Kasi Yehova Wakuniwona Wuli?
1. Kasi Baibolo likuyana wuli na gilasi?
1 Kasi pa gilasi mukujilaŵiska kalinga? Taŵanandi tikujilaŵiska zuŵa lililose cifukwa likutovwira kuwona apo pali suzgo kuti tinozgepo. Baibolo lili nga ni gilasi. Mazgu gha Ciuta ghakutovwira kuwona umo mtima withu uliri. Yehova nayo wakulaŵiska mu mtima. (1 Sam. 16:7; Yak. 1:22-24) Mazgu gha Ciuta “ghakumanya kupanikizga maghanoghano na makhumbiro gha mtima.” (Heb. 4:12) Kasi kuŵazga Baibolo na kughanaghanirapo vingatovwira wuli kuti timanye ivyo tikwenera kusintha kuti tiŵe ŵapharazgi ŵaluso?—Sal. 1:1-3.
2. Kasi Baibolo lingatovwira wuli kuti tijisande?
2 Baibolo Lingamovwirani Nga Ni Gilasi: Nkhani za mu Baibolo izo zikuyowoya vya ŵateŵeti ŵakugomezgeka ŵa Yehova zikutovwira kumanya mikhaliro iyo wakutemwa. Davide wakaŵa wamwamphu pakuteŵetera Yehova. (1 Sam. 17:45, 46) Mwacikanga, Yesaya wakajipeleka kukapharazga mu cigaŵa cakusuzga. (Yes. 6:8, 9) M’malo mwa kuwona uteŵeti nga ni mphingo, Yesu wakawuwonanga nga nchakurya cifukwa wakatemwanga comene Ŵadada ŵake ŵakucanya. (Yoh. 4:34) Ŵakhristu ŵakwambilira ŵakapharazganga mwamwamphu, ŵakagomezga Yehova, na kuŵikapo mtima kuti ŵaleke kuwelera nyuma. (Mil. 5:41, 42; 2 Kor. 4:1; 2 Tim. 4:17) Ivyo ŵanthu aŵa ŵakacita vikutovwira kuti tijisande na cilato cakuti tiwone apo tingasintha kuti ticite makora uteŵeti withu.
3. Cifukwa wuli tikwenera kuzinazina yayi para tawona kuti pali vinthu vinyake ivyo tikwenera kusintha?
3 Citanipo Kanthu: Gilasi lingaŵa lambura nchito usange tikujilaŵiskapo waka kwambura kunozga apo pali suzgo. Tingalomba Yehova kuti watovwire kumanya apo pali suzgo na kucitapo kanthu. (Sal. 139:23, 24; Luka 11:13) Pakuti nyengo iyo yakhalako njicoko ndipo umoyo wa ŵanthu uli pangozi, tikwenera kuzinazina yayi. Kweni tikwenera citapo kanthu mwaluŵiro para tawona kuti pali vinthu vinyake ivyo tikwenera kusintha.—1 Kor. 7:29; 1 Tim. 4:16.
4. Kasi nchivici ico cikucitika para munthu wakulaŵiska mu Mazgu gha Ciuta na kucitapo kanthu?
4 Ivyo vili mu mtima ndivyo ni vyakuzirwa comene kwa Yehova kuluska umo munthu wakuwonekera kuwaro. (1 Pet. 3:3, 4) Kasi nchivici ico cikucitika para munthu wakulaŵiska mu Mazgu gha Ciuta na kucitapo kanthu? Wakuŵa “wakupulika na ciluwa cara, kweni wakucita mulimo,” ndipo ‘wakuŵa wakukondwa.’ (Yak. 1:25) Tiŵenge nadi ŵakukondwa kweniso ŵapharazgi ŵaluso cifukwa ‘tikuŵaliska ucindami wa Yehova nga ni magilasi.’—2 Kor. 3:18.