Muŵe na Kaghanaghaniro Kanthena ka Yehova na Yesu

1-2. Kasi kumutemwa Yehova kukusazgapo vichi, ndipo Yesu wakalongora wuli kuti wakumutemwa Yehova na maghanoghano ghake ghose?

YESU wakati: “Utemwenge Yehova Chiuta wako na mtima wako wose na umoyo wako wose na nkhongono zako zose na maghanoghano ghako ghose, ndiposo utemwenge mzengezgani wako nga umo ukujitemwera wamwene.” (Luka 10:27) Apa Yesu wakayowoya mwakupulikikwa makora kuti ili ndilo likaŵa dango likuru chomene mu Dango la Mozesi. Wonani kuti kutemwa Yehova kukusazgapo mtima withu, makhumbiro ghithu, kweniso umo tikujipulikira. Kweniso kukusazgapo kumuteŵetera na umoyo withu wose, na nkhongono zithu zose. Kweni kutemwa Yehova kukusazgaposo umo tikughanaghanira. Unenesko ngwakuti tingapulikiska yayi maghanoghano ghose gha Yehova. Kweni tingapulikiska makora kaghanaghaniro ka Chiuta para tingasambira “maghanoghano gha Khristu.” Vili nthena chifukwa Yesu wakayezga mwakufikapo kaghanaghaniro ka Awiske.—1 Kor. 2:16.

² Yesu wakatemwanga Yehova na maghanoghano ghake ghose. Wakamanyanga khumbo la Chiuta ndipo wakaŵikapo mtima kuchita ivyo Chiuta wakakhumbanga, nangauli wakamanyanga kuti watambuzgikenge. Pakuti Yesu wakaŵikapo mtima kuchita khumbo la Awiske, wakazomerezga chilichose yayi kumutondeska kufiska chilato chake.

3. Kasi mpositole Petrosi wakasambirako vichi kwa Yesu, ndipo wakaŵachiska vichi Ŵakhristu ŵanyake? (1 Petrosi 4:1)

³ Petrosi na ŵapositole ŵanyake ŵakaŵa na mwaŵi wakuŵa lumoza na Yesu na kusambirako umo wakaghanaghaniranga. Apo Petrosi wakalemba kalata yake yakwamba, wakaŵachiska Ŵakhristu kuti ŵavware zikhore pa kuŵa na kaghanaghaniro kakuyana na ka Khristu. (Ŵazgani 1 Petrosi 4:1.) Petrosi wakagwiliskira ntchito mazgu agho ghakukhwaskana na vya usilikari apo wakati: “Muvware zikhore.” Ntheura usange Ŵakhristu ŵakuŵa na kaghanaghaniro kakuyana na ka Yesu, ŵaŵenge ŵakunozgeka kulimbana na makhumbiro ghose ghakuchita icho ntchiheni, kweniso charu chakuwusika na Satana ichi.—2 Kor. 10:​3-5; Efe. 6:12.

4. Kasi tiwonenge vichi mu nkhani iyi?

⁴ Mu nkhani iyi tiwonenge kaghanaghaniro ako Yesu wakaŵa nako kweniso umo tingamuyezgera. Tiwonenge umo (1) tingayezgera kaghanaghaniro ka Yehova, ako katovwirenge kuŵa na maghanoghano ghakuyana, (2) tingaŵira ŵakujiyuyura, kweniso (3) tingaŵira ŵamahara mwa kuthemba Yehova pa nkhani ya lurombo.

YEZGANI KAGHANAGHANIRO KA YEHOVA

5. Kasi ulendo unyake Petrosi wakatondeka wuli kulongora kaghanaghaniro ka Yehova?

⁵ Tiyeni tiwone nyengo yinyake iyo Petrosi wakatondeka kuŵa na kaghanaghaniro ka nga ka Yehova pa nkhani zinyake. Yesu wakaphalira ŵapositole ŵake kuti walutenge ku Yerusalemu, kukapelekeka ku ŵalongozgi ŵa chisopa, kutambuzgika, ndipo pamanyuma na kukomeka. (Mat. 16:21) Panji chikaŵa chakusuzga kwa Petrosi kugomezga kuti Yehova wangazomerezga kuti ivi vimuchitikire Yesu, uyo wakaŵa Mesiya wakulayizgika kweniso muwomboli wawo. (Mat. 16:16) Ntheura Petrosi wakamutolera Yesu pamphepete na kumuphalira kuti: “Mujilengere lusungu Fumu. Mungazomerezganga na pachoko chara kuti ichi chimuchitikirani.” (Mat. 16:22) Chifukwa chakuti Petrosi wakatondeka kuŵa na kaghanaghaniro ka Yehova pa nkhani iyi, wakaŵa na maghanoghano ghakuyana yayi na Yesu.

6. Kasi Yesu wakalongora wuli kuti wali na kaghanaghaniro kakuyana na ka Yehova?

⁶ Kaghanaghaniro ka Yesu kakaŵa kakuyana na ka Adada ŵake ŵakuchanya. Yesu wakati kwa Petrosi: “Luta kumanyuma kwane Satana! Ndiwe chikhuŵazgo kwa ine, chifukwa uli na maghanoghano gha Chiuta chara, kweni gha ŵanthu.” (Mat. 16:23) Panji Petrosi wakaŵa na chilato chiwemi, kweni Yesu wakakana ulongozgi wa Petrosi. Apa nase tikusambirapo sambiro lakuzirwa. Khumbo la Yehova likaŵa lakuti Yesu wavikilire umoyo wake yayi. Pa zuŵa ili, Petrosi wakasambirapo chinthu chakuzirwa chomene pa nkhani ya kuŵa na kaghanaghaniro ka Chiuta.

7. Kasi pamanyuma Petrosi wakalongora wuli kuti wakakhumbanga kusintha kaghanaghaniro kake kuti kayane na ka Yehova? (Wonani chithuzi.)

⁷ Pati pajumpha nyengo, Petrosi wakalongora kuti wakakhumbanga kusambira kuŵa na kaghanaghaniro ka Yehova. Ivi vikachitika apo Ŵamitundu ŵambura kukotoleka ŵakamba kuŵa chigaŵa cha ŵanthu ŵa Chiuta. Petrosi wakatumika kuti wakapharazgire Koroneliyo, ndipo ndiyo wakaŵa Wamitundu wakwamba kuzgoka Mkhristu. Ŵayuda ŵakachitiranga lumoza yayi vinthu na Ŵamitundu, ntheura Petrosi wakakhumbikwiranga kusintha kaghanaghaniro kake kuti waŵapharazgire ŵanthu aŵa. Petrosi wati wamanya khumbo la Yehova pa nkhani iyi, wakasintha kaghanaghaniro kake. Ntheura apo wakatumika wakaluta “kwambura kususka.” (Mil. 10:​28, 29) Wakapharazgira Koroneliyo na ŵamunyumba yake, ndipo ŵakabatizika.—Mil. 10:​21-23, 34, 35, 44-48.

8. Kasi tingalongora wuli kuti kaghanaghaniro kithu kakuyana na ka Yehova? (1 Petrosi 3:8)

⁸ Vyaka vyati vyajumphapo, Petrosi wakachiska Ŵakhristu ŵanyake kuti ‘ŵaŵe ŵakuyana maghanoghano.’ (Ŵazgani 1 Petrosi 3:8.) Pakuŵa ŵanthu ŵa Yehova, nase tingaŵa ŵakuyana maghanoghano para tikuyezga kaghanaghaniro ka Yehova ako kali mu Mazgu ghake. Mwachiyelezgero, Yesu wakachiska ŵalondezgi ŵake kuti ŵaŵikenge vinthu vya Ufumu pakwamba mu umoyo wawo. (Mat. 6:33) Pakulondezga fundo iyi, mupharazgi munyake mu mpingo winu wangasankha kuti wachiteko uteŵeti unyake wanyengozose. M’malo mwa kumuphalira kuti wajilengere lusungu panji kuti wasankhe umoyo wawofuwofu, tikwenera kuyowoya viwemi vyakukhwaskana na uteŵeti uwo na kumovwira kuti wafiske.

MUŴE ŴAKUJIYUYURA

9-10. Kasi Yesu wakalongora wuli kuti wakaŵa wakujiyuyura chomene?

⁹ Pa usiku wakuti machero ghake wakomekenge, Yesu wakasambizga Petrosi na ŵapositole ŵanyake sambiro lakuzirwa lakukhwaskana na kujiyuyura. Pambere ivi vindachitike, Yesu wakatuma Petrosi na Yohane kuti ŵakanozge paska laumaliro ilo Yesu wakaŵa nawo pambere wandafwe. Vinyake ivyo ŵakanozga, pakwenera kuti pakaŵa beseni na mathawulo mwakuti ŵalendo ŵazakageziskirepo malundi ghawo pambere ŵandarye chakurya. Kweni kasi ninjani wakatenge wachitenge mulimo wapasi uwu?

¹⁰ Yesu wakaziwulika yayi kuchita mulimo uwu, nakuti ivyo wakachita apa wakalongora kujiyuyura chomene. Ŵapositole ŵakwenera kuti ŵakazizwa chomene kuwona Yesu wakuchita mulimo uwo ukachitikanga na ŵateŵeti. Yesu wakawuskako malaya ghake ghakuwaro, wakatora thawulo na kukaka mu chiwuno, na kuŵika maji mu beseni, ndipo wakamba kugeziska malundi ghawo. (Yoh. 13:​4, 5) Pakwenera kuti pakatora nyengo kuti wageziske malundi gha ŵapositole wose 12, kusazgapo na Yudasi wuwo uyo wakaŵa kuti wamupelekenge. Kweni Yesu wakajiyuyura na kumalizga kuchita mulimo wose uwu. Pamanyuma Yesu mwakuzikira wakayowoya kuti: “Kasi mukumanya icho nachita kwa imwe? Imwe mukunichema, ‘Msambizgi,’ ndiposo ‘Fumu,’ ndipo mukuneneska, chifukwa ndimo niliri. Ntheura usange ine, nangauli nili Fumu na Msambizgi, nageziska malundi ghinu, ipo namwe mukwenera kugeziskana malundi.”—Yoh. 13:​12-14.

11. Kasi Petrosi wakalongora wuli kuti wakasambira kuŵa wakujiyuyura? (1 Petrosi 5:5) (Wonaniso chithuzi.)

¹¹ Petrosi wakasambirako kwa Yesu pa nkhani ya kujiyuyura. Yesu wati wawelera kuchanya, Petrosi wakachizga mwanalume mwamunthondwe uyo wakababika wakupendera. (Mil. 1:​8, 9; 3:​2, 6-8) Ivyo vikachitika apa vikapangiska kuti mzinda wa ŵanthu umuwungilire Petrosi. (Mil. 3:11) Kasi Petrosi wakazomerezga kuti uchindami upike kwa iyo, pakuti nayo wakafuma mu mtundu uwo ukakhumbanga chomene kumanyikwa kweniso kutemwa maudindo? Yayi, Petrosi mwakujiyuyura wakakana kuti malumbo ghalute kwa iyo, ndipo wakati Yehova na Yesu ndiwo mbakwenelera kulumbika. Iyo wakati: “Kwizira mu zina [la Yesu], kweniso chipulikano icho ise tili nacho mu zina lake, ndivyo vyachizga munthu uyo mukumuwona na kumumanya.” (Mil. 3:​12-16) Mazgu agho Petrosi wakagwiliskira ntchito mu kalata iyo wakalembera Ŵakhristu pa nkhani ya kujiyuyura, ghakutikumbuska nyengo iyo Yesu wakatora thawulo na kukaka mu chiwuno na kugeziska malundi gha ŵapositole ŵake.—Ŵazgani 1 Petrosi 5:5.

12. Kasi tingachita wuli kuti timuyezge Petrosi na kulutilira kuŵa ŵakujiyuyura?

¹² Nase tingamuyezga Petrosi pa nkhani ya kusambira kuŵa ŵakujiyuyura. Kumbukani kuti kujiyuyura kwanadi kukusazgapo vinandi padera pa kuyowoya waka pa mulomo. Lizgu ilo Petrosi wakaligwiliskira ntchito pakuyowoya vya kujiyuyura likusazgapo maghanoghano ghithu panji kuti mtima wakujiyuyura. Tikuŵawovwira ŵanyithu chifukwa chakuti tikutemwa Yehova na ŵanthu, kuti ŵanthu ŵatilumbe yayi. Para tikuteŵetera Yehova na ŵabali ŵithu mwakukondwa, kwali ivyo tachita ŵanji ŵaviwona panji yayi, tikulongora kuti ndise ŵakujiyuyura.—Mat. 6:​1-4.

“MUŴE ŴAMAHARA”

13. Kasi chikung’anamurachi ‘kuŵa ŵamahara’?

¹³ Kasi ‘kuŵa wamahara’ kukusazgapo vichi? (1 Pet. 4:7) Mkhristu uyo ngwamahara wakuchita vyose ivyo wangafiska kuti wasankhenge vinthu mwamahara na kulongora kuti wali na kaghanaghaniro ka Yehova. Mkhristu wanthena wakumanya kuti chakuzirwa chomene nkhuŵa paubwezi na Yehova. Iyo wakujiwonaso mwakwenelera, ndipo wakumanya kuti wakumanya vyose yayi. Ndipo wakulongora kuti wakuthemba Yehova mwa kumulomba pafupipafupi.a

14. Kasi ulendo unyake Petrosi wakatondeka wuli kuthemba Yehova?

¹⁴ Pa usiku wakuti machero wafwenge, Yesu wakaphalira ŵasambiri ŵake kuti: “Mose mukhuŵarenge chifukwa cha ivyo vinichitikirenge usiku uno.” Petrosi wakajiwonanga wakukhora ndipo wakazgora kuti: “Nanga ŵanyake wose ŵangakhuŵara chifukwa cha ivyo vimuchitikiraninge, ine nikhuŵarenge chara napachoko!” Pa usiku uwu Yesu wakaphalira ŵasambiri ŵake ŵanyake kuti: “Muŵe maso na kulutilira kulomba.” (Mat. 26:​31, 33, 41) Petrosi walondezgenge ulongozgi uwu, wakatenge waŵenge na chikanga kuzomera kuti ni msambiri wa Yesu. M’malo mwake, Petrosi wakayikana Fumu yake, ndipo paumaliro wakajiyimba mulandu.—Mat. 26:​69-75.

15. Kasi Yesu wakachita wuli kuti walutilire kuŵa wamahara mu usiku wake waumaliro pano pasi?

¹⁵ Yesu wakathembanga chomene Yehova. Nangauli Yesu wakaŵa wakufikapo, kweni pa usiku wakuti machero ghake wafwenge wakalomba kanandi waka. Ivi vikamovwira kuti waŵe na chikanga kuchita vinthu mwakuyana na khumbo la Yehova. (Mat. 26:​39, 42, 44; Yoh. 18:​4, 5) Tikukayika yayi kuti Petrosi wakaluwa yayi kuti Yesu wakalomba kanandi waka pa usiku wake waumaliro.

16. Kasi Petrosi wakalongora wuli kuti sono ngwamahara? (1 Petrosi 4:7)

¹⁶ Nyengo yati yajumphapo, Petrosi wakasambira kumugomezga chomene Yehova mwa kulomba kwa iyo. Yesu wati wawuskika, wakamusimikizgira Petrosi na ŵapositole ŵanyake kuti ŵazamupokera mzimu utuŵa kuti ŵafiske ntchito yakupharazga iyo wakaŵatuma. Kweni wakaŵaphalira kuti ŵakhale dankha mu Yerusalemu kulindilira kuti ŵapokere mzimu uwu. (Luka 24:49; Mil. 1:​4, 5) Kasi Petrosi wakachitanga vichi apo wakalindiliranga? Petrosi na Ŵakhristu ŵanyake “ŵakakoseranga mu lurombo.” (Mil. 1:​13, 14) Pamanyuma, mu kalata yake yakwamba, Petrosi wakachiska Ŵakhristu ŵanyake kuti ŵaŵe ŵamahara kweniso ŵathembenge Yehova mu lurombo. (Ŵazgani 1 Petrosi 4:7.) Petrosi wakasambira kugomezga Yehova ndipo wakaŵa ntchindamiro ya mpingo.—Gal. 2:9.

17. Nanga tingaŵa na maluso wuli, kasi ntchivichi icho tikwenera kulutilira kuchita? (Wonaniso chithuzi.)

¹⁷ Kuti tiŵe ŵamahara, tikwenera kulomba kwa Yehova pafupipafupi. Nanga tingaŵa na maluso wuli, tikwenera kulutilira kulomba kwa Yehova. Nakuti chomene usange tikukhumba tisankhe chinthu pa nkhani yakuzirwa chomene, tikwenera kulomba kwa Yehova kuti watilongozge, chifukwa tikugomezga kuti iyo ndiyo wakumanya icho ntchiwemi kwa ise.

18. Kasi tingachita wuli kuti tisinthe kaghanaghaniro kithu kuti kayane na ka Yehova?

¹⁸ Tikuwonga chomene kuti Yehova wakatilenga munthowa yakuti tingayezga mikhaliro yake. (Gen. 1:26) Mbunenesko kuti tingamuyezga Yehova mwakufikapo yayi. (Yes. 55:9) Kweni nga ni Petrosi, nase tingasambira kuŵa na kaghanaghaniro ka Yehova. Ntheura, mphanyi talutilira kuŵa na kaghanaghaniro ka Yehova, kuŵa ŵakujiyuyura, kweniso ŵamahara.