Kasi Kuŵa Mutuŵa Chikung’anamurachi?

Ivyo Baibolo likuyowoya

Kuŵa mutuŵa chikung’anamura kuleka kalikose ako kangafipiska munthu. Lizgu la Chihebere ilo lili kung’anamurika kuti “utuŵa” lili kufuma ku lizgu ilo likung’anamura “kupatulika.” Ntheura chinthu chituŵa chikuŵa chakupatulika ndipo chikugwira ntchito zapadera pera, chomenechomene izo zikukhwaskana na kusopa kutuŵa.

Chiuta ni mutuŵa chomene kuluska waliyose. Baibolo likuti: “Kulije munyake mutuŵa nga ni Yehova.”a (1 Samuyeli 2:2) Ntheura Chiuta ndiyo ngwakwenelera kutisambizga umo tingaŵira ŵatuŵa.

Lizgu lakuti “utuŵa” ŵakuligwiliskira ntchito pa chilichose icho chikukhwaskana na kusopa Chiuta na mtima wose. Mwachiyelezgero, Baibolo likuyowoya vya:

• Malo ghatuŵa: Chiuta wakaphalira Mozesi uyo wakimilira pafupi na chivwati chakugolera moto kuti: “Malo agho wimilirapo ni malo ghatuŵa.”—Ekisodo 3:2-5.

• Maungano ghakupatulika: Ŵaisrayeli ŵakale ŵakasopanga Chiuta pa viphikiro ivyo ŵakavichemanga kuti “maungano ghakupatulika.”—Levitiko 23:37.

• Viteŵetero vyakupatulika: Viteŵetero ivyo ŵakagwiliskiranga ntchito pa kusopa Chiuta mu tempile ku Yerusalemu vikachemekanga “viteŵetero vyakupatulika.” (1 Mathemba 8:4) Nangauli ŵanthu ŵakeneranga kuchindika viteŵetero ivi, kweni ŵakeneranga kuvisopa yayi.b

Kasi munthu wakwananga wangaŵa mutuŵa?

Enya. Chiuta wakuphalira Ŵakhristu kuti: “Muŵenge ŵatuŵa, chifukwa ine nili mutuŵa.” (1 Petrosi 1:16) Ŵanthu ŵangaŵa ŵatuŵa ndendende nga umo Chiuta waliri yayi. Ndipouli, Baibolo likuti awo ŵakulondezga malango ghaurunji gha Chiuta ŵangaŵa ‘ŵatuŵa na ŵakuzomerezgeka kwa Chiuta.’ (Ŵaroma 12:1) Munthu wakulongora kuti ni mutuŵa kwizira mu ivyo wakuyowoya na kuchita. Mwachiyelezgero, munthu uyu wakulondezga ulongozgi wa mu Baibolo wakuti ‘kanani kuchita uzaghali’ kweniso wakuti “muŵe ŵatuŵa mu makhaliro ghinu ghose.”—1 Ŵatesalonika 4:3; 1 Petrosi 1:15.

Kasi vingachitika kuti munthu waleke kuŵa mutuŵa?

Enya. Usange munthu waleka kulondezga malango gha Chiuta, munthu uyu Chiuta wangamuwonaso kuti ni mutuŵa yayi. Mwachiyelezgero, buku la mu Baibolo la Ŵahebere likalembekera “ŵabali ŵatuŵa,” kweni likuŵachenjezga kuti “waleke kuŵa na mtima uheni wambura chipulikano na kufumako kwa Chiuta wamoyo.”—Ŵahebere 3:1, 12.

Mautesi pa nkhani ya utuŵa

Utesi: Munthu wangaŵa mutuŵa para wandatore panji kutengwa.

Unenesko: Munthu wakusankha yekha kuleka kutora panji kutengwa, ndipo kuleka kutora panji kutengwa kukupangiska munthu kuŵa mutuŵa yayi kwa Chiuta. Kweni awo ŵandatore panji kutengwa ŵangateŵetera Chiuta kwambura vyakutimbanizga. (1 Ŵakorinte 7:32-34) Ndipouli, Baibolo likulongora kuti awo ŵali kutora panji kutengwa ŵangaŵaso ŵatuŵa. Nakuti Petrosi uyo wakaŵa mpositole wa Yesu ŵakatora.—Mateyu 8:14; 1 Ŵakorinte 9:5.