Kasi Chiuta Wakamba Pawuli Kulenga Vyose Ivyo Viliko?

Ivyo Baibolo likuyowoya

Baibolo likuyowoya yayi apo Chiuta wakambira ntchito yakulenga kuchanya na charu chapasi nesi nyengo iyo ntchito iyi yikatora. Likuyowoya waka kuti: “Pakwamba, Chiuta wakalenga kuchanya na charu chapasi.” (Genizesi 1:1) Baibolo likuzunura yayi kuti “pakwamba” apa pakaŵa pawuli. Ndipouli, vyakuchitika ivyo vili kulembeka mu buku la Genizesi vikulongora kuti pakaŵa pambere mazuŵa 6 ghakulenga ghandambe.

Kasi mazuŵa 6 gha kulenga ghakaŵa mazuŵa gheneko gha maora 24?

Yayi. Mu Baibolo, lizgu lakuti “zuŵa” lingang’anamura utali wakupambanapambana wa nyengo, vikutolera na nkhani iyo yikuyowoyeka. Mwachiyelezgero, chigaŵa chimoza cha nkhani iyi chikulongosora nyengo yose yakulengera vinthu kuŵa zuŵa limoza.—Genizesi 2:4.

Chikachitikanga ntchivichi mu mazuŵa 6 gha kulenga?

Chiuta wakazgora charu icho “chikaŵa waka, chambura kanthu” kuŵa pulaneti lakuti vyamoyo vingakhalamo makora waka. (Genizesi 1:2) Kufuma apo, wakalenga vyamoyo pa charu chapasi. Baibolo likulongosora vinthu 6 ivyo vikachitika mu mazuŵa gha kulenga:

Zuŵa Lakwamba: Chiuta wakachitiska kuti ungweru ufike pa charu chapasi, ivyo vikapangiska kuti paŵe nyengo ya usiku na muhanya.—Genizesi 1:3-5.
Zuŵa Lachiŵiri: Chiuta wakapanga mlengalenga, panji kuti muphwaphwa wakupatura maji gha pa charu chapasi ku maji gha kuchanya.—Genizesi 1:6-8.
Zuŵa Lachitatu: Chiuta wakachitiska mtunda wakomira kuwonekera. Wakalengaso vyakumera.—Genizesi 1:9-13.
Zuŵa Lachinayi: Chiuta wakapangiska dazi, mwezi, na nyenyezi kuwonekera kuŵa vyakungweluskira pa charu chapasi.—Genizesi 1:14-19.
Zuŵa la 5: Chiuta wakalenga vyamoyo vyamumaji na vyakuduka mudera.—Genizesi 1:20-23.
Zuŵa la 6: Chiuta wakalenga vinyama vyakwenda pa charu na ŵanthu.—Genizesi 1:24-31.

Zuŵa la 6 likati lamara, Chiuta wakapumura ku ntchito iyi, panji kuti wakaleka kulenga.—Genizesi 2:1, 2.

Kasi nkhani ya mu Genizesi iyi yikukolerana na sayansi?

Baibolo lindayowoyepo kuti nkhani ya kulenga yalongosoreka kuyana na umo ŵasayansi ŵakulongosolera. M’malo mwake, likulongosora nkhani yakulenga munthowa yakuti nanga mbaŵazgi ŵamunyengo yakale ŵakapulikiskanga ndondomeko iyo Chiuta wakalengera vinthu vyakupambanapambana. Nkhani ya kulenga yikususkana nazo yayi fundo izo ŵasayansi ŵabowozga. Wasayansi munyake Robert Jastrow wali kulemba kuti: “Vyose ivyo vikulongosoreka vikupambana, kweni nkhani ya ŵasayansi na ya Baibolo ya umo umoyo ukambira zikukolerana pa chinthu chimoza chakukhumbikwa; vyakuchitika ivyo vikalongozgera kuti munthu waŵeko vikamba mwamabuchi, pa nyengo yinyake yakusimikizgika.”

Kasi dazi, mwezi, na nyenyezi vikalengeka pawuli?

Dazi, mwezi, na nyenyezi vikaŵako kale nga ntchigaŵa cha “kuchanya” uko kukalengeka “pakwamba.” (Genizesi 1:1) Ndipouli, vikuwoneka kuti ungweru wawo ukafikanga yayi pa charu chapasi chifukwa pakaŵa waka chisi bii. (Genizesi 1:2) Ntheura nangauli ungweru ukawoneka pa zuŵa lakwamba, kweni ivyo vikapelekanga ungweru uwu vikawonekanga yayi. Pa zuŵa lachinayi, chisi chikwenera kuti chikamara. Baibolo likuti sono ndipo dazi, mwezi, na nyenyezi vikamba ‘kungweluska charu chapasi,’ kulongosora kuyana na umo munthu wangawonera para wali pa charu chapasi.—Genizesi 1:17.

Kasi Baibolo likuti charu chapasi chaŵako nyengo yitali wuli?

Baibolo likuyowoyapo yayi kuti charu chapasi chakhala vyaka vilinga. Pa Genizesi 1:1 pakuyowoya waka kuti vinthu vyose, kusazgapo charu chithu chapasi, vikaŵa na pakwambira. Fundo iyi yikususka yayi fundo za ŵasayansi panji ivyo ŵasayansi ŵakugomezga pa nkhani ya vyaka ivyo charu chapasi chaŵirako.