Tingagomezga Baibolo Pakusankha Chiwemi na Chiheni
Para tasankha vinthu kuyana na umo ise panji ŵanyithu ŵakujipulikira, tingasimikizga yayi kuti ivyo tasankha vitiyenderenge makora. Baibolo likulongosora chifukwa chake, kweniso muli ulongozgi unandi. Mu Baibolo muli ulongozgi wakugomezgeka uwo ungatovwira kusankha pakati pa chiwemi na chiheni, ndipo ivi vikutovwira kuti tiŵe ŵakukondwa.
TIKUKHUMBIKWIRA ULONGOZGI WAKUFUMA KWA CHIUTA
Baibolo likulongosora kuti Yehovaa Chiuta, wakalenga ŵanthu kuti ŵajilongozgenge ŵekha yayi, nakuti munthu wangajilongozga yayi yekha. (Yeremiya 10:23) Lekani watipa Baibolo, ilo muli fundo zakuti zitilongozgenge. Iyo wakutemwa chomene ŵanthu. Lekani wakukhumba yayi kuti tisangane na masuzgo, chifukwa cha kusankha vinthu mwambura mahara kutolera waka umo ise panji ŵanyithu ŵakujipulikira. (Dotoronome 5:29; 1 Yohane 4:8) Kweni fundo yakuzirwa chomene njakuti, Yehova pakuŵa Mlengi ndiyo wangatipa ulongozgi uwemi chomene, chifukwa wali na vinjeru kweniso wakumanya vinthu vinandi. (Salimo 100:3; 104:24) Kweni Chiuta wakuchichizga waliyose yayi kuti wenderenge fundo zake.
Mwachiyelezgero, Yehova wakapa Adamu na Eva, chilichose icho ŵakakhumbikwiranga kuti ŵaŵe ŵakukondwa. (Genizesi 1:28, 29; 2:8, 15) Wakaŵapaso ulongozgi upusu waka ndipo wakakhazganga kuti ŵawupulikirenge. Nakuti Yehova wakaŵapa wanangwa wa kusankha kupulikira panji yayi. (Genizesi 2:9, 16, 17) Kweni chachitima ntchakuti, Adamu na Eva ŵakasankha kwendera maghanoghano ghawo m’malo mwa kwendera fundo za Chiuta. (Genizesi 3:6) Kasi chili kuchitika ntchivichi? Kasi pasono ŵanthu ŵakukondwa chifukwa chakuti ŵakujisankhira ŵekha vinthu? Napachoko pose. Kufuma kale, para ŵanthu ŵakana kwendera fundo za Yehova, ŵakuŵa pamtende yayi ndipo ŵakukondwaso yayi.—Mupharazgi 8:9.
Baibolo likupeleka ulongozgi uwemi uwo ungatovwira kuti tisankhenge vinthu mwamahara. Ulongozgi uwu ungawovwira munthu waliyose, mwambura kupwelerako uko wakukhala panji mbumba iyo wali kukulira. (2 Timote 3:16, 17; wonani bokosi lakuti “Buku la Ŵanthu Wose.”) Wonani umo Baibolo likutovwilira.
Wonani chifukwa icho Baibolo likuyowoyekera kuti ni “mazgu gha Chiuta.”—1 Ŵatesalonika 2:13. Wonelerani vidiyo ya mutu wakuti Kasi Baibolo Ni Mazgu gha Njani? pa jw.org.
BAIBOLO LIKUTIPHALIRA IVYO CHIUTA WAKUKHUMBA
Baibolo likutiphalira umo Yehova wakuchitira vinthu na ŵanthu kwamba kale. Ivyo likuyowoya vikutovwira kupulikiska icho Chiuta wakuchiwona kuti ntchiwemi na chiheni, icho chingatovwira na icho chingatipweteka. (Salimo 19:7, 11) Ulongozgi wake ngwakovwira nyengo zose ndipo ukusintha yayi. Ukutovwira kuti tisankhenge vinthu mwamahara pa umoyo withu wa zuŵa na zuŵa.
Mwachiyelezgero, wonani ulongozgi uwo ukusangika pa Zintharika 13:20: “Uyo wakwenda na ŵavinjeru waŵenge wavinjeru, kweni uyo wakuchita vinthu pamoza na vindere wapwetekekenge.” Ulongozgi uwu uchali wakovwira mazuŵa ghano nga umo vikaŵira mu nyengo yakale. Mu Baibolo muli ulongozgi unandi wanthena uwu, kweniso muli fundo zinandi zakovwira.—Wonani bokosi lakuti “Vinjeru vya mu Baibolo Vichali Vyakovwira.”
Panji mungajifumba kuti, ‘Kasi ningamanya wuli usange ulongozgi uwo wuli mu Baibolo unganovwira nadi?’ Nkhani yakulondezgapo yikulongosora umo ulongozgi wa mu Baibolo wawovwilirapo ŵanthu ŵanyake.
a Yehova ni zina leneko la Chiuta.—Salimo 83:18.