‘Sankhani Uyo Mumuteŵeterenge’

1. Kasi tikwenera kuchita vichi kuti tiŵe ŵakukondwa zanadi, ndipo chifukwa wuli? (Yesaya 48:​17, 18)

ADADA ŵithu ŵakuchanya ŵakutitemwa chomene, ndipo ŵakukhumba kuti tikondwenge na umoyo sono kweniso munthazi. (Muph. 3:​12, 13) Ŵali kutilenga na maluso ghapadera, kweni ŵandatipe mazaza ghakuti tijiwusenge tekha panji tijisankhirenge tekha icho ntchiwemi na chiheni. (Muph. 8:9; Yer. 10:23) Iwo ŵakumanya kuti tikwenera kuŵateŵetera na kuŵapulikira kuti tiŵe ŵakukondwa zanadi.—Ŵazgani Yesaya 48:​17, 18.

2. Kasi Satana wakukhumba kuti ise tigomezgenge kuti vichi, ndipo Yehova walongora wuli kuti Satana ni mutesi?

² Satana wakukhumba kuti tigomezgenge kuti tingaŵa ŵakukondwa kwambura Yehova, kweniso kuti ŵanthu ŵangajiwusa ŵekha makora waka. (Gen. 3:​4, 5) Ntheura Yehova wali kuzomerezga kuti ŵanthu ŵajiwuse ŵekha kwakanyengo kuti walongore kuti Satana ni mutesi. Tikujiwonera tekha kuti muwuso wa ŵanthu watondeka. Ndipouli, mu Malemba muli viyelezgero vinandi vya ŵanalume na ŵanakazi awo ŵakaŵa ŵakukondwa chifukwa cha kuteŵetera Yehova. Chiyelezgero chiwemi chomene ni Yesu Khristu. Nakuti chakwamba tiwonenge vifukwa ivyo wakasankhira kuteŵetera Yehova. Pamanyuma, tiwonenge chifukwa icho Adada ŵithu ŵakuchanya ŵakwenelera nadi kuti tiŵasopenge. Paumaliro, tiwonenge vinyake mwa vifukwa ivyo tili kusankhira kuteŵetera Yehova.

CHIFUKWA ICHO YESU WAKASANKHIRA KUTEŴETERA YEHOVA

3. Kasi Satana wakakhumba kumupa vichi Yesu, ndipo Yesu wakachita wuli?

³ Apo wakaŵa pa charu chapasi, Yesu wakeneranga kusankha uyo wamuteŵeterenge. Nyengo yichoko waka wati wabatizika, Satana wakamuyezga Yesu kuti wamupenge maufumu ghose gha pa charu chapasi usange wangamusopa kamoza pera. Yesu wakazgora kuti: “Fumapo Satana! Pakuti kuli kulembeka kuti: ‘Yehova Chiuta wako ndiyo ukwenera kumusopa, ndipo ndiyo pera uyo ukwenera kumuchitira uteŵeti wakupatulika.’” (Mat. 4:​8-10) Chifukwa wuli Yesu wakasankha nthena? Wonani vifukwa vinyake.

4-5. Kasi ni vifukwa wuli vinyake ivyo Yesu wakasankhira kuteŵetera Yehova?

⁴ Chifukwa chikuru icho Yesu wakasankhira kuteŵetera Yehova ntchitemwa. Iyo wakuŵatemwa chomene Adada ŵake. (Yoh. 14:31) Kweniso Yesu wakuteŵetera Yehova chifukwa chakuti ndicho chinthu chakwenelera kuchita. (Yoh. 8:​28, 29; Chivu. 4:11) Wakumanya kuti Yehova ndiyo Chisimi cha umoyo kweniso ngwakugomezgeka na wakupa. (Sal. 33:4; 36:9; Yak. 1:17) Kweniso kufuma kale, nyengo zose Yehova wakumuphalira unenesko Yesu ndipo ndiyo wali kumupa chilichose icho wali nacho. (Yoh. 1:14) Kweni Satana wakupambana chomene na Yehova, iyo wali kwiziska kwananga na nyifwa pa charu chapasi. Kweniso Satana ni mutesi na muryezi ndiposo ngwakujighanaghanira yekha. (Yoh. 8:44) Pakumanya vyose ivi, lekani Yesu wakakana kuyezga Satana uyo wakagalukira Yehova.—Fil. 2:​5-8.

⁵ Chifukwa chinyake icho Yesu wakasankhira kuteŵetera Yehova ntchakuti wakaghanaghanira viwemi ivyo viŵengepo chifukwa cha kugomezgeka kwake. (Heb. 12:2) Wakamanya kuti para wakhalilirenge wakugomezgeka, watuŵiskenge zina la Awiske na kujura nthowa yakumazgira masuzgo ghose agho ghali kwiza chifukwa cha Dyabulosi.

CHIFUKWA ICHO YEHOVA WAKWENELERA NADI KUTI TIMUSOPENGE

6-7. Chifukwa wuli ŵanthu ŵanandi mazuŵa ghano ŵakumuteŵetera yayi Yehova, kweni chifukwa wuli iyo ngwakwenelera nadi kumusopa?

⁶ Ŵanthu ŵanandi mazuŵa ghano ŵakuteŵetera Yehova yayi chifukwa chakuti ŵandamanye makora mikhaliro yake kweniso vyose ivyo waŵachitira. Ŵanthu aŵa ŵakuyana waka na awo mpositole Paulosi wakaŵapharazgiranga ku Ateni.—Mil. 17:​19, 20, 30, 34.

⁷ Paulosi wakalongosolera ŵanthu ŵa ku Ateni kuti Chiuta waunenesko “wakupeleka ku ŵanthu wose umoyo na mvuchi na vinthu vyose.” Wakasazgiraposo kuti: “Mwa iyo tili ŵamoyo, tikwenda ndipo tiliko.” Chiuta ndiyo ni Mlengi, uyo “wakalenga mitundu yose ya ŵanthu kufuma mwa munthu yumoza,” ntheura ndiyo wakwenelera nadi kuti timusopenge.—Mil. 17:​25, 26, 28.

8. Kasi ntchivichi icho Yehova wazamuchitapo yayi? Longosorani.

⁸ Yehova pakuŵa Mlengi na Fumu ya chilengiwa chose, wakhumbenge mphanyi wakuŵachichizga ŵanthu kuti ŵamuteŵeterenge. Ndipouli, Yehova wazamuchitapo yayi nthena. M’malo mwake, wapeleka maukaboni ghakukhorweska ghakuti iyo waliko kweniso kuti wakutemwa waliyose wa ise payekhapayekha. Wakukhumba ŵanthu ŵanandi kuti ŵaŵe ŵabwezi ŵake kwamuyirayira. (1 Tim. 2:​3, 4) Lekani Yehova watisambizga kuti nase tisambizgenge ŵanji vya khumbo lake kweniso vinthu viwemi ivyo wazamuchitira ŵanthu. (Mat. 10:​11-13; 28:​19, 20) Watipa mpingo umo tikumusoperamo kweniso watipa ŵalaŵiliri ŵachitemwa awo ŵakutovwira munthowa zakupambanapambana.—Mil. 20:28.

9. Kasi Yehova wakulongora wuli chitemwa ku ŵanthu wose?

⁹ Yehova wakulongora kuti ngwachitemwa pa umo wakuchitira vinthu na ŵanthu awo ŵakukana kuti iyo waliko. Ghanaghanirani waka: Kwa vyaka vinandi chomene, ŵanthu mabiliyoni ghanandi ŵasankha kwendera maghanoghano ghawo pa nkhani ya chiwemi na chiheni. Nangauli vili nthena, Yehova wakuŵalongora lusungu pakuŵapa ivyo ŵakukhumbikwira kuti ŵalutilire kuŵa na umoyo. (Mat. 5:​44, 45; Mil. 14:​16, 17) Waŵapa mwaŵi wakuŵa na ŵabwezi, mbumba, kweniso kugwira ntchito kuti ŵaŵe ŵakukondwa. (Sal. 127:3; Muph. 2:24) Ukaboni ukulongolerathu kuti Adada ŵithu ŵakuchanya ŵakutemwa ŵanthu wose. (Eks. 34:6) Tiyeni sono tiwone vinyake mwa vifukwa ivyo tili kusankhira kuteŵetera Yehova kweniso umo watitumbikira chifukwa cha kuchita nthena.

CHIFUKWA ICHO TILI KUSANKHIRA KUTEŴETERA YEHOVA

10. (a) Kasi chifukwa chikuru icho tikuteŵetelera Yehova ntchakuti wuli? (Mateyu 22:37) (b) Kasi mukusanga vyandulo wuli chifukwa chakuti Yehova ngwakuzikira? (Salimo 103:​13, 14)

¹⁰ Nga ni Yesu, nase tikuteŵetera Yehova chifukwa chakuti tikumutemwa chomene. (Ŵazgani Mateyu 22:37.) Tikumutemwa chomene Yehova para tamanya mikhaliro yake. Mwachiyelezgero, ghanaghanirani za mukhaliro wake wakuzikira. Ŵaisrayeli ŵakati ŵamugalukira, wakaŵaŵeyelera kuti: “Weraniko, naŵeya, ku nthowa zinu ziheni.” (Yer. 18:11) Yehova wakukumbuka kuti ndise ŵambura kufikapo kweniso kuti ndise fuvu. (Ŵazgani Salimo 103:​13, 14.) Para mukughanaghanirapo umo Yehova waliri wakuzikira kweniso mikhaliro yinyake yakukondweska iyo wali nayo, kasi vikumukhukiskani kuti mumuteŵetere kwamuyirayira?

11. Kasi ni vifukwa wuli vinyake ivyo tikusankhira kuteŵetera Adada ŵithu ŵakuchanya?

¹¹ Tikukhukaso chomene kumuteŵetera Yehova chifukwa chakuti tikumanya kuti ndicho chinthu chakwenelera icho tikwenera kuchita. (Mat. 4:10) Kweniso tikumanya viwemi ivyo vikuŵapo chifukwa cha kumuteŵetera mwakugomezgeka. Para tikugomezgeka tikovwira kuti zina la Yehova lituŵiskike, tikulongora kuti Dyabulosi ni mutesi, kweniso tikukondweska mtima wa Adada ŵithu. Ndipo para tasankha kuteŵetera Yehova sono, tiŵenge na chilindizga chiwemi cha kuzakakhala kwamuyirayira.—Yoh. 17:3.

12-13. Kasi tikusambirako vichi ku ivyo vikachitikira Jane na Pam?

¹² Apo tichali ŵachoko, tingasambira kumutemwa chomene Yehova, ndipo apo tikukura chitemwa chithu pa iyo chilutilirenge kuŵa chankhongono chomene. Ivi ndivyo ŵakachita ŵadumbu ŵithu ŵaŵiri, Jane na Pam.a Jane wakaŵa na vyaka 11 ndipo Pam wakaŵa na vyaka 10 apo ŵakamba kusambira Baibolo. Nangauli ŵapapi ŵawo ŵakakhumbanga yayi kusambira Baibolo, kweni ŵakazomerezga kuti Jane na Pam ŵambe kusambira na Ŵakaboni chikuru ŵalutenge ku tchalitchi kwawo pamoza na mbumba yose. Jane wakuti: “Ivyo Ŵakaboni ŵakanisambizga kufuma mu Baibolo, vikanovwira kuti nileke kuchichizgika na ŵanyane kugwiliskira ntchito munkhwala wakutimbanizga wongo kweniso kuchitako uzaghali.”

¹³ Vyaka vichoko waka vikati vyajumphapo, wose ŵakaŵa ŵapharazgi. Pamanyuma, ŵakamba kuchita upayiniya uku ŵakupwelelera ŵapapi ŵawo ŵachekuru. Para wawona uko wafuma, Jane wakuti: “Nkhamanya kuti Yehova wakupwelelera ŵateŵeti ŵake, nga umo lemba la 2 Timote 2:19 likuyowoyera kuti, ‘Yehova wakuŵamanya awo mbake.’” Ntheura tikukayika yayi kuti nyengo zose Yehova wakuŵapwelelera ŵanthu awo ŵasankha kumuteŵetera.

14. Kasi ivyo tikuyowoya na kuchita vikovwira wuli kutuŵiska zina la Yehova ku mautesi agho likuyowoyereka? (Wonaniso vithuzi.)

¹⁴ Tikwenera kovwirapo pa kutuŵiska zina la Yehova ku viheni vyose ivyo layowoyereka. Tiyelezgere kuti muli na mubwezi winu uyo ngwalusungu, ngwakupa, kweniso ngwakugowoka. Zuŵa linyake mbwe mukupulika kuti munthu munyake wakuyowoya viheni vyakukhwaskana na mubwezi winu uyu, wakuti ngwankhaza kweniso ni mukhuluku. Kasi mungachita wuli? Mungamuvikilira. Mwakuyana waka, para Satana na ŵanthu ŵake ŵakunanga lumbiri lwa Yehova pakuthandazga mautesi ghakukhwaskana na iyo, tikwenera kuchitapo kanthu mwa kupharazga unenesko wakukhwaskana na Yehova, na kuvikilira chomene zina lake. (Sal. 34:1; Yes. 43:10) Para tachita nthena tikulongora kuti tasankha kuteŵetera Yehova na umoyo withu wose kwizira mu ivyo tikuyowoya na kuchita.

15. Kasi mpositole Paulosi wakasanga chandulo wuli chifukwa cha kusintha vilato vyake? (Ŵafilipi 3:​7, 8)

¹⁵ Tikwenera kuŵa ŵakunozgeka kusintha vilato vithu mwakuti tikondweskenge Yehova kweniso kuchita vinandi mu gulu lake. Mwachiyelezgero, mpositole Paulosi wakaleka udindo wapachanya mwakuti waŵe msambiri wa Khristu kweniso kuteŵetera Yehova. (Gal. 1:14) Chifukwa cha kuchita nthena, wakaŵa na umoyo wakukhorweska kweniso kuŵa na mwaŵi wakukawusa na Khristu kuchanya. Wakadandawurapo yayi chifukwa cha kusankha kuteŵetera Yehova, ndipo nase tizamudandawurapo yayi.—Ŵazgani Ŵafilipi 3:​7, 8.

16. Kasi tikusambirako vichi ku ivyo vikachitikira Julia? (Wonaniso vithuzi.)

¹⁶ Usange mtima withu wose uli pa kuteŵetera Yehova, tiŵenge na umoyo wakukhorweska sono kweniso na munthazi wuwo. Wonani chiyelezgero cha mudumbu munyake zina lake Julia. Pambere wandasambire unenesko, iyo wakimbanga mu kwaya ya tchalitchi apo wakaŵa muchoko. Munthu munyake uyo wakaŵa nkhwantha pakwimba, wakawona kuti Julia wali na luso pakwimba ndipo wakamba kumusambizga kuti nayo waŵe nkhwantha. Nakalinga Julia wakatchuka ndipo wakimbanga mu malo ghakupambanapambana. Apo wakaŵa ku sukulu yake yakwimba, munyake uyo wakasambiranga nayo sukulu wakamba kuyowoya nayo vyakukhwaskana na Chiuta ndipo wakamulongosolera kuti Chiuta wali na zina, ndipo ni Yehova. Nyengo yichoko waka yikati yajumphapo, Julia wakamba kusambira Baibolo kaŵiri pa sabata. Pamanyuma, wakasankha kuŵika mtima pa kuteŵetera Yehova m’malo mwa kuŵika mtima pakuŵa wakwimba. Kweni chikaŵa chipusu yayi kusankha nthena. Iyo wakuti: “Ŵanthu ŵanandi ŵakaniphaliranga kuti nkhunanga luso lwane pawaka. Kweni ine nkhakhumbanga kuteŵetera Yehova umoyo wane wose.” Kasi wakujipulika wuli sono pa chakusankha icho wakachita vyaka 30 ivyo vyajumpha? Iyo wakuti, “Nili na mtende wa mumtima, ndipo nkhugomezga kuti munthazi Yehova wazamunipa chilichose icho mtima wane ukukhumba.”—Sal. 145:16.

LUTILIRANI KUTEŴETERA YEHOVA

17. Kasi fundo yakuti umaliro uli pafupi chomene yikukhwaska wuli awo ŵasankha kuteŵetera Chiuta na awo ŵandasankhe kuchita nthena?

¹⁷ Pasono umaliro uli pafupi chomene. Mpositole Paulosi wakalemba kuti: “Pakuti ‘kwakhala kanyengo kachoko,’ ndipo ‘uyo wakwiza wafikenge nakuti wachedwenge yayi.’” (Heb. 10:37) Kasi ichi chikung’anamurachi? Nyengo yakuti ŵanthu ŵasankhe kuteŵetera Yehova yafupiskika. (1 Kor. 7:29) Ndipo usange tili kusankha kale kuteŵetera Chiuta, tikumanya kuti nangauli tikukhumbikwira kuzizipizga viyezgo, kweni “kwakhala kanyengo kachoko.”

18. Kasi Yesu na Yehova ŵakukhumba kuti tichitechi?

¹⁸ Yesu wakachiska ŵanthu kuti ŵazgoke ŵasambiri ŵake na kulutilira kumulondezga. (Mat. 16:24) Ntheura usange tateŵetera Yehova kwa vyaka vinandi, tiyeni tiŵikepo mtima kulutilira kumuteŵetera. Tikwenera kuchita vyose ivyo tingafiska kuti tisungilire layizgo lithu lakuti timuteŵeterenge Yehova. Nangauli ntchipusu yayi kuchita nthena, kweni tiŵenge ŵakukhorwa kweniso titumbikikenge chomene nanga ni sono nthena.—Sal. 35:27.

19. Kasi tikusambirako vichi ku ivyo vikachitikira Gene?

¹⁹ Ŵanyake ŵakuwona kuti kuteŵetera Yehova ni mphingo chifukwa kukukhumba kujipata chomene. Usange ndimwe ŵawukirano, kasi mukuwona kuti vinthu vinyake vikumujumphani chifukwa chakuti mukuteŵetera Yehova? Mubali munyake wachiwukirano zina lake Gene wakuti: “Nkhawonanga kuti nkhanolekanga vinthu vinyake chifukwa cha kuŵa Kaboni wa Yehova. Vikawonekanga kuti ŵana ŵanandi awo tikakulira lumoza ŵakakondwanga na vinthu nga ni vikondwelero, kuchita vibwezi, panji kuseŵera magemu ghankhaza, apo ine nkhamaliranga nyengo yinandi ku maungano na mu uteŵeti.” Kasi kaghanaghaniro aka kakamukhwaska wuli Gene? Iyo wakuti: “Nkhamba kuŵa na umoyo wapaŵiri, ndipo kwakanyengo nkhaŵa wakukondwa. Kweni chimwemwe ichi chikalutilira yayi. Pamanyuma nkhamba kughanaghanirapo vyandulo ivyo vikuŵapo para ukulondezga ivyo Baibolo likuyowoya, ndipo nkhasankha kumuteŵetera Yehova na mtima wose. Kufuma waka panyengo iyo, nawona kuti Yehova wakunizgora lurombo lulilose ulo ningalomba.”

20. Kasi tikwenera kuŵikapo mtima kuchitachi?

²⁰ Wamasalimo wakimbira Yehova kuti: “Wakukondwa ni munthu uyo mwamusora na kumusendezga pafupi, kuti wakhale mu maluŵaza ghinu.” (Sal. 65:4) Ntheura, mphanyi taŵikapo mtima kulutilira kuteŵetera Yehova, ndipo nga ni Joshuwa nase tingayowoya mwakusimikizga kuti: “Kweni ine na ŵamunyumba yane, titeŵeterenge Yehova.”—Josh. 24:15.