Mama Wambura Kuwona Wakazgoreka Malurombo Ghake

Yanmei, Kaboni wa ku Asia, wakawovwira mama munyake wachibulumutira zina lake Mingjie kwambuka msewu.a Mingjie wakati: “Yewo chomene. Chiuta wakutumbike!” Penepapo, Yanmei wakafumba Mingjie usange wangatemwa kuti ŵazakakumaneso kuti ŵazakadumbirane vya Baibolo. Pamanyuma, Mingjie wakayowoya kuti wakalombanga zuŵa lililose kuti walongozgekere ku mpingo waunenesko wa Chiuta. Chifukwa wuli wakapemphanga nthena?

Mingjie wakalongosora kuti mu 2008, munyake uyo nayo ngwambura kuwona wakamuchemera ku tchalitchi ilo likovwira ŵanthu ŵakulemara. Wati waluta na kupulikizga upharazgi, Mingjie wakafumba wasembe buku ilo wakatoramo ivyo wakapharazganga. Wasembe wakamuphalira kuti ni Baibolo, Mazgu ghaunenesko gha Chiuta. Mingjie wakadokera chomene kuti waliŵazge. Ntheura wakasanga Baibolo la Chitchayinizi mu vilembo vya ŵanthu ŵambura kuwona (braille) ndipo wakaŵazga mavoluyumu 32 mu myezi pafupifupi 6. Mingjie wakalutilira kuŵazga Baibolo, ndipo wakamanya kuti chisambizgo cha Utatu, icho wakasambizgika ku tchalitchi ilo wakalutako, ntchautesi kweniso kuti Chiuta wali na zina, ni Yehova.

Nyengo yati yajumphapo, Mingjie wakagongowa na vyakuchita vya ŵanthu ŵa mu tchalitchi lira. Wakawona kuti ŵakuchita yayi ivyo iyo wakaŵazganga mu Baibolo. Mwachiyelezgero, ŵanthu ŵambura kuwona ŵakaŵapanga vimbala, apo waliyose wakaryanga chakurya chiwemi. Mingjie chitima chikamukora chifukwa cha nkhaza izi, ntheura wakamba kupenja matchalitchi ghanyake mu chigaŵa chakwake. Ndicho chifukwa Mingjie wakalombanga kuti wasange mpingo waunenesko Wachikhristu.

Pakutoleka mtima na lusungu lwa Yanmei, Mingjie wakazomera kusambira Baibolo. Pamanyuma, Mingjie wakaluta kukawungana na Ŵakaboni ŵa Yehova kakwamba. Mingjie wakuti: “Nizamuluwapo yayi ivyo vikachitika ku maungano ghakwamba agho nkhalutako. Ŵabali na ŵadumbu wose ŵakanitawuzga mwachimwemwe. Ivi vikanikhwaska chomene. Nangauli nili wachibulumutira, nkhawona kuti ŵanthu aŵa ŵakutemwana zanadi.”

Mingjie wakalutilira kusambira ndipo wakamba kufika pa maungano nyengo zose. Wakakondwanga chomene kwimba sumu za Ufumu, kweni vikamusuzganga chifukwa chakuti pakaŵavya buku la sumu la vilembo vya ŵanthu ŵambura kuwona (braille). Ntheura na wovwiri wa mpingo, Mingjie wakapanga buku lake la sumu. Vikamutolera maora 22 kuti walembe sumu zose 151 mu vilembo vya ŵanthu ŵambura kuwona (braille)! Mu Epulero 2018, Mingjie wakamba kupharazgira ŵanthu ndipo pamanyuma wakamaliranga maora pafupifupi 30 mwezi uliwose kupharazga.

Pakukhumba kovwira Mingjie kunozgekera ubatizo, Yanmei wakajambura mafumbo kweniso mavesi gha mu Baibolo agho ghali mu buku la Ŵakunozgeka Kuchita Khumbo la Yehova. Mu Julayi 2018, Mingjie wakabatizika. Iyo wakuti: “Nkhakhwaskika chomene na chitemwa icho ŵabali na ŵadumbu ŵakanilongora pa ungano wa chigaŵa uwu. Nkhakondwa na kuthiska masozi chifukwa sono nkhaŵa mu mpingo waunenesko wa Chiuta.” (Yohane 13:34, 35) Sono Mingjie, pakukhumba kulongora chitemwa icho ŵanji ŵakamulongora, wakuteŵetera nga mupharazgi wanyengozose.