Iŵani Ŵatuŵa mwa Kopa Ciuta

KULONGORA kuti Yehova ni mutuŵa kwakuluska waliyose, Baibolo likuti: “Mutuŵa, Mutuŵa, Mutuŵa ndi Yehova.” (Yes. 6:3; Civ. 4:8) Lizgu la Cigiriki ndiposo la Cihebere ilo lili kung’anamurika kuti utuŵa likunena za utuŵa wakukhwaskana na kusopa, kwambura kukazuzgika na cilicose. Utuŵa wa Yehova ukung’anamura kuŵa na mikhaliro yambura kukazuzgika.

Kasi cingaŵa cakuzizika nthena kuti Yehova, uyo ni Ciuta mutuŵa wakukhumba kuti ŵateŵeti ŵake nawo ŵaŵenge ŵatuŵa mwakuthupi, mwamakhaliro, ndiposo mwauzimu? Baibolo likuyowoya mwambura kubisa kuti Yehova wakukhumba kuti ŵateŵeti ŵake ŵaŵenge ŵatuŵa. Pa 1 Petros 1:16 tikuŵazga kuti: “Muŵenge ŵatuŵa; pakuti Ine ndine mutuŵa.” Kasi ŵanthu ŵambura kufikapo ŵangamuyezga nadi Yehova pa nkhani ya kuŵa ŵatuŵa? Inya, nangauli ŵangaŵa ŵatuŵa fikepo yayi. Ciuta watiwonenge kuŵa ŵatuŵa usange tikumusopa mwambura ukazuzi ndiposo usange tikuŵa nayo paubwezi.

Ipo pera, ni mwawuli umo tingaŵira ŵatuŵa mu caru ico cili na mikhaliro yaukazuzi? Ni vyakucita wuli ivyo tikwenera kugega? Ni nkharo wuli ndiposo kayowoyero ako tikwenera kusintha? Tiyeni tiwone ivyo tingasambira kufuma ku ivyo Ciuta wakakhumbanga kuti Ŵaisrayeli ŵacitenge pamasinda pa kufuma ku wuzga ku Babulone mu 537 B.C.E.

‘Kwamkuŵa Nthowa Yakupatulika’

Yehova wakayowoyerathu kuti ŵanthu ŵake awo ŵakaŵa ku wuzga ku Babulone ŵazamuwelera kukwawo. Ucimi uwo ukayowoyanga za kuwelera kukwawo ukaŵa na mazgu ghakusimikizga ghakuti: “Gurwe wamkuŵa kwenekuko, tiwathyike zina, Nthowa Yakupatulika.” (Yes. 35:8a) Mazgu agha ghakulongora kuti Yehova wakapeleka mwaŵi ku Ŵayuda kuti ŵalute kwawo ndiposo kuŵasimikizgira kuti wandamuŵavikilira.

Kwa ŵateŵeti ŵake ŵa pa caru capasi mazuŵa ghano, Yehova wakajura “Nthowa Yakupatulika” apo wakaŵazomerezga kuti ŵafume mu Babulone Mukuru, uwo mbufumu wa caru cose wa cisopa cautesi. Mu 1919 wakafumiska Ŵakhristu ŵakuphakazgika mu wuzga wauzimu wa kusopa kwautesi, ndipo mwapacokopacoko, ŵakatuŵiska kusopa kwawo mwa kuleka visambizgo vyose vyautesi. Mazuŵa ghano, mpingo wa Yehova ngutuŵa, ndipo ndimo tingasopera Yehova na kuŵa nayo paubwezi ndiposo kuŵa paubwezi na ŵanyithu.

“Kamskambo kacoko” ka Ŵakhristu ŵakuphakazgika ndiposo “mzinda ukuru” wa “mberere zinyake” ŵasankha kwenda pa “nthowa yakupatulika,” ndipo ŵakucemerakoso ŵanyawo. (Luka 12:32; Civ. 7:9; Yoh. 10:16) “Nthowa Yakupatulika” njakujulikira wose awo ŵakukhumba ‘kupeleka mathupi ghawo kuŵa sembe yamoyo, yituŵa na yakukondweska Ciuta.’—Rom. 12:1.

“Ŵakufipirwa Ntha Ŵamkwendamo”

Mu 537 B.C.E., Ŵayuda awo ŵakawera ku wuzga ŵakeneranga kulondezga dango linyake lakuzirwa. Pakuyowoya za awo ŵakaŵa ŵakwenelera kwenda pa “Nthowa Yakupatulika,” lemba la Yesaya 35:8b likuti: “Ŵakufipirwa ntha ŵamkwendamo, ndipo nanga mbakupusa kuti ŵapulukirengemo cara.” Pakuti Ŵayuda ŵakaweleranga ku Yerusalemu na cilato ca kukambaso kusopa kwaunenesko, ŵanthu ŵakukhumba kukhorweska makhumbiro ghawo, ŵambura kuzirwiska vinthu vyakupatulika, panji ŵakucita vinthu vyaukazuzi ŵakaŵa ŵambura kuzomerezgeka. Ŵanthu aŵa ŵakeneranga kulutilira kuŵa na mikhaliro yapacanya iyo Yehova wakukhumba. Mazuŵa ghano, awo ŵakukhumba kuti Ciuta waŵatemwe ŵakwenera kuŵaso na mikhaliro yapacanya. Ŵakwenera kuŵa ŵatuŵa mwa kopa Ciuta. (2 Kor. 7:1) Ipo ni vinthu wuli vyaukazuzi ivyo tikwenera kugega?

Mpositole Paulosi wakalemba kuti: “Milimo ya thupi yikuwoneka pakweru, ndi yeneiyi, uzaghali, ukazuzi, ukwakwa.” (Gal. 5:19) Uzaghali nkhugonana kwa mtundu uliwose uko munthu wakucita na viŵaro vyake vyakugonanirana na munthu uyo wandatorane nayo. Ukwakwa ukusazgapo kuŵa wambura kujikora pa nkhani ya uzaghali, wavilere, wambura soni, ndiposo mukazuzi. Uzaghali na ukwakwa ni mikhaliro iyo yikususkana comene na utuŵa wa Yehova. Mwantheura, awo ŵakulutilira kucita vinthu ivi ŵakuzomerezgeka yayi kuŵa mu mpingo Wacikhristu panji ŵakusezgeka usange ŵanguŵa kale mu mpingo. Ndimo viliriso na awo ŵakucita ukazuzi ukuru, kung’anamura “ukazuzi wose na ususi.”—Efe. 4:19.

“Ukazuzi” ni lizgu ilo likukhwaska kwananga kwa mitundu yinandi. Lizgu la Cigiriki ilo liri kung’anamurika kuti “ukazuzi” likung’anamura kuŵa munyankhasi mu kacitiro, kayowoyero, panji mu kasopero. Likusazgapo kucita vinthu ivyo vingaŵa vyaukazuzi, kweni vyakuti pangakhumbikwira komiti ya ceruzgo yayi.a Kweni kasi awo ŵakucita vinthu ivi mbatuŵa?

Tiyelezgere kuti Mkhristu munyake mwakabisibisi wakuwonelera vithuzithuzi vya ŵanthu ŵambura kuvwara. Mwapacokopacoko, mtima wa kukhumba kuŵa mutuŵa pamaso pa Yehova ukumara. Vingaŵa kuti nkharo yake yafika viŵi pa ubudi ukuru yayi, kweni wangaŵa kuti waleka kughanaghanirako za vinthu vyose ivyo ‘ni vituŵa, ivyo vyose ni vyakutowa, ivyo vyose ni vya lumbiri luwemi.’ (Fil. 4:8) Mbukazuzi kuwonelera vithuzithuzi vya ŵanthu ŵambura kuvwara, ndipo vingananga ubwezi wa munthu na Ciuta. Ukazuzi uliwose ukwenera kuzunulika na kuzunulika wuwo yayi pakati pithu.—Efe. 5:3.

Wonani ciyelezgero cinyake. Tiyelezgere kuti Mkhristu munyake wali na cizgoŵi ca kuseŵereska viŵaro vyakugonanirana, ndipo wakucita nthena uku wakuwonelera vithuzithuzi vya ŵanthu ŵambura kuvwara panji yayi. Nangauli mazgu ghakuti kuseŵereska viŵaro vyakugonanirana mulije mu Baibolo, kasi tingakayika kuti kacitiro aka kangananga maghanoghano ghithu? Asi mbunenesko kuti kucita nthena kungananga ubwezi wa munthu na Yehova, na kumucitiska kuŵa wakufipirwa pamaso pake? Tiyeni tikumbukirenge ulongozgi wa Paulosi wakuti “tijitozge ku ukazuzi wose wa thupi na wa mzimu,” ndiposo wakuti ‘tikome viŵaro vithu ivyo vili pa caru; uzaghali, ukazuzi, kulakalaka, kukhumba kuheni, na kudokera.’—2 Kor. 7:1; Kol. 3:5.

Caru ici, ico cikuwusika na Satana cikuzomerezga nkharo zaukazuzi, nakuti cikukhuŵilizga ŵanthu kuti ŵaŵe na nkharo zanthena. Cingaŵa cakusuzga kuzizipizga usange tikuyezgeka kuti ticite vinthu vyaukazuzi. Kweni Ŵakhristu ŵakwenera yayi “kwendaso umo ŵamitundu nawo ŵakwendera mu uzereza wa mano ghawo.” (Efe. 4:17) Yehova watizomerezgenge kwenda pa “Nthowa Yakupatulika” pekha usange tikuleka kucita vinthu vyaukazuzi, kwali tili na ŵanyithu panji kwatekha.

“Nkhalamu Kuti Yamkuŵako Cara”

Ŵanji ŵangakhumbikwira kusintha nkharo yawo ndiposo ivyo ŵakuyowoya mwakuti Yehova, uyo ni Ciuta mutuŵa waŵatemwe. Lemba la Yesaya 35:9 likuti: “Nkhalamu kuti yamkuŵako cara, nanga nchikoko kuti camkwendamo cara” mu “Nthowa Yakupatulika.” Ŵanthu ŵankhaza ndiposo ŵakali ŵakuyelezgereka na vikoko. Ŵazamuŵavya mwaŵi wa kunjira mu caru ciphya ca urunji ca Ciuta. (Yes. 11:6; 65:25) Ipo nchakwenelera kuti ŵanthu awo ŵakukhumba kutemweka na Ciuta ŵaleke kuŵa na mikhaliro ya nga nja vikoko ndipo ŵayezgeyezge kuŵa ŵatuŵa.

Malemba ghakutikhuŵirizga kuti: “Kuŵaŵa kose, na kuceruka, na kukalipa, na kukoromoka, na kutuka, viwuskikeko kwa imwe pamoza na kutokota kose.” (Efe. 4:31) Pa Ŵakolose 3:8 tikuŵazga kuti: “Kweni sono namweso wuskaniko vyeneivi vyose; ukali, kuceruka, kutokota, kutuka, kuyowoya kwa soni mu milomo yinu.” Mazgu ghakuti “kutuka” agho ghali mu mavesi ghaŵiri agha comenecomene ghakung’anamura mazgu ghakupweteka, ghamuyuyuro panji gha matusi.

Mazuŵa ghano, mazgu ghakupweteka ndiposo ghakutuka ghakuyowoyeka palipose kusazgapo na mu mbumba. Ŵakutorana ŵakuyowoyerana mazgu ghakupweteka, ghankhaza na ghamuyuyuro. Ŵakuyowoyeraso ŵana ŵawo mazgu ghantheura. Mbumba za Cikhristu zikwenera yayi kuŵa na kayowoyero kanthena.—1 Kor. 5:11.

Kuŵa Ŵatuŵa mwa Kopa Ciuta Kuli na Vitumbiko

Ni mwaŵi ukuru comene kuteŵetera Yehova, Ciuta mutuŵa. (Josh. 24:19) Paradiso wauzimu uyo Yehova watinjizgamo ngwakuzirwa comene. Tikukayika yayi kuti kuŵa ŵatuŵa mu maso gha Yehova nchinthu ciwemi comene.

Sonosono apa, Paradiso wa pa caru capasi uyo Ciuta wali kutilayizga wafikenge. (Yes. 35:1, 2, 5-7) Wose awo ŵakukhumbisiska kuzakaŵa mu caru ici, ndipo ŵakulutilira kucita vinthu mwakukolerana na dango la Ciuta ndiwo ŵazamukhala mu caru ici. (Yes. 65:17, 21) Mulimose umo vingaŵira, tiyeni tilutilire kuŵa ŵatuŵa apo tikusopa Ciuta, ndipo tilutilire kuŵa nayo paubwezi.

[Mazgu ghamusi]

[Cithuzithuzi pa peji 26]

Nchivici ico Ŵayuda ŵakeneranga kucita kuti ŵende pa “Nthowa Yakupatulika”?

[Cithuzithuzi pa peji 27]

Kuwona vithuzithuzi vya ŵanthu ŵambura kuvwara kukunanga ubwezi wa munthu na Yehova

[Cithuzithuzi pa peji 28]

“Kukoromoka, na kutuka, viwuskikeko kwa imwe”