NKHANI YAKUSAMBIRA 42
SUMU 44 Lurombo lwa Munthu Wakusuzgika
Ivyo Mungachita Kuti Malurombo Ghinu Ghaŵenge Ghakupulikikwa Makora
“Nkhuchema na mtima wane wose. Nizgorani, A Yehova.”—SAL. 119:145.
FUNDO YIKURU
Mu nkhani iyi tiwonenge umo kughanaghanirapo pa malurombo agho ghakusangika mu Baibolo, kungatovwilira kuti malurombo ghithu ghaŵe ghakupulikikwa makora.
1-2. (a) Kasi ntchivichi chingatitondeska kufwatuka kumuphalira Yehova umo tikujipulikira? (b) Kasi tikumanya wuli kuti Yehova wakupulika malurombo ghithu?
KASI nyengo zinyake mukujipulika kuti malurombo ghinu ghamba kuŵa ghakuwerezgawerezga, ghapachanyapachanya, panji ghachizgoŵi waka? Usange ni nthena, muli mwekha yayi. Chifukwa chakuti tikuŵa ŵakutangwanika, nyengo zinyake vingatichitiska kuti tichimbilirenge waka pakulomba. Panji chingatiŵiraso chakusuzga kufwatuka kumuphalira Yehova umo tikujipulikira chifukwa chakuti tikujiwona ŵambura kwenelera kwa iyo.
2 Baibolo likutisimikizgira kuti chakuzirwa chomene kwa Yehova ni umo malurombo ghithu ghaliri yayi, kweni kuti ghafumenge mu mtima wakujiyuyura. Iyo wakupulika “pempho la ŵakuzika.” (Sal. 10:17) Wakutegherezga mwakupwelelera vyose ivyo tikumuphalira chifukwa wakutitemwa.—Sal. 139:1-3.
3. Kasi tiwonenge mafumbo wuli mu nkhani iyi?
3 Tingajifumba kuti: Chifukwa wuli tingalomba kwa Yehova na mtima wose? Kasi tingachita wuli kuti malurombo ghithu ghaŵe ghakupulikikwa makora? Kasi kughanaghanirapo pa malurombo ghakufuma pasi pa mtima agho ghali mu Baibolo, kungatovwira wuli kuti tisinthe umo tikulombera? Ndipo kasi tingachita wuli para tasuzgika chomene maghanoghano mwakuti tikutondeka na kulongosora wuwo umo tikujipulikira? Tiyeni tiwone mazgoro gha mafumbo agha.
LOMBANI KWA YEHOVA NA MTIMA WOSE
4. Kasi ntchivichi chingatovwira kulomba kwa Yehova na mtima wose? (Salimo 119:145)
4 Para tapulikiska kuti Yehova ni mubwezi wakugomezgeka uyo wakutikhumbira viwemi, tizamufwatuka kumuphalira chilichose icho chili ku mtima kwithu. Ndimo vikaŵira na uyo wakalemba Salimo 119, wakaŵa paubwezi wakukhora na Yehova. Nayo wakakumananga na masuzgo pa umoyo wake. Ŵanthu ŵanyake ŵakamupusikizgira mautesi ghaheni chomene. (Sal. 119:23, 69, 78) Kweniso nyengo zinyake wakagongowanga chifukwa wakabudiskanga vinthu vinyake. (Sal. 119:5) Nangauli vikaŵa nthena, kweni wakawopanga yayi kulomba kwa Yehova na mtima wose.—Ŵazgani Salimo 119:145.
5. Chifukwa wuli tikwenera kuzomerezga yayi maghanoghano ghambura kwenelera kutitondeska kulomba? Yowoyani chiyelezgero.
5 Yehova wakukhumba kuti nanga ni awo ŵachita kwananga kukuru ŵalombenge kwa iyo. (Yes. 55:6, 7) Ntheura tingazomerezganga yayi maghanoghano ghambura kwenelera kutitondeska kulomba. Mwachiyelezgero, wakwendeska ndege wakumanya kuti wakwenera kuyowoyeskana na ŵanthu ŵapasi awo ŵakumulongozga para wakukhumbikwira wovwiri. Kasi mukughanaghana kuti wangaziwulika kuyowoyeskana nawo chifukwa chakopa kuti soni zingamukora pakuti wazgeŵa panji wabudiska vinyake? Yayi! Mwakuyana waka, nanga vingaŵa kuti nyengo zinyake tapuluka panji tachita kwananga, tingalomba kwa Yehova na mtima wose.—Sal. 119:25, 176.
UMO MUNGACHITIRA KUTI MALUROMBO GHINU GHAŴE GHAKUPULIKIKWA MAKORA
6-7. Kasi kughanaghanirapo pa mikhaliro ya Yehova kungatovwira wuli kuti malurombo ghithu ghaŵe ghakupulikikwa makora? Yowoyani chiyelezgero. (Wonaniso mazgu ghamusi.)
6 Para tikuyowoya mwakufwatuka na Yehova mwa kumuphalira maghanoghano ghithu, kweniso umo tikujipulikira, malurombo ghithu ghaŵenge ghakupulikikwa makora. Ipo kasi tingachita wuli kuti malurombo ghithu ghaŵenge ghakufumira pasi pa mtima?
7 Ghanaghaniranipo pa mikhaliro ya Yehova.a Para tikughanaghanirapo chomene pa mikhaliro ya Yehova, tiŵengeso ŵakufwatuka kuyowoya maghanoghano ghithu kweniso umo tikujipulikira. (Sal. 145:8, 9, 18) Wonani chiyelezgero cha mudumbu munyake zina lake Kristine, uyo adada ŵake ŵakaŵa ŵambembe chomene. Iyo wakuti: “Chikaŵa chakusuzga chomene kuyowoya na Yehova nga ni Dada. Nkhawonanga kuti Yehova wazamunijowora chifukwa cha ivyo nkhabudiskanga.” Kasi ni mukhaliro wuli wa Yehova uwo ukamovwira? Iyo wakuti: “Chitemwa chakugomezgeka cha Yehova chikunovwira kuti nijiwonenge wakuvikilirika. Nkhumanya kuti wazamunijoworapo yayi. Nanga ningawa, waniwuskenge mwachitemwa. Ivi vikunovwira kuti nimuphalirenge vinthu ivyo nkhukondwa navyo kweniso ivyo vikunipangiska kwenjerwa.”
8-9. Kasi kughanaghanirapo dankha ivyo tikukhumba kuyowoya pambere tindalombe kuli na vyandulo wuli? Yowoyani chiyelezgero.
8 Ghanaghaniranipo ivyo muyowoyenge. Pambere mundalombe, mungachita makora kujifumba mafumbo. Mwachiyelezgero: ‘Kasi ni masuzgo wuli agho nkhukumana nagho pasono? Kasi walipo uyo nkhwenera kumugowokera? Kasi pali chiyezgo chinyake icho nkhukhumbikwira wovwiri wa Yehova kuti nitonde?’ (2 Mathe. 19:15-19) Tingasambirakoso ku lurombo lwa chiyelezgero lwa Yesu, na kughanaghanira ivyo tingamupempha Yehova vyakukhwaskana na zina lake, Ufumu wake, na khumbo lake.—Mat. 6:9, 10.
9 Apo mudumbu munyake zina lake Aliska wakaphalirika kuti mfumu wake wali na kansa ya mu wongo, chikamuŵira chakusuzga kuti walombe. Iyo wakuti: “Nkhasuzgika chomene maghanoghano mwakuti nkhatondekanga na kughanaghana makora ivyo ningalomba.” Kasi ntchivichi chamovwira? Iyo wakuti: “Pambere nindalombe, nkhukhala dankha kanyengo kachoko waka kuti nighanaghanirepo ivyo ningayowoya, ndipo ivi vyanovwira chomene kuwoneseska kuti malurombo ghane ghaleke kuŵa waka ghakukhwaskana na vyakukhumba vyane pera. Nthowa iyi yikunovwira kuti nijipulikengeko makora kweniso kuti maghanoghano ghane ghaŵenge ghakukhazikika para nkhulomba.”
10. Chifukwa wuli nyengo zinyake tikwenera kufwasa na kulomba malurombo ghatalighatali? (Wonaniso vithuzi.)
10 Kuchimbilira yayi pakulomba. Nangauli malurombo ghafupighafupi nagho ngawemi waka, kweni para tingalomba malurombo ghatalighatali vingatovwira kuti tifwase kuyowoya vyose ivyo vili mu mtima withu.b Elijah, mfumu wa Aliska wakuti: “Nkhuyezga kulomba kanandi waka zuŵa lose, ndipo nkhuwona kuti ubwezi wane na Yehova wakhora chomene chifukwa nkhupatura nyengo na kulomba malurombo ghatalighatali. Nkhumanya kuti Yehova wakuchita kukhazga waka yayi kuti nimalizge kuyowoya nayo, ntheura nkhufwasa para nkhulomba.” Yezgani kuchita ivi: Sangani nyengo na malo agho mungalomba lurombo lutali, panji nanga mungaŵa mwakukwezga, kwambura chakutimbanizga chilichose, ndipo muchitenge nthena mwakuwerezgawerezga.
Sangani nyengo na malo agho mungalomba kwa Adada ŵinu kwambura chakutimbanizga chilichose (Wonani ndime 10)
GHANAGHANIRANIPO PA MALUROMBO GHAKUFUMIRA PASI PA MTIMA AGHO GHAKUSANGIKA MU BAIBOLO
11. Kasi tikusanga chandulo wuli para tikughanaghanirapo pa malurombo ghakufumira pasi pa mtima agho ghakusangika mu Baibolo? (Wonaniso bokosi lakuti “Kasi Namwe Mukujipulika nga Ndiwo?”)
11 Para mungaghanaghanirapo pa malurombo ghakufumira pasi pa mtima, sumu zakulumba Chiuta, panji masalimo, ivyo vikusangika mu Baibolo, vingamovwirani chomene. Apo mukuwona umo ŵateŵeti ŵa Chiuta ŵakayowoyeranga maghanoghano ghawo mwakufwatuka, namwe muchiskikenge kujura mtima winu kwa Yehova. Mungasangaso fundo zinyake ziphya zakulumba Yehova izo namwe mungasazgamo mu malurombo ghinu. Ndipo nyengo zinyake mungasanga malurombo agho ghakukolerana na umo vinthu viliri pa umoyo winu.
12. Kasi ni mafumbo wuli agho tingajifumba apo tikughanaghanirapo ivyo vili mu lurombo lwa mu Baibolo?
12 Apo mukughanaghanirapo ivyo vili mu lurombo lwa mu Baibolo, jifumbani kuti: ‘Kasi ni njani uyo wakayowoya mazgu agha ndipo vinthu vikaŵa wuli pa umoyo wake? Kasi ivyo vili mu lurombo ulu vikukolerana na umo vinthu viliri kwa ine? Kasi ningasambirapo vichi?’ Nyengo zinyake mungakhumbikwira kupenjerezgaso fundo zinyake kuti muzgore mafumbo agha, ndipo kuchita nthena nkhwakovwira chomene. Wonani viyelezgero vichoko waka ivi.
13. Kasi tingasambirako vichi kwa Hana pa nkhani ya lurombo? (1 Samuyeli 1:10, 11) (Wonaniso chithuzi.)
13 Ŵazgani 1 Samuyeli 1:10, 11. Apo Hana wakalombanga lurombo ulu, wakaŵa na masuzgo ghaŵiri ghakurughakuru. Wakaŵa chumba, kweniso muwolimwa munyake wakamunyozanga. (1 Sam. 1:4-7) Usange mukusangana na suzgo lambura kumara, kasi mungasambirako vichi ku lurombo lwa Hana? Hana wakapatura nyengo na kulomba lurombo lutali, kumuphalira Chiuta vyose ivyo wakasuzgikanga navyo mu mtima wake, ndipo ivi vikamovwira kuti wajipulike makora. (1 Sam. 1:12, 18) Nase tingajipulika makora para ‘katundu withu tikumuthwikiska Yehova’ mwa kumulongosolera umo tikujipulikira chifukwa cha masuzgo agho tikukumana nagho.—Sal. 55:22.
Hana wakaŵa chumba kweniso muwolimwa munyake wakamunyozanga kanandi waka, kweni iyo wakamukhutulira Yehova vyose ivyo vikaŵa mu mtima wake (Wonani ndime 13)
14. (a) Kasi tikusambirakoso vichi kwa Hana? (b) Kasi kughanaghanirapo pa Malemba kungatovwira wuli kuti malurombo ghithu ghaŵenge ghawemi chomene? (Wonaniso mazgu ghamusi.)
14 Vyaka vichoko waka pamanyuma pakuti mwana wake Samuyeli wababika, Hana wakamupeleka kwa Wasembe Mukuru Eli. (1 Sam. 1:24-28) Mu lurombo lwake lwakufumira pasi pa mtima, wakaphalira Yehova kuti wakumuwonga chifukwa chakuti wakuvikilira na kupwelelera ŵateŵeti ŵake ŵakugomezgeka.c (1 Sam. 2:1, 8, 9) Masuzgo agho wakakumananga nagho kunyumba kwake ghakaŵa kuti ghandafumepo, kweni Hana wakaŵika mtima pa umo Yehova wakamutumbikiranga. Kasi tikusambirapo vichi? Nase tingafiska kuzizipizga masuzgo ghambura kumara agho tikusangana nagho para tikuŵika mtima pa umo Yehova wakutovwilira m’paka sono.
15. Para tikusangana na vinthu vyambura urunji, kasi tingasambirako vichi ku lurombo lwa ntchimi Yeremiya? (Yeremiya 12:1)
15 Ŵazgani Yeremiya 12:1. Pa nyengo yinyake, ntchimi Yeremiya yikasuzgika chomene maghanoghano chifukwa cha kuwona kuti ŵaheni vinthu vikuŵayendera. Kweniso wakagongoweskeka chifukwa cha umo Ŵaisrayeli ŵanyake ŵakachitiranga nayo vinthu. (Yer. 20:7, 8) Nase tingajipulika nga ndiyo para tikuwona ŵanthu ŵaheni vinthu vikuŵayendera panji para ŵanthu ŵakutinena. Nangauli Yeremiya wakayowoya umo wakakhwaskikira na vinthu ivi, kweni wakayowoyapo yayi kuti ni Yehova wapangiska. Wakati wawona umo Yehova wakachitira na ŵanthu ŵake awo ŵakamugalukira, wakwenera kuti wakamba kumugomezga chomene Chiuta kuti wakuchita mwaurunji. (Yer. 32:19) Nase tingafwatuka kumuphalira Yehova mu lurombo vinthu ivyo vikutikwenyerezga, uku tikugomezga kuti pa nyengo yake yakwenelera wazamunozga vinthu vyose vyambura urunji ivyo tikusangana navyo pasono.
16. Usange tikutondeka kuchita vinandi chifukwa cha umo vinthu viliri pa umoyo withu, kasi tingasambirako vichi ku lurombo lwa Mulevi uyo wakaŵa ku wuzga? (Salimo 42:1-4) (Wonaniso vithuzi.)
16 Ŵazgani Salimo 42:1-4. Sumu iyi yikalembeka na Mulevi uyo wakaŵa ku wuzga ndipo wakatondekanga kuchita vinthu lumoza na Ŵaisrayeli ŵanyake. Salimo lake likuvumbura umo wakajipulikiranga. Nase tingajipulika nga ndiyo para tikutondeka kufumapo pa nyumba panji para tajalirika mu jele chifukwa cha chipulikano chithu. Tingamba kusinthasintha umo tikujipulikira, nyengo zinyake tingajipulika makora waka, kweni nyengo zinyake tingagongoweskeka. Ndipouli, tikwenera kumuphalira Yehova mu lurombo umo tikujipulikira. Ivi vingatovwira kuti tisande maghanoghano ghithu na kwamba kuwona vinthu mwakwenelera. Mwachiyelezgero, Mulevi uyu wakamanya kuti wakaŵa na mipata yinyake yakulumbira Yehova. (Sal. 42:5) Wakaghanaghaniraso umo Yehova wakamupweleleranga. (Sal. 42:8) Kulomba kwa Chiuta mwakufumira pasi pa mtima kungatovwira kusanda chifukwa icho tikujipulikira nthena, kwamba kuwona vinthu mwakwenelera, kweniso kusanga nkhongono zakuzizipizgira.
Mulevi uyo wakalemba Salimo 42 wakamuphalira Chiuta vyose ivyo vikaŵa mu mtima wake. Para tikumuphalira Chiuta mu lurombo umo tikujipulikira, vingatovwira kuti tambe kuwona vinthu mwakwenelera (Wonani ndime 16)
17. (a) Kasi tingasambirapo vichi pa lurombo lwa ntchimi Yona? (Yona 2:1, 2) (b) Kasi mazgu ghanyake agho ghali mu Masalimo ghangatovwira wuli para tasangana na masuzgo? (Wonani mazgu ghamusi.)
17 Ŵazgani Yona 2:1, 2. Ntchimi Yona yikalomba lurombo ulu apo yikaŵa munthumbo mwa chisomba. Nangauli Yona wakamupulikira yayi Yehova, kweni wakaŵa na chigomezgo chose kuti Chiuta wapulikenge lurombo lwake. Apo wakamuŵeyeleranga Yehova, Yona wakagwiliskira ntchito mazgu ghanandi agho ghakusangika mu Masalimo.d Wakwenera kuti wakaghamanyanga makora Masalimo agha. Chifukwa cha kughanaghanirapo pa Masalimo agha, vikamovwira kusimikizga kuti Yehova wamovwirenge. Mwakuyana waka, para tikuyezga kusunga pa mtima mavesi ghanyake gha mu Baibolo, chizamuŵa chipusu kughakumbuka ndipo ghazamutipembuzga apo tikulomba kwa Yehova mu nyengo zakusuzga.
LUTILIRANI KUSENDELERA KWA YEHOVA MU LUROMBO
18-19. Usange nyengo zinyake vikutisuzga kulongosora umo tikujipulikira apo tikulomba, kasi lemba la Ŵaroma 8:26, 27, likutisimikizgira vichi? Yowoyani chiyelezgero.
18 Ŵazgani Ŵaroma 8:26, 27. Nyengo zinyake tingasuzgika chomene maghanoghano mwakuti tingatondeka na kumulongosolera Yehova umo tikujipulikira. Kweni kuti tilije wovwiri yayi. Pa nyengo zanthena izi, mzimu utuŵa wa Chiuta “ukuŵeyelera” m’malo mwa ise. Munthowa wuli? Kwizira mu mzimu wake utuŵa, Yehova wakachitiska kuti malurombo ghanandi ghasungike mu Mazgu ghake. Para tikutondeka kuyowoya makora umo tikujipulikira, Yehova wangagwiliskira ntchito malurombo agho ghali kulembeka kale mu Baibolo kuŵa pempho ilo tatenge tiyowoyenge, ndipo wangazgora.
19 Fundo iyi ndiyo yikawovwira mudumbu munyake wa ku Russia zina lake Yelena. Iyo wakakakika chifukwa cha kulomba na kuŵazga Baibolo. Yelena wakasuzgika chomene maghanoghano mwakuti wakatondekanga na kulomba. Iyo wakuti: “Nkhakumbuka kuti para nasuzgika chomene maghanoghano ndipo nkhumanya yayi chakuti ningalomba, Yehova wagwiliskirenge ntchito malurombo ghakulembeka gha ŵateŵeti ŵake ŵakumanyuma . . . kuŵa pempho lane ilo natenge nilombenge. . . . Fundo iyi yikaŵa yakunikhozga chomene pa nyengo yakusuzga iyi.”
20. Kasi tinganozgekereska wuli maghanoghano ghithu kuti tilombe pa nyengo iyo tikwenjerwa?
20 Para tikusuzgika maghanoghano, chingaŵa chakusuzga kuti maghanoghano ghithu ghakhazikike apo tikulomba. Kuti tinozgekereske maghanoghano ghithu, chingaŵa chiwemi kutegherezga buku lakujambura la Masalimo. Tingayowoyaso umo tikujipulikira mwakuchita kulemba ivyo vili mu mtima withu nga umo Themba Davide likachitira. (Sal. 18, 34, 142; mazgu ghapachanya.) Unenesko ngwakuti palije malango gha umo tingachitira kuti tinozgekereske maghanoghano ghithu kuti tilombe. (Sal. 141:2) Chitani ivyo vingaŵa vyakovwira kwa imwe.
21. Chifukwa wuli tingalomba na mtima withu wose?
21 Ntchakukhozga chomene kumanya kuti Yehova wakupulikiska umo tikujipulikira nanga ni apo tindayowoye chilichose. (Sal. 139:4) Kweni wakukhumba kuti timuphalirenge umo tikujipulikira kweniso umo tikumugomezgera. Ntheura kuziwulika yayi kulomba kwa Adada ŵithu ŵakuchanya. Sambiraniko ku malurombo agho ghali mu Mazgu ghawo. Lombani na mtima winu wose. Muphalirani ivyo mukukondwa navyo na ivyo vikumuchitiskani chitima. Pakuŵa Mubwezi winu wanadi, Yehova wamovwiraninge nyengo zose!
SUMU 45 Maghanoghano gha Mtima Wane
a Wonani “Makhaliro ghanyake ghapachanya gha Yehova” agho ghakusangika mu buku la Malemba Ghakovwira pa Umoyo Withu Wachikhristu pasi pa kamutu kakuti “Yehova.”
b Malurombo agho ghakupelekeka m’malo mwa mpingo, kanandi ghakuŵa ghakudumura.
c Mu lurombo lwake, Hana wakagwiliskira ntchito mazgu ghakuyana na agho Mozesi wakalemba. Iyo wakwenera kuti wakapaturanga nyengo ya kughanaghanirapo pa Malemba. (Doto. 4:35; 8:18; 32:4, 39; 1 Sam. 2:2, 6, 7) Pamanyuma pa vyaka vinandi, Mariya nyina wa Yesu, nayo wakagwiliskira ntchito mazgu ghakulumba Yehova ghakuyanako waka na agho Hana wakayowoya.—Luka 1:46-55.
d Kuti muwone viyelezgero, yaniskani Yona 2:3-9 na Salimo 69:1; 16:10; 30:3; 142:2, 3; 143:4, 5; 18:6 kweniso 3:8, ndipo mavesi agha ghali mu ndondomeko ya umo Yona wakayowoyera mu lurombo lwake.