Kasi Fundo za mu Baibolo pa Nkhani ya Chiwemi na Chiheni Zichali Kugwira Ntchito?
Ŵanthu ŵanandi, kusazgapo na ŵanyake awo ŵakuti Mbakhristu, ŵakuwona kuti fundo ziwemi za mu Baibolo zakukhwaskana na kugonana na nthengwa zili kuleka kugwira ntchito. Matchalitchi ghanyake ghasintha ivyo ghakusambizga pa nkhani ya icho ntchiwemi panji chiheni kuti vikolerane na umo vinthu viliri mazuŵa ghano. Kasi fundo za mu Baibolo pa nkhani ya icho ntchiwemi na chiheni zichali kugwira ntchito mazuŵa ghano? Enya. Wonani vifukwa ivyo tikuyowoyera nthena.
Ŵanthu ŵakukhumbikwira fundo za Chiuta pa nkhani ya icho ntchiwemi na chiheni
Taŵanthu tili kulengeka kuti tilongozgekenge na Mlengi withu. Baibolo likuti: “Munthu uyo wakwenda wangalongozga yayi mendero ghake.” (Yeremiya 10:23) Nangauli Yehovaa Chiuta wali kutilenga munthowa yakuti tisankhenge tekha vinthu, kweni wandatipe mazaza panji nkhongono zakuti tidumurenge tekha pa nkhani ya icho ntchiheni panji chiwemi. Ntheura wakukhumba kuti tithembenge iyo.—Zintharika 3:5.
Mu Baibolo ndimo tikusanga fundo ziwemi izo tikwenera kulondezga zakufuma kwa Chiuta. Tiyeni tidumbiskane vifukwa viŵiri ivyo vikulongora kuti fundo izi ni zakuzirwa chomene.
Chiuta ndiyo wali kutilenga. (Salimo 100:3) Pakuŵa Mlengi withu, Yehova Chiuta wakumanya makora ivyo tikukhumbikwira nadi kuti tiŵe na umoyo uwemi mwauzimu na mwakuthupi kweniso kuti tiŵe ŵakukondwa. Iyo wakumanyaso masuzgo agho tingasangana nagho para tingaleka kulondezga fundo zake ziwemi. (Ŵagalatiya 6:7) Nakutiso Yehova wakukhumba kuti ise tiŵe na umoyo uwemi. Lekani Baibolo likulongosora kuti Chiuta ndiyo “wakumusambizgani kuti musange chandulo, uyo wakumulongozgani mu nthowa iyo mukwenera kwendamo.”—Yesaya 48:17.
Makhumbiro ghithu ghangatipuluska. Ŵanthu ŵanandi ŵakuwona kuti ŵangasankha ŵekha icho ntchiwemi panji chiheni mwakulondezga waka ivyo mtima wawo ukukhumba. Kweni Baibolo likuti “mtima nguryarya kuluska chilichose, nguheni wambura kukoleka.” (Yeremiya 17:9) Para mtima withu ukulongozgeka na vinjeru vya Chiuta yayi, ungatipangiska kuchita vinthu ivyo pamanyuma tingazakadandawura navyo.—Zintharika 28:26; Mupharazgi 10:2.
Kasi ŵalongozgi ŵavisopa ŵakwenera kusulako waka ivyo Baibolo likuyowoya pa nkhani ya icho ntchiheni panji chiwemi?
Yayi! Baibolo likusambizga unenesko wakukhwaskana na Chiuta kweniso makhaliro agho wakukhumba kuti ise tiŵe nayo. (1 Ŵakorinte 6:9-11; Ŵagalatiya 5:19-23) Iyo wakukhumba kuti ŵanthu ŵamanye makora unenesko. (1 Timote 2:3, 4) Ntheura, ŵalongozgi ŵa matchalitchi gha Chikhristu ŵakwenera kusambizga ŵanthu ivyo Mazgu gha Chiuta ghakuyowoya.—Tito 1:7-9.
Ŵanthu ŵanandi ŵakukhumba yayi kupulikira fundo ziwemi izo zili mu Baibolo, m’malo mwake ŵakuluta ku ŵalongozgi ŵa matchalitchi kuti “ŵaŵaphalire ivyo ŵakukhumba kupulika nakale.” (2 Timote 4:3, mazgu ghamusi) Kweni Mazgu gha Chiuta ghakutichenjezga kuti: “Soka ku awo ŵakuyowoya kuti uwemi ndiwo uheni, uheni ndiwo uwemi.” (Yesaya 5:20) Ntheura ntchakuwonekerathu kuti Chiuta wazamweruzga ŵalongozgi ŵa matchalitchi awo ŵakuŵasambizga yayi ŵanthu ivyo Chiuta wakuyowoya pa nkhani ya icho ntchiheni na chiwemi.
Kasi fundo za mu Baibolo zikuchiska ŵanthu kuti ŵaleke kupulika vya ŵanyawo?
Yayi. Awo ŵakukhumba kukondweska Chiuta ŵakulondezga chiyelezgero cha Yesu Khristu na ivyo wakasambizganga. Yesu wakasambizga awo ŵakamulondezganga kuti ŵakwenera yayi kweruzga ŵanji m’malo mwake ŵakwenera kuŵatemwa na kuŵapa ntchindi ŵanthu wose.—Mateyu 5:43, 44; 7:1.
Yesu wakasambizga ŵalondezgi ŵake kuti ŵagwiliskirenge ntchito fundo za Chiuta pa umoyo wawo. Ndipouli, wakaŵasambizgaso kuti ŵakwenera kuzomerezga fundo yakuti ŵanthu ŵanyake ŵangasankha fundo izo ŵangakhumba kuzilondezga pa umoyo wawo. (Mateyu 10:14) Yesu wakaŵazomerezgapo yayi ŵasambiri ŵake kuti ŵagwiliskirenge ntchito ndyali panji nthowa yinyake yiliyose kuti ŵachichizge ŵanyawo kupulikira fundo za Chiuta.—Yohane 17:14, 16; 18:36.
Kasi pali uwemi wuli para tikugwiliskira ntchito fundo za mu Baibolo pa umoyo withu?
Wose awo ŵakuyezgayezga kulondezga fundo za Chiuta pa nkhani ya icho ntchiwemi na chiheni ŵakuŵa ŵakukondwa sono ndiposo kunthazi ŵazamutumbikika chomene. (Salimo 19:8, 11) Wonani vinyake mwa vitumbiko ivyo ŵakusanga:
a Yehova ni zina la Chiuta nga umo Baibolo likuyowoyera.—Salimo 83:18.