NKHANI YAKUSAMBIRA 43
SUMU 41 Mupulike Lurombo Lwane
Kumbukani Kulombera Ŵanji
‘Mulomberanenge. Ŵeyelero la munthu murunji lili na nkhongono yikuru chomene.’—YAK. 5:16.
FUNDO YIKURU
Mu nkhani iyi tiwonenge chifukwa icho ntchakuzirwa kulombera ŵanji kweniso masachizgo agho ghangatovwira kuchita nthena.
1. Kasi tikumanya wuli kuti malurombo ghithu ngakuzirwa kwa Yehova?
LUROMBO ntchawanangwa chapadera icho tili kupika. Ghanaghanirani fundo iyi: Yehova wali kupeleka mauteŵeti ghanyake ku ŵangelo. (Sal. 91:11) Wali kupaso Mwana wake maudindo ghakuzirwa chomene. (Mat. 28:18) Kweni wuli pa nkhani ya kutegherezga malurombo? Uwu ni mulimo uwo wali kupeleka kwa munyake yayi. Yehova uyo ‘ngwakupulika malurombo,’ wakutegherezga yekha malurombo ghithu.—Sal. 65:2.
2. Kasi mpositole Paulosi wali kutilekera chiyelezgero wuli pa nkhani ya kulombera ŵanji?
2 Nangauli tingafwatuka kulomba kwa Yehova vyakukhwaskana na ise taŵene, kweni tikweneraso kulombera ŵanji. Ndivyo mpositole Paulosi wakachita. Mwachiyelezgero, wakalembera mpingo wa ku Efeso kuti: “Nkhulutilira kumuzunurani mu malurombo ghane.” (Efe. 1:16) Paulosi wakalomberangaso munthu waliyose payekhapayekha. Mwachiyelezgero, wakaphalira Timote kuti: “Nkhuwonga Chiuta, . . . ndipo usiku na muhanya nkhuleka yayi kukukumbuka mu maŵeyelero ghane.” (2 Tim. 1:3) Paulosi nayo wakaŵa na masuzgo ghake agho wakakhumbikwanga kuti waghalombere. (2 Kor. 11:23; 12:7, 8) Ndipouli, wakapaturanga nyengo kuti walombere ŵanji.
3. Chifukwa wuli nyengo zinyake tingaluwa kulombera ŵanji?
3 Nyengo zinyake tingaluwa kulombera ŵanji. Chifukwa wuli? Mudumbu munyake zina lake Sabrinaa wakulongosora chifukwa chimoza icho chingapangiska. Iyo wakuti: “Mazuŵa ghano taŵanthu tikutangwanika chomene. Tingatimbanizgika na masuzgo ghithu ivyo vingachitiska kuti tilomberenge vyakukhumbikwa vithu pera.” Kasi namwe vyanthena vili kumuchitikiranipo? Usange ni nthena, nkhani iyi yingamovwirani. Yilongosorenge (1) chifukwa icho ntchakuzirwa kulombera ŵanji kweniso (2) masachizgo agho ghangatovwira kuchita nthena.
CHIFUKWA WULI TIKWENERA KULOMBERA ŴANJI?
4-5. Chifukwa wuli malurombo ghithu agho tikulombera ŵanji ghangaŵa “na nkhongono yikuru chomene”? (Yakobe 5:16)
4 Kulombera ŵanji kuli “na nkhongono yikuru chomene.” (Ŵazgani Yakobe 5:16.) Kasi kulombera ŵanji kungasintha nadi umo vinthu viliri pa umoyo wawo? Enya, kungasintha. Yesu wakati wamanya kuti mpositole Petrosi wamukanenge, wakati: “Nakuŵeyelelera kwa Chiuta kuti chipulikano chako chileke kulopwa.” (Luka 22:32) Paulosi nayo wakamanyanga kuti lurombo lungasintha vinthu. Apo wakajalirika mu jele kwambura chifukwa ku Romu, wakalembera Filimoni kuti: “Nkhugomezga kuti niwezgekerenge kwa imwe chifukwa cha malurombo ghinu.” (Filim. 22) Ndipo vikachitika nadi, mwaluŵiro Paulosi wakafumiskika mu jele ndipo wakambiraso ntchito yake yakupharazga.
5 Kweni ivi vikung’anamura kuti malurombo ghithu ghangamuchichizga Yehova kuchitapo kanthu yayi. Iyo wakumanya ivyo ŵateŵeti ŵake ŵakufipa navyo mtima, ndipo nyengo zinyake wakusankha kuchitapo kanthu pa ivyo ŵamupempha. Kumanya fundo iyi kungatovwira kulomba kwa Yehova kufumira pasi pa mtima vyakukhwaskana na nkhani yinyake, na kuleka vyose mu mawoko ghake uku tikugomezga kuti wazgorenge munthowa yiwemi chomene.—Sal. 37:5.
6. Kasi kulombera ŵanji kungakhwaska wuli umo tikuŵawonera? (1 Petrosi 3:8)
6 Kulombera ŵanji kungatovwira kuti tiŵe “ŵa mtima wa chiwuravi.” (Ŵazgani 1 Petrosi 3:8.) Munthu wachiwuravi ni uyo para wawona munyake wakusuzgika wakuŵa wakukhumbisiska kumovwira. (Mrk. 1:40, 41) Mulara munyake zina lake Michael wakuti: “Para nkhulombera ŵanji pa ivyo ŵakukhumbikwira, nkhupulikiska makora masuzgo agho ŵakusangana nagho ndipo ivi vikupangiska kuti niŵatemwenge chomene. Nkhujipulika kuti nili pafupi nawo, nangauli iwo ŵangaŵa kuti ŵakumanya yayi.” Mulara munyake zina lake Richard wakulongosora uwemi unyake wakuchita nthena. Iyo wakuti: “Para tikulombera munthu munyake, tikuchiskika chomene kuchitapo kanthu kuti timovwire.” Wakusazgirapo kuti: “Usange tawovwira munthu uyo tikumulombera, tikuŵa kuti tikovwira kuzgora lurombo ulo tikalomba.”
7. Kasi kulombera ŵanji kungatovwira wuli kuti tileke kughanaghanira masuzgo ghithu pera? (Ŵafilipi 2:3, 4) (Wonaniso vithuzi.)
7 Kulombera ŵanji kukutovwira kuti tiwonenge masuzgo ghithu mwakwenelera. (Ŵazgani Ŵafilipi 2:3, 4.) Tose tikukumana na masuzgo chifukwa chakuti tikukhala mu charu icho chikuwusika na Dyabulosi. (1 Yoh. 5:19; Chivu. 12:12) Usange nkhaluso kithu kulombera ŵanji, tikukumbuka kuti “visuzgo vyakuyana waka vikuŵachitikira ŵabali [ŵithu] wose awo ŵali mu charu.” (1 Pet. 5:9) Mupayiniya munyake zina lake Katherine wakuti: “Kulombera ŵanji kukunikumbuska kuti ŵanji nawo ŵakusangana na masuzgo. Fundo iyi yikunovwira kuti nileke kuŵika waka mtima pa masuzgo ghane.”
Kulombera ŵanji kukutovwira kuti tileke kughanaghanira waka za masuzgo ghithu (Wonani ndime 7)d
ŴAKUKHUMBIKWIRA MALUROMBO GHITHU
8. Yowoyani viyelezgero vya ŵanthu awo tingaŵalombera.
8 Kasi mbanjani awo tingaŵalombera? Tingalombera ŵanthu ŵakupambanapambana. Mwachiyelezgero awo ŵakulwaralwara, ŵawukirano awo ŵakuneneka na kuchichizgika na ŵanyawo ku sukulu kuti ŵachite vinthu viheni, panjiso ŵanji awo ŵakukumana na masuzgo chifukwa cha uchekuru. Ŵakhristu ŵanyithu ŵanandi ŵakususkika na ŵachibali ŵawo panji na boma. (Mat. 10:18, 36; Mil. 12:5) Ŵabali ŵithu ŵanyake ŵali kuleka nyumba zawo chifukwa cha vivulupi ivyo vikuchitika chifukwa cha ndyali. Ŵanji ŵakusuzgika chifukwa cha masoka ghachilengiwa. Nyengo zinyake tingaŵa kuti tikuŵamanya makora yayi ŵabali na ŵadumbu aŵa. Kweni usange tikuŵalombera, tikulongora kuti tikulondezga dango la Yesu lakuti “mutemwanenge.”—Yoh. 13:34.
9. Chifukwa wuli tikwenera kulombera awo ŵakutilongozga mu gulu la Yehova kusazgapo na ŵawoli ŵawo?
9 Tingalomberaso awo ŵakulongozga mu gulu la Yehova. Ŵanthu aŵa ŵakusazgapo ŵa mu Wupu Wakulongozga na awo ŵakuŵawovwira, ŵabali ŵa mu Komiti ya Munthavi, ŵabali awo ŵakulaŵilira madipatimenti ghakupambanapambana mu maofesi gha minthavi, ŵalaŵiliri ŵa dera, ŵalara ŵa mpingo, na ŵateŵeti ŵakovwira. Ŵanandi mwa ŵabali aŵa ŵakulimbana na masuzgo ghawo apo ŵakuyezgayezga kuti ŵatovwire. (2 Kor. 12:15) Mwachiyelezgero, mulaŵiliri wa dera munyake zina lake Mark wakuti: “Limoza mwa masuzgo ghakuru chomene, ndakuti nkhukhala kutali na ŵapapi ŵane awo mbachekuru. Wose ŵakulwaralwara. Nangauli mudumbu wane na mfumu wake ŵakuŵapwelelera, kweni vikuniŵinya chomene chifukwa nkhuchita vinandi yayi pakuŵapwelelera.” Kwali tikumanya masuzgo agho ŵabali aŵa ŵakukumana nagho panji yayi, kweni tingachita makora kuŵalombera. (1 Tes. 5:12, 13) Tingalomberaso ŵawoli ŵa ŵabali aŵa, chifukwa ŵakovwira ŵafumu ŵawo mwakugomezgeka kuti ŵalutilire kuchita mauteŵeti ghawo.
10-11. Kasi Yehova wakukondwa na malurombo agho tikulombera ŵabali na ŵadumbu ŵithu mwachisanisani? Longosorani.
10 Nga umo tadumbiskirana kale, kanandi tikuŵalombera ŵabali na ŵadumbu ŵakupambanapambana. Mwachiyelezgero, nanga vingaŵa kuti tikughanaghanira waliyose yayi wakuti timulombere, tingamupempha Yehova kuti wawovwire awo ŵali mu jele panji kupembuzga awo ŵataya ŵakutemweka ŵawo. Mulara munyake zina lake Donald wakuti, “Pali ŵabali na ŵadumbu ŵanandi awo ŵakusangana na masuzgo, mwakuti nyengo zinyake tikulomba waka lurombo lwachisanisani mwakuti tiŵasazgemo wose awo ŵakusangana na masuzgo.”
11 Kasi malurombo ghanthena ghakumukondweska Yehova? Enya! Vili nthena chifukwa chakuti tikumanya yayi ivyo ŵabali na ŵadumbu ŵakukhumbikwira nadi. Ntheura ntchakuzirwa kulomba mwachisanisani apo tikulombera ŵabali na ŵadumbu. (Yoh. 17:20; Efe. 6:18) Malurombo ghanthena ghakupeleka ukaboni wakuti ‘tikutemwa ŵabali wose.’—1 Pet. 2:17.
PARA TIKULOMBERA WALIYOSE PAYEKHA
12. Kasi kuŵikako mahara ku ŵanthu kungatovwira wuli kuti tilomberenge ŵanji mwakudunjika?
12 Muŵikengeko mahara ku ŵanthu. Padera pa kulombera ŵabali na ŵadumbu mwachisanisani, tikweneraso kulombera munthu waliyose payekha mwakuchita kumuzunura zina. Kasi pali munthu munyake mu mpingo mwinu uyo wakusuzgika na nthenda yambura kukonda munkhwala? Kasi pali muwukirano uyo wamba kulopwa chifukwa cha masuzgo agho wakusangana nagho ku sukulu? Kasi pali mupapi uyo wakuyezgayezga kulera yekha mwana ‘pa kumulanga na kumusambizga maghanoghano gha Yehova’? (Efe. 6:4) Kuŵikako mahara ku ŵanji kumovwiraninge kuti muŵatemwenge chomene, ndipo mukhumbisiskenge chomene kuŵalombera.b—Rom. 12:15.
13. Kasi tingalombera wuli ŵanthu awo tikumanyana yayi?
13 Lomberani ŵanji mwakuchita kuŵazunura mazina ghawo. Tingalombera nanga ni ŵanthu awo tindakumanepo nawo. Mwachiyelezgero, ghanaghanirani vya ŵabali na ŵadumbu ŵithu awo ŵali mu jele mu vyaru nga ni Crimea, Eritrea, Russia, na Singapore. Mungasanga mazina gha ŵabali na ŵadumbu aŵa pa jw.org.c Mulaŵiliri wa dera munyake zina lake Brian wakuti: “Nasanga kuti kulemba zina la mubali panji mudumbu uyo wali mu jele na kulizunura mwakukwezga, kukunovwira kuti nimukumbukenge munthu uyo na kumuzunura mu malurombo ghane.”
14-15. Kasi tingachita wuli kuti malurombo ghithu ghaŵenge ghakudunjika?
14 Mulombenge mwakudunjika ivyo mukukhumba. Michael, uyo tamuzunura kale wakusachizga kuti: “Para naŵazga nkhani pa jw.org za ŵabali awo ŵali mu jele, nkhuyezga kughanaghanira umo ningajipulikira viŵenge kuti ndine najalirika mu jele. Nkhumanya kuti natenge nifipirenge mtima muwoli wane, ndipo natenge niwoneseskenge kuti wakupwelelereka makora. Ntheura ivi vikunovwira kuti nighanaghanire chakuti ningaŵalombera ŵabali awo ŵali mu jele awo ŵali kutora.”—Heb. 13:3, mazgu ghamusi.
15 Para tikughanaghanira ivyo ŵabali awo ŵali mu jele ŵakusangana navyo zuŵa na zuŵa, vingatovwira kuti tisange nthowa zinyake izo tingalombera kuti malurombo ghithu ghaŵe ghakudunjika. Mwachiyelezgero, tingalomba kuti ŵalinda ŵa jele ŵaŵalongorenge lusungu ŵabali ŵithu kweniso kuti ŵamazaza ŵaŵazomerezge ŵabali ŵithu kuti ŵasopenge mwawanangwa. (1 Tim. 2:1, 2) Tingalomba kuti ŵabali mu mpingo ŵakhozgeke na chiyelezgero chiwemi icho mubali panji mudumbu uyo wali mu jele wakulongora, panji kuti ŵanthu awo Mbakaboni yayi ŵawone nkharo yiwemi iyo wakulongora Kaboni uyo wali mu jele, ndipo paumaliro ŵategherezge uthenga withu. (1 Pet. 2:12) Ndipo tingachitaso mwakuyana waka para tikulombera ŵabali na ŵadumbu ŵithu awo ŵakuzizipizga viyezgo. Para tikuŵikako mahara ku ŵanji, tikulombera ŵanji mwakuchita kuŵazunura mazina ghawo, kweniso kulomba mwakudunjika ivyo tikukhumba, tikulongora kuti ‘tikutemwana chomene na ŵakugomezga ŵanyithu.’—1 Tes. 3:12.
KUWONA MWAKWENELERA MALUROMBO GHITHU
16. Kasi tingachita wuli kuti tilutilire kuwona mwakwenelera malurombo ghithu? (Mateyu 6:8)
16 Nga umo tawonera, para tikulombera munthu munyake, nyengo zinyake vingawovwira kuti vinthu visinthe pa umoyo wake. Ndipouli, tikwenera kuwona vinthu mwakwenelera. Para tikulomba, tikuŵa kuti tikumuphalira Yehova vinthu ivyo wakuleka kuvimanya yayi; panji kumuphalira umo wakwenera kuchitira na suzgo linyake. Yehova wakumanya ivyo ŵateŵeti ŵake ŵakukhumbikwira nanga vingaŵa kuti ise panji awo tikukhumba kuŵalombera ŵandavimanye. (Ŵazgani Mateyu 6:8.) Ipo chifukwa wuli pera tikwenera kulombera ŵanji? Padera pa vifukwa ivyo tavizunura kale mu nkhani iyi, tikwenera kuchita nthena kuti tilongore kuti tikughanaghanira ŵanji. Chitemwa ndicho chikutichiska kuti tilomberanenge. Ndipo Yehova wakukondwa kuwona kuti tikuyezga mukhaliro wake wa chitemwa.
17-18. Kasi malurombo agho tikulombera ŵanji tingaghayaniska na vichi?
17 Nanga malurombo ghithu ghangawoneka kuti ghandasinthe suzgo linyake ilo talomberanga, kweni ghakulongora kuti tikuŵatemwa ŵabali na ŵadumbu ŵithu, ndipo Yehova wakuwona. Tingayelezgera munthowa iyi: Ghanaghanirani mbumba yinyake iyo yili na ŵana ŵaŵiri ŵachokoŵachoko, kanyamata na kasungwana. Kanyamata nkhalwari ndipo kagona pa bedi. Mbwenu kasungwana kakupempha adada ŵake kuti: “Chonde adada movwirani mudumbu wane. Wakomwa chomene!” Dada wakuŵa kuti wakumovwira kale mwana uyo walwara; wakumutemwa mwana wake ndipo wakumupwelelera. Ndipouli, dada wakuŵa wakukondwa chomene kuwona kuti kamwana kake kasungwana kakumufipira mtima chomene mudumbu wake mwakuti kakumupempha iyo kuti wamovwire.
18 Mwakuyana waka, Yehova wakutichiska kuti tifipiranenge mtima na kulomberana. Apo tikuchita nthena, malurombo ghithu ghakuvumbura kuti tikujighanaghanira tekha yayi, kweni tikufipiraso mtima ŵanji, ndipo Yehova wakuwona ivyo tikuchita. (2 Tes. 1:3; Heb. 6:10) Kweniso, nga umo tadumbiskirana kale, nyengo zinyake malurombo ghithu ghangasintha umo vinthu vyanguŵira ku ŵanji. Ntheura tiyeni tichite vyose ivyo tingafiska kuti tikumbukenge kulombera ŵanji.
SUMU 101 Kuchita Vinthu mu Umoza
a Mazina ghanyake ghasinthika.
b Wonelerani vidiyo pa jw.org ya mutu wakuti Takeshi Shimizu: Yehova ‘Wakupulika Malurombo’
c Kuti musange mazina gha ŵabali na ŵadumbu awo ŵali mu jele, penjani pa jw.org mazgu ghakuti “Ŵakaboni ŵa Yehova Ŵakujalirika Chifukwa cha Chipulikano Chawo—Kuyana na Malo.”
d MAZGU GHAKULONGOSORA CHITHUZI: Ŵabali na ŵadumbu awo nawo ŵakusangana na masuzgo ŵakulombera ŵanji.