Wovwirani Ŵasambiri ŵa Baibolo Kuti Ŵambe Kuteŵetera Yehova

1-2. (a) Chifukwa wuli ŵasambiri ŵa Baibolo ŵanyake ŵakuziwulika kuti ŵasankhe kuteŵetera Yehova? (b) Kasi tidumbiskanenge vichi mu nkhani iyi?

KASI namwe mukaziwulikanga kuti muŵe Kaboni wa Yehova? Panji mukachita nthena chifukwa mukawopanga kuti ŵanyinu ŵa ku ntchito, ŵabwezi ŵinu, panji ŵamumbumba yakwinu ŵangamusekani. Panjiso mukamba kuwona kuti mungafiska yayi kulondezga fundo za Chiuta. Para ni nthena, namwe mungaŵapulikiska ŵasambiri ŵa Baibolo awo ŵakuziwulika kuti ŵasankhe kuteŵetera Yehova.

² Yesu wakamanya kuti vyanthena ivi vingapangiska msambiri kutondeka kukura mwauzimu. (Mat. 13:​20-22) Kweni wakaleka yayi kuŵawovwira awo ŵakaziwulikanga kumulondezga. M’malo mwake, wakaŵasambizga ŵasambiri ŵake umo ŵangawovwilira ŵanthu ŵanthena (1) kumanya ivyo vikuŵatondeska kuluta panthazi, (2) kuti ŵamutemwenge chomene Yehova, (3) kuti ŵasinthe ivyo ŵakuŵika pakwamba, kweniso (4) kuti ŵatonde masuzgo agho ŵakukumana nagho. Kasi tingalondezga wuli ivyo Yesu wakasambizga ŵasambiri ŵake apo tikugwiliskira ntchito buku la Mungakondwa na Umoyo Kwamuyirayira! kuti tovwire msambiri wa Baibolo kusankha kuteŵetera Yehova?

WOVWIRANI MSAMBIRI WINU KUMANYA IVYO VIKUMUTONDESKA KULUTA PANTHAZI

3. Kasi ntchivichi chikwenera kuti chikatondeskanga Nikodemo kuzgoka msambiri wa Yesu?

³ Nikodemo, uyo wakaŵa mulongozgi wakumanyikwa wa Ŵayuda, wakaŵa na suzgo linyake ilo likamutondeskanga kuzgoka msambiri wa Yesu. Pati pajumpha waka myezi 6 kufuma apo Yesu wakambira uteŵeti wake, Nikodemo wakamanya kuti Yesu wakatumika na Chiuta. (Yoh. 3:​1, 2) Ndipouli, Nikodemo wakasankha kukumana na Yesu mwachibisibisi chifukwa cha ‘kopa Ŵayuda.’ (Yoh. 7:13; 12:42) Panji wakaghanaghananga kuti watayenge vinandi para wazgoka msambiri wa Yesu.a

4. Kasi Yesu wakamovwira wuli Nikodemo kumanya ivyo Chiuta wakakhazganga kwa iyo?

⁴ Nikodemo wakalimanyanga Dango, kweni wakakhumbikwiranga kovwirika kuti wamanye ivyo Yehova wakakhazganga kwa iyo. Kasi Yesu wakamovwira wuli? Yesu wakaŵa wakunozgeka kovwira munthu nyengo yiliyose, lekani wakazomera kukumana na Nikodemo nangauli ukaŵa usiku. Ndipo Yesu wakamuphalira mwakupulikikwa makora Nikodemo ivyo wakwenera kuchita kuti waŵe msambiri. Wakamuphalira kuti wakwenera kulapa zakwananga zake, kubatizika mu maji, na kuŵa na chipulikano mwa Mwana wa Chiuta.—Yoh. 3:​5, 14-21.

5. Kasi tingawovwira wuli msambiri wa Baibolo kuti wamanye ivyo vikumutondeska kuluta panthazi?

⁵ Nanga msambiri wa Baibolo wangaŵa wakupulikiska makora Malemba, wangakhumbikwiraso kumovwira kuti wamanye ivyo vikumutondeska kuti walute panthazi. Nyengo zinyake ntchito yakulembeka panji chifukwa chakuti wakususkika na ŵamumbumba yake vingamutondeska kuŵa Kaboni wa Yehova. Ntheura mupaturenge nyengo yakovwilira msambiri winu. Nyengo zinyake mungamuchemera kunyumba kwinu panji mungakatembeyapo waka lumoza. Para mungachita nthena, wangafwatuka kumuphalirani masuzgo ghake. Chiskani msambiri winu kuti wasinthenge na chilato chakuti wakondweske imwe yayi, kweni Yehova.

6. Kasi mungamovwira wuli msambiri wa Baibolo kuti wachite chikanga kulondezga ivyo wakusambira? (1 Ŵakorinte 16:13)

⁶ Usange msambiri wa Baibolo wakugomezga kuti Yehova wamovwirenge kulondezga fundo za mu Baibolo, waŵenge na chikanga kuchita ivyo wakusambira. (Ŵazgani 1 Ŵakorinte 16:13.) Mulimo winu tingawuyaniska na msambizgi wa ku sukulu. Kasi nyengo iyo mukaŵa ku sukulu mukatemwanga msambizgi wuli? Tikukayika yayi kuti wakaŵa msambizgi uyo wakazikiranga namwe na kumovwirani kuti mufiske ivyo mukakhumbanga kuchita. Mwakuyana waka, msambizgi muwemi wa Baibolo, wakusambizga msambiri wake ivyo Chiuta wakukhumba, kweniso wakumusimikizgira kuti na wovwiri wa Yehova, wangasintha vinthu vinyake pa umoyo wake. Kasi mungachita wuli kuti muŵe msambizgi muwemi?

WOVWIRANI MSAMBIRI WINU KUTI WATEMWENGE CHOMENE YEHOVA

7. Kasi Yesu wakawovwira wuli ŵategherezgi ŵake kuti ŵamutemwenge chomene Yehova?

⁷ Yesu wakamanya kuti para msambiri wangamutemwa Chiuta vingamovwira kuti walondezgenge ivyo wakusambira. Kanandi wakasambizganga ŵasambiri ŵake vinthu ivyo vingaŵawovwira kuti ŵatemwenge chomene Adada ŵawo ŵakuchanya. Mwachiyelezgero, wakayaniska Yehova na dada uyo wakupeleka vinthu viwemi ku ŵana ŵake. (Mat. 7:​9-11) Ŵanthu ŵanyake awo ŵakategherezganga kwa Yesu, nyengo zinyake ŵakaŵavya dada wachitemwa nthena. Ghanaghanirani waka umo ŵakwenera kuti ŵakajipulikira Yesu wati waŵaphalira ntharika ya dada wachiwuravi uyo wakapokelera mwana wake uyo wakachitanga makhaliro ghaheni. Ŵakwenera ŵakawona kuti Yehova wakuŵatemwa chomene ŵana ŵake ŵa pa charu chapasi.—Luka 15:​20-24.

8. Kasi mungamovwira wuli msambiri wa Baibolo kuti wamutemwenge chomene Yehova?

⁸ Namwe mungawovwira msambiri wa Baibolo kuti wamutemwenge chomene Yehova, para kanandi apo mukusambizga mukudidimizgapo chomene mikhaliro iyo Chiuta wali nayo. Pa sambiro lililose, movwirani kuti wawonenge kukolerana uko kulipo pakati pa ivyo wakusambira na chitemwa cha Yehova. Para mukudumbiskana vya sembe yakuwombora, didimizgani umo yikumukhwaskira iyo payekha. (Rom. 5:8; 1 Yoh. 4:10) Msambiri winu wachiskikenge kumutemwa Yehova para wakughanaghanirapo umo Yehova wakumutemwera iyo payekha.—Gal. 2:20.

9. Kasi ntchivichi chikamovwira Michael kusintha umoyo wake na kwamba kuteŵetera Yehova?

⁹ Ghanaghanirani vya Michael, wa ku Indonesia. Wakakulira mu unenesko kweni wakabatizika yayi. Apo wakaŵa na vyaka 18, wakaluta ku charu chinyake kukagwira ntchito ya udilayivara. Pamanyuma wakatora, kweni wakayileka mbumba yake na kukalutilira kugwira ntchito ku charu chakutali. Pa nyengo iyo wakaŵira ku charu chakutali ichi, muwoli wake na mwana wake msungwana ŵakamba kusambira Baibolo ndipo ŵakalutanga panthazi. Amama ŵake ŵakati ŵafwa, Michael wakawelera kukwake kuti wakapwelelere adada ŵake ndipo wakazomera kusambira Baibolo. Apo ŵakasambiranga chigaŵa cha “Manyani Vinandi” mu sambiro 27 mu buku la Mungakondwa na Umoyo Kwamuyirayira!, Michael wakakhwaskika chomene. Apo wakaghanaghaniranga umo Yehova wakwenera kuti wakakhwaskikira kuwona kuti Mwana wake Yesu wakutambuzgika, Michael wakathiska masozi. Wakamba kuwonga chomene sembe yakuwombora ndipo ivi vikamovwira kuti wasinthe umoyo wake na kubatizika.

WOVWIRANI MSAMBIRI WINU KUTI WASINTHE IVYO WAKUŴIKA PAKWAMBA

10. Kasi Yesu wakawovwira wuli ŵasambiri ŵake kusintha ivyo ŵakaŵikanga pakwamba? (Luka 5:​5-11) (Wonaniso chithuzi.)

¹⁰ Ŵasambiri ŵanyake ŵakawamo luŵiro kuti Yesu wakaŵa Mesiya wakulayizgika, kweni ŵakakhumbikwiranga kovwirika kuti ŵaŵikenge pakwamba uteŵeti wawo. Petrosi na Andireya ŵakaŵa kale ŵasambiri kwakanyengo apo Yesu wakaŵachemanga kuti ŵamulondezgenge nyengo zose. (Mat. 4:​18, 19) Iwo lumoza na Yakobe na Yohane ŵakachitiranga lumoza bizinesi ya ulovi iyo yikendanga makora chomene. (Mrk. 1:​16-20) Apo Petrosi na Andireya “ŵakasida mikwawu yawo,” ŵakwenera ŵakanozgerathu umo ŵapwelelerenge mbumba zawo uku ŵakulondezga Yesu. Kasi ntchivichi chikaŵawovwira kuti ŵasinthe ivyo ŵakaŵikanga pakwamba? Nkhani iyo yili mu buku la Luka yikutiphalira kuti Yesu wakachita munthondwe uwo ukaŵawovwira kugomezga chomene kuti Yehova waŵapenge ivyo ŵakukhumbikwira.—Ŵazgani Luka 5:​5-11.

11. Kasi tingamukhozga wuli msambiri withu na ivyo vikatichitikirapo?

¹¹ Ise tingachita yayi minthondwe nga ni Yesu, kweni tingaŵaphalirako vyakuchitika vinyake ivyo vikulongora umo Yehova wakovwilira ŵanthu awo ŵakumuŵika iyo pakwamba. Mwachiyelezgero, kasi mukukumbuka umo Yehova wakamovwilirani apo imwe mukamba kuwungana? Nyengo zinyake mukaluta dankha kwa abwana ŵinu na kuŵalongosolera chifukwa icho mugwilirengeso yayi ovatayimu usange ni zuŵa la maungano. Apo mukumuphalirako msambiri winu ivyo vikamuchitikirani, mulongosolerani umo chipulikano chinu chikakhozgekera mwati mwawona umo Yehova wakamovwilirani kuti muŵikenge kusopa pakwamba.

12. (a) Chifukwa wuli tikwenera kuchemerako ŵapharazgi ŵakupambanapambana ku sambiro lithu la Baibolo? (b) Kasi mungagwiliskira wuli ntchito mavidiyo kuti musambizge msambiri winu kuŵika Yehova pakwamba? Yowoyani chiyelezgero.

¹² Msambiri winu wangasangaso chandulo usange wangapulika umo ŵabali na ŵadumbu ŵanyake ŵakasinthira vinthu ivyo ŵakaŵikanga pakwamba. Ntheura mulutenge na ŵabali na ŵadumbu ŵakupambanapambana ku sambiro linu la Baibolo. Ŵapemphani kuti ŵalongosore umo ŵakasambilira unenesko kweniso ivyo ŵakachita kuti ŵadangizgenge vinthu vya Ufumu pakwamba. Kweniso mupaturenge nyengo na msambiri winu kuti muwonelere mavidiyo pa chigaŵa cha “Manyani Vinandi” ndiposo usange ntchakwenelera na gha pa chigaŵa cha “Sangani Fundo Zakusazgikira” mu buku la Mungakondwa na Umoyo Kwamuyirayira! Mwachiyelezgero, para mukudumbiskana sambiro 37, mungadumbiskana fundo za mu vidiyo yakuti Yehova Watipwelelerenge.

WOVWIRANI MSAMBIRI WINU KUTONDA MASUZGO AGHO WANGAKUMANA NAGHO

13. Kasi Yesu wakaŵanozgekereska wuli ŵasambiri ŵake ivyo ŵangachita para ŵakumana na ŵakususka?

¹³ Yesu wakaŵaphalira ŵalondezgi ŵake mwakuwerezgawerezga kuti ŵatambuzgikenge na ŵanji, kusazgapo ŵabali ŵawo. (Mat. 5:11; 10:​22, 36) Apo wakakhala pachoko waka kuti wamalizge uteŵeti wake pa charu chapasi, wakachenjezga ŵasambiri ŵake kuti nyengo zinyake ŵangafika na pakukomeka wuwo chifukwa cha kuteŵetera Yehova. (Mat. 24:9; Yoh. 15:20; 16:2) Wakaŵaphalira kuti ŵakwenera kuŵa maso para ŵakupharazga. Wakaŵaphaliraso kuti ŵakwenera yayi kugazgana na ŵakususka kweniso ŵakwenera kuŵa maso na ivyo ŵakuyowoya mwakuti ŵalutilire kupharazga.

14. Kasi tingawovwira wuli msambiri withu wa Baibolo kunozgekera ivyo wangachita para wasangana na ŵakususka? (2 Timote 3:12)

¹⁴ Tingawovwira msambiri withu wa Baibolo kunozgekera ivyo wangachita para wakususkika mwa kumulongosolera ivyo ŵanyake ŵa ku ntchito, ŵabwezi ŵake, kweniso ŵachibali ŵake ŵangayowoya chifukwa chakuti wakusambira Baibolo. (Ŵazgani 2 Timote 3:12.) Ŵanyake ŵa ku ntchito ŵangamba kumuseka chifukwa chakuti sono wakuyezgayezga kulondezga fundo za mu Baibolo. Ndipo ŵanyakeso, nanga ŵangaŵa ŵachibali ŵapafupi chomene, ŵangamba kususka vigomezgo vyake vya mu Baibolo. Para tatendekera kuŵawovwira ŵasambiri ŵithu kunozgekera ivyo ŵangachita para ŵakususkika, ŵaŵengeso ŵakunozgeka para ŵasangana na vyanthena.

15. Kasi ntchivichi chingawovwira msambiri wa Baibolo kuzizipizga para wakususkika na ŵamumbumba yakwake?

¹⁵ Usange msambiri winu wakususkika na ŵamumbumba yakwake, movwirani kuti waghanaghanirepo chifukwa icho ŵachibali ŵake ŵakukhuŵalira. Panji ŵangaghanaghana kuti wapuluskika, kweniso vingachitika kuti ŵakuŵatinkha waka Ŵakaboni ŵa Yehova. Nanga ni Yesu nayo wakasuskikanga na ŵachibali ŵake. (Mrk. 3:21; Yoh. 7:5) Sambizgani msambiri winu kuti walutilire kuŵa wakuzika kweniso walusungu para wakuyowoya na ŵanji kusazgapo ŵamumbumba yakwake.

16. Kasi tingawovwira wuli msambiri wa Baibolo kuti waphalirengeko ŵanji mwaluso ivyo wakugomezga?

¹⁶ Nanga vingaŵa kuti ŵachibali ŵalongora kunweka, msambiri wa Baibolo wakwenera kuchita vinthu mwavinjeru ndipo wakwenera yayi kulongosora vinthu vinandi panyengo yimoza. Para wangalongosora vinandinandi panyengo yimoza, ŵachibali ŵake ŵangavuka kutegherezga, ndipo ulendo unyake ŵangazomeraso yayi kudumbiskana nawo. Ntheura chiskani msambiri winu wa Baibolo kuti walongosore ivyo wakugomezga munthowa yakuti ulendo unyake ŵachibali ŵake ŵazakaŵe ŵakukhumbisiska kutegherezga. (Kol. 4:6) Panji wangaŵaphalira ŵachibali ŵake kuti ŵawone pa jw.org. Ivi vingaŵawovwira kuti ŵasambire vinandi vyakukhwaskana na Ŵakaboni ŵa Yehova pa m’pata wawo.

17. Kasi mungamovwira wuli msambiri winu umo wangakazgolera mafumbo ghakukhwaskana na Ŵakaboni ŵa Yehova? (Wonaniso chithuzi.)

¹⁷ Panji mungagwiliskira ntchito nkhani za pa jw.org za pa chigaŵa chakuti “Ivyo Ŵanthu Ŵakutemwa Kufumba,” kuti movwire msambiri winu kunozgekera mazgoro ghapusu gha mafumbo agho ŵachibali panji ŵanyake ŵa ku ntchito ŵangafumba. (2 Tim. 2:​24, 25) Paumaliro wa sambiro lililose mu buku la Mungakondwa na Umoyo Kwamuyirayira!, wonani chigaŵa chakuti “Ivyo Ŵanyake Ŵakuyowoya.” Chiskani msambiri winu kuti wayezgelerenge umo wangakazgolera mu mazgu ghake na ghake. Usange ntchakukhumbikwa, muphalirani masachizgo agho ghangamovwira kukazgora makora. Para muchitenge nthena, mumovwirenge kuti wakavikilire chipulikano chake mwachikanga.

18. Kasi mungamuchiska wuli msambiri winu kuti wambe kupharazga na mpingo? (Mateyu 10:27)

¹⁸ Yesu wakachiska ŵasambiri ŵake kuti ŵapharazge makani ghawemi ku ŵanthu. (Ŵazgani Mateyu 10:27.) Para msambiri wamba luŵiro kuphalirako ŵanji za chipulikano chake, wambengeso luŵiro kugomezga Yehova. Kasi mungamovwira wuli msambiri kuti wajiŵikire chilato ichi? Para mu chigaŵa chinu muli upharazgi wapadera, muchiskani msambiri winu kuti waghanaghanirepo ivyo wangachita kuti waŵe mupharazgi. Longosorani chifukwa icho ŵanandi ŵakuwona kuti ntchipusu chomene kwamba kupharazga pa nyengo ya upharazgi wapadera. Wangasangaso chandulo para wangamba kudumba nkhani zinyake pa maungano ghamukati mwa sabata. Apo wakuyezgayezga kujiŵikira chilato chakuti wadumbenge nkhani pa maungano agha, wasambirenge kuyowoya vigomezgo vyake mwachikanga.

LONGORANI KUTI MUKUMUGOMEZGA MSAMBIRI WINU

19. Kasi Yesu wakalongora wuli kuti wakuŵagomezga ŵasambiri ŵake, ndipo ise tingamuyezga wuli?

¹⁹ Pambere Yesu wandakwelere kuchanya, wakaphalira ŵasambiri ŵake kuti zuŵa linyake ŵazamuŵiraso lumoza. Kweni ŵasambiri ŵakapulikiska yayi kuti Yesu wakang’anamuranga kuti nawo ŵazamuluta kuchanya. Ndipouli, iyo wakaŵika mtima pa kugomezgeka kwawo, pa ivyo ŵakatondekanga kuchita makora yayi. (Yoh. 14:​1-5, 8) Wakamanya kuti ŵakakhumbikwiranga nyengo kuti ŵapulikiske vinthu vinyake, nga ntchigomezgo chawo cha kuchanya. (Yoh. 16:12) Nase tingalongora kuti tikugomezga kuti msambiri withu ngwakukhumbisiska kusintha kuti wakondweske Yehova.

20. Kasi mudumbu wa ku Malawi wakalongora wuli kuti wakamugomezganga msambiri wake?

²⁰ Tilutilire kugomezga kuti msambiri withu wakukhumba kuchita icho ntchiwemi. Mwachiyelezgero, ghanaghanirani vya Chifundo, mudumbu wa ku Malawi. Wakamba kusambira Baibolo mwakugwiliskira ntchito buku la Mungakondwa na Umoyo Kwamuyirayira! na msungwana munyake wa tchalitchi la Katolika zina lake Alinafe. Apo ŵakamalizganga kusambira sambiro 14, Chifundo wakafumba msambiri wake ivyo wakaghanaghananga pa nkhani yakugwiliskira ntchito vikozgo pakusopa. Alinafe wakakwiya chomene ndipo wakazgora kuti, “Ichi ntchakusankha chane, chikumukhwaskani ngati!” Chifundo wakaghanaghananga kuti sambiro la Baibolo lamalira penepapa. Kweni wakazikira na kulutilira kusambira nayo Baibolo Alinafe, ndipo wakaŵa na chigomezgo kuti para nyengo yajumphapo wamanyenge iyo ni fundo yenecho. Myezi yichoko waka yikati yajumphapo, Chifundo wakamufumba fumbo msambiri wake ilo lili mu sambiro 34, lakuti: ‘Kasi kusambira Baibolo kweniso vyakukhwaskana na Chiuta waunenesko Yehova, kwamovwirani wuli kufika pasono?’ Pakulongosora umo Alinafe wakazgolera, Chifundo wakati: “Wakayowoya fundo zinandi zakukondweska, ndipo yimoza yake wakati Ŵakaboni ŵa Yehova ŵakuchitako yayi vinthu ivyo Baibolo likukanizga.” Nyengo yichoko waka yati yajumphapo, Alinafe wakaleka kugwiliskira ntchito vikozgo pakusopa ndipo pamanyuma wakabatizika.

21. Kasi tingamovwira wuli msambiri withu wa Baibolo kuti wasankhe kuteŵetera Yehova?

²¹ Nangauli Yehova ndiyo “wakukuzga,” kweni tose tili na udindo wakovwira msambiri withu wa Baibolo kuti walute panthazi. (1 Kor. 3:7) Tikuchita vinandi padera pa kumusambizga waka ivyo Chiuta wakukhumba kuti wachitenge. Tikumovwira kuti wambe kumutemwa chomene Yehova. Tikumuchiskaso kuti walongore chitemwa ichi mwakumuŵika Yehova pakwamba pa umoyo wake. Ndipo tikumusambizga umo wangagomezgera Yehova para wasangana na masuzgo. Para talongora kuti tikumugomezga msambiri withu wa Baibolo, tikumovwira kugomezga kuti nayo wangafiska kulondezga fundo za mu Baibolo na kusankha kuteŵetera Yehova.