Mafumbo Ghakufuma ku Ŵaŵazgi
Kasi “ŵangelo ŵakusoleka” awo ŵakuyowoyeka pa 1 Timote 5:21 mbanjani?
Mpositole Paulosi wakalembera mulara munyake Timote kuti: “Nkhukuphalira panthazi pa Chiuta na Khristu Yesu na ŵangelo ŵakusoleka, kuti ulondezgenge ulongozgi uwu kwambura kutemwera panji sankho.”—1 Tim. 5:21.
Chakwamba tidumbiskanenge za ŵangelo awo vingachitika yayi kuti ŵaŵe mu gulu ili. Ntchakuwonekerathu kuti ŵangelo aŵa ŵangaŵa yayi mu gulu la ŵa 144,000. Apo Paulosi wakalemberanga Timote mazgu agha, chiwuka cha Ŵakhristu ŵakuphakazgika chikaŵa kuti chindambe. Ŵapositole na Ŵakhristu ŵanyake ŵakuphakazgika ŵakaŵa kuti ŵandazgoke vilengiwa vyauzimu, ntheura ndiwo yayi ŵangaŵa “ŵangelo ŵakusoleka.”—1 Kor. 15:50-54; 1 Tes. 4:13-17; 1 Yoh. 3:2.
Kweniso “ŵangelo ŵakusoleka” aŵa ŵangaŵa ŵangelo awo ŵakagaluka panyengo ya Chigumula yayi. Ŵangelo ŵakugaluka aŵa ŵakalondezga Satana na kuzgoka viŵanda, ndipo ŵakazgoka ŵalwani ŵa Yesu. (Gen. 6:2; Luka 8:30, 31; 2 Pet. 2:4) Ndipo kunthazi, ŵazamuponyeka mu chizongwe kwa vyaka 1,000, ndipo pamanyuma ŵazamuparanyika pamoza na Dyabulosi.—Yuda 6; Chivu. 20:1-3, 10.
Ntheura “ŵangelo ŵakusoleka” awo Paulosi wakayowoyanga ŵakwenera kuti mbangelo ŵakuchanya awo ŵakukhozgera “Chiuta na Khristu Yesu.”
Pali ŵangelo ŵanandi chomene ŵakugomezgeka. (Heb. 12:22, 23) Vikuwoneka kuti mbangelo wose yayi awo ŵakupika mulimo wakuyana. (Chivu. 14:17, 18) Kumbukani kuti panyengo yinyake mungelo yumoza wakapika mulimo wakuparanya ŵankhondo Ŵaasiriya ŵakukwana 185,000. (2 Mathe. 19:35) Ŵangelo ŵanandi ŵakwenera kuti ŵali kupika mulimo ‘wakuwuskamo mu Ufumu wa Yesu vinthu vyose ivyo vikukhuŵazga kweniso ŵanthu awo ŵakuchita uchikanamalango.’ (Mat. 13:39-41) Ŵanyake ŵakwenera kuti ŵali kupika mulimo ‘wakuwunganyira kuchanya’ Ŵakhristu ŵakuphakazgika. (Mat. 24:31) Ndipo ŵanyake ‘ŵakutivikilira mu nthowa zithu zose.’—Sal. 91:11; Mat. 18:10; yaniskani na Mateyu 4:11; Luka 22:43.
“Ŵangelo ŵakusoleka” awo ŵakuzunulika pa 1 Timote 5:21 ŵakwenera kuti mbangelo awo ŵakapika mulimo wakupwelelera mpingo. Nkhani yose ya mu lemba ili, yikulongoraso kuti Paulosi wakapeleka ulongozgi wakukhwaskana na umo ŵalara ŵakwenera kuchitira milimo yawo, kweniso kuti awo ŵali mu mpingo nawo ŵachindikenge ŵalara. Paulosi wakati ŵalara ŵakwenera kuchita milimo yawo “kwambura kutemwera panji sankho” ndipo ŵakwenera yayi kupanga vyakusankha kwambura kughanaghanirapo dankha. Ŵakeneranga kulondezga ulongozgi uwo Paulosi wakapeleka chifukwa chakuti ŵalara ŵakuteŵetera ŵabali ŵawo “panthazi pa Chiuta na Khristu Yesu na ŵangelo ŵakusoleka.” Ntheura ntchakuwonekerathu kuti ŵangelo ŵanyake ŵakupika milimo yakukhwaskana na mpingo, nga nkhuvikilira, kulaŵilira mulimo wakupharazga, kweniso kupeleka malipoti kwa Yehova pa ivyo ŵakuwona.—Mat. 18:10; Chivu. 14:6.