimo 12:7 likuyowoya vya mazgu gha Chiuta yayi.
Ntheura tingati vesi ili likupeleka chigomezgo ku “ŵanthu ŵachipulikano” kuti Chiuta waŵawovwirenge.