NKHANI YAKUSAMBIRA 30
SUMU 97 Umoyo Ukuthemba pa Mazgu gha Chiuta
Lutilirani Kusambirako ku Visambizgo Vyakwambilira vya mu Baibolo
“Niŵenge wakunozgeka nyengo zose kumukumbuskani vinthu ivi, nangauli mukuvimanya kale ndipo mwakoleska unenesko.”—2 PET. 1:12.
FUNDO YIKURU
Mu nkhani iyi tiwonenge umo tingachitira kuti tisangenge chandulo na visambizgo vyakwambilira vya mu Baibolo, nanga pangaŵa kuti pajumpha vyaka vinandi kufuma apo tikasambilira.
1. Kasi visambizgo vya mu Baibolo vikamovwirani wuli apo mukambanga kusambira unenesko?
VISAMBIZGO vyakwambilira vya mu Baibolo vili kutovwira kusintha umoyo withu. Mwachiyelezgero, tikati tasambira kuti zina la Chiuta ni Yehova, tikachitapo kanthu kuti tiŵe nayo paubwezi. (Yes. 42:8) Tikati tasambira unenesko wakukhwaskana na ŵakufwa, tikaleka kusuzgika na maghanoghano ghakuti panji ŵachibali ŵithu awo ŵali kufwa ŵakusuzgika. (Muph. 9:10) Ndipo tikati tasambira malayizgo gha Chiuta ghakukhwaskana na Paradiso pa charu chapasi, tili kuleka kwenjerwa na ivyo vizamutichitikira kunthazi. Tikamanya kuti umoyo withu ngwakanyengo waka yayi, kuti ngwa vyaka 70 panji 80 pera, kweni kuti tizamukhala kwamuyirayira.—Sal. 37:29; 90:10.
2. Kasi lemba la 2 Petrosi 1:12, 13 likulongora wuli kuti Ŵakhristu ŵakukhwima mwauzimu nawo ŵangasanga chandulo na visambizgo vyakwambilira vya mu Malemba?
2 Tikwenera kuviwona mwakupepuka yayi visambizgo vyakwambilira vya mu Baibolo. Kalata yake yachiŵiri, mpositole Petrosi wakalembera Ŵakhristu awo ŵakaŵa kuti ‘ŵakoleska unenesko.’ (Ŵazgani 2 Petrosi 1:12, 13.) Ndipouli, panyengo iyo mu mpingo mukaŵa ŵanthu ŵaheni awo ŵakakhumbanga kupatuska ŵabali ku unenesko. (2 Pet. 2:1-3) Petrosi wakakhumbanga kuŵakhozga ŵabali na ŵadumbu kuti ŵaleke kupusikika. Ntheura wakaŵakumbuska visambizgo vinyake ivyo ŵakaŵa kuti ŵali kusambira kale. Visambizgo ivi vikaŵawovwiranga kuti ŵalutilire kugomezgeka m’paka paumaliro.
3. Chifukwa wuli Ŵakhristu wose ŵakwenera kulutilira kughanaghanirapo visambizgo vyakwambilira vya mu Baibolo? Yowoyani chiyelezgero.
3 Nanga vingaŵa kuti takhala mu unenesko kwanyengo yitali, tingasanga chandulo na visambizgo vyakwambilira vya mu Baibolo. Kuti tipulikiske, tiyeni tiwone chiyelezgero ichi. Munthu uyo ni nkhwantha pakuphika na uyo wakusambilira waka, wose ŵangagwiliskira ntchito vinthu vyakuyana waka pakuphika chakurya. Kweni uyo ni nkhwantha pakuphika wangasambira umo wangagwiliskiraso ntchito vinthu ivi munthowa yinyake, na kuphika vyakurya vinyake vyakunowa chomene. Mwakuyana waka, awo ŵateŵetera Yehova kwanyengo yitali na awo ŵakusambira sono Baibolo, ŵangapambana pa ivyo ŵangasambirapo pa visambizgo vyakwambilira vya mu Baibolo. Ntchakuwonekerathu kuti umo vinthu viliri pa umoyo withu panji mauteŵeti agho tikuchita mu gulu la Yehova, vili kusintha kufuma apo tikabatizikira. Para tikughanaghanirapo pa visambizgo vya mu Baibolo ivyo tikasambira kumasinda, tingasangaso nthowa ziphya za umo tingavilondezgera sono. Tiyeni tiwone ivyo Ŵakhristu awo ŵateŵetera Yehova kwanyengo yitali ŵangasambirako ku visambizgo vitatu vyakwambilira vya mu Baibolo.
YEHOVA NDIYO NI MLENGI
4. Kasi kumanya fundo yakuti Yehova ndiyo ni Mlengi kwatovwira wuli?
4 “Uyo wakazenga vinthu vyose ni Chiuta.” (Heb. 3:4) Tikumanya kuti pulaneti lithu na vyamoyo vyose ivyo vilimo vikalengeka na Mlengi wavinjeru kweniso wankhongono chomene. Iyo ndiyo wakatilenga, ndipo wakutimanya makora chomene. Kweniso iyo wakutipwelelera ndiposo wakumanya icho ntchiwemi kwa ise. Kumanya fundo iyi yakuti Yehova ndiyo ni Mlengi, kwatovwira kusintha umoyo withu na kumanya kuti umoyo uli na chandulo.
5. Kasi ni fundo wuli iyo yingatovwira kuŵa ŵakujiyuyura? (Yesaya 45:9-12)
5 Fundo yakuti Yehova ndiyo ni Mlengi, yingatisambizga kuti tiŵe ŵakujiyuyura. Mwachiyelezgero, apo Yobu wakamba kuyowoya vinthu vyakubudika vyakukhwaskana na Yehova kuti wajivikilire na kulongora kuti iyo ni murunji, Yehova wakamukumbuska kuti iyo ndiyo ni Mlengi wankhongonozose. (Yobu 38:1-4) Ivi vikamovwira Yobu kumanya kuti nthowa za Yehova ni zapachanya chomene kuluska za ŵanthu. Pa nkhani yeneyiyi, ntchimi Yesaya nayo yikalemba kuti: “Kasi dongo lingayowoya kwa wakuwumba kuti: ‘Kasi ukupanga vichi?’”—Ŵazgani Yesaya 45:9-12.
6. Kasi mphawuli chomene apo tikwenera kughanaghanirapo vya umo Mlengi withu waliri? (Wonaniso vithuzi.)
6 Para munthu wateŵetera Yehova kwa vyaka vinandi, nyengo zinyake wangamba kugomezga chomene maghanoghano ghake m’malo mwa kuthemba Yehova na Mazgu ghake kuti ndigho ghamulongozgenge. (Yobu 37:23, 24) Kasi pakuŵa uwemi wuli usange munthu wakughanaghanirapo chomene pa vinjeru kweniso ukuru wa Mlengi wake? (Yes. 40:22; 55:8, 9) Fundo yakuzirwa iyi yingamovwira kuti walutilire kuŵa wakujiyuyura na kuwona kuti maghanoghano gha Yehova ndigho ngakuzirwa chomene kuluska ghake.
Kasi ntchivichi chingatovwira kuti tilutilire kuwona mwakwenelera maghanoghano ghithu? (Wonani ndime 6)d
7. Kasi Rahela wakachita wuli kuti wazomerezge kusintha uko kukachitika?
7 Rahela, uyo wakukhala ku Slovenia, wakuwona kuti kughanaghanira vya Mlengi kwamovwira kuzomerezga para vinthu vinyake vyasintha mu gulu la Yehova. Iyo wakuti: “Nyengo zinyake chikuniŵira chakusuzga kuzomerezga ivyo awo ŵakulongozga ŵasankha. Mwachiyelezgero, nangauli nkhaŵa kuti nawonelera Lipoti Lakufuma ku Wupu Wakulongozga la 2023 #8, kweni nkhazizwa chomene kuwona kakwamba mubali uyo wali na mwembe wakudumba nkhani. Ntheura nkhalomba kwa Yehova kuti wanovwire kuzomerezga kusintha uku.” Rahela wakawamo kuti Yehova pakuŵa Mlengi wakuchanya na charu chapasi, nyengo zose wakumanya nthowa yiwemi chomene yakulongozgera gulu lake. Usange namwe chikumuŵirani chakusuzga kuzomerezga kapulikiskiro kaphya panji ulongozgi uphya, mukwenera kujiyuyura na kughanaghanirapo vinjeru vyapachanya chomene kweniso nkhongono izo Mlengi withu wali nazo.—Rom. 11:33-36.
CHIFUKWA ICHO CHIUTA WAZOMEREZGERA KUTI TISUZGIKENGE
8. Kasi tasanga chandulo wuli chifukwa cha kumanya chifukwa icho Chiuta wazomerezgera kuti tisuzgikenge?
8 Chifukwa wuli Chiuta wazomerezga kuti tisuzgikenge? Ŵanyake awo ŵakumanya yayi zgoro la fumbo ili ŵakumukwiyira Chiuta, panji kughanaghana kuti Chiuta kulije. (Zinth. 19:3) Kweni imwe mwasambira kuti ŵanthu ŵakusuzgika kweniso kufwa chifukwa cha kwananga uko tili kuhara na kuleka kufikapo, ni Yehova yayi wakupangiska. Mwasambiraso kuti chifukwa chakuti Yehova wazikira nawo ŵanthu, vyawovwira kuti ŵanthu mamiliyoni ghanandi ŵamumanye makora na kumanya umo Yehova wazamuchitira kuti wamazgirethu masuzgo ghose. (2 Pet. 3:9, 15) Kumanya fundo zaunenesko izi kwamovwirani kuti muŵe paubwezi wakukhora chomene na iyo.
9. Kasi mphanyengo wuli apo tikwenera kughanaghanira vifukwa ivyo Yehova wazomerezgera kuti tisuzgikenge?
9 Tikumanya kuti tikwenera kuzikira apo tikulindilira kuti Yehova wamazge masuzgo ghose. Ndipouli, para ise panji ŵakutemweka ŵithu ŵasangana na masuzgo, kuchitirika vinthu vyambura urunji, panji para taferwa, tingamba kuwona nga kuti Yehova wakuchedwa kuchitapo kanthu. (Hab. 1:2, 3) Pa nyengo zanthena izi, tingachita makora kughanaghanirapo vifukwa ivyo Yehova wazomerezgera kuti ŵanthu ŵarunji nawo ŵasanganenge na masuzgo.a (Sal. 34:19) Tingaghanaghaniraso vya khumbo lake lakuti wazamumazgirathu masuzgo ghose agho ghalipo.
10. Kasi ntchivichi chawovwira Anne kuzizipizga nyifwa ya amama ŵake?
10 Kumanya unenesko wakukhwaskana na chifukwa icho Chiuta wazomerezgera kuti tisuzgikenge kungatovwira kuzizipizga. Anne, uyo wakukhala pa chilwa cha Mayotte, ku Indian Ocean, wakuti: “Nkhaŵa na chitima chomene chifukwa cha nyifwa ya amama awo ŵali kufwa vyaka vichoko waka ivyo vyajumpha. Ndipouli, nyengo zose nkhujikumbuska kuti ni Yehova yayi uyo wakupangiska masuzgo. Iyo ngwakukhumbisiska kuzakamazga masuzgo ghose na kuzakawuska ŵakutemweka ŵithu. Kughanaghanirapo fundo zaunenesko izi kukunovwira kuti niŵe na mtende wa mumtima uwo ukunovwira chomene.”
11. Kasi kumanya vifukwa ivyo Yehova wazomerezgera kuti tisuzgikenge kungatovwira wuli kuti tilutilire kupharazga?
11 Kumanya vifukwa ivyo Chiuta wazomerezgera kuti tisuzgikenge kungatikhukiska kuti tilutilire kupharazga. Pamanyuma pa kulongosora kuti Yehova wakuzikira chifukwa chakuti wakukhumba ŵanthu ŵang’anamuke mtima na kuponoskeka, Petrosi wakalemba kuti: “Mughanaghanire mtundu wa ŵanthu uwo mukwenera kuŵa. Muŵe ŵanthu ŵa makhaliro ghatuŵa na kuchita milimo iyo yikulongora kuti mukusopa Chiuta mwakujipeleka.” (2 Pet. 3:11) Ntchito ya kupharazga njimoza mwa “milimo iyo yikulongora kuti mukusopa Chiuta mwakujipeleka.” Nga ni Dada withu Yehova, nase tikutemwa ŵanthu. Tikukhumba kuti nawo ŵazakakhale mu charu chiphya cha Chiuta icho muzamuŵa urunji. Yehova wazikira nawo ŵanthu ŵa mu chigaŵa chinu ndipo waŵapa mwaŵi wakuti ŵasankhe kumusopa iyo. Ni mwaŵi wapadera chomene kugwira ntchito lumoza na Chiuta na kovwira ŵanthu ŵanandi chomene kuti ŵasambire vyakukhwaskana na iyo pambere umaliro undize.—1 Kor. 3:9.
TIKUKHALA MU “MAZUŴA GHAUMALIRO”
12. Kasi kumanya kuti tili mu “mazuŵa ghaumaliro” kukutovwira wuli?
12 Baibolo likulongosora mwakupulikikwa makora umo ŵanthu ŵazamuŵira mu “mazuŵa ghaumaliro.” (2 Tim. 3:1-5) Para tikuwona umo ŵanthu awo tikukhala nawo ŵakuchitira vinthu, tikujiwonera tekha kuti uchimi uwu ukufiskika nadi. Apo tikuwona umo makhaliro gha ŵanthu ghakuhenipira zuŵa na zuŵa, tikukhorwa nadi kuti Mazgu gha Chiuta ngakugomezgeka.—2 Tim. 3:13-15.
13. Kuyana na ntharika ya Yesu ya pa Luka 12:15-21, kasi tikwenera kujifumba mafumbo wuli?
13 Kumanya kuti tili mu mazuŵa ghaumaliro kukutovwiraso kuti tigwiliskirenge ntchito nyengo yithu mwamahara. Tiyeni tiwone ivyo tikusambirapo pa fundo iyi kufuma pa ntharika ya Yesu iyo yili pa Luka 12:15-21. (Ŵazgani.) Chifukwa wuli mwanalume musambazi uyu wakachemeka “muzeleza”? Chikaŵa chifukwa chakuti munthu uyu wakaŵa musambazi yayi, kweni chifukwa chakuti wakaŵikanga mtima pa vinthu vyambura kuzirwa. Iyo ‘wakajisungira usambazi kweni wakaŵa musambazi chara kwa Chiuta.’ Chifukwa wuli mwanalume uyu wakakhumbikwanga kuti wachitepo kanthu mwaluŵiro? Chifukwa Chiuta wakamuphalira mwanalume uyu kuti: “Usiku uno ŵakhumbenge umoyo wako.” Kasi ntharika iyi yingatovwira wuli mazuŵa ghano? Kwakhala nyengo yichoko waka kuti umaliro wize, ntheura tingachita makora kujifumba kuti: ‘Kasi vilato vyane vikulongora kuti nkhuŵika mtima pa vinthu vyakuzirwa nadi? Kasi ŵana ŵane nkhuŵawovwira kuti ŵajiŵikire vilato wuli? Kasi nkhugwiliskira ntchito nkhongono, nyengo yane, na chuma chane kuti nijisungire usambazi pa charu chapasi, panji kuchanya?’
14. Kasi nkhani ya Miki yikutovwira wuli kuwona kuti ntchakuzirwa kukumbuka kuti tikukhala mu mazuŵa ghaumaliro?
14 Kughanaghanirapo pa ukaboni wakuti sono tikukhala nadi mu mazuŵa ghaumaliro, kungatovwira kuti tisankhe makora vinthu pa umoyo withu. Ivi ndivyo wakachita mudumbu munyake zina lake Miki. Iyo wakuti: “Nkhati namalizga masambiro gha ku sekondare, mtima wane wose ukaŵa wakuti nkhasambire vyakukhwaskana na vinyama. Kweni nkhakhumbangaso kuchita upayiniya wanyengozose na kukateŵetera uko kukukhumbikwa ŵapharazgi ŵanandi. Ŵabali na ŵadumbu mu mpingo ŵakanovwira kuti nighanaghanirepo chomene usange ningafiska vyose viŵiri, kukasambira masambiro ghapachanya agha na kufiska vilato vyane vyauzimu. Ŵakanikumbuska kuti charu ichi chimarenge sonosono apa. Kweni mu charu chiphya nizamuŵa na mwaŵi wakusambira vyakukhwaskana na vinyama vilivyose ivyo natemwa. Ntheura nkhasankha kosi yipusu waka yakusambira kwanyengo yichoko. Ivi vikanovwira kuti nisange ntchito iyo yinganovwira kuti nichitenge upayiniya wanyengozose, ndipo kufuma apo nkhasamira ku Ecuador, uko kukakhumbikwanga ŵapharazgi ŵanandi.” Pasono Miki na mfumu wake ŵakuchita mulimo wakwendera dera mu charu ichi.
15. Kasi ŵanthu ŵangachita wuli na uthenga withu? Yowoyani chiyelezgero. (Wonaniso vithuzi.)
15 Tingagongowanga yayi usange pakwamba ŵanthu ŵakana uthenga withu. Ŵanthu ŵangasintha. Ghanaghanirani chiyelezgero cha Yakobe munung’una wa Yesu. Iyo wakawonanga Yesu wakukura, kuŵa Mesiya, kweniso wakasambizganga kuluska munthu waliyose pa charu chapasi. Kweni kwa vyaka, Yakobe wakamulondezga yayi Yesu. Wakamba kulondezga Yesu pamanyuma pakuti wawuskika, ndipo kufuma apo wakazgoka msambiri wamwamphu.b (Yoh. 7:5; Gal. 2:9) Ntheura kuleka yayi kuŵapharazgira ŵachibali ŵinu awo ŵandalongore kuti mbakunweka panji awo pakwamba ŵakakana uthenga wa Ufumu. Kumbukani kuti tikukhala mu mazuŵa ghaumaliro, ntheura ntchito yithu yakupharazga yikwenera kuchitika mwaluŵiro. Ivyo mukuŵaphalirako pasono vingazakaŵakhwaska nyengo yinyake munthazi, panji para suzgo yikuru yazakamba.c
Kasi ntchivichi chingatovwira kuti tileke kugongowa kupharazgira ŵachibali ŵithu awo Mbakaboni yayi? (Wonani ndime 15)e
LUTILIRANI KUWONGA VIKUMBUSKO VYAKUFUMA KWA YEHOVA
16. Kasi tikusanga chandulo wuli na vinthu ivyo vikunozgekera ŵanthu awo Mbakaboni yayi? (Wonaniso bokosi lakuti “Vigwiliskirani Ntchito Pakovwilira Ŵanji.”)
16 Chakurya chinyake chauzimu icho tikupokera, chikunozgekera ŵanthu awo ŵandapulikepo visambizgo vyakwambilira vya mu Baibolo. Mwachiyelezgero, nkhani zachisanisani izo zikudumbika sabata yiliyose, nkhani zinyake za pa webusayiti yithu ya jw.org na mavidiyo, kweniso magazini ghakupharazgira, chomene vikulembekera ŵanthu awo Mbakaboni yayi. Nangauli vili nthena, kweni nase tikusanga chandulo na vinthu ivi. Vikutovwira kuti timutemwenge chomene Yehova, tighagomezgenge chomene Mazgu gha Chiuta, kweniso kuti tisambizgenge mwaluso para tikupharazgira ŵanji.—Sal. 19:7.
17. Kasi mphanyengo wuli apo tingaghanaghanirapo visambizgo vyakwambilira vya mu Baibolo?
17 Pakuŵa Ŵakaboni ŵa Yehova, tikukondwa chomene para fundo yinyake ya mu Malemba ŵayilongosoraso makora. Kweni tikuwongaso chomene visambizgo vyakwambilira vya mu Baibolo ivyo vikatovwira kuti timanye unenesko. Usange tayezgeka kuti tambe kwendera maghanoghano ghithu m’malo mwa kulondezga ulongozgi wakufuma ku gulu la Yehova, tingachita makora kukumbuka kuti uyo wakulongozga gulu ili ni Mlengi wavinjeru kweniso wankhongonozose. Para ise panji mubwezi withu tasangana na suzgo linyake, tikwenera kuzikira na kughanaghanira chifukwa icho Yehova wazomerezgera kuti tisuzgikenge. Ndipo para tikukhumba kusankha umo tigwiliskirenge ntchito nyengo na katundu withu, tikwenera kukumbuka kuti kwakhala nyengo yichoko chomene kuti umaliro ufike. Mphanyi vikumbusko vya Yehova vyalutilira kutikhozga, kutichiska, na kutovwira kusankha vinthu mwavinjeru.
SUMU 95 Ungweru Ukuŵaliraŵalira
a Wonani nkhani yakuti “Chifukwa Icho Masuzgo Ghose Ghamalirenge Sonosono Apa” mu Gongwe la Mulinda la Juni 1, 2007, peji 14-18.
c Wonani nkhani yakuti “Kasi Tikumanya Vichi vya Umo Yehova Wazamweruzgira Ŵanthu Kunthazi?” mu Gongwe la Mulinda la Meyi 2024, peji 8-13.
d MAZGU GHAKULONGOSORA CHITHUZI: Mulara wapeleka sachizgo pa ungano wa ŵalara, ilo ŵalara ŵanyake ŵandakolerane nalo. Pamanyuma, apo mulara uyu wakulaŵiska nyenyezi kuchanya, vyamovwira kuti wambe kuwona mwakwenelera maghanoghano ghake.
e MAZGU GHAKULONGOSORA CHITHUZI: Panyengo ya sambiro layekha, Kaboni wakusanda ukaboni wakuti tikukhala mu mazuŵa ghaumaliro. Ivi vyamuchiska kuti wimbire mukuru wake kuti wamupharazgire.