Umo Wupu Wakulongozga Ukucitira Milimo Yake

WUPU Wakulongozga wa Ŵakaboni ŵa Yehova wuli na ŵanalume awo ŵali kujipatulira kwa Ciuta. Ŵanalume aŵa mbateŵeti ŵa Ciuta ŵakuphakazgika na mzimu utuŵa. Ŵanalume aŵa ŵakwimira gulu la muzga wa magomezgeko na wa vinjeru, ilo liri na mulimo wa kupeleka cakurya cauzimu ndiposo ulongozgi wakwendeskera mulimo wa kupharazga Ufumu, na kuwoneseska kuti mulimo uwu ukwenda makora pa caru cose.—Mat. 24:14, 45-47.

Wupu Wakulongozga ukukumana sabata yiliyose, comenecomene pa Citatu. Maungano agha ghakovwira ŵabali aŵa kuti ŵateŵeterenge lumoza mwakukolerana. (Sal. 133:1) Ŵabali ŵa mu Wupu Wakulongozga ŵaliso mu makomiti ghakupambanapambana. Kuti komiti yiliyose yicite makora vinthu vya Ufumu, yikuŵa na milimo iyo yikulaŵilira, nga umo vyalongosolekera mwakudumura pasi apa.

◼ KOMITI YAKULONGOZGA: Mu komiti iyi muli ŵabali awo ŵakulongozga makomiti ghakupambanapambana gha Wupu Wakulongozga, ndipo yili na mulembi uyo nayo ngwa mu Wupu Wakulongozga. Yikuwoneseska kuti makomiti ghose ghakugwira makora milimo yawo ndipo vyose vikwenda makora. Yikovwiraso para kwacitika masuzgo ghakuru, nthambuzgo, masoka ghacilengiwa, na vinthu vinyake vyamabuci ivyo vikuwira Ŵakaboni ŵa Yehova pa caru cose.

◼ KOMITI YA NCHITO: Ŵabali ŵa mu komiti iyi ŵali na mulimo wa kulaŵilira umoyo wauzimu na wakuthupi wa ŵa mu mbumba za Beteli pa caru cose. Komiti iyi yikulaŵilira nchito ya kusankha na kucemera ŵabali ŵaphya ku Beteli ndiposo kuzgora mafumbo ghakukhwaskana na uteŵeti wawo.

◼ KOMITI YA KUSINDIKIZGA: Komiti iyi yikulaŵilira mulimo wa kusindikizga, kuthandazga na kutumizga mabuku ghakulongosora Baibolo pa caru cose. Yikulaŵilira nyumba zakusindikizgira mabuku na vinthu vyose vya mawupu ghakupambanapambana gha Ŵakaboni ŵa Yehova. Komiti iyi yikunozga nthowa yiwemi ya kagwiliskiro nchito ka ndarama izo zikupelekeka kuti zovwire pa nchito ya Ufumu pa caru cose.

◼ KOMITI YA UTEŴETI: Ŵabali ŵa mu komiti iyi ŵakulaŵilira nchito ya kupharazga ndiposo nkhani zakukhwaska mipingo, ŵapayiniya, ŵalara, na ŵalaŵiliri ŵakwendakwenda. Komiti iyi yikulaŵilira mulimo wa kunozga Uteŵeti Withu wa Ufumu ndiposo kucema ŵanthu awo ŵakuluta ku Sukulu ya Gileadi ndiposo Sukulu Yakusambizga Uteŵeti, na kuŵatumizga ku malo ghakupambanapambana para ŵamalizga masambiro ghawo.

◼ KOMITI YAKUSAMBIZGA: Komiti iyi yikulaŵilira mulimo wa kunozga nkhani za pa maungano gha dera, ghapadera, gha cigaŵa, ndiposo gha mpingo. Yikunozga mapulogiramu ghauzimu gha mbumba ya Beteli, kulaŵilira masukulu ghakupambanapambana nga ni Sukulu ya Gileadi na Sukulu ya Uteŵeti wa Upayiniya, ndiposo kunozga matepi, ma CD, na mavidiyo.

◼ KOMITI YAKULEMBA: Komiti iyi yili na mulimo wa kulaŵilira nchito ya kulemba mabuku gha cakurya cauzimu agho ghakuya ku ŵabali na ŵadumbu ndiposo ŵanthu wose. Komiti iyi yikuzgora mafumbo gha mu Baibolo na kuzomerezga kufumiskika kwa vinthu nga ni maseŵero na maautilayini gha nkhani. Yikulaŵiliraso nchito ya kung’anamura mabuku iyo yikucitika pa caru cose.

Mpositole Paulosi wakayaniska mpingo wa ŵakuphakazgika na thupi la munthu, ndipo wakadidimizga za kuzirwa kwa munthu waliyose, kugomezgana kwawo, citemwa ndiposo kukolerana kwawo pakugwira nchito yiliyose iyo Ciuta waŵapa. (Rom. 12:4, 5; 1 Kor. 12:12-31) Yesu Khristu, uyo ni Mutu wawo, wakuŵapa vyose vyakukhumbikwa kuti ŵacitenge mulimo wawo mwakukolerana ndiposo mwakupulikana. Kweniso wakuŵapa ulongozgi kwizira mu Baibolo. (Efe. 4:15, 16; Kol. 2:19) Mwantheura, Wupu Wakulongozga ukwendeska vinthu mwakulongozgeka na mzimu utuŵa wa Yehova.