Yesu “Wakasambira Kupulikira”

Nyengo zose Yesu wakupulikira Yehova. (Yoh. 8:29) Ipo chifukwa wuli Baibolo likuyowoya kuti: “Wakasambira kupulikira kwizira mu vinthu ivyo wakasuzgika navyo”?—Heb. 5:8.

Apo wakaŵa pa charu chapasi, Yesu wakakumana na masuzgo agho kuchanya kukaŵavya. Wakalereka na ŵapapi ŵakugomezgeka kweni ŵambura kufikapo. (Luka 2:51) Wakatambuzgika na ŵalongozgi ŵankhaza ŵa chisopa kweniso ŵalara ŵa boma. (Mat. 26:59; Mrk. 15:15) Kweniso “wakajiyuyura ndipo wakapulikira m’paka nyifwa,” nyifwa yakuŵinya chomene.—Fil. 2:8.

Vinthu vyose ivyo Yesu wakajumphamo ivi, vikamusambizga kupulikira uko wakaŵa kuti wandasambirepo kuchanya. Lekani iyo ni Themba liwemi chomene kweniso Wasembe Mukuru uyo wakutipulikiska. (Heb. 4:15; 5:9) Kweniso Yesu wali kuzgokaso wakuzirwa chomene kwa Yehova chifukwa cha kupulikira kufuma pa vinthu ivyo wakasuzgika navyo. Nase tingaŵa ŵakuzirwa chomene kwa Yehova kweniso ŵakukhumbikwa pa uteŵeti uliwose uwo wangatipa para tikulutilira kupulikira nanga ni apo ntchakusuzga kuchita nthena.—Yak. 1:4.