Gwiliskirani Makora Ntchito Gilasi

Msambiri Yakobe wakayaniska Baibolo na gilasi ilo likutovwira kuwona wunthu withu wamukati. (Yak. 1:22-25) Kasi tingagwiliskira wuli ntchito makora Baibolo nga ni gilasi?

Muŵazgenge mwakupwelelera. Para tingalaŵiska pa gilasi mwakuchimbilira, tingatondeka kuwona vinthu vinyake vyakuti tinozge. Mwakuyana waka, kuti timanye apo tikukhumbikwira kusintha, tikwenera kuŵazga Baibolo mwakupwelelera.

Jilaŵiskani chomene mwaŵenecho kuluska ŵanji. Nyengo zinyake para tikulaŵiska pa gilasi tingawonaso ŵanyithu na vinthu vinyake ivyo vindakhale makora. Mwakuyana waka, nyengo zinyake tingaŵazga Baibolo na kwamba kughanaghana ivyo ŵanji ŵakubudiska. Kweni kuchita nthena kungatovwira yayi kuti tisinthe apo tikutondeka kuchita makora.

Muŵe na chilato chiwemi. Para tikulaŵiska waka pa ivyo tikubudiska, mbwenu tikhuŵarenge. Tikwenera kuŵa na chilato chiwemi para tikuŵazga mazgu gha Chiuta na kuleka kukhazga vinandi kuluska ivyo Yehova wakukhumba.—Yak. 3:17.