Wovwirani Mwaluŵiro Ŵanthu Awo Ŵali na “Maghanoghano Ghakwenelera”

1. Kasi ŵanthu ŵakupambana wuli na umo ŵakuchitira para ŵapulika uthenga uwemi? (Milimo 13:47, 48; 16:14, 15)

ŴANTHU ŵanandi mu nyengo ya Ŵakhristu ŵakwambilira ŵakazomera unenesko ŵati ŵapulika waka uthenga wa Ufumu. (Ŵazgani Milimo 13:47, 48; 16:14, 15.) Mwakuyana waka, mazuŵa ghano napo ŵanthu ŵanandi ŵakukondwa para ŵapulika kakwamba vya uthenga wa Ufumu. Nangauli pakwamba ŵanji ŵanganweka yayi, kweni para pajumpha nyengo ŵangajura mitima yawo na kuzomera makani ghawemi. Kasi tingachita wuli para tasanga ŵanthu awo ŵali na “maghanoghano ghakwenelera” mu uteŵeti?

2. Kasi mulimo withu wakuzgora ŵanthu kuŵa ŵasambiri ukuyana wuli na wa mulimi?

² Ghanaghanirani chiyelezgero ichi. Mulimo withu wakuzgora ŵanthu kuŵa ŵasambiri tingawuyaniska na wa mulimi. Usange chipambi cha mu khuni linyake chaphya, mulimi wangavuna nanga wangaŵa kuti wachali kulima panji kupanda ku chigaŵa chinyake. Mwakuyana waka, usange tasanga ŵanthu awo ŵakukhumba kupulika uthenga withu, tikwenera kuŵawovwira mwaluŵiro kuti ŵaŵe ŵasambiri ŵa Khristu. Kweni ku awo mbakunozgeka yayi, tikwenera kulutilira kuŵawovwira kuti ŵamanye kuzirwa kwa uthenga uwo ŵakupulika. (Yoh. 4:35, 36) Umanyi uzamutovwira kusanga nthowa yiwemi iyo tingaŵawovwilira ŵanthu. Tiyeni tiwone ivyo tingachita paulendo wakwamba kuti tovwire awo ŵakukhumba kupulika uthenga withu. Tiwonengeso umo tingaŵawovwilira kuti ŵalutilire kuluta panthazi.

USANGE ŴANTHU MBAKUNWEKA

3. Kasi tingachita wuli usange tasanga ŵanthu ŵakunweka mu uteŵeti? (1 Ŵakorinte 9:26)

³ Para tasanga ŵanthu awo mbakunweka mu uteŵeti, tikwenera kuŵawovwira nyengo yeneyiyo kuti ŵambe kwenda pa nthowa yakuluta ku umoyo. Ntheura, tikwenera kuchedwa yayi kuŵapempha kuti tisambirenge nawo Baibolo na kuŵachemerako ku maungano pa ulendo wakwamba wenewuwo.—Ŵazgani 1 Ŵakorinte 9:26.

4. Yowoyani chiyelezgero cha munthu uyo wakazomera kusambira Baibolo mwaluŵiro.

⁴ Kupempha munthu sambiro. Ŵanji awo tikuŵapharazgira ŵakuzomera kwamba kusambira Baibolo mwaluŵiro. Mwachiyelezgero, zuŵa linyake pa Chinayi, msungwana wa ku Canada wakafika apo pakaŵa kashelufu ndipo wakatorapo kaburosha ka mutu wakuti Mungakondwa na Umoyo Kwamuyirayira! Mudumbu uyo wakaŵa pa kashelufu wakamulongosolera kuti paliso mwaŵi wakusambira Baibolo kwaulere kwizira mu kaburosha aka. Msungwana uyu wakaŵa wakunweka ndipo wakapeleka foni nambara yake. Mise ya zuŵa ilo, msungwana uyu wakalembera meseji mudumbu vya zuŵa ilo ŵangambira kusambira. Apo mudumbu wakasachizga vyakwiza kuumaliro wa sabata, msungwana uyu wakafumba kuti: “Wuli machero? M’pata nili nawo.” Ŵakambapo kusambira machero ghake gheneghagho pa Chinkhondi. Msungwana uyu wakamba kuwungana sabata yeneyiyo ndipo wakalutilira kuluta panthazi.

5. Kasi tingamanya wuli nthowa yiwemi yakwambiskira sambiro la Baibolo? (Wonaniso vithuzi.)

⁵ Mbunenesko kuti tikukhazga kuti ni wose yayi awo ŵangapulika uthenga withu na kunweka nga umo wakachitira msungwana uyu. Ŵanji ŵangakhumbikwira nyengo. Nyengo zinyake tingakhumbikwira kwamba dankha na nkhani iyo munthu wanganweka nayo. Chinyakeso ntchakuti, usange tikulutilira kuŵa na maghanoghano ghakwenelera kweniso kulongora kuti tikunweka nayo munthu uyo, mu nyengo yichoko waka, tingamba kusambira nayo Baibolo. Kasi para tikupempha munthu sambiro la Baibolo tingayowoyachi? Ŵabali na ŵadumbu ŵanandi awo mbaluso pakwambiska masambiro gha Baibolo ŵakafumbikapo fumbo ili.

6. Kasi tingamuphalira vichi munthu wakunweka kuti tizalutilire kudumbiskana nayo?

⁶ Ŵapharazgi na ŵapayiniya ŵanyake awo ŵakafumbikapo vyakukhwaskana na kwambiska masambiro gha Baibolo, ŵakalongosora kuti mu vyaru vinyake ntchiwemi yayi kugwiliskira ntchito mazgu nga ghakuti “kusambira,” “sambiro la Baibolo,” panji “kumusambizgani” pakuŵaphalira za sambiro. M’malo mwake, ŵakawona kuti mazgu ghawemi ni “kudumbiskana,” “chidumbirano,” kweniso “kumanya Baibolo.” Kuti munthu wanweke kuti muzakadumbiskaneso nayo, mungayowoya kuti, “Ntchakukondweska kuwona umo Baibolo likuzgolera mafumbo ghakuzirwa ghakukhwaskana na umoyo withu,” panji “Baibolo ni buku la chisopa waka yayi; likutovwiraso munthowa zinandi.” Mungasazgiraposo kuti: “Vikutora nyengo yitali yayi; maminiti 10 panji 15 ngakukwana kuti musambire chinthu chinyake chakuzirwa pa umoyo winu.” Mungayowoya ivi kwambura kugwiliskira ntchito mazgu ghakuti “tipangane zuŵa” panji “tikusambira sabata yiliyose,” ivyo vingaŵapangiska kujipulika kupanikizgika kuti ŵakumanenge namwe nyengo zose.

7. Kasi mphawuli apo ŵanji ŵakamanyira unenesko wa mu Baibolo? (1 Ŵakorinte 14:23-25)

⁷ Ŵachemeraniko ku maungano. Vikulongora kuti mu nyengo ya mpositole Paulosi, ŵanji ŵakamanya kuti ŵasanga unenesko wa mu Baibolo ŵati ŵiza ku maungano Ghachikhristu. (Ŵazgani 1 Ŵakorinte 14:23-25.) Kanandi ndimo vikuŵiraso mazuŵa ghano. Ŵanandi ŵakuluta panthazi mwaluŵiro chomene usange ŵamba kuwungana. Mphawuli apo mungamba kuŵachemerako? Buku la Mungakondwa na Umoyo Kwamuyirayira! mu sambiro 10, likuchiska munthu kuti wize ku maungano ghithu, kweni tikwenera kulindilira dankha kuti tifike mutu uwu yayi. Pa chidumbirano chinu chakwamba mungamuchemerako munthu uyo ku maungano gha kuumaliro wa sabata, panji mungamuphaliraso za mutu wa nkhani yachisanisani kweniso fundo yinyake kufuma mu Sambiro la Gongwe la Mulinda la sabata iyo.

8. Kasi tingamuphalira vichi munthu usange tikumuchemerako ku maungano ghithu? (Yesaya 54:13)

⁸ Usange mukuchemerako munthu uyo ngwakunweka, longosorani umo maungano ghithu ghakupambanirana na maungano gha visopa vinyake ivyo iyo wakumanya. Apo msambiri wa Baibolo munyake wakaŵapo kakwamba pa Sambiro la Gongwe la Mulinda, wakafumba msambizgi wake kuti, “Kasi wakuchitiska ndikuti wakumanya zina la waliyose?” Mudumbu wakazgora kuti tose tikuyezgayezga kumanya zina la waliyose nga umo tikumanyira ŵanthu awo tikukhala banja limoza. Msambiri uyu wakawona kuti ivi vikupambana chomene na ivyo vikuchitika ku tchalitchi kwawo. Tingamulongosoleraso chinthu chinyake icho maungano ghithu ghakupambanirana na visopa vinyake. (Ŵazgani Yesaya 54:13.) Tikuwungana kuti tisope Yehova, kusambira kwa iyo, kweniso kukhozgana yumoza na munyake. (Heb. 2:12; 10:24, 25) Lekani maungano ghithu ghakuchitika mundondomeko yiwemi, kwambura kusazgako mitheto panji tuvigomezgo twa ŵanthu. (1 Kor. 14:40) Malo ghithu ghakusoperapo ngakunozgeka munthowa yambura kusuzga kusoperapo. Ndipo tikukhozgera chipani chilichose yayi cha ndyali kuluska chinyake chifukwa tikunjilirapo yayi pa vya ndyali; nesi kuchitako viwoneskero. Mungachita makora kumulongolerathu msambiri winu vidiyo yakuti Kasi pa Nyumba ya Ufumu Pakuchitika Vichi? Para tachita nthena, vingamovwira kumanya ivyo vikuchitika pa maungano ghithu.

9-10. Apo tikumuchemerako munthu ku maungano ghithu, kasi tingachita wuli kuti timusimikizgire kuti timuchichizgenge yayi kuti wanjire chisopa chithu panji kukazgorapo? (Wonaniso chithuzi.)

⁹ Ŵanyake ŵakuziwulika kwiza ku maungano chifukwa ŵakopa kuti tizamuŵapempha kuti ŵaŵe Ŵakaboni ŵa Yehova. Musimikizgirani munthu kuti tikuŵa ŵakukondwa kupokelera ŵalendo kweniso tikuŵachichizga yayi kunjira chisopa chithu panji kuzgorapo. Mbumba ni zakupokelereka kusazgapo na izo zili na ŵana. Pa maungano ghithu, ŵana ŵakusambizgikira paŵekha yayi. M’malo mwake, ŵana na ŵapapi ŵawo ŵakukhala pamoza na kusambilira lumoza. Munthowa iyi, ŵapapi nyengo zose ŵakumanya apo ŵana ŵawo ŵali kweniso ivyo ŵakusambizgika. (Doto. 31:12) Tikutolera zithero yayi nesi kupempha ŵanthu kuti ŵizenge na ndalama. M’malo mwake, tikulondezga languro la Yesu lakuti: “Mukapokera kwawanangwa, pelekani kwawanangwa.” (Mat. 10:8) Mungamuphaliraso munthu kuti wakukhumbikwira vyakuvwara vyapachanya yayi kuti wize ku maungano. Chiuta wakuwona mu mtima, kawonekero ka munthu yayi.—1 Sam. 16:7.

¹⁰ Para munthu wiza ku maungano, chitani vyose ivyo mungafiska kuti wajipulike kuti wapokelereka. Movwirani kuti wamanyane na ŵalara panji ŵapharazgi ŵanyake. Usange wajipulika kuti wapokelereka, ntchakuwonekerathu kuti wazamukhumbisiska kwizaso ulendo unyake. Pa nyengo ya maungano, usange walije Baibolo, mungawona nayo lumoza linu na kumulongora umo tikulondezgerana nayo wakudumba nkhani kweniso uyo wakuchitiska sambiro.

PARA SAMBIRO LA BAIBOLO LAMBAPO

11. Kasi mungalongora wuli kuti mukuzirwiska nyengo na ndondomeko ya msambiri winu?

¹¹ Kasi ni fundo wuli izo tikwenera kukumbuka apo tikusambira Baibolo na munthu pa nyumba pake? Zirwiskani nyengo na ndondomeko ya mweneko nyumba. Mwachiyelezgero, usange mwapangana nayo, fikani panyengo yake, vilije kanthu umo ŵanthu ŵakuwonera nyengo mu chigaŵa chinu. Kweniso, ntchiwemi kuti paulendo wakwamba muleke kutora nyengo yitali. Ŵapharazgi ŵanyake ŵaluso ŵakusachizga kuti ntchiwemi kumalizga mwaluŵiro sambiro, nangauli mweneko wangakhumba kuti wamanye vinandi. Ndipo mungayowoyanga chomene yayi mwekha. Mupani m’pata mweneko nyumba kuyowoya umo wakujipulikira.—Zinth. 10:19.

12. Kasi kufuma pakwamba chilato chithu chikwenera kuŵa vichi para tikwambiska sambiro la Baibolo la panyumba?

¹² Kufuma pakwamba, chilato chinu chikwenera kuŵa kovwira msambiri winu kumanya Yehova na Yesu kweniso kwamba kuŵatemwa. Mungachita nthena para mukugwiliskira ntchito Mazgu gha Chiuta m’malo mwa kuŵaphalira waka maghanoghano ghinu. (Mil. 10:25, 26) Mpositole Paulosi ntchiyelezgero chiwemi pa nkhani iyi, visambizgo vyake vikajinthanga pa Yesu Khristu, uyo Yehova wakamutuma kuti watovwire kumumanya makora na kwamba kumutemwa. (1 Kor. 2:1, 2) Paulosi wakalongosoraso mwakupulikikwa makora kuzirwa kwa kovwira ŵasambiri ŵaphya kuŵa na mikhaliro yiwemi iyo yingayaniskika na golide, siliva, na malibwe ghakuzirwa. (1 Kor. 3:11-15) Mikhaliro yakuzirwa iyi yikusazgapo chipulikano, vinjeru, umanyi, kweniso kopa Yehova. (Sal. 19:9, 10; Zinth. 3:13-15; 1 Pet. 1:7) Londezgani nthowa iyo Paulosi wakagwiliskiranga ntchito pakovwira ŵasambiri ŵinu kuŵa na chipulikano chakukhora kweniso kuŵa paubwezi wakukhora na Adada ŵawo ŵakuchanya.—2 Kor. 1:24.

13. Kasi tingalongora wuli kuzika na mahara apo tikovwira ŵanthu ŵakunweka? (2 Ŵakorinte 10:4, 5) (Wonaniso chithuzi.)

¹³ Para mukusambizga ŵanji yezgani Yesu pakuŵa ŵakuzika na ŵamahara. Gegani kufumba mafumbo agho ghangapangiska munthu kukhozgeka soni. Usange ntchakwenelera, fundo iyo wandayipulikiske makora mungayileka dankha, na kuzakaweleraposo nyengo yinyake. M’malo mwa kumuchichizga kugomezga chisambizgo chinyake pambere iyo wandakhorwe, mupani nyengo kuti unenesko ujinthe misisi mu mtima mwake. (Yoh. 16:12; Kol. 2:6, 7) Baibolo likuyowoya kuti visambizgo vyautesi vili nga ni “vinthu vyakukhora chomene” ivyo vikukhumbikwa ‘kuvigadabura.’ Mu chiyowoyero chakwambilira, Baibolo likugwiliskira ntchito mazgu agho ghakwimira linga ilo likwenera kuwiskika. (Ŵazgani 2 Ŵakorinte 10:4, 5.) Ntheura ntchipusu yayi kuti msambiri waleke kugomezga chinthu icho wachigomezga kwa nyengo yitali. Ipo tikwenera kumovwira msambiri kuti chakwamba wazenge linga liphya, icho chikung’anamura kumovwira kugomezga Yehova. Para tachita nthena chiŵenge chipusu kumusambizga kuti waleke vigomezgo ivyo vili kugandilira chomene mwa iyo.—Sal. 91:9.

USANGE ŴAKUNWEKA ŴAMBA KWIZA KU MAUNGANO

14. Kasi tingachita wuli na ŵakunweka awo ŵakwiza ku maungano ghithu?

¹⁴ Yehova wakukhazga kuti tichitenge vinthu mwambura kutemwera na ŵanthu awo ŵamba sono kuwungana vilije kanthu mtundu wawo, kasangiro kawo, panji uko ŵakulira. (Yak. 2:1-4, 9) Ntheura kasi tingalongora wuli chitemwa ku ŵanthu awo ŵamba sono kuwungana nase?

15-16. Kasi tingawovwira wuli ŵanthu awo ŵamba sono kuwungana nase kujipulika kuti ŵapokelereka?

¹⁵ Ŵanthu ŵanyake ŵakwiza ku maungano ghithu kuti ŵazakawone waka umo vikuŵira panji ŵangaŵa kuti ŵachiskika na munthu uyo wakukhala ku chigaŵa chinyake kuti ŵize ku maungano ghithu. Ntheura tingaziwulikanga yayi kuyowoya nawo ŵanthu ŵanthena, awo ŵiza kuzakawungana nase. Ŵapokelerani na mawoko ghaŵiri kuti ŵaŵe ŵakufwatuka. Ŵapemphani kuti mukhale nawo lumoza. Wonani nawo Baibolo linu kweniso mabuku agho tikusambilira, panji mungaŵapa ghawo. Kweniso, ghanaghanirani umo ŵakujipulikira. Mwanalume munyake uyo wakiza ku maungano wakaphalira mubali uyo wakamupokelera kuti wakafipanga mtima na malaya agho wakavwara. Mubali uyu wakamupangiska munthu uyu kuti wafwatuke ndipo wakamuphalira kuti Ŵakaboni ŵa Yehova nawo ŵakupambana yayi na ŵanthu ŵanyake. Pamanyuma munthu uyu wakaluta panthazi na kubatizika, kweni wakaluwa yayi umo mubali wakachitira nayo. Ndipouli, tikwenera kuŵa maso kuti para tikuyowoya na ŵalendo pambere maungano ghandambe panji para ghamara, tileke kuyowoya panji kuŵafumba vinthu ivyo vikutikhwaska yayi.—1 Pet. 4:15.

¹⁶ Tingachitiskaso ŵalendo ŵithu kuŵa ŵakufwatuka usange tingaleka kudumbiskana vinthu ivyo vingaŵayuyura, kuŵa maso na mazgoro ghithu pa maungano, kweniso kuyowoya mwantchindi pa vigaŵa vya maungano ivyo vikukhwaska ŵanthu awo Mbakaboni yayi panji vigomezgo vyawo. Gegani kuyowoya mazgu agho ghangaŵakhuŵazga panji kuŵapangiska kujiwona kuti mbawakawaka. (Tito 2:8; 3:2) Mwachiyelezgero, tikwenera yayi kuyuyura vigomezgo vya ŵanthu awo Mbakaboni yayi. (2 Kor. 6:3) Nakuti ŵabali awo ŵakudumba nkhani zachisanisani ndiwo ŵakwenera kuŵa maso chomene pa nkhani iyi. Ŵakweneraso kulongora kuti ŵakughanaghanira chomene ŵanthu awo Mbakaboni yayi mwa kulongosora mazgu panji fundo izo ŵangaleka kuzipulikiska.

17. Kasi chilato chithu ntchakuti wuli usange tasanga ŵanthu awo ŵali na “maghanoghano ghakwenelera” mu uteŵeti?

¹⁷ Ntchito yithu yakuzgora ŵanthu kuŵa ŵasambiri yikuŵa yaluŵiro chomene zuŵa lililose, ndipo tikulutilira kusanga ŵanthu awo ŵali na “maghanoghano ghakwenelera umoyo wamuyirayira.” (Mil. 13:48) Apo tikuchita mulimo uwu, tikwenera kuziwulika yayi kuŵapempha kuti tisambirenge nawo Baibolo panji kuŵachemerako ku maungano. Para tikuchita nthena, tingaŵawovwira kuti ŵambepo kwenda pa “nthowa . . . iyo yikuya ku umoyo.”—Mat. 7:14.