Mafumbo Ghakufuma ku Ŵaŵazgi
Apo Yesu wakambiskanga Mugonero wa Fumu, kasi ŵasambiri ŵanyake 70 awo wakaŵatumapo kukapharazga ŵakaŵa nkhu? Kasi ŵakaŵa kuti ŵamuchimbira?
Palije chifukwa cha kughanaghanira kuti ŵasambiri 70 pakuti pakaŵavya apo Yesu wakambiskanga Mugonero wa Fumu ndikuti ŵakaŵa ŵambura kwenelera panji ŵakaŵa kuti ŵamuchimbira. Yesu wakakhumbanga waka kuŵa na ŵapositole ŵake pera pa chakuchitika ichi.
Ŵasambiri ŵake 12 na ŵasambiri ŵake ŵanyake 70, wose ŵakaŵa ŵakuzomerezgeka kwa iyo. Chakwamba Yesu wakasorapo ŵasambiri ŵanalume 12 pa ŵasambiri ŵake ŵanandi, ndipo wakaŵachema ŵapositole. (Luka 6:12-16) Wakaŵa ku Galileya apo ‘wakachema ŵasambiri ŵake 12’ na ‘kuŵatuma kukapharazga Ufumu wa Chiuta na kuchizga ŵalwari.’ (Luka 9:1-6) Pamanyuma, apo wakaŵa mu Yudeya, Yesu ‘wakasora ŵanyakeso 70 na kuŵatuma ŵaŵiriŵaŵiri.’ (Luka 9:51; 10:1) Nakuti Yesu wakaŵa na ŵasambiri mu vigaŵa vyose ivyo wakapharazganga uthenga wake.
Ŵayuda awo ŵakazgoka ŵasambiri ŵa Yesu ŵakachitanga nipera Paska chaka chilichose, ndipo panji ŵakachitanga lumoza na mbumba zawo. (Eks. 12:6-11, 17-20) Apo wakaŵa pafupi kukomeka, Yesu na ŵasambiri ŵake ŵakaluta ku Yerusalemu. Kweni wakachema ŵasambiri ŵake wose yayi kwamba ku Yudeya, Galileya na Pereya kuti wachite nawo Paska pamoza. Ntchakuwonekerathu kuti Yesu wakakhumbanga waka kuŵa na ŵapositole ŵake pera panyengo iyi. Wakaŵaphalira kuti: “Nakhumbisiska kurya Paska ili pamoza na imwe pambere nindasuzgike.”—Luka 22:15.
Pakaŵa chifukwa chiwemi icho wakachitira nthena. Yesu wakaŵa pafupi kufwa nga ni “Mwana wa mberere wa Chiuta uyo wakuwuskako kwananga kwa charu!” (Yoh. 1:29) Wakeneranga kufwira mu Yerusalemu, uko ŵanthu ŵakapelekeranga sembe kwa Chiuta kwamba kale. Nyifwa ya Yesu yikaŵa kuti yichitenge vinandi pakufwatura ŵanthu ku wuzga, kuluska mwana wa mberere uyo mbumba za Israyeli zikaryanga pa usiku uwo ŵakafumiskikira mu Eguputo. (1 Kor. 5:7, 8) Ivyo Yesu wakachita vikaŵa kuti viwovwirenge ŵasambiri 12 kuŵa fawundeshoni ya mpingo Wachikhristu. (Efe. 2:20-22) Chakukondweska ntchakuti msumba utuŵa wa Yerusalemu uli na “malibwe 12 gha fawundeshoni” apo pali kulembeka “mazina 12 gha ŵapositole 12 ŵa Mwana wa mberere.” (Chivu. 21:10-14) Nadi, ŵapositole ŵakugomezgeka ŵakaŵa kuti ŵali na chigaŵa chakuzirwa chomene pakufiska khumbo la Chiuta. Ntheura ntchakupulikikwa kuti Yesu wakakhumba waka kuŵa na iwo pera pa Paska lake laumaliro, ilo pamanyuma pake wakambiska Mugonero wa Fumu.
Ŵasambiri ŵake 70 na ŵanyake, ŵakaŵapo yayi pa chakurya ichi na Yesu. Ndipouli, ŵasambiri wose awo ŵakalutilira kugomezgeka ŵakapindura na Mugonero wa Fumu uwo Yesu wakambiska. Ŵasambiri wose awo mukuluta kwa nyengo ŵakazgoka Ŵakhristu ŵakuphakazgika, ŵakanjira mu phangano la ufumu, ilo Yesu wakaliyowoya ku ŵapositole ŵake pa usiku uwu.—Luka 22:29, 30.