Kasi Wupu Wakulongozga wa Ŵakaboni ŵa Yehova Ni Vichi?

Wupu Wakulongozga ni gulu la ŵanalume ŵachoko waka awo ŵakupeleka ulongozgi ku Ŵakaboni ŵa Yehova pacharu chose. Ŵakovwira pa ntchito izi:

• Ŵakupeleka ulongozgi wa mu Baibolo kwizira mu mabuku, maungano, na masukulu gha Ŵakaboni ŵa Yehova.—Luka 12:42.

• Ŵakulongozga ntchito yakupharazga ya Ŵakaboni ŵa Yehova pacharu chose, kweniso ŵakuwoneseska kuti vyawanangwa ivyo ŵanthu ŵakupeleka vikugwira ntchito yake.

Wupu Wakulongozga ukulondezga ivyo “ŵapositole na ŵalara” mu nyengo yakale ŵakachitanga. Iwo ŵakapelekanga ulongozgi wa mu Baibolo ku Ŵakhristu ŵakwambilira. (Milimo 15:2) Wupu uwu ukupambana chomene na ŵalongozgi ŵa matchalitchi ghanyake. Wupu Wakulongozga ukwendera fundo za mu Baibolo, ndipo ukumanya kuti Yehova wali kwimika Yesu kuŵa Mutu wa mpingo.—1 Ŵakorinte 11:3; Ŵaefeso 5:23.

Kasi mbanjani awo ŵali mu Wupu Wakulongozga?

Awo ŵali mu Wupu Wakulongozga ni aŵa: Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane na Jeffrey Winder. Ŵanalume aŵa ŵali pa ofesi yikuru ya Ŵakaboni ŵa Yehova ku Warwick, New York, U.S.A.

Kasi Wupu Wakulongozga ukuchita wuli ntchito zake?

Wupu wakulongozga wuli na makomiti 6 agho ghakulaŵilira ntchito zakupambanapambana. Waliyose wa mu Wupu Wakulongozga wakuteŵetera mu komiti yimoza panji kujumphirapo.

• Komiti Yakulongozga: Yikuwona nkhani za malango na masoka gha chilengiwa, kweniso yikovwira Ŵakaboni ŵa Yehova para ŵakutambuzgika.

• Komiti Yakulaŵilira Ŵateŵeti ŵa pa Beteli: Yikulaŵilira awo ŵakuteŵetera pa Beteli, panji kuti pa maofesi gha Ŵakaboni ŵa Yehova.

• Komiti Yakusindikizga: Yikulaŵilira ntchito ya kupanga na kutumizga mabuku ghakulongosora Baibolo, kuzenga malo ghakusoperapo, na maofesi.

• Komiti Yauteŵeti: Yikulaŵilira ntchito yakupharazga makani “ghawemi gha Ufumu.”—Mateyu 24:14.

• Komiti Yakusambizga: Yikupeleka ulongozgi wa mu Baibolo uwo tikupokera pa maungano, na masukulu. Kweniso kupanga mavidiyo na vinyake ivyo tikuchita kupulikizga.

• Komiti Yakulemba: Yikupeleka ulongozgi wa mu Baibolo kwizira mu mabuku ghakupambanapambana, kweniso pa webusayiti yithu. Komiti iyi ndiyo yikulaŵilira mulimo wakung’anamura mabuku.

Padera pa wovwiri uwo makomiti agha ghakupereka, Wupu Wakulongozga ukukumana sabata yiliyose kuti uwone ivyo vikukhumbikwa. Pa maungano agha, ivyo ŵakudumbiskana vikufuma mu Baibolo, ndipo mzimu utuŵa wa Chiuta ukuŵawovwira kuti ŵakolerane fundo yimoza.—Milimo 15:25.

Kasi mbanjani awo ŵakovwira Wupu Wakulongozga?

Wupu Wakulongozga ukusankha ŵanalume ŵakugomezgeka kuti ŵawovwirengepo pa milimo yinyake. (1 Ŵakorinte 4:2) Waliyose wakuyimanya makora milimo ya komiti iyo wakuteŵeteramo, ndipo wakuŵapo para komiti yake yikukumana sabata yiliyose. Nangauli ŵakukakako yayi fundo, kweni ŵakuyowoyapo maghanoghano ghawo, ndipo ŵakulondezga ivyo komiti yakolerana. Wupu Wakulongozga ukutumaso ŵanalume aŵa mu vyaru vyakupambanapambana kuti ŵakakhozge Ŵakaboni ŵa Yehova ndipo nyengo zinyake ŵakuyowoya nkhani za mu Baibolo pa maungano, nga ni maungano ghapachaka na gha awo ŵamalizga sukulu yakusambizga Baibolo ya Giliyadi.