Ninjani Waponoskenge Charu Ichi?

Ŵanandi ŵakufipa mtima na vyakuchita vya ŵanthu ivyo vikunanga charu chapasi kweniso vyose ivyo vilimo. Kuyana na ivyo nkhwantha zinyake zasanga pa kafukufuku wawo, ivyo ŵanthu ŵakuchita pasono, vikuŵika pangozi umoyo wa vinthu vinandi kweniso wa vyamoyo vinyake ivyo vyakhala kale pachoko kumalirathu.

Kasi ŵanthu ŵanangirengethu charu? Panji ŵasinthenge na kwamba kuchita vinthu ivyo vikuleka kunanga chilengiwa?

Kasi ivyo ŵanthu ŵakuyezgayezga kuchita viphurenge kanthu?

Nkhwantha zinandi zili na chigomezgo chose kuti ŵanthu ŵangavikilira charu na kuleka kuchita vinthu ivyo vingananga chilengiwa. Apo ŵanyakeso awo ŵakuchita kafukufuku ŵakususka fundo iyi ndipo ŵakuti, pakwenera kusintha vinthu vinandi pa nyengo yimoza kuti ŵanthu ŵaleke kunanga charu. Vinthu ivyo vikwenera kusintha ni nga:

• Kusintha umo ŵanthu ŵakuchitira pakupwelelera charu, makuni, malo agho ghali na chinyezi chomene, kweniso nyanja.

• Kusanga nthowa zinyake za ulimi kweniso nthowa zakupangira nkhongono ya magesi.

• Kusintha nthowa zakupangira chakurya kweniso umo ŵanthu ŵangachisangira mwakuti ŵanthu ŵaryenge chomene vyakumera ndipo ŵachepeskeko kurya nyama na somba. Ivi viwovwirenge kuti ŵaryenge pachoko na kuleka kusakaza chakurya.

• Kuzomerezga fundo yakuti kuti munthu waŵe na umoyo uwemi vikuthemba pakuŵa na katundu munandi yayi.

Imwe mukuwona wuli? Kasi vingachitika kuti maboma, ŵamalonda, na ŵanthu, waliyose payekha, kuti ŵakolerane chimoza pa nkhani iyi? Panji mukuwona kuti vingachitika yayi chifukwa ŵanthu ŵanyake mbaryezi, ŵakujighanaghanira ŵekha, ndipo ŵalije navyo ntchito vya umo vinthu viŵirenge munthazi?—2 Timote 3:1-5.

Chifukwa chakuŵira na chigomezgo

Baibolo likutisimikizgira kuti kunthazi uku vinthu vizamuŵa makora mu charu. Likulongosora chifukwa icho ŵanthu paŵekha ŵangakwaniskira yayi kuponoska charu, ndipo likuyowoya mwakupulikikwa makora vinthu ivyo vikwenera kusintha nadi. Likutiphaliraso umo vizamwendera kuti vinthu visinthe.

Chifukwa icho ŵanthu paŵekha ŵangatondekera kuponoska charu. Yehovaa Chiuta wakalenga charu chapasi, ndipo wakapeleka ku ŵanthu udindo wa kuchipwelelera. (Genizesi 1:28; 2:15) Iwo ŵakatenge ŵakwaniskenge ntchito iyo ŵakapika ŵathembenge Mlengi wawo kuti waŵalongozge kweniso ŵapulikirenge malango ghake. (Zintharika 20:24) M’malo mwake, iwo ŵakakana kupulikira Yehova na kusankha kuti ŵajilongozgenge ŵekha. (Mupharazgi 7:29) Ŵanthu paŵekha ŵangafiska yayi kupwelelera charu, ndipo vichoko waka ivyo ŵakuyezga kuchita kuti ŵaponoske charu vikuya patali yayi.—Zintharika 21:30; Yeremiya 10:23.

Icho chikwenera kusintha. Chiuta wakukhumba kulekeska ŵanthu kunanga charu. (Chivumbuzi 11:18) Iyo wasinthenge maboma gha ŵanthu agho ghakunanga charu chapasi yayi, kweni waghafumiskengepo. (Chivumbuzi 21:1) Pa chifukwa ichi, Yehova wakuti: “Wonani! Nkhupanga vinthu vyose kuŵa viphya.”—Chivumbuzi 21:5.

Ivyo vizamuchitika kuti vinthu visinthe. Yehova wazamuwuskapo maboma gha ŵanthu na kuŵikapo boma lake lakuchanya ilo likuchemeka kuti Ufumu wa Chiuta. Boma ili, lizamuwusika na Yesu Khristu, ndipo lizamulamulira pa charu chose chapasi.—Daniyeli 2:44; Mateyu 6:10.

Ufumu wa Chiuta uzamusambizga ŵanthu kuti ŵenderenge fundo zaurunji za Chiuta. Para ŵanthu ŵazakamumanya makora Mlengi wawo na kulondezga malango ghake, chizamuŵa chipusu kuti ŵazakakhale makora kwambura kunanga chilengiwa. (Yesaya 11:9) Baibolo likulongosora umo boma la Chiuta lizamovwilira ŵanthu kuti ŵakhalenge umoyo uwemi, kwambura kunanga charu. Boma ili lizamuchita ivi:

• Kupeleka chakurya chakukwana ku ŵanthu wose.—Salimo 72:16.

• Kuwezgerapo vinthu ivyo vyanangika mu charu.—Yesaya 35:1, 2, 6, 7.

• Kuwoneseska kuti ŵanthu na vinyama ŵakukhala makora.—Yesaya 11:6-8; Hoseya 2:18.

• Kuwuskapo masoka gha chilengiwa.—Mariko 4:37-41.

Manyani kuti Ufumu wa Chiuta wizenge na vinthu vyose ivi sonosono apa. Kuti mumanye vinandi, ŵerengani nkhani ya mutu wakuti “Kasi Ufumu wa Chiuta Wambenge Pawuli Kulamulira pa Charu Chapasi?”