Mu Wupu Wakulongozga Mwasazgikira Ŵabali Ŵaŵiri

PA OKUTOBALA 5, 2024, pa ungano wapachaka pakaŵa chipharazgo chapadera chakuti: Mubali Jody Jedele na Jacob Rumph, ŵimikika kuŵa mu Wupu Wakulongozga wa Ŵakaboni ŵa Yehova. Ŵabali wose ŵaŵiri aŵa ŵateŵetera Yehova mwakugomezgeka kwanyengo yitali.

Mubali Jedele wakababikira ku Missouri, U.S.A. ndipo wakulira mu unenesko. Ŵapapi ŵake ŵakakhalanga kufupi na chigaŵa icho chikapharazgikanga viŵi yayi. Ivi vikapangiska kuti wasangane na ŵabali na ŵadumbu ŵanandi awo ŵakafumanga ku vigaŵa vyakupambanapambana kuzakawovwirapo kupharazga ku chigaŵa ichi. Wakakhwaskika chomene kuwona chitemwa chawo kweniso umo ŵakachitiranga vinthu mwakukolerana. Wakabatizika pa Okutobala 15, 1983. Wakatemwanga chomene kupharazga, ndipo wakati wamalizga masambiro gha ku sekondare, wakamba upayiniya wanyengozose mu Seputembala 1989.

Panyengo iyo Mubali Jedele wakaŵa muchoko, ŵapapi ŵake ŵakalutanga nayo pamoza na mudumbu wake kukawona malo ku Beteli. Kuchita nthena kukaŵachiska kuti ŵajiŵikire chilato chakuti ŵazakateŵetere pa Beteli—chilato icho wose ŵakakwaniska. Mubali Jedele wakamba kuteŵetera pa Beteli ya Wallkill mu Seputembala 1990. Pakwamba wakateŵeteranga mu Dipatimenti ya Utozgi ndipo kufuma apo mu Dipatimenti ya vya Chipatala.

Pa nyengo iyi, mipingo ya Chisipanishi iyo yikaŵa pafupi yikakuranga chomene ndipo yikakhumbikwiranga ŵabali ŵakujipeleka. Ntheura Mubali Jedele wakamba kuwungana na umoza mwa mipingo iyi ndipo wakamba kusambira Chisipanishi. Pati pajumpha kanyengo kachoko waka, wakakumana na Damaris, mudumbu uyo wakachitanga upayiniya mu dera lenelili. Pamanyuma ŵakatorana, ndipo ŵakamba kuchitira lumoza uteŵeti pa Beteli.

Mu 2005 ŵakafumapo pa Beteli kuti ŵakapwelelere ŵapapi ŵawo. Panyengo iyi, ŵakachitanga upayiniya wanyengozose. Mubali Jedele wakawovwiranga pakusambizga Sukulu ya Uteŵeti wa Upayiniya, kweniso wakateŵeteranga mu Komiti Yakudumbiskana na Chipatala ndiposo mu Komiti ya Vyakuzenga.

Mu 2013, Mubali na Mudumbu Jedele ŵakachemekaso pa Beteli kuti ŵakawovwirepo pa mulimo wakuzenga ku Warwick. Kufuma waka panyengo iyi, ŵateŵeteraposo ku Patterson na Wallkill. Mubali Jedele wateŵeterapo mu Dipatimenti Yakuwona vya Mapulani na Kuzenga kweniso mu Dipatimenti Yakupeleka Chimanyisko cha Vyachipatala. Mu Malichi 2023, wakamba kuteŵetera nga movwiri wa mu Komiti ya Uteŵeti. Para wakughanaghanira vya mauteŵeti agho wachita, wakuti: “Para wapika uteŵeti uphya, nyengo zinyake ungamba kopa usange ukwaniskenge. Kweni apa ndipo ukwenera kukumbuka kuti ukwenera kuthemba Yehova chifukwa ndiyo wakuchitiska kuti tichite icho iyo wakhumba.”

Mubali Rumph wakababikira ku California, U.S.A. Panyengo iyo wakaŵa muchoko, amama ŵake ŵakaŵa ŵakulopwa kweni ŵakayezgayezga kumusambizga Baibolo. Kweniso chaka chilichose wakalutanga kukawona abuya ŵake awo ŵakaŵa Kaboni wakugomezgeka. Ŵakamovwira kuti wanweke na unenesko, ndipo apo wakaŵa na vyaka 13, wakapempha sambiro la Baibolo. Wakabatizika pa Seputembala 27, 1992. Chakukondweska ntchakuti amama ŵake ŵakambiraso kuchita makora mwauzimu ndipo adada ŵake na ŵana ŵakwake nawo ŵakaluta panthazi na kubatizika.

Apo wakaŵa muchoko, Mubali Rumph wakawonanga umo ŵapayiniya ŵakaŵiranga ŵakukondwa. Wati wamalizga masambiro gha ku sekondare, wakamba upayiniya mu Seputembala 1995. Mu 2000, wakasamukira ku Ecuador kuti wakateŵetere uko kukakhumbikwiranga ŵapharazgi ŵanandi. Uku ndiko wakasangana na Inga, mudumbu uyo wakaŵa mupayiniya wakufuma ku Canada, ndipo pamanyuma ŵakatorana. Ŵati ŵatorana, ŵakamba kuteŵetera mu tawuni yinyake ya mu Ecuador iyo mukaŵa kagulu kachoko ka ŵapharazgi. Pasono ni mpingo ukuru uwo ukuluta panthazi.

Nyengo yati yajumphapo, Mubali na Mudumbu Rumph ŵakimikika kuŵa ŵapayiniya ŵapadera ndipo kufuma apo ŵakatumika kukendera dera. Mu 2011 ŵakachemeka kukanjira kilasi la nambara 132 la Sukulu ya Giliyadi. Ŵati ŵamalizga masambiro gha Giliyadi, ŵakateŵetera mu vyaru vyakupambanapambana ndipo ŵakachitapo mauteŵeti ghakupambanapambana, nga uteŵeti wa pa Beteli, umishonale, na kwendera dera. Mubali Rumph wakaŵaso na mwaŵi wakusambizga Sukulu ya Ŵapharazgi ŵa Ufumu.

Chifukwa cha muliri wa COVID-19, Mubali na Mudumbu Rumph ŵakawelera ku United States. Kufuma apo, ŵakachemeka kukateŵetera ku Beteli ya Wallkill, uko Mubali Rumph wakasambizgika vyakukhwaskana na Dipatimenti ya Uteŵeti. Pamanyuma ŵakatumikaso ku ofesi ya munthavi ya Ecuador, uko Mubali Rumph wakateŵeteranga mu Komiti ya Munthavi. Mu 2023 ŵakatumika ku Warwick. Mu Janyuwale 2024, Mubali Rumph wakimikika kuŵa movwiri wa mu Komiti ya Uteŵeti. Para wakughanaghanira mauteŵeti agho wachitapo, mubali uyu wakuti, “Icho chikupangiska uteŵeti kuŵa wapadera ni malo agho ukuchitirako uteŵeti yayi, kweni ni ŵanthu awo ukuteŵetera nawo.”

Tikuwonga chomene mulimo uwo ŵabali aŵa ŵakuchita, ndipo ‘tikulutilira kuwona ŵanthu ŵanthena kuŵa ŵakutemweka chomene.’—Fil. 2:29.