NKHANI YAKUSAMBIRA 34
SUMU 107 Chiuta Ntchakuwonerapo cha Chitemwa
Umo Ŵalara Ŵakulongolera Chitemwa na Lusungu ku Ŵakwananga
“Chiuta wamulongorani lusungu kuti mung’anamuke mtima.”—ROM. 2:4.
FUNDO YIKURU
Umo ŵalara ŵakuchitira kuti ŵawovwire awo ŵachita kwananga kukuru mu mpingo.
1. Kasi ntchivichi chingachitika ku ŵanyake awo ŵachita kwananga kukuru?
MU NKHANI iyo yajumpha, tikawona umo mpositole Paulosi wakachitira na nkhani ya munthu uyo wakachita kwananga kukuru mu mpingo wa Korinte. Munthu uyu pakwamba wakaŵa wambura kung’anamuka mtima ndipo wakafumiskika mu mpingo. Ndipouli, nga umo lemba ilo pajintha mutu wa nkhani iyi likulongolera, ŵanthu ŵanyake awo ŵachita kwananga kukuru ŵangawovwirika ndipo ŵangachiskika kung’anamuka mtima. (Rom. 2:4) Ipo kasi ŵalara ŵangaŵawovwira wuli kuti ŵang’anamuke mtima?
2-3. Kasi tikwenera kuchita vichi usange tamanya kuti Mkhristu munyithu wachita kwananga kukuru, ndipo chifukwa wuli?
2 Ŵalara kuti ŵawovwirepo, ŵakwenera kumanya dankha kwananga uko munthu wachita. Ntheura kasi tikwenera kuchita wuli usange tamanya kuti Mkhristu munyithu wachita kwananga kukuru, uko kungapangiska kuti wafumiskike mu mpingo? Tikwenera kumuchiska uyo wachita kwananga kuti walute ku ŵalara kuti ŵakamovwire.—Yes. 1:18; Mil. 20:28; 1 Pet. 5:2.
3 Wuli usange uyo wachita kwananga wakukhumba yayi kukaphalira ŵalara? Mbwenu ise ndise tikwenera kukaŵaphalira ŵalara kuti munthu uyu wapokere wovwiri wakwenelera. Kuchita nthena ntchitemwa, chifukwa tikukhumba yayi kutaya mubali panji mudumbu withu. Usange uyo wachita kwananga wakulutilira kwenda mu nthowa zake ziheni, wangalutilira kunanga ubwezi wake na Yehova. Wanganangaso lumbiri lwa mpingo. Ntheura tikuchita chikanga kukaphalira ŵalara chifukwa tikumutemwa Yehova kweniso mubali withu uyo wachita kwananga.—Sal. 27:14.
UMO ŴALARA ŴAKOVWILIRA AWO ŴACHITA KWANANGA KUKURU
4. Kasi chilato cha ŵalara ntchakuti wuli para ŵakukumana na uyo wachita kwananga kukuru?
4 Para munyake mu mpingo wachita kwananga kukuru, wupu wa ŵalara ukusora ŵabali ŵatatu ŵakwenelera kuti ŵaŵe mu komiti.a Ŵanalume aŵa ŵakwenera kuŵa ŵakujiyuyura. Apo ŵakuyezgayezga kovwira uyo wachita kwananga kuti wang’anamuke mtima, ŵakumanya kuti ŵangamuchichizga yayi kuti wasinthe. (Doto. 30:19) Ŵalara ŵakumanya kuti ni ŵakwananga wose yayi awo ŵangasintha na kung’anamuka mtima, nga umo likachitira Themba Davide. (2 Sam. 12:13) Ŵanyake ŵangasulako waka ulongozgi wakufuma kwa Yehova. (Gen. 4:6-8) Ndipouli, chilato cha ŵalara ntchakuti ŵamovwire wakwananga kuti wang’anamuke mtima usange vingachitika. Kasi ŵalara ŵakwenera kukumbuka vichi apo ŵakukumana na uyo wachita kwananga kukuru?
5. Kasi ŵalara ŵakwenera kukumbuka ulongozgi wuli para ŵakukumana na wakwananga? (2 Timote 2:24-26) (Wonaniso chithuzi.)
5 Ŵalara ŵakuwona uyo wachita kwananga kuti ni mberere yakuzirwa iyo yazgeŵa. (Luka 15:4, 6) Ntheura apo ŵakukumana na munthu uyo, ŵakuyowoya nayo mwaukali yayi panji kuchita nayo vinthu mwambura lusungu; nesi kughanaghana kuti ŵamufumbenge waka mafumbo na chilato chakuti ŵasange waka ukaboni. M’malo mwake ŵakulongora mikhaliro iyo yikusangika pa 2 Timote 2:24-26. (Ŵazgani.) Ŵalara ŵakulutilira kuŵa ŵakuzikira, ŵaubwezi, kweniso ŵalusungu apo ŵakuyezgayezga kumovwira kuti wasinthe kaghanaghaniro kake.
Nga umo ŵakachitiranga ŵaliska mu nyengo yakale, ŵalara ŵakuchita vyose ivyo ŵangafiska kuti ŵawovwire mberere yakuzgeŵa (Wonani ndime 5)
6. Kasi ŵalara ŵanganozgekereska wuli mitima yawo pambere ŵandakumane na wakwananga? (Ŵaroma 2:4)
6 Ŵalara ŵakunozgekereska mitima yawo. Ŵakuyezgayezga kuyezga Yehova pa umo ŵakuchitira na uyo wachita kwananga, ndipo ŵakukumbuka mazgu gha Paulosi ghakuti: “Lusungu lwa Chiuta lukuyezga kukulongozgera ku kupera.” (Ŵazgani Ŵaroma 2:4, bi7.) Mulimo ukuru wa ŵalara ngwauliska ndipo ŵakwenera kulondezga ulongozgi wa Khristu kweniso kumuyezga pa nkhani ya umo ŵakuchitira na mpingo. (Yes. 11:3, 4; Mat. 18:18-20) Pambere ŵandakumane na uyo wachita kwananga, ŵalara awo ŵali mu komiti ŵakulomba na kughanaghanirapo chilato chawo, icho nkhovwira wakwananga kuti wang’anamuke mtima. Ŵakupenjerezga fundo zakovwira mu Malemba kweniso mu mabuku ghithu, ndipo ŵakulomba Yehova kuti waŵawovwire kumupulikiska uyo wachita kwananga kweniso nkhani yose. Iwo ŵakughanaghaniraso ivyo ŵakwenera kumanya vyakukhwaskana na munthu uyo, ivyo panji vikapangiska kuti waghanaghane na kuchita vinthu munthowa iyo.—Zinth. 20:5.
7-8. Kasi ŵalara ŵangamuyezga wuli Yehova pa nkhani ya kuzikira para ŵakukumana na wakwananga?
7 Ŵalara ŵakuyezga Yehova pa nkhani ya kuzikira. Iwo ŵakukumbuka umo Yehova wakachitira na ŵakwananga mu nyengo yakale. Mwachiyelezgero, Yehova wakazikira nayo Kayini, na kumuchenjezga za masuzgo agho wangakumana nagho usange wangaleka kusintha, kweniso wakamuphalira vitumbiko ivyo wasangenge para wapulikirenge. (Gen. 4:6, 7) Yehova wakamupa ulongozgi Davide kwizira mwa ntchimi Natani, ndipo yikayowoya ntharika iyo yikamukhwaska chomene Davide. (2 Sam. 12:1-7) Ndipo Yehova ‘wakalutilira kutuma’ ntchimi zake “kaŵirikaŵiri” ku mtundu wa Israyeli para waleka kumupulikira. (Yer. 7:24, 25) Wakalindiliranga kuti ŵanthu ŵake ŵang’anamuke mtima dankha yayi kuti ndipo wambe kuŵawovwira. M’malo mwake, apo ŵakaŵa kuti ŵakuchita kwananga, wakaŵachiskanga kuti ŵang’anamuke mtima.
8 Ŵalara ŵakuyezga Yehova para ŵakuyezgayezga kovwira awo ŵachita kwananga kukuru. Nga umo lemba la 2 Timote 4:2 likuyowoyera, iwo ŵakuchita vinthu ‘mwakuzikira’ para ŵakovwira uyo wachita kwananga. Ntheura nyengo zose mulara wakwenera kukhazikiska mtima pasi na kuchita vinthu mwakuzikira, mwakuti wawovwire wakwananga kuŵa wakukhumbisiska kuchita icho ntchakwenelera. Usange mulara wangathukira panji kukwiya, mbwenu munthu uyo wachita kwananga wangapulikira yayi ulongozgi uwo wakupika panji wangatondeka kung’anamuka mtima.
9-10. Kasi ŵalara ŵangamovwira wuli wakwananga kumanya ivyo vikapangiska kuti wachite kwananga?
9 Ŵalara ŵakuyezga kumanya ivyo vikapangiska munthu kuchita kwananga. Mwachiyelezgero, kasi munthu uyo wachita kwananga wakamba kulopwa mwauzimu pachoko na pachoko chifukwa cha kusulako sambiro lamwene panji kuleka kupharazga? Kasi wakaleka kulomba kwa Yehova nyengo zose? Kasi wakaleka kukanizga makhumbiro ghaheni? Kasi wakasankha mwambura mahara pa nkhani ya ŵabwezi panji vyakusanguluska? Kasi ivyo wakasankha vikakhwaska wuli kaghanaghaniro kweniso makhumbiro ghake? Kasi wakumanya umo Adada ŵake a Yehova ŵakujipulikira chifukwa cha ivyo wachita?
10 Ŵalara ŵangamufumba wakwananga mafumbo agho ghangamovwira kughanaghanirapo ivyo vikapangiska kuti ubwezi wake na Yehova wambe kulopwa ndipo paumaliro na kuchita kwananga. Kweni ŵakwenera kuchita nthena mwalusungu ndipo ŵakwenera kugega kumufumba vinthu ivyo vikuleka kuŵakhwaska. (Zinth. 20:5) Kweniso nyengo zinyake ŵangagwiliskira ntchito viyelezgero kuti ŵamovwire munthu kughanaghanirapo na kuwamo yekha ukuru wa kwananga uko wachita, nga umo Natani wakachitira na Davide. Nyengo zinyake pa ulendo wakwamba wenewuwu, wakwananga wangamba kuchita chitima na ivyo wakachita, ndipo wangang’anamuka mtima.
11. Kasi Yesu wakachitanga wuli na ŵakwananga?
11 Ŵalara ŵakuyezgayezga kuti ŵayezge Yesu. Apo wakawovwiranga Saulosi wa ku Taraso, Yesu wakamufumba fumbo ilo likamuchontha chomene, wakati: “Saulosi, Saulosi, ukunitambuzgirachi?” Apa Yesu wakamovwira Saulosi kuwamo kuti ivyo wakachitanga vikaŵa viheni. (Mil. 9:3-6) Ndipo pakuyowoya vya “mwanakazi yura Yezebeli,” Yesu wakati: “Nkhamupa nyengo kuti wang’anamuke mtima.”—Chivu. 2:20, 21.
12-13. Kasi ŵalara ŵangachita wuli kuti ŵamupe nyengo wakwananga kuti wang’anamuke mtima? (Wonaniso chithuzi.)
12 Pakuti ŵakuyezga Yesu, ŵalara ŵakuchimbilira yayi kumweruzga wakwananga kuti ngwambura kung’anamuka mtima. Nangauli ŵanyake ŵakung’anamuka mtima paulendo wakwamba uwo komiti yakumana nawo, kweni ŵanyake ŵangakhumbikwira nyengo. Ntheura ŵalara ŵanganozga ndondomeko yakuti ŵazakakumaneso nayo munthu uyo. Panji pamanyuma pa kukumana nayo kakwamba, Mkhristu uyo wachita kwananga wangamba kughanaghanirapo chomene ivyo waphalirika. Wangajiyuyura na kumulomba Yehova kuti wamugowokere. (Sal. 32:5; 38:18) Lekani pakukumana nayo kachiŵiri, wakwananga wangalongora mzimu wakupambanako na uwo wakalongora apo ŵakakumananga nayo kakwamba.
13 Kuti ŵamovwire wakwananga kung’anamuka mtima, ŵalara ŵakumulongora chitemwa na lusungu. Ŵakulomba kwa Yehova ndipo ŵakugomezga kuti watumbikenge kuyezgayezga kwawo kuti wakwananga wawemo na kung’anamuka mtima.—2 Tim. 2:25, 26.
Ŵalara ŵangakumana na wakwananga kujumpha pa kamoza mwakuti ŵamupe nyengo yakuti wang’anamuke mtima (Wonani ndime 12)
14. Kasi ni njani uyo wakwenera kulumbika para wakwananga wang’anamuka mtima, ndipo chifukwa wuli?
14 Usange wakwananga wang’anamuka mtima, tikukondwa chomene! (Luka 15:7, 10) Kasi malumbo ghakwenera kuluta kwa njani? Ku ŵalara? Kumbukani ivyo Paulosi wakalemba vyakukhwaskana na ŵakwananga, wakati: “Panji Chiuta wangaŵapa mwaŵi kuti ŵang’anamuke mtima.” (2 Tim. 2:25) Ntheura malumbo ghakwenera kuluta kwa Yehova, kwa munthu yayi, chifukwa ndiyo wakovwira wakwananga kusintha kaghanaghaniro kake. Paulosi wakalongosora viwemi ivyo vikuŵapo para munthu wang’anamuka mtima. Munthu uyo, wakwamba kuwumanya makora unenesko, kughanaghana makora, kweniso kugega vipingo vya Satana.—2 Tim. 2:26.
15. Kasi ŵalara ŵangachita wuli kuti ŵalutilire kumovwira wakwananga uyo wang’anamuka mtima?
15 Usange wakwananga wang’anamuka mtima, ŵalara ŵazamulutilira kumwendera kuti ŵamovwire kulutilira kupokera wovwiri uwo wakukhumbikwira kuti walimbane na vipingo vya Satana na kuchita icho ntchiwemi. (Heb. 12:12, 13) Mbunenesko kuti ŵalara ŵakuphalira waliyose yayi ivyo munthu uyo wabuda. Kweni kasi mpingo ungamanyiskika vichi?
“UŴACHENYE PAMASO PA WOSE”
16. Kuyana na 1 Timote 5:20, kasi Paulosi wakang’anamurangachi apo wakati “pa maso pa ŵose”?
16 Ŵazgani 1 Timote 5:20. Paulosi wakalembera mazgu agha kwa mulara munyake Timote pa umo wangachitira na “awo ŵakuchita kwananga.” Kasi wakang’anamurangachi? Apa wakang’anamuranga mpingo wose yayi. Kweni wakang’anamuranga ŵanthu ŵachoko waka awo ŵakaŵa kuti ŵakumanya za kwananga uku. Ŵanthu aŵa ŵangaŵa awo ŵakawona na maso, panji awo wakwananga wakaŵaphalirapo. Ŵalara ŵangaŵaphalira mwachibisibisi kuti nkhani iyo yili kudumbika ndipo wakwananga wali kovwirika.
17. Usange ŵanandi mu mpingo ŵamanya vya kwananga kukuru uko kwachitika, panji ntchakuwonekerathu kuti kumanyikwenge, kasi pakwenera kupharazgika chipharazgo wuli, ndipo chifukwa wuli?
17 Kweni nyengo zinyake ŵanandi mu mpingo ŵangamanya vya kwananga uko kwachitika, panji ntchakuwonekerathu kuti ŵamanyenge. Para vili nthena, ndikuti kuchenyeka “pamaso pa wose” kungasazgapo mpingo wose. Ntheura mulara wakwenera kupharazga mu mpingo kuti mubali panji mudumbu ngana wachenyeka. Chifukwa wuli? Paulosi wakati: “Kuti liŵe chenjezgo ku ŵanyake” kuti ŵaleke kuchita kwananga kukuru.
18. Kasi ŵalara ŵeruzgenge wuli para uyo wachita kwananga kukuru ni mwana muchoko? (Wonaniso chithuzi.)
18 Wuli pakuyowoya vya ŵana awo ŵali kubatizika, awo ŵandafiske vyaka 18, ndipo ŵachita kwananga kukuru? Wupu wa ŵalara uzamusora ŵalara ŵaŵiri kuti ŵakumane na mwana uyo wachita kwananga pamoza na ŵapapi ŵake Ŵachikhristu.b Ŵalara ŵazamuwona ivyo ŵapapi ŵachitapo kale kuti ŵamovwire mwana wawo kuti wang’anamuke mtima. Usange mwana wapulikira ulongozgi wa ŵapapi ŵake na kuchitapo kanthu kuti wasinthe, ŵalara ŵaŵiri aŵa ŵangasankha kuti mbwenu ŵapapi ndiwo ŵalutilire kumovwira mwana wawo. Nakuti ntchakupulikikwa, chifukwa udindo wakulanga ŵana mwachitemwa kuti ŵasinthe nkharo yawo, Chiuta wali kupeleka ku ŵapapi. (Doto. 6:6, 7; Zinth. 6:20; 22:6; Efe. 6:2-4) Kufuma apo, ŵalara mwa apo na apo ŵazamufumbanga ŵapapi kuti ŵamanye usange mwana wakupokera wovwiri wakwenelera. Kweni wuli usange mwana wakulongora kuti ngwambura kung’anamuka mtima? Usange vili nthena, komiti ya ŵalara yikumanenge nayo mwana pamoza na ŵapapi ŵake Ŵachikhristu.
Usange mwana wachita kwananga kukuru, ŵalara ŵaŵiri ŵazamukumana nayo pamoza na ŵapapi ŵake Ŵachikhristu (Wonani ndime 18)
“YEHOVA NGWACHITEMWA CHOMENE NDIPOSO NGWALUSUNGU”
19. Kasi ŵalara ŵakumuyezga wuli Yehova para ŵakukumana na uyo wachita kwananga kukuru?
19 Ŵalara awo ŵakuteŵetera mu makomiti ŵali na udindo panthazi pa Yehova, wa kusungilira mpingo kuŵa wakutowa. (1 Kor. 5:7) Iwo ŵaliso na udindo wakovwira awo ŵachita kwananga kukuru kuti ŵang’anamuke mtima usange ntchamachitiko. Kweni apo ŵakuchita ivi, ŵalara ŵakwenera kuŵa na chigomezgo kuti wakwananga wangasintha. Chifukwa wuli? Chifukwa ntchakuti ŵakukhumba kuyezga Yehova, uyo “ngwachitemwa chomene ndiposo ngwalusungu.” (Yak. 5:11) Wonani umo mpositole Yohane wakalongolera mzimu uwu. Iyo wakalemba kuti: “Mwatwana twane, nkhumulemberani vinthu ivi kuti muleke kunanga. Kweni usange munyake wananga, tili na movwiri kwa Adada, Yesu Khristu, uyo ni murunji.”—1 Yoh. 2:1.
20. Kasi tizamusambira vichi mu nkhani yaumaliro?
20 Chachitima ntchakuti, nyengo zinyake Mkhristu uyo wachita kwananga wangakana kung’anamuka mtima. Para vyaŵa nthena, wakwenera kufumiskikamo mu mpingo. Kasi ŵalara ŵakuchita wuli para vyanthena vyachitika? Tizamudumbiskana vinandi mu nkhani yaumaliro.
SUMU 103 Ŵaliska Ŵapelekeka Kuŵa Vyawanangwa
a Kumasinda ghakamanyikwanga kuti makomiti gha cheruzgo. Kweni pakuti kweruzga njimoza waka mwa ntchito yawo, lekani taleka kugwiliskira ntchito mazgu agha. M’malo mwake, tiyowoyenge kuti makomiti gha ŵalara.
b Fundo iyi yikugwiraso ntchito na ku awo ŵakukhala panji kulera ŵana awo mbawo yayi.