Lutilirani Kwenda mu Chipulikano

1. Chifukwa wuli mpositole Paulosi wakaŵa wakukhorwa na umoyo wake wati wawona uko wafuma?

MPOSITOLE PAULOSI wakamanya kuti wakhala pachoko kukomeka, kweni wakaŵa na vifukwa vyakukwana vyakuŵira wakukondwa. Iyo wakati: “Nachimbira mu chiphalizgano m’paka kuumaliro, nasungilira chipulikano.” (2 Tim. 4:​6-8) Paulosi wakasankha mwavinjeru apo wakachitanga uteŵeti wake, ndipo wakagomezganga kuti Yehova wakakondwanga nayo. Nase tikwenera kusankha makora vinthu mwakuti Chiuta wakondwenge nase. Ipo kasi tingachita wuli nthena?

2. Kasi chikung’anamurachi kwenda mu chipulikano?

² Pakuyowoya vya iyo na Ŵakhristu ŵanyake ŵakugomezgeka, Paulosi wakati: “Tikwenda mu chipulikano, mu kuwona yayi.” (2 Kor. 5:7) Kasi Paulosi wakang’anamurangachi? Mu Baibolo, mazgu ghakuti “kwenda” nyengo zinyake ghakung’anamura umo munthu wakukhalira pa umoyo wake. Para munthu wakwenda mu kuwona pera, wakusankha vinthu kuyana na ivyo wakuwona, kupulika, kweniso umo wakujipulikira. Kweni para munthu wakwenda mu chipulikano, wakusankha vinthu kuyana na ivyo Yehova wakukhumba. Ivyo wakuchita vikulongora kuti wakugomezga kuti Chiuta wamutumbikenge, kweniso wasangenge chandulo chifukwa cha kulondezga ulongozgi wa mu Baibolo.—Sal. 119:66; Heb. 11:6.

3. Kasi tikusanga vyandulo wuli para tikwenda mu chipulikano? (2 Ŵakorinte 4:18)

³ Mbunenesko kuti tose nyengo zinyake tikusankha vinthu chifukwa cha ivyo tawona waka. Ndipouli, para tikusankha vinthu pa nkhani zakuzirwa kuyana na ivyo tawona panji kupulika waka, tisanganenge na masuzgo. Chifukwa wuli? Ni nyengo zose yayi apo ivyo tawona panji kupulika vikuŵa vyaunenesko. Nanga vingaŵa kuti ni vyaunenesko, kweni para tikwenda mu kuwona pera, paumaliro tingamba kusulako khumbo la Chiuta panji fundo zake. (Muph. 11:9; Mat. 24:​37-39) Ndipouli, para tikwenda mu chipulikano tisankhenge vinthu ivyo ni ‘vyakuzomerezgeka kwa Fumu.’ (Efe. 5:10) Kweniso tiŵenge na mtende wa mumtima na ŵakukondwa zanadi para tilondezgenge ulongozgi wa Chiuta. (Sal. 16:​8, 9; Yes. 48:​17, 18) Ndipo para tilutilirenge kwenda mu chipulikano, tizamusanga umoyo wamuyirayira.—Ŵazgani 2 Ŵakorinte 4:18.

4. Kasi munthu wangamanya wuli usange wakwenda mu chipulikano panji mu kuwona?

⁴ Kasi tingamanya wuli usange tikwenda mu chipulikano panji mu kuwona? Tingamanya usange tingajifumba mafumbo agha: Kasi para nkhusankha vinthu nkhulongozgeka na fundo wuli? Kasi nkhulongozgeka na vinthu ivyo nkhuwona pera? Panji kasi para nkhusankha vinthu nkhuthemba fundo za Yehova panji zane? Tiyeni sono tidumbiskane umo tingachitira kuti tilutilire kwenda mu chipulikano, ndipo tidumbiskanenge vigaŵa vitatu: para tikusankha ntchito, para tikusankha munthu wakutorana nayo, kweniso para tapokera ulongozgi. Pa chigaŵa chilichose, tidumbiskanenge vinthu ivyo tikwenera kughanaghanira kuti tisankhe makora vinthu.

PARA TIKUSANKHA NTCHITO

5. Kasi tikwenera kughanaghanira vichi para tikusankha ntchito?

⁵ Tose tikukhumba kuti tisangenge vyakukhumbikwa pa umoyo withu kweniso vya ŵamumbumba yithu. (Muph. 7:12; 1 Tim. 5:8) Ntchito zinyake ni za ndalama zinandi apo zinyake yayi. Nakuti ntchito zinyake wamunthu ungafiska kupwelelera mbumba yako zuŵa na zuŵa, na kusungako kachokochoko ka munthazi. Kweni ntchito zinyake, munthu wakufiska kusanga waka vyakukhumbikwa vya mbumba yake, nga ntchakurya, malo ghakukhala, na vyakuvwara. Mbunenesko kuti para tikusankha ntchito, tikughanaghanirapo unandi wa ndalama izo tisangenge. Ndipouli, munthu wangaŵa kuti wakwenda mu kuwona usange ichi ndicho ntchifukwa chekha icho wakusankhira ntchito iyo.

6. Kasi tingenda wuli mu chipulikano para tikusankha ntchito? (Ŵahebere 13:5)

⁶ Para tikwenda mu chipulikano, tighanaghanirengeso umo ntchito iyo yikhwaskirenge ubwezi withu na Yehova. Tingajifumba kuti: ‘Kasi ntchito iyi yipangiskenge kuti nichiteko vinthu ivyo Yehova wakutinkha?’ (Zinth. 6:​16-19) ‘Kasi yinitimbanizgenge kusopa panji kupangiska kuti nitalikiranenge na mbumba yane kwa nyengo yitali?’ (Fil. 1:10) Usange zgoro ndakuti enya, chingaŵa chamahara kuleka kunjira ntchito iyo, nanga kungaŵa ku malo uko ntchito zikusoŵa. Chifukwa chakuti tikwenda mu chipulikano, tikusankha vinthu ivyo vikulongora kuti tikugomezga kuti Yehova watovwirenge kusanga ivyo tikukhumbikwira.—Mat. 6:33; ŵazgani Ŵahebere 13:5.

7-8. Kasi mubali munyake ku South America wakenda wuli mu chipulikano? (Wonaniso chithuzi.)

⁷ Wonani umo Javier,a mubali wa ku South America, wakawonera kuti ntchakuzirwa kwenda mu chipulikano. Iyo wakuti: “Nkhafumbira ntchito yapachanya iyo nkhatenge nisangwenge nayo chifukwa yikaŵa ya malipiro ghanandi chomene.” Ndipouli, Javier wakakhumbanga chomene kuchita upayiniya. Iyo wakulutizga kuti: “Nkhachemeka kukafumbika mafumbo kuti ŵawone usange ndine wakwenelera pa ntchito. Pambere nindalute kukafumbika mafumbo, nkhalomba Yehova kuti wanovwire, chifukwa nkhagomezganga kuti wakumanya icho ntchiwemi kwa ine. Nkhakhumbanga kuti niŵe pa ntchito yiwemi, kweni nkhakhumbanga yayi kunjira ntchito iyo yinganitondeska kufiska vilato vyane vyauzimu.”

⁸ Javier wakuti: “Pa nyengo iyo nkhafumbikanga mafumbo, bwana wakaniphalira kuti kanandi nigwirenge ovatayimu. Nyengo yeneyiyo nkhamuphalira mwantchindi kuti ningagwira yayi ntchito iyi chifukwa cha uteŵeti wane.” Javier wakayikana ntchito iyi. Pamanyuma pa masabata ghaŵiri, wakamba kuchita upayiniya. Ndipo kuumaliro wa chaka chenechichi, wakasanga ntchito iyo wakagwiranga mazuŵa ghachoko waka. Iyo wakuti: “Yehova wakapulika malurombo ghane ndipo wakanovwira kusanga ntchito iyo yikaŵa yakukolerana na ndondomeko yane ya upayiniya. Nkhukondwa chomene kuti nkhugwira ntchito iyo yikunipa nyengo yinandi yakuteŵetera Yehova na ŵabali.”

9. Kasi mukusambirako vichi kwa Trésor?

⁹ Wuli usange tamanya kuti ntchito iyo tikugwira yikutovwira yayi kuti tende mu chipulikano? Wonani ivyo wakachita Trésor wa ku Congo. Iyo wakuti: “Ntchito yane yiphya yikaŵa ntchito iyo nkhakhumbanga chomene. Nkhapokeranga ndalama zinandi chomene kuluska ntchito iyo nkhagwiranga pakwamba ndipo ŵanthu ŵakanichindikanga chomene.” Ndipouli, Trésor kanandi wakakhalanga ku maungano chifukwa chakuti wakagwiranga ovatayimu. Kweniso wakachichizgikanga kuti nayo wachitengeko mabizinesi ghauryarya. Trésor wakakhumbanga kuti wayileke ntchito iyi, kweni wakafipanga mtima kuti para wayileka waŵenge pa ulova. Kasi ntchivichi chikamovwira? Iyo wakuti: “Lemba la Habakuku 3:​17-19 likanovwira kumanya kuti nanga ningayileka ntchito, Yehova wanipwelelerenge. Ntheura nkhayileka ntchito.” Iyo wakutiso: “Mabwana ghanandi ghakughanaghana kuti munthu wangachita chilichose kuti wasungilire ntchito yake yapachanya, nanga vingaŵa kuti waŵavyenge nyengo yakuchezgera na mbumba yake panji yakusopera. Ndine wakukondwa kuti nkhasungilira ubwezi wane na Yehova kweniso mbumba yane. Pati pajumpha chaka chimoza, Yehova wakanovwira kusanga ntchito yiwemi iyo yikunovwira kusanga vyakukhumbikwa pa umoyo kweniso kuŵa na nyengo yinandi yakuchitira vinthu vyauzimu. Para tikuŵika Yehova pakwamba, nyengo zinyake tingasuzgikira dankha pa nkhani ya vyachuma, kweni timanye kuti Yehova watipwelelerenge.” Nadi, para tikugomezga ulongozgi wa Yehova na malayizgo ghake, tilutilirenge kwenda mu chipulikano ndipo iyo watitumbikenge.

PARA TIKUSANKHA WAKUTORANA NAYO

10. Kasi ntchivichi chingatipangiska kuti tende mu kuwona para tikusankha munthu wakutorana nayo?

¹⁰ Nthengwa ntchawanangwa chakufuma kwa Yehova, ndipo ntchakawiro munthu kukhumba kutora panji kutengwa. Para mudumbu wakughanaghanira munthu wakutorana nayo, nyengo zinyake wangawona waka wunthu wa mubali, mawonekero, lumbiri, kasangiro, maudindo gha mu mbumba, kweniso umo wangachitira nayo vinthu.b Vinthu vyose ivi ni vyakuzirwa. Ndipouli, usange mudumbu wakughanaghanira waka vinthu ivi pera, mbwenu ndikuti wakwenda mu kuwona.

11. Kasi tingenda wuli mu chipulikano para tikusankha wakutorana nayo? (1 Ŵakorinte 7:39)

¹¹ Yehova wakukondwa nawo chomene ŵabali na ŵadumbu ŵithu awo ŵakulondezga ulongozgi wake para ŵakusankha munthu wakutorana nayo. Mwachiyelezgero, ŵakulondezga fundo yakuti ŵalindilire m’paka ŵajumphe ‘maulamphalampha gha uwukirano’ pambere ŵandayambe kughanaghana vya kunjira mu nthengwa. (1 Kor. 7:36) Ŵakusanda munthu kuti wangaŵa wakwenelera kutorana nayo, chomene para wali na mikhaliro iyo Yehova wakuti yingapangiska munthu kuŵa mfumu panji muwoli muwemi. (Zinth. 31:​10-13, 26-28; Efe. 5:33; 1 Tim. 5:8) Usange munthu uyo ni Kaboni yayi wakulongora kuti wakuŵakhumba, ŵakulondezga ulongozgi wa kutora panji kutengwa “mu Fumu pera” uwo uli pa 1 Ŵakorinte 7:39. (Ŵazgani.) Ŵakulutilira kwenda mu chipulikano, ndipo ŵakugomezga kuti Yehova waŵawovwirenge kuti ŵaleke kuchita phukwa.—Sal. 55:22.

12. Kasi mukusambirako vichi kwa Rosa?

¹² Wonani ivyo wakachita Rosa, mupayiniya wa ku Colombia. Ntchito iyo wakagwiranga yikapangiskanga kuti wayowoyeskanenge kanandi waka na mwanalume munyake uyo wakaŵa Kaboni yayi, ndipo wakamudokeranga. Rosa nayo wakakopeka nayo mwanalume uyu. Iyo wakuti: “Wakawonekanga kuti ni mwanalume muwemi chomene. Wakajipelekanga kovwira ŵanthu ŵa mu chigaŵa chakwake, ndipo wakaŵa munthu muwemi. Umo wakachitiranga nane vinthu, vikapangiskanga kuti nijipulikenge mwapadera chomene. Wakaŵa na mikhaliro yose iyo nkhakhumbanga mwa mwanalume uyo ningatorana nayo, kuti waka wakaŵa Kaboni yayi.” Iyo wakulutizga kuti: “Chikaŵa chakusuzga kuti nimukane chifukwa nane para nili na iyo phukwa likamaranga. Pa nyengo iyi, nkhachitanga phukwa ndipo nkhakhumbanga kutengwa, kweni nkhaŵa nindamusange mubali.” Ndipouli, Rosa wakaŵika waka mtima pa ivyo wakawonanga pera yayi. Iyo wakaghanaghanirapo umo ivyo wasankhenge vingakhwaskira ubwezi wake na Yehova. Ntheura wakaleka kuyowoyeskana nayo munthu uyu, ndipo wakalutilira kutangwanika na milimo ya Ufumu. Pati pajumpha nyengo yichoko waka, wakachemeka kukanjira Sukulu ya Ŵapharazgi ŵa Ufumu, ndipo sono ni mupayiniya wapadera. Rosa wakuti: “Yehova wanitumbika chomene ndipo ndine wakukondwa.” Nangauli nyengo zose ntchipusu yayi kwenda mu chipulikano, chomenechomene pa vinthu ivyo nase kamtima kali kwenekuko, kweni ntchakuzirwa chomene kwendera maghanoghano gha Yehova.

PARA TAPOKERA ULONGOZGI KUFUMA KU GULU

13. Kasi ntchivichi chingatipangiska kwenda mu kuwona para tapokera ulongozgi?

¹³ Kanandi tikupokera ulongozgi kufuma ku ŵalara ŵa mpingo, ŵalaŵiliri ŵa dera, ofesi ya munthavi, panji ku Wupu Wakulongozga, uwo ukutovwira apo tikusopa Yehova. Kweni wuli usange nyengo zinyake tindapulikiske chifukwa icho tapikira ulongozgi unyake? Tingamba kukayikira usange ulongozgi uwo nguwemi nadi. Tingambaso waka kuŵika mtima pa ivyo ŵakubudiska ŵabali awo ŵatipa ulongozgi.

14. Kasi ntchivichi chingatovwira kuti tende mu chipulikano para tapokera ulongozgi? (Ŵahebere 13:17)

¹⁴ Para tikwenda mu chipulikano, tikugomezga kuti Yehova ndiyo wakulongozga kweniso wakumanya umo vinthu viliri kwa ise. Ivi vikutovwira kuti tipulikirenge mwaluŵiro kweniso tikuŵa na maghanoghano ghakwenelera ghakuchitira nthena. (Ŵazgani Ŵahebere 13:17.) Tikumanya kuti para tikupulikira vikovwira kuti mu mpingo tiŵe ŵakukolerana. (Efe. 4:​2, 3) Tikugomezgaso kuti nangauli awo ŵakulongozga mbambura kufikapo, kweni Yehova watitumbikenge para tikupulikira. (1 Sam. 15:22) Tikumanyaso kuti pa nyengo yakwenelera, Yehova wazamunozga ivyo vikukhumbikwa kunozgeka.—Mika 7:7.

15-16. Kasi ntchivichi chikawovwira mubali kuti wende mu chipulikano nangauli pakwamba wakakayikiranga ulongozgi uwo wakapokera? (Wonaniso chithuzi.)

¹⁵ Wonani chiyelezgero icho chikulongora uwemi wa kwenda mu chipulikano. Ku Peru, nangauli Chisipanishi chikuyowoyeka chomene, kweni ŵanthu ŵanandi ŵakuyowoya viyowoyero vinyakeso. Chiquechua ntchimoza mwa viyowoyero ivi. Kwa vyaka vinandi, ŵabali na ŵadumbu awo ŵakayowoyanga Chiquechua ŵakapenjanga ŵanthu awo ŵakuyowoya chiyowoyero ichi mu chigaŵa chawo chakupharazgako. Ndipouli, kuti gulu likolerane na malango gha boma, likasintha nthowa yakupharazgira. (Rom. 13:1) Ivi vikapangiska kuti ŵanyake ŵajifumbenge usange mulimo wakupharazga wendenge makora mu chigaŵa icho. Kweni chifukwa chakuti ŵabali na ŵadumbu ŵakapulikira ulongozgi uwu, Yehova wakatumbika kuyezgayezga kwawo ndipo ŵakasanganga ŵanthu ŵanandi ŵakuyowoya Chiquechua.

¹⁶ Kevin, mulara wa mu mpingo wa chiyowoyero cha Chiquechua, wakaŵa yumoza mwa ŵabali awo ŵakafipanga mtima. Iyo wakuti: “Nkhajifumba kuti, ‘Kasi sono tiŵasangenge wuli ŵanthu ŵakuyowoya Chiquechua?’” Kasi Kevin wakachita vichi? Iyo wakuti: “Nkhakumbukira lemba la Zintharika 3:5. Ndipo nkhaghanaghanirapo vya Mozesi. Iyo wakaŵa kuti walongozgenge Ŵaisrayeli kufuma mu Eguputo, ndipo nthowa iyo Yehova wakaŵaphalira kuti ŵende yikawonekanga nga kuti Ŵaeguputo ŵaŵakorenge. Ndipouli, wakapulikira ndipo Yehova wakamutumbika.” (Eks. 14:​1, 2, 9-11, 21, 22) Kevin wakaŵa wakunozgeka kusintha nthowa yakupharazgira. Kasi pakaŵa vyakufumapo wuli? Iyo wakuti: “Nkhazizwa kuwona umo Yehova wakatitumbikira. Kumanyuma uku, tikendanga mitunda yitali ndipo nyengo zinyake tikasanganga waka munthu yumoza panji ŵaŵiri ŵakuyowoya Chiquechua. Pasono tikuluta uko kuli ŵanthu ŵanandi awo ŵakuyowoya Chiquechua. Ntheura ivi vikutovwira kuti tipharazgirenge ŵanthu ŵanandi, tiŵe na maulendo ghakuwelerako, kweniso masambiro gha Baibolo. Chiŵelengero cha ŵanthu awo ŵakuwungana sono chasazgikira.” Nadi, para tikwenda mu chipulikano, nyengo zose Yehova wakutitumbika.

17. Kasi mwasambira vichi mu nkhani iyi?

¹⁷ Tadumbiskana umo tingachitira kuti tilutilire kwenda mu chipulikano mu vigaŵa vitatu. Kweni tikwenera kulutilira kwenda mu chipulikano mu vigaŵa vyose vya umoyo withu, nga mpha nkhani yakusankha vyakusanguluska, kweniso masambiro panji kulera ŵana. Pa chilichose icho tikusankha, tikwenera kulongozgeka na ivyo tikuwona pera yayi, kweni tikwenera kughanaghaniraso ubwezi withu na Yehova, ulongozgi wake, kweniso layizgo lake lakuti watipwelelerenge. Para tichitenge nthena, nyengo zose “tendenge mu zina la Yehova Chiuta withu muyirayira swii.”—Mika 4:5.